TBP Balochi

بلوچستان ءِ دمگ کیچ ءَ چہ اھوال اِنت کہ سلاہ بندیں مردماں پاکستانی لشکری نشانگ کُتگ اَنت۔

لشکریانی سر ءَ کولواہ ءَ ڈنڈار ڈل ءِ ھند ءَ نشانگ کنگ بیتگ۔

اھوالانی ردءَ اُرش ءِ تہءَ لشکریاں جانی تاوانانی دیمپانی کنگ کپتگ بلے اے درگت ءَ چہ لشکریانی نیمگ ءَ دلجمیں سدکی دیما نئیتکگ۔

دومی نیمگ ءَ ھندی اھوالانی گُشگ اِنت کہ جنگ ءَ پد ھیلی کاپٹر جنگ جاہ ءَ سر بیتگ اَنت ءُ ترندیں شیلنگ ءُ بمبگواری کُتگ اِش۔

زانگ بہ بیت کہ اے دمگانی تہءَ آجوئی لوٹوکیں سلاہ بندیں گل مھکم اَنت بلے داں انگت اے اُرش ءِ زمہ واری کجام ھم گل ءَ نہ من اِتگ۔

بلوچ نودربر گل آزاد ءِ بنجاھی جارکش ءَ رسانکدراں وتی شنگ کرتگیں درشان ءِ تہ ءَ پنجگور، نوشکی ءُ بالگتر ءَ لس مھلوک ءِ نشانگ کنگ دلپدردی درشان اتگ ءُ گوشتگ کہ بلوچستان ءَ انسانی ھکانی سک باز لگتمالی بوگ ءَ انت – چیزے روچ انت کہ بجن چگل دیگ ءِ پالیسی ءِ تہ ءَ یکرندے پد ءَ گیشی آرگ بوتگ ءُ بلوچستان ءَ برجاھیں انسانی ھکانی لگتمالی ءِ بگیری ءَ میان استمانی ادارھانی ھچ نہ گوشگ ادرھانی کِرد ءِ سر ءَ ٹک چتگیں نشانے –

جارکش ءَ گوشتگ کہ چیزے روچ ءِ تہ ءَ سبی، پنجگور، بالگتر ءُ نوشکی ءَ لس مردم آوار جنگ ءُ پد ءَ آھانی تیر سُپتگیں جون چگل داتگ انت – لس مھلوکانی نشانگ کنگ زلم ءُ زوراکی ءِ گڈسر انت – زورگیرانی مدامی ھمے کار بوتگ لس بازاری مردماں نشانگ کنگ ءُ آھانی تہ ءَ ترس ءِ ودی کنگ ءِ کوشست کنگ – بے گناھیں مردمانی نشانگ کنگ ءَ ریاست ھچبر وتی لوٹاں سوبین نہ بیت – انی چیزے روچ ءِ تہ ءَ شال، نوشکی، پنجگور ءُ کیچ ءِ جتا جتائیں دمگاں بازیں مردمے زورانسری آوار جنگ بوتگ بلے پدردی گپ ایش اِنت کہ انسانی ھکانی ادارہ اے زلم ءُ زوراکیانی گندگ ءَ پد ھچ گوشگ ءَ نک انت – بلوچستان ءَ میڈیا بلیک آؤٹ ءُ اھوالکارانی سر ءَ ریاست ءِ زور چریشی ءَ درسیں کتکاری چیردیگ بوگ ءَ انت ءُ میان استمانی راجداری تاکت ھچ گوشگ ءَ نہ انت ءُ بس تماشا چارگ ءَ انت-

جارکش ءَ گوشتگ کہ پاکستان ءَ بازیں وھدے بیت کہ سنگینیں جنگی جرم کنگائینت – بلوچستان ءِ تہ ءَ چشیں روچ ءِ نگوزیت کہ پاکستانی پوج بلوچستان ءِ تہ ءَ کُشت ءُ کوش نہ کن انت بلے اے درساں زوراکیاں ابید میان استمانی ادارھانی نیمگ ءَ پاکستان ءَ مھار گُٹ ءَ دیگ ءُ یل کنگ بوتگ ھمے سوب ءَ ریاستی ادارھاں بلوچستان ءِ تہ ءَ چکچینی ءِ بازار گرم کتگ ریاستی زلم ءُ زوراکیاں پاکستان ءِ درسیں ادارہ ھوار انت – میان استمانی انسانی ھکانی ادارہ ءُ راجداریں تاکتاں اے درگت ءَ وتی کرد پیلو کنگی ءِ انت –

