TBP Balochi

بلوچستان لبریشن فرنٹ ءَ کولواہ ءَ پاکستانی پوج ءِ ھشت کارندھانی کوش ءِ زمہ واری منّ اِتگ-

بلوچستان لبریشن فرنٹ ءِ جارکش میجر گْوھرام بلوچ ءَ پاکستانی پوج ءِ سر ءَ بوتگیں اُرش ءِ زمہ واری منّ اِتگ ءُ گْوشتگ کہ گوستگیں روچ ءَ ھشت فروری ءَ سُھب ءِ بانگواہ ءَ ساھت ھپت ءَ سرمچاراں کیچ ءِ دمگ ڈنڈار ڈل بازار ءَ پاکستانی پوج ءِ کاروان سر ءَ پیسر ءَ بستگ ءُ ودار ءَ بوتگیں ھمے وھد ءَ دومی نیمگ ءَ چہ دُژمن فوج سرمچارانی سر ءَ اُرش کتگ-

جارکش ءَ گْوشتگ کہ اُرش پد یک دْراجیں میڑے بندات بوتگ تانکہ شش کلاک ءَ برجاہ بوتگ-

آئی ءَ گْوشتگ کہ پاکستانی پوج ءِ کُمک ءِ ھاتر ءَ چار بالگرد جنگجاہ ءَ سر بوتگ اَنت بلے سرمچاراں جوانیں چیر جنگی ھُنراں چہ پاکستانی پوج پُشت کنزینتگ- میڑ ءَ پاکستانی پوج ءِ ھشت کارندہ مرتگ ءُ بازین ئِے ٹپی بوتگ اَنت- اے اُرش ءَ مارا بلوچ نیشنل آرمی ( بی این اے) کُمک گون بوتگ-

میجر گْوھرام بلوچ ءَ گْوشتگ کہ اے اُرش داں بلوچستان ءِ وتواجھی ءَ برجاہ بنت-

پدائی

نبشتہ کار: اسد ابدال

دی بلوچستان پوسٹ

پِدائی چی یے، پِدا بوھوک کَے اِنت ءُ پرچا پدا بیت، آیا پدائی کنگ شر اِنت؟ مئے چاگرد ناں بلکیں سرجمیں جھان ءَ بازیں بنیادم ءِ پکر لھتے انچیں جُست ءُ ھیالاں گوں بندوک اِنت پمیشکا کسے نیکراھی ءِ درور ءَ دنت ءُ ھمے گوش ایت کہ پِدائی کنگ گناہ اِنت آ کہ مر ایت سَکَٹ اِنت ءُ دوزہ ءَ رَوت پرچا کہ بزاں آ وتکُشی کنگ ءَ اِنت ءُ وتکُشی ءِ موہ ھُدا ءَ نہ داتگ، کسے وت ءَ را انسانیت ءِ مستریں نمونہ سرپد بیت ءُ ھمے گوش ایت اے کہ پدائی کن اَنت اشانی زَد ءَ دگہ بازیں بے گُناہ ھم کیت گوں بے گناہ ءِ جنَگ جوانیں کردے نہ اِنت، بزاں بازیں مردم گوں ھمے دابیں گالاں پداھیناں رَد گوشگ ءُ سابت کنگ ءِ جُھد ءَ کن اَنت بلے من ھمے گوش اں دنیا ءِ کِرّ ءُ گوراں بازیں گَلّانی نیمگ ءَ پدائی کنگ بیت ھیر ھر کسی وتی وتی مول ءُ مراد اَنت بلے من بلوچ پداھینانی گپ ءَ کناں کہ ھپتاد سال ءَ گیش اِنت کہ ناپاک ریاست ءِ زُلمانی دیمپان اَنت ءُ وتی ھون ءَ وڑے نہ وڑے ریچان ءُ پیداک انت-

گوں ھورت ھورت ءَ پِدائی ءِ دل ءَ چمشانک بدئے ءُ بہ چار تاں ترا پدائی ءِ دل ءَ ھمے ندارگ گندگ ءَ کیت کہ آئی ءِ مات بدواھانی دست ءَ بندیگ اِنت ءُ دمان پہ دمان بے آبرو کنگ بوگ ءَ اِنت، پِدائی ءِ دل ءَ ندارگ کن آئی ءِ گُوھار ءِ مُرتگیں جون بے پُچ ءُ کپن ءَ برھنگ ءَ ڈَن ءِ سر ءَ کپتگ کہ ھمے بدواہ ءِ زوراکیانی برورد اِنت، پِدائی ءِ دل ءَ ندارگ کن تَاں ھمے گندئے آئی ءِ برات بدواہ ءَ آوار جتگ ءُ کرنانی کرن گوستگ اَنت بلے انگت آ برات ءِ ھچ ھال ءُ بود نیست کہ باریں کجام ھال ءَ اِنت زندگ اِنت یا مُرتگ برات ءِ بیگواھی ءِ ھمے پیمیں جیڑگانی آس ءَ پِدائی ھمک دمان سُچگ ءَ اِنت-

