TBP Balochi

10 فروری 2022 گڈانی یوتھ ءِ دیوان ءِ کارمستر ھلیمہ بچو ءِ سروکی ءَ برجم دارگ بوتگ، نیاد ءَ “ھلیمہ بچو” ءَ سرھال بلوچ پدریچ ءِ سر ءَ تران کرتگ-

تران کنان ءَ ھلیمہ بلوچ ءَ گوشتگ کہ گوستانک ءِ ندکار ءُ زانتکار گال “بلوچ” ءَ عرب , پاکستان ءُ ایران ءِ نندوکیں مردمانی کارمرز کرتگیں گالے گشتگ، ایشی ءَ چہ پیسر افریکہ ءُ یورپ ءَ گالے بلوچ کارمرز بوتگ, بولان ءُ مکران ءُ کوہ ءِ البرز ءِ نندوکیں مردمانی زبان بلوچی انت ءُ داں مرچی اود ءَ نندوک انت-

آئی ءَ گُشتگ بلوچ کجام زبان ءَ چے دراتگ داں مرچی چشیں source ءِ نیست کہ ما بلوچ سرپد بہ بنت, گوستانک ءِ تھا گال بلوچ ءِ توارینک ءِ ھساب ءَ مانا ءُ متلب داتگ انت بلے scientific ھچ proof نیست-

ھلیمہ بلوچ ءَ گوشتگ عرب ءَ بلوچ ءَ را بلوث ءُ فارسی ءَ بلوج گُشگ بیتگ، بازیں عرب وتی گوستانک ءِ تہ ءَ بلوچ ءَ ایران ءِ نندوک نبشتہ کنت ءُ لھتے پاکستان, مکران ءُ ایران ءِ نندوک نبشتہ کنت پد ءَ سنگت ءَ دیمتر ءَ گُشت کہ بازیں زانتکار گُشی کہ گال بلوچ بعلوث ءَ چے دراتکگ ءُ بعلوث بابل ءِ بادشاہ بیتگ, لھتے وھداں پد اے گال بعلوث، بلوث ءُ پد ءَ بلوچ بیتگ، اے گوستانک ءِ نبشتہ کنوک برطانیہ ءِ Sir T Holdish ات-

آئی ءَ گوشتگ کہ ایشی ءَ گُشتگ کہ انچو ما عرب ءِ سر ءَ قبضہ کرتگ ھمیں وڑ ءَ بلوچ ءَ عربانی سر ءَ قبضہ کرتگ ابوالقاسم گش ایت کہ گال بلوچ نیم نام انت ایشی ءِ ثبوت ءَ وتی کتاب شاہنامہ ءِ تہ ءَ دنت، بازیں ندکار گوش اَنت کہ بلوچ سنسکرت ءِ دو گال ءَ چہ جوڑ بوتگ, بل متلب زورآور(تاکتور) ءُ اوچ متلب مزن ءُ برز, اے لیکہ ءِ آروک Henery Wolter ات بازیں ندکار نبشتہ کن اَنت کہ گال بلوچ دگہ زباناں چے درنیاتکگ ءُ اے بلوچانی وتی گال انت ءُ ایشی ءِ متلب خانہ بدوش انت، بازیں زانتکار بلوچ ءَ را Altic نبشتہ کنت ءُ آیاں کرگز ءُ ترکمان گش انت, ایشانی منوگر Sir Henry Potenger ات -بازیں گشی کہ بلوچ آریائی نسل ءَ چے اتکگ ءُ آریائی ءِ دو مزنیں شاک انت یکے ایرانی, دومی ھندوستانی, ھمے رنگ ءَ بازیں بلوچ ءَ ایرانی آریاں گوں یک کنت ءُ بازیں ھندوستانی آریاں گوں یک کنت -پد ءَ سنگت ءَ دیمتر ءَ گُشت کہ semite ءِ متلب collection of arabic and Iranian language بلوچ ءَ سامی ءُ عرب گشوگ پروفیسر George Rawlinson ات- اے بلوچ ءَ نمرودی اولاد انت میجر پرسی مولسورت اے گپاں ھم منیت ءُ بلوچاں کلدانی ءَ گوں یک کنت گل خان نصیر, ملک محمد خان, پروفیسر محمد شاھیں ھم اے گپاں منوک انت کہ بلوچ حلب ءَ چہ اتکگ انت ءُ ھمے جاہ ءَ نشتگ انت –