بلوچستان ءِ دمگ شال ءُ پنجگور ءَ تیرگواری ءُ دگہ وئیلاں دس مردم کشگ بیتگ اَنت ءُ یکے زدگ بیتگ –

گیشیں ھالانی رد ءَ بلوچستان ءِ دمگ شال ءَ جناح دگ ءَ ٹیکسی سٹینڈ ءِ نزیک ءَ ناشناسیں مردماں تیرگواری کرتگ ءُ یک مردمے کُشتگ کہ آئی ءِ پجار عبدالقیوم ء مھمد نعیم جھمنند سیٹلائیٹ ٹاؤن شال ءِ نام ءَ زانگ بیتگ –

لاش سول ھسپتال ءَ برگ بیتگ ءُ اود ءَ کوش ءِ سبب زانگ نہ بیتگ-

شال ءِ دمگ ھزار گنجی ءَ کلی رئیسانی ءَ یک لوگے ءَ لاشے دزکپتگ کہ آئی ءِ گٹ دارگ ءُ کشگ بیتگ-

لاش ایدھی کارمنداں سول ھسپتال ءَ برتگ ءُ اود ءَ آئی ءِ پجار چیر مھد بڑیچ جھمنند رئیسانی ءِ نام ءَ زانگ بیتگ-

ھمے وڑ پنجگور ءِ دمگ تسپ ءَ ھالانی رد ءَ سلاہ بندیں مردماں تیرگواری کرتگ ءُ صدام الاھی زدگ کرتگ کہ آ زدگیں جاورھالاں نادراہ جاہ ءَ برگ بیتگ –

آزات لچہ: ندر پہ ڈیھہ ءِ کنگریں پدائیاں

شائر: توکل بلوچ

دی بلوچستان پوسٹ

ھلک ءِ ماھیں جنک
دستاں ھنی کن اِت
چاپ ءُ نازینک جن اِت
بچ بوتگ شھید
ڈیھ ءَ پہ مادریں
ساہ ءَ کربان کن ایں
جُھد ءَ دیم ءَ بر ایں
کوہ ءُ گیابان ءِ جنگ
اتکگ شھر ءَ سریں
الم باج ءَ بر ایں
الم باج ءَ بر این
پہ ڈیھ ءَ کربان کُت اَنت
تو وتی ساہ ءُ جان
تئی اے جُھد ءَ سلام
سبزو مان ایت تئی نام
نوں نہ بہ ایں ما گُلام
نوں نہ بہ ایں ما گُلام
داں گڈی تیر ءَ وتی
بُرز داشتگ سِلاہ
کُنگریں بادل ءَ
ما رس ایں منزل ءَ
ما رس ایں منزل ءَ
بیا اِت کبر ءِ سر ءَ
ریچ اِت پُل ءُ زباد
پہ ڈیھ ءَ بوتگ شھید
اتکگ شیریں مراد
ڈیھ اِنت شِیریں منی
سرمچار اَنت پرھاد
سرمچار اَنت پرھاد
زور ایت توپک ءُ بمباں
جنگ ءَ در کپ ایت میرین
آجوئی نوں نزیک اِنت
کے گْوش ایت کہ دیریں
کے گْوش ایت کہ دیریں
جی جی پہ بلال جان ءَ
در کپ ایت میدان ءَ
ندر کنت وتی جان ءَ
پہ ھاک ءُ مادریں شان ءَ
کاروان جُنزان ءَ
کاروان جُنزان ءَ
بیم ءَ دژمن لرزینت ئِے
وھدے اتک ماں شھر ءَ
سھرین دروت ازیز ءَ را
سھرین دروت ازیز ءَ را
جنگ کنت دیم پہ دیم
دژمن ءَ گوں ابراھیم
یاسر ءُ مئے ناسر جان
گوں انیل ءِ ھوری ءَ
پہ ڈیھ ءَ مست ءُ شیدا اَنت
مھر ءُ اِشک ءِ کید ءَ اَنت
دیدگ ءِ دلیری ءَ
آجوئی چراگ روک کُت
نام پُلیں بریگیڈ ءِ
دپتر ءَ دوبر نوک کُت
دپتر ءَ دوبر نوک کُت
نامے ایشان رستگ
وتی بود ءُ کمال ءَ
جی جی پہ زبیر ءَ
جی جی پہ جمال ءَ
شُئیب ءُ پُلین الیاس جان
شُمئے ھوناں رُد ایت پِکرے
ھمے پِکر بیت پد ءَ جُنزان
آجو بیت بلوچستان
آجو بیت بلوچستان

