TBP Balochi

ھمے ماہ ءَ بلوچستان ءَ پاکستانی پوج ءِ دست ءَ زورانسری آوار جنی ءُ پوج ءِ دست ءَ مردمانی کوشانی وئیل گیشی ءَ گندگ ءَ اتکگ اَنت اشانی تہ ءَ چاگردی باسک ءُ نودربراں ھوار دگہ پھناتاں بندوکیں مردم ھوار اَنت-

اے وھد ءَ بیگواہ بیتگیں چہ پنجگور ءَ سوشل میڈیا ایکٹیویسٹ ملک میران ءُ ھزدار ءَ ایم فل ءِ نودربر حفیظ بلوچ ھوار اَنت-

حفیظ بلوچ قائد اعظم یونیورسٹی اسلام آباد ءَ شعبہ فزکس ءَ این فل ءِ نودربرے بیتگ ءُ ریسرچ ءِ پٹ ءُ پول ءَ کنگ اِنت ءُ ھمے وھداں آ مکلانی وھد ءَ ھزدار ءَ اتکگ ءُ میتگ ءَ اکیڈمی ءَ وانینگ ءَ بیتگ آ ھشت فروری ءَ اکیڈمی ءَ کلاس ءِ وھد ءَ پوج ءَ دزگیر کرتگ ءُ ناشناسیں جاھے ءَ برتگ کہ ھما اِنت بیگواہ اِنت-

حفیظ بلوچ ءِ یل کنائینگ ءِ ھاتر ءَ باندا بزاں یازدہ فروری ءَ ھزدار ءَ شھید رزاق چوک ءَ ڈسٹرکٹ کورٹ ھزدار ءَ بیگاہ ءِ ساھت سَے ءَ یک زھرشانی روانکے ءِ کشگ ءِ جار جنگ بیتگ –

زانگ بہ بیت اے لھتے روچانی تہ ءَ بلوچستان زورانسری آوار جنیانی درچ ترندی ءَ گندگ ءَ آیگ اِنت کہ اود ءَ دَہ روچانی تہ ءَ سِی مردماں گیش بیگواہ ءُ نیمساریناں ھوار چار مردم کُشگ بیتگ اَنت-

اے گیشی ءَ سرجمیں بلوچستان ءَ مردم گرگ بیتگ اَنت بلے اے دمگانی تہ ءَ گیشتر پنجگور ءُ نوشکی اسرمند بیتگ اَنت-

ٹی بی پی پتر ھال ءَ سر بیتگیں ھالانی رد ءَ یک فروری ءَ پاکستانی پوچ ءَ کیچ ءَ سَے مردم دزگیر کرتگ ءُ برتگ اَنت، سَے فروری ءَ پاکستانی پوج ءَ پنجگور ءَ یک نودربرے ءَ ھوار دو مردم کشتگ اَنت، ھمے وڑ پنچ فروری ءَ نوشکی ءَ دو، سبی ءَ سَے بیگواہ، ڈیرہ مراد جمالی ءَ یکے ءُ کراچی ءَ چہ پنجگور ءِ جھننندیں یک مردمے بیگواہ بیتگ، ھمے وڑ سبی ءَ یک مردمے ءِ لاش دزکپتگ ءُ کیچ ءَ پیسر ءَ دزگیریں مردمے پوج ءِ دست ءَ کُشگ بیتگ –

شش فروری ءَ پنجگور ءِ دمگ چتکان ءَ ندیم ابدال نامیں مردمے کہ نیمسارے بیتگ آئی ءِ لاش دزکپتگ، دمگی مردماں گوشتگ پوج ءَ تیرگواری کرتگ ءُ کُشتگ، ھمے وڑ ھمے روچ ءَ شال ءَ سرپرہ برادری ءِ ورنایے بیگواہ کنگ بیتگ –

ھپت فروری ءَ پنجگور ءِ جتا جتائیں جاھاں چار مردم بیگواہ کنگ بیتگ ءُ شال ءَ سرپرہ ٹک ءِ دگہ دو مردم آوار جنگ بیتگ اَنت-