پِدائی ءِ دل ءَ ندارگ کن تَاں ھمے گندئے کہ آئی ءِ سرجمیں لوگ ءُ جاگہ مال ءُ مَڈی بدواہ ءَ مانداشتگ اَنت پہ تپلیں زھگاں سر ءِ چیر دیَگ ءَ تُشے جاہ ھم پَشت نہ کپتگ برے اے دیم ءَ برے آ دیم ءَ در پہ در اَنت، پِدائی ءِ دل ءَ ندارگ کن چہ درد ءُ رنج ءُ زند ءِ تھنائی ءَ ابید دگہ ھچ نہ گندئے ءُ آئی ءِ زند ءِ وشی ءُ شادمانیانی روچ بدواہ ءَ گوں رنج ءُ اندوھاں بدل کرتگ اَنت ءُ واھِش مانداشتگ اَنت-

گڑا چریشی ءَ مستریں دوزہ دگہ کجام بوت کنت کہ کسے چہ دومی دوزہ ءَ رَکّگ ءِ جُھد ءَ بہ کنت ءُ جنّت ءِ مُراھیگ بہ بیت یک بنیادمے کہ آئی ءِ گوم ءَ وڑ وڑیں نارواھی بوگ ءَ اِنت ھما نا رواھی کہ آ بابت ءَ گوشگ ءَ گال ھم نیست ءُ نارواھی ءِ پُشت ءَ نارواھی ءُ پد ءَ چُشیں زوراوریں بدواہ ءِ زوراکیانی دیم ءَ وتی بے وسی ءِ مارگ ءَ پَد گیرت مند ءِ واست ءَ بس یکیں راہ پَشت کپیت پِدائی، اے وَ پدّریں ھبرے کہ دشمن ریاست ءِ اینچو جنگی اوزارانی دیم سِنگ ءُ ڈوکانی گوم ءَ دارگ نہ بیت ءُ یا کہ تھنا کلاشنکوپے گوم ءَ دارگ نہ بیت بلکیں اے چیز واست ءَ وتی دل چو سِنگ ءَ ءُ وتی جند کلاشنکوپے کنگی کپ اِیت، وتی جند یک ٹوپے کنگ کپ ایت، وتی جند یک تیرے جاھے ءَ کارمرز کنگ کپ ایت اے جنگ ءِ یک بھرے، انچو گُش اَنت کہ اِشک ءُ جنگ ءِ تہ ءَ درست جائز اِنت من ھچبر نہ گوش آں کہ بے گناھانی جنگ شر اِنت بلے اینچو گوش آں چو کہ بلوچ جُھدکار اینچو پھریز ءِ گوم ءَ وتی کاراں کنگ ءَ اَنت کہ بے گناھاں ھچ تاوان مہ رس ایت انچوشکہ نوشکی ءُ پنجگور ءِ بُنجل کہ بلوچ پداھیناں انگِرّاں کتگ اِت اَنت اے وھداں بُنجلانی تہ ءَ دشمن ءِ ساڑی ئیں چُک ءُ زالبول بلوچ پداھیناں ھچ کار نہ داشتگ اَنت گوں شرپ ءُ اھترام پہ درایگ ءَ راہ شونداتگ اَنت پرچا کہ پکر ھمیش اِنت ابید چہ دشمن ءَ دگہ بے گناہ زَد ءَ مئیت بلے کَزا ءَ کَس رَزا دات نہ کنت-

گُڈسر ءَ من ھمےگْوش آں کہ جنّت آئی ءَ ھم نہ رس ایت کہ بس پنچ وھد ءِ نمازاں وان ایت ءُ دنیا ءِ دگہ ھرچ ھال ءَ نا سھیگ اِنت ءُ وتی چاگرد ءِ ھچ جیڑہ ءَ شریں آسرے ءَ سر کنگ ءِ ھاٹیگ ءَ نہ داریت، ھُدا ءَ نہ گوشتگ کہ تھنا وتی جیڑھانی سر ءَ بہ جیڑ اِناں بلکیں ھرچ ھما جیڑہ کہ تئی راج ءُ انسانیت ءِ جیڑہ اِنت آئی ءَ وتی جیڑہ بہ زان ءُ ھما داب ءَ وتی کساس ءَ جیڑہ ءَ ھلاس کنگ ءِ جُھد ءَ بہ کن زوراک ءِ دیم ءَ جُکّگ ءُ زوراکی سگّگ وت مستریں زوراکی اِنت، راجدپتر گواہ اِنت ھر وھد ءَ کہ بے وسیں راجانی سر ءَ زُلم ءُ زوراکی کنگ بوتگ گڑا آ راج ءِ باجبری ءِ مستریں سوَب ھمے بوتگ کہ آھانی کرا جنگی اوزار کہ نہ بوتگ گڑا آھاں وتی جند جنگی اوزار جوڑ کتگ ءُ دیم پہ زالم ءَ کپتگ اَنت بزاں پدائی کتگ ءُ بلاہ بلاھیں تاکت اِش پروش داتگ اَنت ءُ تاں وتی گُلزمین چہ زالم ءُ زوراکانی دست ءَ رکّینتگ ءُ مرچی ھما زُلمانی دیمپانیں راج گوں ھمے پیم کنگ ءَ آجوئی ءُ وتواجھی ءِ ماڑی ءَ نشتگ اَنت ءُ ایمنی ءِ بنگ ءَ نوش کنگ ءَ اَنت، ءُ اے منی ایمان اِنت کہ ھمے پیم یک روچے مئے بلوچ راج ھم آجو بیت ءُ وتی گُلزمین ءِ واھُند وت بیت ءُ الّم ایمنی ءِ بنگ ءَ نوش کنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

