TBP Balochi

بلوچستان ءَ بندات بیتگیں زورانسری بیگواھیانی نوکیں لڑ اوشتگ ءِ نام گرگ ءَ نہ اِنت اے نوکیں لڑ ءِ تہءَ داں انگت یازدہ روچانی نیام ءَ بے کساس مردم بیگواہ کنگ بیتگ اَنت کہ اِشی تہءَ داں انگت پنجاہ ءِ کچءَ مردمانی پجار بیتگ۔

ڈیرہ مراد جمالی ءَ چہ دگہ سَے مردمانی بیگواھی ءِ ھال اِنت کہ اشانی تہءَ دو مردمانی پجار بیتگ کہ اشانی نام بختیار ء حمزہ ءُ صاحب ءِ حمزہ ڈومکی ءِ ناماں بیتگ۔ وھدیکہ سیمی مردمے پجار داں انگت نہ بیتگ۔

ھمے ماہ ءِ تہءَ سرجمیں بلوچستان ءَ چہ مردمانی زورانسری بیگواھی ءِ وئیلانی اناگتی تیزی گندگ ءَ پیداک اِنت کہ اِشی تہءَ بلوچستان ءَ لشکری مردماں دزگیر کنگ ءَ پد ناشناسیں جاھاں بُرتگ اَنت۔

بلوچستان ءِ دمگ نوشکی ءَ گوستگیں روچاں ایف سی ءِ ھیڈکوارٹر ءِ سر ءَ اُرش کنوکیں مردمانی لاشانی دیگ ءَ چہ واکدار انکار کنگ ءَ اَنت۔

ٹی بی پی ءَ رس اتگیں اھوالانی رد ءَ دو فروری ءَ اُرش کنوکیں بی ایل اے ءِ پدائیانی کھولاں نیمگ ءَ وتی مردمانی لاشاں وتی بُنکی شھراں برگ ءُ کل ءُ کسارت کنگ لوٹگ ءَ اَنت بلے نوشکی ءِ واکداراں لاشانی دیگ ءَ چہ انکار کنگ ءَ اَنت۔

کھولاں ٹی بی پی ءَ گُشتگ کہ اے درگت ءَ ڈپٹی کمشنر، ایس ایچ او ءُ دگہ واکداراں گوں گپ کُتگ بلے اے مردم جتائیں نیمون کنگ ءَ اَنت ءُ لاشاں کھول ءِ دست ءَ دیگ ءَ نہ اَنت۔

کھولاں گیشتر گُشتگ کہ لاشاں گوں شرپ ءَ کل ءُ کسارت کنگ مئے دود ءُ ربیدگ ءِ بھر اِنت وھدیکہ پنجگور ءِ ارشءَ ھواریں پدائیانی لاش ھما روچ ءَ کھول ءِ دست ءَ دیگ بیتگ اَنت بلے نوشکی ءِ وتگڑیں ءِ درشانی ءَ کنگ ءَ اَنت۔

زانگ بہ بیت دو فروری ءِ شپ ءَ نوشکی ءُ پنجگور ءَ یکیں وھد ءَ ایف سی ھیڈکوارٹر انی سر ءَ ترندیں اُرش بیتگ اِت اَنت کہ اِشانی زمہ واری بلوچ لبریشن آرمی ءَ زرتگ اَت۔

بی ایل اے جارکش جیئند بلوچ ءَ پد ءَ سرجمیں اھوال شِنگ کنان ءَ گُشتگ اَت کہ نوشکی اُرش ءَ بی ایل اے مجید بریگیڈ ءِ نھ ءُ پنجگور ءَ ھپت پدائیاں بھر زُرتگ۔

نوشکی ءَ اُرش کنوکیں اُرشکاراں چہ یکے ءِ سیادی گوں نوشکی ءِ جند ءَ بیتگ کہ آئی ءِ پجار میرین جمالدینی ءِ نام ءَ بیتگ کہ آئی ءَ تراکناکیں شورواں پُریں گاڑی ایف ھیڈکوارٹر ءِ بنجاھی گیٹ ءِ دپءَ تراکینتگ اَت وھدیکہ ایندگہ اُرشکار بلوچستان جتاجتائیں شھرانی مردم بیتگ اَنت-