ھمے وڑ ھشت فروری ءَ پنجگور ءِ دمگ وشبود ءِ جھمندیں دو برات اکرم ءُ اھمد بیگواہ کنگ بیتگ اَنت ءُ نوشکی ءَ دگہ دو کس آوار جنگ بیتگ اَنت کہ اشانی پجار نہ بیتگ اَنت، نوشکی، پنجگور، ھزدار ءُ تربت ءَ ھشت مردم بیگواہ کنگ بیتگ اَنت-

زورانسری آوار جنی ءِ آماچیں بلوچ سیاسی باسکانی یل نہ بیگ ءِ ھلاپ ءَ وائس فار بلوچ مسنگ پرسنز ءِ ھرتالی بنجل ءَ مروچی چار ھزار ءُ پنچ سد ءُ ھشتاد ءُ ھپت روچ سرجم بیتگ –

کراچی ءِ پریس کلب ءِ دیم ءَ برجاھیں بنجل ءَ چہ ھب چوکی ءَ سیاسی ءُ چاگردی باسک واجد بلوچ، ظھیر بلوچ ءُ دگہ پھناتاں سیادی داروکیں مردم اتکگ ءُ پدردی از درشان کتگ –

ھمے وھد ءَ گل ءِ وائس چیئرمین ماما قدیر بلوچ ءَ گُشتگ بلوچستان ءَ سیاسی رھشون ءُ باسکاں ھوار نودربر زورانسری آوار جنی بیگ ءَ اَنت-

آئی ءَ گُشتگ ھمے ھپتگ ءَ بلوچستان ءِ جتا جتائیں جاھاں بلوچ نودربر بازیں کچے ءَ زورانسری آوار جنی ءِ آماچ بیگ ءَ اَنت-

آئی ءَ گُشتگ بلوچستان ءَ تاکت ءِ زور کامرد ھلاس بہ بیت سیاسی رنگ ءَ مردمانی گپ گوشدارگ بہ بیت اے رنگ ءَ سیاسی باسک ترس آماچ کنگ نہ بنت-

ماما قدیر بلوچ ءَ گُشتگ اے وھد ءَ بلوچ یک بدتریں انسان کُشی ءِ دیمپان اِنت، دراھیں سیاسی پاٹی ھوار بیگ ءُ زورانسری آوار جنیانی ھلاپ ءَ توار چِست بہ کن اَنت –

آئی ءَ دیمتر ءَ گُشتگ اے وھد ءَ بلوچ نودربر نشانگ کنگ بیگ ءَ اَنت ءُ نودربر بازیں کچے ءَ نودربر پوج ءِ دست ءَ آوار جنگ ءُ بیگواہ کنگ بیگ ءَ اَنت-

بلوچستان لبریشن فرنٹ ءِ جارکش میجر گوھرام بلوچ ءَ آواران ءَ پاکستانی پوج ءِ سر ءَ بیتگیں اُرش ءِ زمہ واری منّ اِتگ –

بی ایل ایف ءِ جارکش ءَ گُشتگ نُھ فروری ءَ سرمچاراں جھاؤ زیلگ ءَ پوجی چوکی اسنائپر ءِ گون ءَ اُرش کرتگ ءُ یک کارندھے کشتگ –

میجرگوھرام بلوچ ءَ گوشتگ اے اُرش ءَ پد پوج ءَ سرمچارانی رندگیری کرتگ ءُ ھمے میان یَ سرمچاراں زیلگ کور ءَ لشکر ءِ سر بستگ ءُ اُرش کرتگ-

جارکش ءَ گوشتگ اے اُرش داں دو اداراں برجاہ بیتگ ءُ چریشی ءَ پوج ءِ چار کارندہ مرتگ ءُ بازینینے زدگ بیتگ اَنت-

بی ایل ایف ءِ جارکش ءَ گوشتگ کہ پوج ءَ جانی تاواناں پد زورگریں پوج ءِ کمک ءَ گن شپ ھیلی کاپٹر سر بیتگ اَنت ءُ چریشی ءَ پد سرمچاراں پوج پشتکنزی ءَ لاچار کرتگ ءُ مھکمیں جاھاں سلامتی ءَ سر بیتگ اَنت –