گوستگیں لھتے روچانی تہ ءَ بلوچستان ءِ جتا جتائیں دمگاں بازیں کچے ءَ پاکستانی پوج ءِ دست ءَ مردمانی بیگواھی ءِ ھال یکشل ءَ پیداک اَنت –

پنجگور ءَ یک مردمے پوج ءِ دست ءَ آوار جنگ ءَ پد بیگواہ کنگ بیتگ ءُ گوستگیں سال ءِ گڈسر ءَ آوار جنگ بیتگیں ودود ساتکزئی مروچی یل کنگ بیتگ-

سر بیتگیں ھالانی رد ءَ گوستگیں شپ ءَ پاکستانی پوج ءُ چیریں ادارھانی کارمنداں پنجگور بونستان ءِ ھند مرغوڈن ءَ بیڑ برتگ ءُ یحیٰ رئیس ء ھاجی مقبول اھمد جھمنند مرغو ڈن بونستان آوار جتگ ءُ پھمیانیں جاھے ءَ برتگ –

کھول ءِ رد ءَ گوستگیں شپ ءِ نھنگام ءَ پوج ءُ دمگی چیریں ادارھانی ھواری ءَ بیڑ برتگ ءُ اود ءَ آوار جنگ بیتگیں مردم پجار کنگ ءَ پد گوں وت برتگ ءُ پد ءَ آئی ءِ درگت ءَ ھچ ھال نیست اِنت-

دمگء مردمانی رد ءَ اے مرد ایران ءِ سیمسراں تیل ءِ باپاری ءَ بیتگ-

زانگ بہ بیت گوستگیں لھتے روچانی تہ ءَ پنجگور ءَ بازیں کچے ءَ مردم گرگ بیتگ اَنت کہ اشانی تہ ءَ نُھ کسانی پجار بیتگ اَنت-

ھمے وڑ ءَ گوستگیں سال ءَ شال ءَ آوار جنگ بیتگیں ودود ساتکزئی یل بیتگ ءُ وتی لوگ ءَ سر بیتگ-

ودود ساتکزئی ءِ گوھار گل زادی ءَ وتی ٹوئٹر تندجاہ ءَ اے ھال راست کرتگ ءُ گوشتگ کہ منی برات ودود ساتکزئی یل کنگ بیتگ ءُ وتی لوگ ءَ سر بیتگ –

گل زادی ءَ وتی ٹوئٹ ءِ تہ ءَ آئی ءِ برات ءِ یل کنائینگ ءَ جھد کنوکیں دراھیں مردمانی منت گپتگ ءُ سرکار ءَ ھمے دزبندی کرتگ ءُ گوشتگ اُمیت اِنت دراھیں بندیگاں یل کنت ءُ ھمک گوھار ءِ دل ءِ بستگیں لھڑ آسر بنت ءُ شاتمانی بنت-

پد ءَ واتر کایاں

نبشتہ کار: ناسر امام

دی بلوچستان پوسٹ

پہ آئی ءِ واستا اے چوں ارزان نہ اَت کہ آ وتی وانگ، وتی سنگت وتی ھلک ءُ دمگ ءُ وتی مردماں یل بکنت ءُ چہ آنگو در بہ کپ ایت بلے آئی ءِ زند یک انچیں سیمسرے ءَ سر اَت کہ آئی ءَ اے درست یل کنگی اِت اَنت ءُ دیم پہ یک کشکے ءَ در کپگی اَت۔ آئی ءَ پنچ ماہ ءَ بُرز اَت کہ اے پیسلھے کتگ اَت ئِے کہ آئی ءَ را چہ اِد ءَ چے روگ لوٹ ایت بلئے جاور ھمے رنگ اِت اَنت کہ آئی ءِ روگ چو جلدی نہ بوت آرا ھما سنگت ءِ نمبر شوھاز کنگی اَت کہ آرا چہ اود ءَ در بکنت نمبر ءِ شوھاز ءَ کنگ ءَ پد آ وتی سرجمیں ھال ءُ کسہ گوں سنگت ءَ کت اَنت ، سنگت ءَ پسو داتگ ات ھمے گشتگ ات ئِے کمے ودار بکن بلئے آئی ءِ جاور ھمے رنگ ءَ اِت اَنت کہ آئی ءِ گون ءَ گیش ودار نہ بوت آئی ءَ سنگت‌ ءَ را ھمے گشت کہ ھمینچو زوت بوت کنت من ءَ چہ اِد ءَ بہ بر چندے روچ ءِ گوزگ ءَ پد سنگت ءَ ھال کُت ءُ گشت ئِے کہ وت ءَ تیار بکن پِلان روچ ءَ ءُ پِلان جاہ ءَ برو سنگتے ترا دست گیپت آئی ءَ وتی جند گیگ ءُ گور کت ھما چیز کہ آرا زورگی ات انت آئی ءِ گوں وت زرت انت ءُ چہ لوگ ءَ درکپت دگہ جاگھے ایر کت انت-