لچہ: ندر پہ بلوچ فدائیاں

لچہ کار: نعیم وفا

دی بلوچستان پوسٹ

شکلّیں جنگانی داستان سُہر بنت
گنجلیں اوستانی تیھُر مُھکم اَنت
ھنّی ئیں آشوبءِ بامے ٹِکّ دنت
گْواڈگیں ارواہاں بوسیت گلزمین
پہ مجید برگیڈءِ ملّیں کُنگراں

سُجدگءَ پادانی دیما کوہ کپّنت
مُرگ آجویءِ سوتءَ جننت
اِمبری گوراں نہ چرتگ بالگتر
اِمبری آمین بوتگ مچکِدگ
اِمبری نوشکیءَ بیران گرند اِتگ
اِمبری پنجگورءَ سنجےءَ جتگ
اِمبری بولان بہارگاہ اِنت منی
امبری آجوی یے جار اِش جتگ

گُژنگیں ھونی سگاراں جہ جتگ
سر کپن پوشّنت ءُ لانک اِش بستگنت
بیرک اِش بُرز ءُ بُلند کُت گیدیءَ
بیرک اِش بُرز ءُ بُلند کُت گیدیءَ

بلوچ لبریشن آرمی ءِ سرمچاراں 2 فروری حب شھر سوک سینٹر ءِ ھند مال کشوکیں ٹرک یک بمب اُرشے ءُ تیرگواری ءِ نشانگ کتگ اَنت، اے ٹرک دالبندین ءُ کش ءُ گوراں دمگاں پُل پانچ کتگیں گرانبھائیں بلوچ مڈیاں پاکستان ءَ برگ ءَ بوتگ اَنت-

اے گاڑی دالبندین ءَ ھوار بلوچستان ءَ دگہ دمگاں چہ سنگ مرمر ءُ دگہ مڈیاں پُل پانچاں ھوار بوتگ اَنت-

اے اُرش ٹرک واھنند ءُ کنٹریکٹرانی ھاتر ءَ یک بیھارے بوتگ، اگاں اے دمگاں بلوچ مڈیانی پُل ءُ پانچ بند کنگ نہ بوتگ گُڑا آؤکیں وھداں مئے اُرش اشی ءَ چہ گیش تُرند بنت- ھرچ وڑیں جانی ءُ مالی تاوانانی زمہ وار اے مردم وت بنت-

چیزے وھد اِنت کہ پاکستانی پروپیگنڈہ مشین بلوچ لبریشن آرمی ءِ نام ءَ چہ جتائیں وتگڑیں زمہ واری ءُ درشان شنگ کنگ ءَ اَنت تانکہ بلوچ راج ءِ تہ ءَ شک ودی کُت بہ کن اَنت- زانگ بہ بیت بی ایل اے سرجمیں درشان ، اکس ، تامُر آئی ءِ وتی جند ءِ چینل ھکل ءَ چہ شنگ بنت- کجام درشان ءِ پدر کنگ مئے جند ءِ چینل یا کہ رسانکدری ادارھاں چہ کُت کن اَنت-

سر بیتگیں ھالانی رد ءَ بلوچستان ءِ دمگ ڈیرہ بگٹی ءِ ھند موندارنی مٹ ءَ بیست ءُ ھشت جنوری دوھزار ءُ بیست ءُ دو ءَ یک بمب تراکے ءَ زدگ بیتگیں بشکو بگٹی مروچی ماں کراچی ءَ آگان خان نادراہ جاہ ءَ بیران بیتگ –