جارکش ءَ گُشتگ پوج ءِ سر ءَ اے وڑیں اُرش بلوچستان ءِ آجوئی ءَ داں برجاہ بنت –

دستونک

شائر: شاکر مراد

تئ زھیراں اجب واھگءِ گُمان کتگ
پمیشکہ زرد ءَ منی کسہے بیان کتگ

اے مہر ءِ راہ اِنت ادءَ باز بیمناکی ایں
اد ءَ ھمنچو بزان سنگءُسر میڈان کتگ

کدی من سر باں چراگانی منزل ءَ باریں
من ءَ کہ آئیءَ داں اُمبرے ءَ زبان کتگ

تی زھیر ئے کساس ءَ وت ءَ چہ شوناتگ
شپ ءِ نگاھاں خمارءِ من انچیں مان کتگ

تو چونیں درچکے دل ءِ سینگ ءِ تہ ءَ کِشتگ
کہ من پتو کرنے ءَ داں راھے ءَ روان کتگ

مدام من نشتگاں شاکر ودار ءِ روچاناں
بگندئے نوبت ءِ نوکیں مئے درداں سان کتگ

نبشتانک: مارا مات ءٙ یل دات

نبشتہ کار : امجد ھیال

دی بلوچستان پوسٹ

من ءَ یات اِنت یک روچے مگرب ءِ ساھت اَت من گوں وتی مکھیں مات ءَ گْوانکو ءٙ گپ ءَ ات آں داں ھشت ءُ ده منٹ ءَ گپ کت گُڑا پد ءَ من وتی مکھیں مات ءَ را گوشت اماں” وش انت من گْوانکو ءَ بند کن آں من گوں وتی زند ءِ کاراں دست گٹ آں مکھیں مات ءَ پسو ترینت ءُ گْوشت ئِے” شر منی چُک اللہ ترا مدت بات من ءَ باز دوا ءُ نیک کُت ئِے دمانے ءَ رند منی مستریں برات آتک من ءَ گوشت ئِے امجد مات نہ دْراه اِنت من اجکہ ءُ ھیران بوت آں من برات ءَ را گوشت من انی کلاکے ءَ پیسر گوں وتی مکهیں مات ءَ گوانکو ءَ گپ کُتگ برات ءَ پسو دات تئی گون ءَ گپ ءَ کنگ ءَ پد نادراہ بوتگ۔

من سک گمیگ ات آں ھمے شپ ءَ من ءَ داں دیراں واب نیتک اناگہ ءَ من وتی گوانکو ءِ دامگ پچ کُت ءُ وٹس اپ ءِ تہ ءَ شت آں ادار یک بج اَت من چارت منی برات زتک آن لائن اَت من جُست کت تو اے ساھت ءَ آن لائن ءِ پسو دات ئِے ھو من وت من سرپداں منی مکھیں مات ءَ من ءَ یل داتگ چہ اے جھان ءَ رکست کتگ ئے ھمے دمان ءَ من واب کپت آں سھب ءَ مھلہ من پاد اَتک آں دیم پہ وتی دُکان ءَ شُت آں دُکان پچ کُت۔

منی برات ھم آتک برات ءَ گْوشت امجد بیا رو ایں مات وش وش نہ انت گُڑا من ءُ برات سرگپت ایں دیم پہ لوگ ءَ وھدے کہ ما وتی لوگ ءَ رس ات ایں من چار اِت مئے کمپان ءِ توک ءِ چاریں نیمگ ءَ مردم نشتگ اَنت ءُ گمیگ اَنت من چہ وتی کبلھیں پت ءَ را جُست کُت ابا اماں کُج اِنت پت ءَ پسو دات منی چُک تئی مات ءَ مارا یل دات منی ھیال ءَ پہ من سرجمیں زندگی مھشر بوت مردم گوش اَنت زند ءَ وپا نیست بلے راست گوش اَنت مکھیں مات ءَ را سالے سرجم بوت گُڑا ھمے پیم ءَ منی کبلھیں پت بیران بوت پد ءَ من ھمے پھم اِت منی زندگی ھلاس بوت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

چار شمبے ءِ روچ ءَ بوتگیں یورپئین پریمئیر لیگ فٹبال گوازی ءَ ساؤتھ ایمپتون ءَ ٹوٹنہم ءِ دیم ءَ سَے پہ دو گول ءَ گوازی کٹ اِتگ وھدیکہ آسٹون ویلا ءُ لیڈز یونائیٹڈ سَے پہ سَے، نارویچ سٹی ءُ کریسٹال فلیس یک یک گولے ءَ دیمیگ بوتگ اَنت –