آرا وتی وانگجاہ، گوں وتی سنگت ءُ مردماں ھما گڈی روچے گڈی دیوان انگت یاد اِت اَنت ھما گڈی روچ ءَ کہ آئی ءَ وت ءَ را زوت وانگجاہ ءَ سر کت کہ مرچی اد ءَ آئی ءِ گُڈی روچ اَت
اے روچ ءَ انچو کہ آئی ءَ وتی پاد وانگجاہ ءِ کمپان ءِ تہ ءَ ایر کت انت کہ کلیں چیز ھما پیشیگیں رنگ ءَ اِت انت ھر کس گوں وتی کار ءِ سر ءُ پیٹال اَت بلئے آ جوانی ءَ سرپد اَت کہ آئی ءِ وانگجاہ ءُ گوں وتی وانگجاہ ءِ سنگتانی گوما گڈی روچ اِنت آئی ءَ وتی بیگ کلاس روم ءِ تھ ءَ ایر کُت ءُ وت کلاس روم ءِ دیمی نیمگ ءَ نِشت ھمے دمان ءَ آرا وتی ھما کلیں ساھت یات آتک انت کہ آئی ءَ گوں وتی وانگجاہ ءَ گوازینتگ ات انت آئی ءَ را ھما بنداتی روچ بگر داں ھما ساھت کہ آ گوازینگ ءَ ات آئی ءِ دیم ءَ چو درچکے ءَ میلانک ات اَنت ھمے دمان ءَ کہ جیڑ ات کہ آ منی بنداتی روچ بوتگ انت اے منی ءِ گڈی روچ اِنت آئی ءَ وتی وانگجاہ ءِ اسٹیج ءَ بگر دانکہ کلاس ءِ دریگ ءُ پٹ شریں رنگے ءَ چار ات انت دگہ باریں کجام چیزانی جیڑگ ءِ آماچ اَت آنگہ ءَ آئی ءِ کوپگ ءِ سر ءَ یکے ءَ وتی دست ایر کت انچو کہ آئی ءَ وتی دیم چکرینت ءُ چار اِت کہ سنگت میرک اِنت آ پاد اَھت ءُ یکے دومی ءَ را امبازاں زرت ءُ دروت دراھبات کت، بچکند اِت ئِے میرک ھمے جُست کُت کہ مرچی تو سک زوت آتکگ ئے گڑا آئی ءَ پسو دات ھؤ کہ مرچی من چہ لوگ ءَ زوت گیشتگ آں بلئے میرک ھچ سرپد نہ اَت آوانی گڈی دیدار انت آئی ءَ لوٹ اِت کہ مرچی گوں کلیں سنگتاں یک برے الم دوچار بہ کپ آں بلئے کم کم ءَ آ گوں باز سنگت ءَ دوچار کپت اے روچ ءَ آئی ءَ وتی کلیں سنگت امبازاں زرت اَنت چونائی ءَ ھر وھد ءَ ھمے کہ وانگ ھلاس بوت آ زوتاں چہ زوت لوگ ءَ شُت بلئے آ روچ ءَ کہ وانگ ھلاس بوت آ وانگجاہ ءِ دپ ءَ اوشتات ءُ گوں سک باز سنگتاں ڈیک وارت ئِے پرچہ کہ آئی ءَ زانت کہ باریں دوبر گوں اے سنگتاں دوچار کپگ بیت یا ناں وھدے کہ آ وتی پرپٹ ءَ سوار بوت گڈی وھد ءَ آئی ءَ وتی چم دیم پہ وانگجاہ ءَ شانک دات انت آئی ءِ چم پہ سنگتے ءَ کپت اَنت کہ آ سنگت ھم آئی ءَ چارگ ءَ اَت گڈسر ءَ آئی ءَ وتی دست سُرینت ءُ سنگت رُکست کت ءُ دیم پہ لوگ ءَ شُت ھما شپ اَت کہ نوں آرا باندا در کپگی اَت آئی ءَ وتی نزیکیں مھروانیں سنگتے ءِ کر ءَ شت ءُ ھمے گشت ئِے کہ ترا باندا اَلّم وتی پرپٹ زورگی انت ءُ سهب ءِ سر ءَ زوت مئے میتگ ءِ دیمی نیمگ ءَ پلان جاھ ءَ آیگ لوٹ ایت آئی ءِ سنگت ءَ ھمے جست کت چے ءَ ترا زاناں چونیں کارے ھست ؟ آئی ءَ سنگت ءِ دست زرت ءُ وتی دست ءَ کت ءُ ھمے پسّو دات کہ باندا الّم بیا ترا ھمود ءَ گش آں۔