بلوچ نیشنل موومنٹ ءِ بنجاھی جارکش ءَ گُشتگ کہ بلوچستان ءَ پاکستانی پوج ءِ نیمگ زورانسری بیگواھیانی تیزی آرگ بیتگ۔ گوستگیں ھپتگءِ تہءَ پنجاہ ءَ چہ گیش بلوچ دزگیر کنگ ءُ بیگواہ کنگ بیتگ اَنت۔ اشانی تہءَ گیشتر ورناہ ءُ نودربر ھوار اَنت۔

آئی ءَ گُشتگ کہ یک نیمگے پاکستانی لشکریانی نیمگ ءَ ھواریں سزا ءِ دروشم ءَ بلوچ جھدکارانی سیاد چِست کنگ ءُ بیگواہ کنگ ءَ اَنت ءُ دومی پروش ورگ ءِ سوب ءَ لس مھلوک ءَ نشانگ کنگ ءِ درچ ترندی ءَ گوں برجاہ اَنت۔ اے پروش ورگی ءِ سوب گوستگیں دو دھکاں چہ بلوچ راجی آجوئی ءِ جھد اِنت۔ پاکستان ءِ کوشست بیتگ کہ مردماں تاگت ءُ توپگ ءِ زور ءَ راجی جُنز ءِ ھمراھداری ءَ چہ دیر دارگ بہ بیت۔ اِشی تہءَ بے سوبی ءَ پد پاکستان ءَ وتی زورانسری بیگواھی ءِ پالیسی ءِ تہءَ سک باز ترندی آرتگ اِش۔

جارکش ءَ گُشتگ کہ بلوچستان ءَ برجاھیں زوراکی ءَ ترندی، زورانسری بیگواھیانی تہءَ گیشی ءُ مردماں دروگیں میڑانی تہءَ کُشگ ءِ بگیرءَ بی این ایم ءَ میان اُستمانی تکءَ زھرشانی کنت۔ اِشی ءَ ابید جتاھیں ملک ءُ ادارگانی سرءَ نمدی ھم نبشتگ کنگ بنت۔

قائد اعظم مزن شھدربرجاہ ءِ بیگواھیں نودربر حفیظ بلوچ ءُ دگہ بیگواھیں مردمانی پھازیتگیں پئیم ءَ یل کنائنگ ءِ ھاترءَ سول سوسائٹی ءِ نیمگ ءَ خضدار زھرشانی روانک کشگ بیتگ۔

اھوالانی ردءَ بلوچستان ءَ زورانسری بیگواھیانی ءُ نودربر حفیظ بلوچ ءِ زورانسری بیگواھی ءِ ھلاپ ءَ خضدار ءَ زھرشانی روانک کشگ بیتگ کہ اِشی تہءَ مزنیں کساس ءَ بچک ءُ جنکیں نودربراں ھوار زند ءِ جتائیں تک ءَ سیادی داروکیں مردماں بھر زرتگ۔

زھرشانی کنوکاں خضدار ءَ چہ بیگواھیں قائداعظم یونیورسٹی ءَ ایم فل ءِ نودربر حفیظ بلوچ ءِ رکیتگیں دروشم ءَ یل کنائنگ ءِ ھاترءَ خضدار ڈسٹرکٹ ہائی کورٹ ءِ دیما نندانک داتگ وھدیکہ زھرشانی کنوکاں حفیظ بلوچ ءُ دگہ بیگواھیں مردمانی یل کنائنگ ءِ ھاترءَ ءُ واکدارانی ھلاپ ءَ اوگام جتگ۔

مظاہرین کا کہنا تھا کہ بلوچستان کے طویل و غرض جبری گمشدگیوں کا جو سلسلہ ہے خضدار شہر ہمیشہ اس سے متاثر رہا ہیں، آئے روز ہمارے طلباء کو مختلف علاقوں سے لاپتہ کیا جارہا ہے جبکہ اس دوران خضدار سے کئی افراد لاپتہ کردئے گئے ہیں جبکہ اس سے قبل کئی افراد پہلے سے لاپتہ ہیں-