زانگ بہ بیت کہ ھمے سال ءِ بیست ءُ ھشت جنووری ءَ بوتگیں اُرش ڈیرہ بگٹی ءَ سرکار ءِ پلامرزی ءَ برجاھیں گل ءِ کماندار نواب دین بُگٹی پنام رھیڑا بُگٹی ءِ کاروان ءِ سر ءَ بیتگ اَت چریشی ءَ سرکاری پلامرزی ءَ ھستیں گل ءِ کارمنداں یک بلاھیں جانی تاوانے بوتگ اَت۔ ھمے بمب تراک ءَ بلوچستان ءِ گوستگیں وزیر داکلہ سرفراز بُگٹی ءِ یک ناکو زتک ءُ نواب دین بُگٹی ءَ ھوار پنج کارندہ بیران بیتگ اِت اَنت ءُ دوازدہ ٹپی بوتگ ات اَنت بلے مرچی یکے پد ءَ بیران بوتگ چریشی ءَ بیران بیتگیں کارندھانی شُمار شش ءَ سربیتگ اَنت۔

دمگی مردمانی رد ءَ نواب دین بگٹی پنام رھیڑا ءِ سنگت ءُ بلوچ راج ءِ راجدْروھیں سرکاری کماندار بشکو بُگٹی کہ سوئی ءِ میتگ ءَ شپیک مینگل ءِ نام ءَ نامدار اَت، مرچی سُھب ءِ ھپت ءَ چہ کراچی ءِ نادْراجاہ آگا ھان ءِ ترامگیج ءَ ساہ ئِے داتگ اَنت۔

زانگ بہ بیت کہ ڈیرہ بگٹی ءِ دمگ ءَ سرکاری پلامرزی ءَ ھستیں گلانی ھلاپ یکشل اُرش برجاہ اَنت۔

اے اُرش ءِ زمہ واری تنی وھدی ھچ کس ءَ نہ منّ اتگ ءُ دگہ گیشیں گپ دیم ءَ نیتکگ اَنت-

بلوچستان ءَ سیاسی مردمانی گوشگ اِنت کہ بلوچستان ءِ بازیں جاھاں پاکستانی پوج ءُ چیریں ادارھاں لس مردم سلاہ بند کتگ اَنت کہ آ بلوچستان ءَ آوار جنی، کشت ءُ کوش ءُ دگہ سلکاریاں ھوار اَنت آ گیشتر ڈیتھ اسکواڈ ءِ ناماں زانگ بنت-

دی بلوچستان پتر ءَ سربوتگیں ھالانی رِد ءَ شال ءُ پنجگور ءَ پاکستانی پوج ءَ دگہ چار مردم زورانسری آوار جتگ ءُ بیگواہ کُتگ اَنت –

گیشیں ھالانی رِد ءَ پاکستانی پوج ءِ چیردستیں ادارگ ایف سی ءُ چیریں ادارھانی کارمنداں دوشی شپ شال ءِ دمگ فیض آباد ءَ حاجی نوراللہ سرپرہ نامی مردمے ءِ گِس ءِ سر ءَ بیڑ برتگ ءُ زوراکی کنان ءَ دو ورناہ آوار جتگ ءُ بیگواہ کتگ اَنت –

شال ءِ دمگی اھوالکار ءَ دی بلوچستان پوسٹ ءَ گوں تران کنان ءَ گوشتگ کہ پاکستانی پوج ءَ حاجی نوراللہ سرپرہ ءِ گِس ءِ پٹ لوٹ کنگے میان ءَ گِس ءِ تہ ءَ ساڑئیں مردم لٹ شاپ کرتگ انت ءُ دو ورناہ زورانسری آوار جتگ ءُ گوں وت برتگ – پوج ءِ دست ءَ زورانسری آوار جنگ بوتگیں ورناھانی پجار فرہاد سرپرہ ء حاجی نوراللہ سرپرہ ءُ ثاقب زیب سرپرہ ء حاجی نثار سرپرہ ءِ ناماں چہ بوتگ اَنت –

زانگ بہ بیت کہ گوستگیں شپ ءَ ھم پاکستانی پوج ءَ حاجی نثار ءِ گِس ءِ سر ءَ بیڑ برتگ ءُ زوراکی کنان ءَ آئی ءِ زھگے ءُ ثاقب زیب ءِ برات ہارون ولید سرپرہ آوار جتگ ءُ بیگواہ کتگ اَنت- ھر سَئیں ورناہ بنکی ءَ مستونگ دمگ گردگاپ ءِ نندوک اَنت –