آئی ءَ سنگت ءَ را رکست کت ءُ دیم پہ لوگ ءَ شُت لوگ ءِ رسگ ءَ گوں شام ئِے کت ءُ وتی بیگ زُرت ءُ وتی کوٹی ءَ شت کوٹی ءِ دروازگ ءِ تہ ءَ چہ بند کت آ جوانی ءَ سرپد اَت کہ اے آئی ءِ گُڈی شپ اِنت گوں اے شھر تھاریں شپ ءُ گوں ابیتکیں کوٹی ءَ آئی ءَ بیگ ءِ تھ ءَ چہ تاک ءُ ندے در کت کہ چیزے بہ نویساں ھمے جیڑان ءُ نبشتہ کنان ات آئی دیم ءَ ھما چیز میلانک ات انت کہ آئی ءِ زند ءِ ھما ھشتیں سالانی تھ ءَ کہ آئی ءَ اے شھر ءُ دمگاں گوازینتگ اِتاں آئی ءَ ھمک ھما چیز یات اَتک کہ گوں آئی ءِ زند ءَ بندوک اِت اَنت وڑے نہ وڑے ءَ آئی ءِ دوست ءُ ھمبلانی ھما نند ءُ نیاد کہ آ مدام یک جاہ اِت اَنت ءُ مدام آوانی دپ چہ کندگ ءَ پُر اِت اَنت وانگجاہ ءِ سنگتانی گوما ھما ساھت کہ وانگجاہ ءَ گوازینتگ اَت انت ئِے استادانی داتگیں درس ءُ سبک، مردمانی مردم گری، اے میتگ ءُ اے میتگ ءِ وش چکیں ندارگ ھمے دمان ءَ آئی ءَ جیڑ اِت کہ منی آوکیں باندات ءَ چہ اے سرجمیں چیزاں گستاہ باں ھمد ءَ آئی ءَ وت ءَ را وت ھمے جست کت کہ من چہ اے سرجمیں چیزاں چے ءَ اے پیم گستا بوت کن آں؟ ھمے جیڑگانی تھ ءَ آئی ءَ را ھما کشک ھما سپر ھما پند یات آتک ءُ آئی ءَ وتی جست ءِ پسو وت دات کہ من کت کناں من ءَ الم کنگ لوٹ ایت۔

آئی ءَ ند ءُ تاک ماں وتی پشک ءِ کیسگ ءَ مان کت ءُ سر ماں بالشت ءِ سر ءَ ایر کت ھمے دمان ءَ ھما سنگت کہ آئی ءَ درجتگ ات شوھاز کتگ ات آئی ءَ میسجے دیم داتگ ات ءُ گوشتگ ات ئِے من تئی نمبر دیم ءِ سنگت ءَ را داتگ آ ترا سھب ءَ ھال کنت آئی ھمے پسو دات کہ ودار انت آ سھب ءَ زوت پاد آتک ھمے ودار ءَ نشت کہ کدی من ءَ آ سنگت ھال کنت لھتیں دمان ءِ گوزگ ءَ پد سنگت ءَ گوانک جت گشت ئِے کہ یک کلاکے ءَ رند ترا پلان جاھ ءَ آیگ لوٹ ایت آئی ءَ پسو دات جوان انت آئی ءَ وتی ھما مھروانیں سنگت ءَ را ھال کت ءُ گشت کہ زوت پرپٹ ءَ بزور ءُ بیا گڑا دیر بیت مھروان ءَ لھتیں دمان ءِ گوازگ ءَ پد آئی ءَ مھروان ءَ ھمے  گشت کہ من وَ  تئی گشتگیں جاہ ءَ ساڑی آں آ زوت چہ لوگ ءَ در کپت ھما چیز کہ آئی ءِ جاگھے ایر کتگ انت گوں وت زرت انت ءُ دیم پہ سنگت ءِ کر ءَ شت پرپٹ ءَ سوار بوت ءُ دیم پہ دومی سنگت راہ کپت انت ھمد ءَ آئی ءَ را مھروانیں سنگت ءَ جست کت کہ تو بگش کہ تو کجا روگ ءَ ئے؟ آئی ءَ بچکند اِت ءُ گشت کہ من مرچی چہ اے شھر ءَ دور روگ ءَ آں سنگت ھیران بوت ءُ گشت ئِے تو زاناں کجا روگ ءَ ئے ؟ آئی ءَ پسو دات کہ نزاناں بس دیم پہ یک سرجمیں کشکے ءَ سر گپتگ آں مھروان ءَ پد ءَ جست کت گڑا کدیں واتر کن ئے؟ آئی ءَ پسوئِے دات نزاناں باریں واتر آیگ بیت یا ناں مھروان ءَ کند اِت ءُ گشت یار مزاک مکن آئی ءَ گشت من مزاک ءَ نہ آں مھروان ءَ جست کت بلئے چے ءَ تو روگ لوٹ ئے ترا زاناں اے شھر وش نہ بیت؟ آئی گشت من ءَ وَ اے شھر چہ وتی ساہ ءَ گیش دوست انت-