آئی ءَ دیم تر ءَ لھتے ءَ جُست کُت ءُ جُستانی پُسو دیگ ءَ پد دیوان ءَ آویکیں سنگتانی منت گِپت ءُ دیوان ءِ ھلاسی ءِ جار جَتگ-

نبشتانک: بلے من نیزگار نہ اِت آں بس در پہ دری ءَ گلام اِت آں

نبشتہ کار: گلام بلوچ

دی بلوچستان پوسٹ

نیزگاری ءَ من ءَ ھزار جاہ ءَ دَور داتگ اَت در پہ دری من ءَ چوں کرمے وڑ ءَ وَران اَت کدی باڈر ءَ اِت آں ءُ کدی دریا ءَ مائیگ گِرگ ءَ اِت آں من وتی زند ءَ چِہ بیزار بوّگ ءَ اِت آں من ءَ بلوچ بّوگ پمیشکا کُنّت پیداک اَت کہ گلامی ءَ چاریں نیمگ ءَ پَتاتگ اَت من ءَ ، ھر کُجا کہ شُت آں ھر کس من ءَ بے کاریں راجے پھمگ ءَ اِت اَنت۔

درد ءِ بازی ءَ نِشہ ھم بندات کُتگ اَت دگہ کار ءُ ھنرے ھم نیست اَت کہ وت ءَ مُشکول بوکُتین اَت۔ میزان میزان ءَ منی تہ ءَ یک مارشتے ودان بوت کہ بیدے وانگ ءُ زانگ ءَ من وتی درد ءُ گماں نہ رکین آں بوت کنت کہ من وت ءَ پُوہ بہ باں؟

وانگ پہ من یکیں گڈی راہ اَت کہ پش کپتگ اَت من ءَ چوشیں ، ھاسیں وَسّے نیست اَت کہ پہ وانگ ءِ ھاتر ءَ شالا بہ رو آں۔ من دو دل ءِ تہ ءَ اِت آں من مار اِت۔ یکے نیزگاری اَت ءُ دومی وانگ! کمے دیراں پد مار اِت کہ نیزگاری در پہ دری ھلاس وَ نہ بیت ءُ وانگ پہ زر نہ بیت۔

من ءَ کس کُمک کنگ ءَ نہ اَت گوں بے وسی ءَ جیڑگ ءَ اِت آں کہ من اَلّم وان آں اے نو ھالے بے زانتی ءَ من ءَ ھرکس رد دنت؟ کہ بیا منی گلام بہ ئے؟! ھمے گلامی اِنت کہ من ءَ تورگ ءَ اَت کہ بہ وان ، وت ءَ بہ پھم کہ چوں مہ بیت کہ دیر بہ بیت۔

من سوڑگ کُت پہ وانگ ءِ ھاتر ءَ شالا شُت آں من ءَ اے ساھت ءَ سئے ھزار کلدار گون اَت، سئے ھزار کلدار چے بیت ؟ من وت ءَ وت درائینت ءُ گْوشت: بلے من وت ءَ مُھکم کُت ءُ وانگ بندات کُت۔ اے وھد ءَ من ءَ وانگ ءِ ھُبْ سک باز اَت۔

ا-ک: دو سال گْوست منی تہ ءَ بدلی اتکگ اَت من وت ءَ پولِت کہ من کَے آں؟ بلوچ کَے اِنت؟ گلامی چے اِت؟ ءُ ایشی ءَ چَہ ابید آشوب چے اِت؟
ھمے ساھت ءَ من ءَ گمان بوت کہ من گلام نہ اِت آں بس در پہ دری ءَ گلام اِت آں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ خاران، نوشکی ءُ قلات ءِ کوھی ھنداں مروچی سُھب ءَ چہ پاکستانی پوج ءِ لشکر کشی برجاہ اِنت، دمگ ءَ بالگردانی بُرز بالی سھت ماں سھت گندگ بوگ ءَ اِنت-