یوروپین پریمئیر لیگ ءِ اولی گوازی آسٹون ویلا ءُ لیڈز یونائیٹڈ ءِ میان ءَ ویلا پارک فٹبال گوازی پٹ ءَ برجاہ دارگ بوتگ کہ ھردو ٹیمانی لیبیاں جوانیں گوازی پیش داشتگ ءُ ھردو ٹیم سَے پہ سَے گول ءَ دیمیگ بوتگ اَنت –

لیڈز یونائیٹڈ ءُ آسٹون ویلا ءِ میان ءَ بوتگیں گوازی ءَ اولی گول لیڈز یونائیٹڈ ءِ نیمگ ءَ چہ اسکور کنگ بوتگ کہ لیڈز ءِ لیبی ڈی. جیمز ءَ نُھمی ملٹ ءِ تہ ءَ داتگ ءُ پدا آسٹون ءِ لیبی فیلفی ءَ یک گولے اسکور کُتگ – ھمے وڑ ڈی جیمز ءَ یک دگہ گولے اسکور کُتگ لیڈز ءِ نیمگ ءَ سیمی گول ڈائیگو ءَ داتگ ءُ آسٹون ءِ نیمگ ءَ دومی ءُ سیمی گول جے. رمسے ءَ داتگ انت ءُ ھردو ٹیم سَے پہ سَے گول دیمیگ بوتگ انت –

پریمئیر لیگ ءِ دومی گوازی ٹوٹنہم ءُ ساؤتھ ایمپتون ءِ میان ءَ بوتگ کہ ساؤتھ ایمپتون ءَ سَے گول ءَ گوازی کٹ اِتگ – ٹوٹنہم ءِ نیمگ ءَ چہ دو گول اسکور کنگ بوتگ انت کہ جے.بیڈنارک ءُ ایچ.سن ءَ داتگ انت وھدیکہ ساؤتھ ایمپتون ءِ نیمگ ءَ لیبی اے.بروجا، ایم .ایلئیونوسی ءُ سی. ایڈمس ءَ یک یک گولے داتگ ءُ گوازی وتی ٹیم ءِ نام ءَ کُتگ –

کریسٹال فلیس ءُ نارویچ سٹی ءِ میان ءَ بوتگیں سیمی گوازی ءَ ھردو ٹیم یک یک گولے ءَ دیمیگ بوتگ انت – کہ گوازی ءِ بندات ءَ نارویچ سٹی ءِ لیبی ٹی.فُکی ءَ یک گولے اسکور کُتگ وھدیکہ کریسٹال ءِ نیمگ ءَ لیبی ڈبلیو زاہا ءَ گول اسکور کُتگ پد ءَ رند ءَ داں گوازی ءِ گڈسر ءَ ھچ نیمگ ءَ چہ گول اسکور کنگ نہ بوتگ ءُ ھردو ٹیم دیمیگ بوتگ اَنت –

دی بلوچستان پوسٹ اھوال پتر ءَ سر بیتگیں ھالانی رد ءَ بلوچستان ءِ دمگ سوئی ءَ پاکستانی لشکریانی بیڑ سَے روچاں چہ برجاہ اِنت۔

اھوالانی رد ءَ سوئی ءِ جتاجتائیں بازارانی تہ ءَ لشکریانی زمینی ءُ آزمانی بیڑ برجاہ اِنت، بلے اے داں انگت ھچ پئیمیں جانی تاوان ءُ دزگیریانی اھوال دیم ءَ نیتکگ اَنت۔

ھندی اھوالاں اے ھال راست کنان گُوشتگ کہ سوئی ءِ میتگ ماوند، ڈونگان، گل ملی، گمبولی، گژیجہ وڈھ ءُ سمچ ءَ مروچی ھم بیڑ برجاہ اِنت۔

گیشتریں اھوالانی رد ءَ سوئی ءِ میتگ بی جی کور، کُوٹ منڈائی، ڈاڈا کور ءُ کوریاک ءَ زمینی ءُ آزمانی بیڑانی تہءَ گیشتر ترندی آرگ بیتگ۔