بلئے وھد ءُ جاور ھمے رنگ ءَ انت کہ من جل اِت نکن آں، گوں ھمے گپ ءَ مھروانیں سنگت ءَ را ھاموشی ءَ مانشان اتگ ات ءُ ھچ ئِے نہ گشت آ دوئیں ھما سنگت ءِ جاھ ءَ سر بوت انت دروت دراھبات ئِے اش کرت ءُ دیم ءِ سنگت ءَ گشت کہ زوت کن کہ مارا در کپگ لوٹ ایت کہ مئے سپر سک باز دراج اِنت آئی ءَ وتی مھروانیں سنگت امبازاں زرت ءُ ارساں آئی ءِ چمانی توک ءَ وت را داشت نہ کت آئی ءَ وتی کیسگ ءَ تاکے در کت ءُ مھروانیں سنگت ءِ کیسگ ءَ دات ءُ گشت ئِے ھر وھد ءَ کہ تو اے جیڑے کہ من دوبر واتر باں یا ناں گڑا ھمے تاک ءَ بوان گڈسر ءَ آئی ءَ گوں گیمرتگیں توار ءَ گشت کہ اگاں زند ءَ وپا کت پد ءَ واتر کایاں، مھروان ءَ گشت الّم آ ءُ دوئیں درکپت انت پہ وتی منزل ءِ نیمگ ءَ آئی ءِ چم شانک دات انت داں آئی ءِ مھروانیں سنگت ھمود ءَ جل اتگ ات وانگ ءُ، سنگت ءُ مھلوک، ھما شھر ءُ دمگ کہ اود ءَ آئی ءِ زند ءِ ھزاراں کسہ انگت ھمائی ءِ دل ءَ نکش ات انت آ انگت ھمود ءَ جل اتگ ات انت آئی ءَ مھروانیں اَرواہ اے درس یل کت اَنت ءُ باریں دیم پہ چونیں منزلے ءَ در کپت لھتیں روچ ءَ پد آ وتی منزل ءَ سر بوت اود ءَ سر بوگ ءَ وتی گوانکوے پچ کت داں کہ مھروانیں سنگت ءِ کلوھے آتکگ اَت ءُ ھمے گشتگ ئِے “من داں وتی زند ءَ تئی ھما گپ ءَ شموشت نکن آں کہ تو گُڈی وھد ءَ گشتگ اَت اگاں زند ءَ وپا کت پد ءَ واتر کایاں آئی ءَ مھروان ءَ را پسو دات کہ کسہ انگت نا سرجم انت بلئے مرچی یک کَرنے گوستگ ات آ انگت واتر نہ آتکگ اَت نوں مھروان ھم زانت کہ آ ھچبر واتر نئیت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ کیچ ءَ ناشناسیں سلاہ بندیں مردماں پاکستانی پوج ءِ چوکی ءِ سر ءَ اُرش کرتگ –

اُرش کیچ ءِ دمگ زامران ءَ بیتگ – ھالانی تہ ءَ گوشگ بیتگ اے اُرش ءَ پوج ءَ جانی تاوانانی دیمپانی کنگ کپتگ بلے اشی ءِ راستیں ھال دیم ءَ نیتکگ اَنت-

زانگ بہ بیت اے دمگ ءَ بلوچ آجوئی دوستیں سلاہ بندیں گل پُرکار اَنت بلے تنی وھدی اے اُرش ءِ زمہ واری کس ءَ نہ زرتگ-

سربوتگیں ھالانی بلوچستان ءِ دمگ نوشکی، پنجگور ھزدار ءُ تربت ءَ چہ پاکستانی پوج ءَ ھشت مردم زورانسری آوار جتگ ءُ بیگواہ کُتگ اَنت –

گیشیں ھالانی رِد ءَ بلوچستان ءِ دمگ کیچ ءِ بنجاھی شھر چہ تربت ءَ پاکستانی پوج ءَ نودربر رھشون ءُ بی ایس او ءِ بنجاھی سیکٹرٹری جنرل ءِ برات ءُ چہ پنجگور ءَ دو، نوشکی ءَ چار مردم آوار جتگ ءُ بیگواہ کتگ اَنت –

پاکستانی پوج ءِ دست ءَ زورانسری آوار جنگ بوتگیں مردمانی تہ ءَ بلوچی ازمکار ءُ بی ایس او ءِ سیکریٹری جنرل ماما عظیم بلوچ ءِ مستریں برات نزیر رحمت پنام عزیز بلوچ، رجب ء حاجی دلمراد، باسط ء حسن، وحید، عاصم، فرید محمد اسلم ءُ سمیع ء عبدالغفار نام ھوار انت –

نزیر رحمت پوج ءَ گوستگیں شپ ءَ تربت ءَ چہ وھدیکہ رجب ءُ باسط پنجگور ءَ، وھدیکہ وھید، سمیع، فرید ءُ عاصم چہ نوشکی ءَ زورانسری آوار جتگ انت -.