سربوتگیں ھالانی رِد ءَ مروچی سُھب ءَ نوشکی خاران ءُ قلات ءِ کوھی دمگاں پاکستانی پوجے بُرزی لشکر کشی بندات کتگ-

زانگ بہ بیت بلوچستان ءَ اے وھد ءَ پاکستانی پوج ءِ مزنیں کچے جھلی ءُ بُرزی لشکر کشی برجاہ کتگ-

مروچی برجاھیں لشکر کشی ءَ ھچ وڑیں آوار جنی ءُ جانی تاوان ءِ ھال سر نہ بوتگ-

بلوچستان ءِ دمگ پنجگور ءَ چہ پاکستانی پوج ءَ دگہ یک ورنائیں ازمکار ءُ چاگردی باسکے دزگیر کنگ ءَ پد ناشناسیں جاھے ءَ برتگ –

بیگواہ کنگ بیتگیں ورنا ءِ پجار مسرور عمر ءِ نام ءَ زانگ بیتگ کہ پنجگور گرمکان ءِ نندوک اِنت-

سول سوسائٹی پنجگور ءِ رد ءَ مسرور عمر یک وش تبیں،وش تواریں ازمکار ءُ چاگردی باسکے – آئی ءَ گُشتگ ما واکداریں ادارھاں گوں دزبندی کن ایں آ مسرور عمر ءَ یل بہ کن اَنت-

زانگ بہ بیت ھمے ھپتگ ءَ چہ پنجگور ءَ دومی چاگردی باسک اِنت پوج ءُ دزگیر کرتگ ءُ برتگ، اشی ءَ پیسر پنجگور ءِ دمگ عیسیٰ ءَ پوج ءَ ملک میران آوار جنگ ءَ پد بیگواہ کرتگ اَت انگت ءَ بیگواہ اِنت-

سرجمیں بلوچستان ءَ زورانسری آوار جنیانی نوکیں درچ بندات بیتگ کہ چریشی ءَ دَہ روچانی تہ ءَ چِل مردم ءِ کچ ءَ مردم آوار جنگ بیتگ اَنت-

سول سوسائٹی پنجگور ءِ گوشگ اِنت سیکورٹی پورسز ءَ جتا جتائیں جاھاں بیڑ برگ ءُ ورنایانی آوار جنگ روچ پہ روچ گیش بیان اِنت چریشی ءَ نا ایوک ءَ مھلوک بلکیں ھما کھولانی مردم بے کسور اَنت آ آوار جنگ بیگ ءَ اَنت آیانی دلاں پوج ءِ واستا گیش زھر ودی بیگ ءَ اِنت-

سربوتگیں ھالانی رِد ءَ بلوچستان ءِ تیاب دپی دمگ گوادر ءَ پاکستانی پوج ءِ دست ءَ زورانسری آوار جنگ بوتگیں دشت ءِ دمگ شولی ءِ جھمنندیں کسانسالیں ورنا مروچی شش سال ءَ پد زنداناں چہ یل بوتگ ءُ وتی گِس ءَ سربوتگ – آئی ءِ یل کنگ ءِ ھال چہ کھول ءِ نیمگ ءَ راست کنگ بوتگ –

زورانسری آوار جنی ءَ پد یل بوتگیں ورنا ءِ پجار مُسلم ء بشام جھمنند دشت شولی ءِ نام ءَ چہ بوتگ – مسلم سال دوھزار ءُ ھبدہ ءِ اکتوبر ءِ ماہ ءَ سیزدہ ءِ رمس ءَ پاکستانی پوج ءَ چہ گوادر ءَ آوار جتگ ءُ بیگواہ کُتگ کہ مروچی یل کنگ بوتگ –