اھوالکار ءَ گوں ٹی بی پی ءَ تران کنان ءَ گُوشت کہ گوستگیں چیزے ماھانی تہ ءَ شال ءَ ھوار بلوچستان ءِ دگہ دمگاں مستونگ ءُ نوشکی ءَ پاکستانی پوج ءَ گردگاپ ءِ جاھمنند سرپرہ کھول ءَ سیادی داروکیں کساس دہ مردم زورانسری آوار جتگ ءُ بیگواہ کنگ بیتگ اَنت –

ھمے ماھانی تہ ءَ آوار جنگ بوتگیں مردمانی پجار ذاکر سرپرہ، جاوید سرپرہ، راشد سرپرہ، فیاض سرپرہ، ایوب سرپرہ، ہارون سرپرہ، ثاقب زیب سرپرہ ءِ فرھاد ءِ نام ھوار اَنت –

وھدیکہ دومی نیمگ ءَ چہ پنجگور ءَ سربوتگیں ھالانی رِد ءَ گوستگیں شپ ءَ پاکستانی پوج ءَ پنجگور ءِ دمگ وشبود ءَ دو برات اکرم ءُ احمد زورانسری آوار جتگ ءُ گوں وت برتگ انت –

وھدیکہ گوستگیں شپ ءَ زورانسری آوار جنگ بوتگیں مردمانی کچ ھپت ءَ سربوتگ انت اشی ءَ پیش پاکستانی پوج ءَ پنجگور ءِ جتا جتائیں دمگاں پنچ مردم زورانسری آوار جتگ ءُ بیگواہ کتگ اَنت کہ آھانی تہ ءَ ملک میران، بالاچ، عقیل، عبدالکریم ءُ شبیر ءِ نام ھوار اَنت –

دوشمبے ءِ روچ ءَ بلوچستان ءِ دمگ کیچ مند ءَ گورنمنٹ بوائز ھائی سکول سورو ءَ ٹیچر ءِ کمی ءُ دگہ جیڑہ جنجالانی ھاتر ءَ گورنمنٹ بوائز ہائی سکول سورو، گرلز سکول ءِ نودربراں ھوار مند سول سوسائٹی ءِ رھشونانی نیمگ ءَ سورو ءَ زھر شانی کنگ بوتگ –

زھرشانی کنوکانی گوشگ ات کہ سورو ھائی سکول ءَ ٹیچرانی کمی ءِ بگیری ءَ نودربر ءُ سول سوسائٹی بازیں وھدے بیت کہ زھرشانی انت –

آھانی گوشگ ات کہ گورنمنٹ بوائز ھائی سکول ءَ گیشیں ٹیچرانی آرگ ءِ بدل ءَ دگہ یک ٹیچر ءِ عبدالاحد مسعودی کہ درسیں پرائمری سیکشن زمہ دار انت آ دگہ جاہ ءَ برگ بوتگ اَنت –

آھانی گوشگ ات ھمے ناھکیں امل ءِ بگیری ءَ نودربراں ھوار مند سول سوسائٹی ءَ ھواری ءَ زھرشانی کتگ –

زھرشانی ترانکارانی گوشگ ات کہ ما اے بدلی ءَ ایرجنیں ءُ عبدالاحد مسعودی بدل کنگ مہ بیت تانکہ پیسر ءَ چہ اسکول ءَ ٹیچرانی کمی ءِ سوب ءَ پرائمری سیکشن چد ءُ گنتر مہ بیت –

آھانی گوشگ ات کہ وانگ ءُ زانگ ھر انسان ءِ بنکی ھک انت بلے مند ءِ مھلوک چہ ھمے بنکی ھک ءَ زبھر کنگ بوگ ءَ انت، مند پیسر ءَ چہ بازیں چیز ءَ پُشت انت چد ءُ گیش وانگ ءِ ھساب ءَ پُشت کنگ مہ بیت –

ترانکاراں لوٹ کُتگ گوشتگ کہ ڈی ای او کیچ کہ مند ءِ گوم ءَ ماتو ءِ داب ءَ پیش آیگ ءَ اِنت ءُ ڈپٹی ڈی او مند ءِ اے درسیں کاراں گوں آئی ءَ ھمکار انت ایش بدل کنگ بہ بنت ءُ ھما ٹیچر کہ سکول ءَ آیگ ءَ نہ انت آھانی پُشت پناھی یل کنگ بہ بیت اگاں ناں مند ءِ درسیں اسکول بند کنگ بنت –