اھوالکار ءِ گوشگ انت کہ نوشکی ءَ چیزیں روچانی تہ ءَ پاکستانی پوج ءَ بازیں مردمے آوار جتگ وھدیکہ دمگ ءِ تہ ءَ لشکر کشی ءُ دامگ ءِ نہ بوگ ءِ سوب ءَ آھانی پجار بوگ ءَ نہ انت –

دومی نیمگ ءَ چہ ھزدار ءَ ھمے ھال آیگ ءَ اِنت کہ پاکستانی پوج ءَ قائداعظم شاھدربرجاہ ءِ ایم فل ءِ نودربر حفیظ بلوچ ھزدار ءَ چہ زورانسری آوار جتگ ءُ بیگواہ کتگ –

بلوچ ریپبلکن گارڈز ءِ جارکش ءَ رسانکدراں شنگ کتگیں درشان ءِ تہ ءَ گوشتگ کہ بی آر جی ءِ سرمچاراں مروچی ڈیرہ مراد جمالی ءَ سی ٹی ڈی ءِ کارندھانی سر ءَ ھما وھد ءَ دست بمبے ءَ گوں نشانگ کتگ اَنت وھدیکہ آ بازار ءَ گشت کنگ ءَ بوتگ اَنت- اے اُرش ءَ یک کارندھے ھما دمان ءَ مرتگ ءُ سے ٹپی بوتگ اَنت-

آئی ءَ گْوشتگ کہ پولیس بیگواھیں بے میاریں بلوچاں دروگیں میڑ ءَ شھید کنگ ءَ تچکی ءَ گون اَنت ما بلوچ راج ءَ گوں دزبندی کن ایں کہ آ اے لشکر ءَ برتی بوگ ءَ پھریز بہ کن اَنت ءُ راج پوج کارواناں چہ گستا بہ بنت کہ کجام وھد ءَ آیانی سر ءَ نشانگ کت کن ایں-

آئی ءَ گوشتگ کہ مئے اے وڑیں اُرش داں بلوچستان ءِ وتواجھی ءَ برجاہ بنت-

ڈیرہ مراد جمالی ءَ بس ءِ اڈہ ءِ نزیک ءَ دزبمب اُرشے ءَ یک مردمے بیران ءُ سَے زدگ بیتگ اَنت-

گیشیں ھالانی رد ءَ بس اڈہ ءِ نزیک ءَ دزبمب اُرشے ءَ یک مردمے بیران ءُ سَے زدگ بیتگ اَنت، بیران بیتگیں مردم ءِ پجار دلداد علی ء جانی خان ءِ نام ءَ بیتگ ءُ زدگ بیتگیں مردمانی پجار امداد علی ء بچل ابڑو، غلام مرتضیٰ ابڑو ء بنجھل بخش ابڑو ءِ ناماں زانگ بیتگ اَنت-

زدگ بیتگیں مردم ٹپانی درمانی ءَ سول ھسپتال ءَ برگ بیتگ اَنت، پولیس ءَ تراک جاہ بند کرتگ ءُ پَٹ ءُ پول بندات کتگ-

بلے تنی وھدی بمب ترک ءِ سبب زانگ نہ بیتگ اَنت نانکہ دگہ گلے ءَ منّ اِتگ-

چاگی ءَ کاپر ءُ سُھر ءِ پیداک کنگے جاہ سیندک پروجیکٹ ءِ تہ ءَ چینی کمپنیاں ترءُتاب ءِ سر ءَ بندش ءُ چپ چاگرد ءَ سیکیورٹی ءَ ابید ھم دمگی دکان ءُ کاردارانی میس بند کنگ بوتگ کہ چریشی ءَ پد دمگی مردماں اے امل ترندی ءَ گوں ایرجتگ ءُ اے پیسلہ زوراکی ءِ گوشتگ –

سیندک پروجیکٹ ءَ چہ اھوالکار ءَ گون دی بلوچستان پوسٹ ءَ تران کنان ءَ گوشتگ کرونا نادراھی ءِ سوب ءَ کاردارانی سُرءُ پُر ءِ سر بندش ءُ سیندک پروجیکٹ ءِ سر ءَ ریگولر آرمی ءِ ڈیوٹی دیگ ءَ ابید ھم چینی کمپنی ایم سی سی ریسورس ڈویلپمنٹ کمپنی لمیٹڈ (ایم آر ڈی ایل) ءَ پروجیکٹ ءِ نزیک گورے ءِ بازیں دکان ءِ بند کُتگ کہ اودے دکانداراں گوشگ بوتگ کہ آھانی دکان ھپتگ ءَ تاں بند کنگ بنت تنی وھدی اے پیسلہ کنگے ھچ سوب دیم ءَ آرگ نہ بوتگ-