زانگ بہ بیت بلوچستان ءِ جتا جتائیں ھند ءُ دمگاں پاکستانی پوج ءَ مزنیں کساسے ءَ مردم آوار جتگ ءُ بیگواہ کُتگ انت ءُ آوار جنی ءِ درچ یکشل ءَ برجاہ انت ءُ بلکیں ھمے ماہ ءَ آئی ءِ تہ ءَ گیشی آرگ بوتگ، دومی نیمگ ءَ کمے کساس ءَ چیزے مردم یل کنگ بوگ انت ءُ پد ءَ دو سری دگہ مردم آوار جنگ بوگ ءَ انت –

بلوچستان ءِ دمگ نوشکی ءَ ھمے ماہ ءَ بیتگیں اُرش ءِ ایف آئی آر نبشتگ کنگ بیتگ۔

اھوالانی ردءَ پاکستانی لشکریانی بنجاھی کیمپ ءِ سرءَ اُرش ءِ ایف آئی آر سی ٹی ڈی تھانہ ءَ نبشتگ کنگ بیتگ۔ ایف آئی آر ایف سی کارمند ءِ مستری ءَ سی ٹی ڈی تھانہ رخشان ڈویژن ءَ نبشتہ کنگ بیتگ، ایف آئی آر ءِ تہءَ مجید بریگیڈ ءُ دگہ کمک کارانی نامینگ بیتگ اَنت ۔ ایف آئی آر ءِ تہءَ کُشگ، کُشگ ءِ کوشست، ناشرکاری ایکٹ ءَ ھوار دگہ ھم دفعات ھوار اَنت۔

ایف آئی آر ءِ تہءَ کُشگ بیتگیں کارمنداں ابید اُرشکارانی گورءَ دزگیر کُتگیں مڈیاں ھوار دگہ اھوال ھم نبشتہ کنگ بیتگ اَنت۔

زانگ بہ بیت کہ ھمے ماہ ءَ دو فروری ءَ بلوچستان ءِ دمگ نوشکی ءُ پنجگور پاکستانی لشکریانی دو ھیڈکوارٹرزانی سرءَ اُرش کنگ بیتگ اَت کہ اِشانی زمہ واری بلوچ لبریشن آرمی ءِ مجید بریگیڈ ءَ من اِتگ اِت اَنت۔ بی ایل اے ءِ جارکش ءَ اَے اُرشانی تہءَ یک سد ءَ چہ گیشتر پوجی کارمندانی کُشگ ءِ زمہ واری زرتگ اَت وھدیکہ جارکش ءَ گُشتگ اَت کہ اُرش مجید بریگیڈ ءَ کُتگ کہ پدائین اُرشکارانی سرءَ بندوک اِنت۔

پیشکان سپر لیگ سَے بنام ء کپٹن کہدہ بخش پنام ءِ واجل کرکٹ گوازی بندات کنگ بوتگ ءُ مروچی سیزن ءِ اولی گوازی ریکسر کرکٹ کلب ءُ باجبر کرکٹ کلب میان ءَ برجاہ دارگ بوتگ کہ باجبر ءَ جوانیں لیب پیش داشتگ ءُ گوازی کٹ اِتگ –

ریکسر کرکٹ کلب ءُ باجبر کرکٹ کلب ءِ میان ءَ بوتگیں گوازی ءَ ریکسر ءِ کپٹن ءَ ٹاس کٹ اِتگ ءُ اولسر ءَ بیٹنگ کُتگ کہ دہ اوورانی تہ ءَ ریکسر ءِ درسیں بیٹسمین آؤٹ بوتگ انت ءُ آھاں بس سِی ءُ شش رن جوڈینتگ –

دومی اننگز ءَ باجبر کلب ءِ لیبیاں جوانیں لیب پیش داشتگ ءُ سیمی اوور ءِ تہ ءَ بید وکٹانی تاوان ءَ ریکسر ءِ داتگیں ٹارگٹ پروشتگ ءُ گوازی وتی نام ءَ کُتگ –