زانگ بہ بیت کہ سَے فروری ءَ پاکستانی چیریں ادارگانی کارمنداں سبی ءَ چہ حیات ء زنگی، اتور گورگیج، حاشم ڈومکی دزگیر کنگ ءَ پد ناشناسیں ھنداں بُرتگ اِت اَنت ءُ دزگیری ءِ نیام ءَ حاشم ڈومکی کُشتگ اَت ءُ آئی جون مچھ ءَ دور دیگ بیتگ اَت۔

بلوچستان ءَ ھمے زوتاں بندات بوتگیں زورانسری آوار جنی ءِ درچ ھلاس نہ بوتگ ءُ دگہ سَے مردم پاکستانی پوج ءَ زورانسری آوار جتگ ءُ بیگواہ کُتگ انت –

گیشیں ھالانی رِد ءَ شش فروری ءِ شپ ءَ پاکستانی پوج ءَ سوئی ءَ محمد ہاشم نامی مردمے ءِ گِس ءَ بیڑ بُرتگ ءُ پٹ پول کُتگ ءُ محمد ہاشم زورانسری آوار جتگ ءُ گوں وت برتگ –

محمد ہاشم ءِ کھول ءَ آئی ءِ زورانسری آوار جنی ءِ ھبر راست کُتگ ءُ گوشتگ کہ پوج ءِ شش گاڑی اتکگ اَنت ءُ آھاں محمد ہاشم آوار جتگ ءُ گوں وت برتگ – کھول ءِ رِد ءَ محمد ہاشم پیسر ءَ پاکستانی پوج ءِ کارمند ءِ بوتگ –

دومی نیمگ ءَ گوستگیں روچ ءَ پاکستانی پوج ءَ تربت ءِ دمگ گوکدان ءَ نعیم نامی مردمے آوار جتگ ءُ بیگواہ کتگ کہ تنی وھدی بیگواہ اِنت –

اے زورانسری آوارجنیانی تہ ءَ دو دمگ پنجگور ءُ نوشکی گیشتر سانمند اَنت – نوشکی ءَ مروچی سھب ءَ پاکستانی پوج ءَ پیش ءَ چہ آوار جنگ بوتگیں مصطفی سرپرہ ءِ برات صادق ء عزیز سرپرہ زورانسری آوار جتگ ءُ بیگواہ کتگ اَنت –

زانگ بہ بیت نوشکی ءُ پنجگور ءَ بلوچ آجوئی لوٹوکیں سلاہ بندیں گل بلوچ لبریشن آرمی ءِ اُرشاں پد بلوچستان ءِ جتا جتائیں ھند ءُ دمگاں پاکستانی پوج ءَ بازیں مردمے آوار جتگ ءُ بیگواہ کتگ انت – گوستگیں روچ ءَ پاکستانی پوج ءَ ھزدار ءَ حفیظ باجوئی نامی نودربرے بیگواہ کُتگ وھدیکہ ھما روچ ءَ دگہ ھپت مردم پاکستانی پوج ءَ دگہ دگہ دمگاں آوار جتگ ءُ بیگواہ کتگ انت –

اے وئیلانی درگت ءَ بلوچ راجداریں مردمانی گوشگ انت کہ پنجگور ءُ نوشکی ءِ بوتگیں اُرش ءَ پد ھمے گمان ودی بیتگ اَت کہ بازیں بے گناھیں مردمے یکجاھی سزائے نشانگ کنگ بنت- گوستگیں چیزے روچ ءِ تہ ءَ لس مردمانی نشانگ کنگ ءَ پد اے گمان راستی ءِ تہ ءَ مٹ بوتگ –

اے درگت ءَ بلوچ نودربر گل آزات ءَ ھم وتی درشان ءِ تہ ءَ گوشتگ کہ بلوچستان ءَ انسانی ھکانی سنگینیں لگتمالی بوھگ انت – ھنو بجن چگل دئیگے پالیسی تہ ءَ یکرندے پدا گیشی آرگ بوتگ – جارکش ءَ دیمترا گوشتگ کہ بلوچستان ءَ برجاھیں انسانی ھکانی لگتمالی ءِ بگیری ءَ میاں استمانی ادارھانی ھچ نگوشگ ءَ ادراھانی کردے سر ءَ ٹک جتگیں نشانے-