اھوالکار ءِ رِد ءَ ھمے وڈا کاردارانی میس ھم بند کنگ بوتگ ءُ ھر ڈیپارٹمنٹ ےِ انچارج ھمے گوشگ بوتگ کہ کاردارانی ورگاں پارسل بہ کن انت –

لھتے اھوالکارانی رِد ءَ کرونا لھتے کیسانی آھگے سوب ءَ اے گامگیج زورگ بوتگ بلے ھمودے کارداراں اے گپ رد کُتگ ءُ گوشتگ کہ درسیں کاردار ءُ دمگی مردماں کرونا سَئیں ڈوز جنگ بوتگ انت وھدیکہ آھانی رؤگ ءُ آھگے سر ءَ ھم بندش جنگ بوتگ اشی ءَ ابید ھما کاردار کہ چٹیاں ھلاس کن انت ءُ واتر بنت آ چاردہ روچ ءَ قرنطینہ ءَ کنگ بنت او آھانی رپورٹ پنچ رند ءَ نیگیٹیو بوھگ ءَ پد نوں آھاں کارے موکل ءَ دئینت انچو پابندیاں ابید کرونا کیس بوھگ وت سوالیہ نشان یے –

دمگی کارداراں اے ھم الزام جتگ کہ اے بندش بس دمگی کاروالایانی سر ءَ جنگ بوتگ انت وھدیکہ چینی کمپنیانی دری اپسر ءُ آھانی نزیکیں پاکستانی اپسراں اے بندش جنگ نہ بوتگ –

دمگی کار والایانی رِد ءَ گوستگیں سال ءَ ھمے وتسریں بندشانی بگیری ءِ زھرشانی ءَ چینی کمپنیاں دہ مارچ ءَ تاں درسیں بندش ھلاس کنگ ءُ راھے پچ کنگ دمگی مردمانی رؤگ ءُ آھگے بندش ھلاس کنگے تحریری معاہدہ بوتگ بلے معاہدہ ءِ پورہ بوھگ ءَ نزیک ءَ اناگت ءَ دکان ءُ میس بند کنگ بوتگ انت چریشی ءَ دمگی کاردار دمگی مردم بازیں اڈوجنجالانی تہ ءَ گیشی اتکگ –

آھاں اے بندشانی بگیری ءَ زھرشانی کنگے بیھار داتگ ءُ درسیں کاردار یکجاہ بوھگ ءُ زھرشانی کنگے لوٹ کتگ –

زانگ بہ بیت بلوچستان ءَ چیزے وھدے میان ءَ سیکورٹی پوج ءِ سر ءَ اُرش ءَ پد سیندک پروجیکٹ چینی واکدارانی تہ ءَ تُرس پیداک بوتگ کہ وتی نندجاھاں آرمی لوٹارینتگ وھدیکہ دمگی کاردار ءُ دمگی مردمانی سر ءَ بازیں بندش ءِ جنگ بوتگ

بلوچستان ءِ تیابدپی شھر گوادر ءِ ھند پسنی ءَ دمگی دریاورداں بازیں کچے ءَ گوستگیں پنچ روچاں وتی لوٹانی ھق ءِ واستا ھق دو تھریک ھم ھوار اِنت-

سَے شمبے ءِ روچ ءَ پسنی ءَ ماھیگی باپاری ھنیپ بشیر، فش کمپنی ءِ عزیز پیر بخش، ظفر اقبال ءُ سیٹھ کمبر ءَ ھق دو تھریک پسنی ءِ نندانک ءَ اتکگ ءُ دریاوردانی گون ءَ ھمدردی درشان کتگ –

ھمے وھد ءَ دمگی دریاوردانی گوشگ اِنت کہ دری ٹرالرنگ مافیا ءُ بیوپاریانی سبب ءَ ما نان ءِ چُنڈے ءَ زبھر اِنت-

آیاں گُشتگ کہ فش کمپنیاں زر ءِ ساھدارانی تباھی ءِ پکر نیست اِنت بلے ما وتی زر ءِ پھازگ ءَ جد ءُ جھد ءَ برجاہ داریں –

زانگ بہ بیت پسنی ءِ دمگی دریاورداں گوستگیں پنچ روچاں وتی ھکانی واستا پسنی فش ھاربر جیٹی ءِ بنجاھی گیٹ ءِ دیم ءَ بنجل جتگ ءُ نشتگ اَنت-

آیانی مستریں لوٹ ھمیش اِنت گیرکانوبی ٹرالنگ ءِ ھلاسی، پسنی ءِ ھاربر ءِ بھالی ءُ سیٹانی من مانی کمیشن ءِ ھلاسی انت-

ھمے وھد ءَ ھق دو تھریک ءِ سروک مولانا ھدایت الرھمان بلوچ ءَ گوشتگ اگاں پسنی ءِ ماھیگرانی جائزیں لوٹانی سر ءَ گامگیج زورگ نہ بیت گڑا مکران کوسٹل ھائی وے ءَ نندانک ءِ جار ءَ جن ایں –