گوازی ءَ مھیم بابا ءَ جوانی ءَ بالنگ کُتگ ءُ آئی ءَ سَے لیبی آؤٹ کُتگ گوازی ءِ جوانتریں لیبی گوشگ بوتگ –

زانگ بہ بیت کہ پیشکان سپر لیگ سیزن سَے ءَ سرجمی ءَ یانزدہ ٹیماں بھر زرتگ کہ آھانی تہ ءَ چار ٹیم پلے آف تہ ءَ کوالیفائی کن انت – اے ٹورنمنٹ بندات پیشکان کرکٹ کمیٹی ءِ سرکماش ماسٹر اشرف ءَ کُتگ ءُ اشی ءِ ھمراھی ءَ گوستگیں یو سی نازُم محمد ایوب تاج محمد، بابا آدم ، ڈاکٹر ارشاد، سہیل فضل، فرید غلام ءُ دگہ مھماناں اتکگ ءُ ٹورنمنٹ ءِ ستاشانی کُتگ ءُ.لیبی دلبڈی داتگ انت –

سربوتگیں ھالانی رِد ءَ سند ءِ مزن شھر کراچی ءَ پاکستانی پوج ءَ بلوچستان ءِ دمگ کوھلو ءِ جھمنندیں ورنا زورانسری آوار جتگ ءُ بیگواہ کُتگ – زورانسری آوار جنگ بوتگیں ورنا ءِ پجار چارگل ءِ نہال شاہیجہ مری ءِ نام ءَ چہ بوتگ –

اھوالکار ءِ رِد ءَ اے ورناہ پاکستانی پوج ءَ نُھ فروری ءِ سھب ءِ ادار نُھ ءِ میان ءَ پاکستانی پوج ءَ کراچی ءِ دمگ چہ گلشن میمار ءَ آوار جتگ – ورناہ کوھلو ءِ جھمنند اِنت وتی کار ءِ ھاتر ءَ کراچی ءَ شُتگ بوتگ کہ زورانسری آوار جنی ءِ آماچ بوتگ –

زانگ بہ بیت ھمے ھپتگے اے دومی وئیل انت اشی ءَ پیسر بلوچستان ءِ دمگ پنجگور جاھمنند معراج ھم پوج ءَ کراچی ءِ دمگ رئیس گوٹ ءَ آوار جتگ –

دومی نیمگ ءَ بلوچستان ءِ جتا جتائیں ھند ءُ دمگاں پاکستانی پوج ءَ تنی وھدی سِی مردماں گیش آوار جتگ ءُ بیگواہ کتگ انت ءُ چار مردم کُشتگ انت –

سربوتگیں ھالانی رِد ءَ بلوچستان ءِ بنجاھی شھر شال ءَ چہ 135 کلومیٹر دور ھرنائی ءِ دمگ شاھرگ ءَ ناشناسیں سلاہ بندیں مردماں پاکستانی پوج ءِ پانگس ءِ سر ءَ راکٹ ءُ دگہ سلاھاں گوں اُرش کُتگ –

اھوالکار ءِ رِد ءَ ناشناسیں سلاہ بندیں مردماں کھوسٹ ءَ برجاھیں پاکستانی پوج ءِ پانگس نشانگ کُتگ اُرش ءِ آسر ءَ پاکستانی پوج ءَ جانی ءُ مالی تاوان ءِ گمان کنگ بیت اتنت –

بلے پدا ھم تنی وھدی پوجی بنشون ءِ نیمگ ءَ اے درگت ءَ ھچ وڈیں درشان دیگ نہ بوتگ –

زانگ بہ بیت ھرنائی ءُ آئی ءِ کش ءُ کری دمگاں چدوپیسر ھم پاکستانی پوج ءِ سر ءَ اُرش کنگ بوتگ کہ اُرشانی زمّہ واری بلوچ آجوئی لوٹوکیں سلاہ بندیں گلاں منّ اِتگ انت بلے اے اُرش ءِ زمہ واری تنی وھدی ھچ گل ءَ نہ منّ اِتگ –