زھرشانی کنوکاں گُشتگ کہ بلوچستان ءَ دراج کشیں زورانسری بیگواھیانی درچ کہ برجاہ اِنت خضدار ءِ شھر مدام چریشی ءَ سانمند بیتگ، ھمک روچ مئے نودربر چہ جتاھیں شھراں بیگواہ کنگ بیگ ءَ اَنت وھدیکہ اے نیام ءَ خضدار ءَ چہ مزنیں کساس ءَ مردم بیگواہ کنگ بیتگ اَنت وھدیکہ بازیں مردم چہ پیسرءَ ھم بیگواہ اَنت۔

زھرشانی کنوکانی تہءَ نودربر ھم ھوار بیتگ اَنت کہ آھاں مئے اُستاد “حفیظ بلوچ” ءَ یل بہ کن اِت ءِ پلے کارڈ دستءَ بیتگ اَنت۔ نودربرانی گُشگ اَت کہ حفیظ بلوچ وانینگ ءِ نیام ءَ چہ کلار روم ءَ نودربرانی دیما دزگیر کنگ ءَ پد بیگواہ کنگ بیتگ۔

زھرشانی ءَ ھواریں مردمانی گُشگ اَت کہ بلوچستان ءِ شھر خضدار ءَ اے اولی وئیل نہ اِنت کہ کس مزانت حفیظ ءِ بیگواہ کنوک کئے اَنت مئے لوٹ اِنت کہ حفیظ بلوچ زیت دیما آرگ بہ بیت ءُ بلوچ نودربرانی بگیر ءَ اے گیر قانودی زوراکی ھلاس کنگ بہ بیت۔

زھرشانی ءَ نوشکی ءَ چہ سَے سال پیسر بیگواہ بیتگیں آصف ءُ رشید ءِ گھار سائرہ ھم گون بیتگ کہ آئی ءَ زھرشانی ءِ سروکی کُتگ۔ سائرہ بلوچ ءَ تران کنان ءَ گُشتگ کہ ما ھر ھمک جاہ ءَ پہ وتی دوستیگیں مردماں زھرشانی کنیں کہ چمودہ مارہ کمک ھم اوست بہ بیت بلے داں انگت مارا ھچ پئیمیں دیمروی گندگ ءَ نہ اِیت وھدیکہ مئے بیگواھیں دوستیگیں مردمانی یل کنگ ءَ ابید گیشتر مردم بیگواہ کنگ بئیگ ءَ اَنت۔

پاکستان ءِ پرگینگ پنجاب ءِ راجدانی لاھور ءَ بلوچستان ءَ سیادی داروکیں سَے پوریاگر بیگواہ کنگ بیتگ اَنت۔

بیگواہ بیتگیں مردمانی پجار جمال خان بلخانی، مھمد نواز بلخانی ءُ فاروق خان ءِ ناماں بیتگ اَنت۔

بیگواہ بیتگیں مردم رادا شام کوہ سلیمان ءِ جھمنند اَنت کہ لاھور ءَ پوریاگری کنگ ءَ بیتگ اَنت کہ لشکریاں ھپت فروری ءَ دزگیر کنگ ءَ پد بیگواہ کُتگ اَنت۔

یات بہ بیت بلوچستان ءَ زورانسری بیگواھیانی وئیلانی تہءَ ترندی ءَ گوں گیشی پیداک اِنت اِشی ءَ ابید پنجاب ءُ سندھ ءِ دگہ دمگاں چہ مردمانی بیگواھی ءِ ھال دیما پیداک اَنت۔

بلوچستان ءِ دمگ قلات ءِ ھند منگچر ءَ آدینگ ءِ روچ ءَ پاکستانی پوج ءَ جتا جتائیں میتگاں لشکر کشی ءِ میان ءَ پنچ مردم آوار جنگ ءَ پد بیگواہ کتگ اَنت-

گیشیں ھالانی رِد ءَ منگچر خلق مجید شھید ءَ پاکستانی پوج ءِ کارندھاں لوگ لوگ ءَ پٹ ءُ پول کتگ مردم آوار جتگ اَنت-

بیگواہ کنگ بوتگیں مردمانی تہ ءَ یک مردمے ءِ پجّار وطن ٹیچر ایسوسی ایشن قلات ءِ دمگی صدر ماسٹر کفایت اللہ لانگو ءِ نام ءَ چہ بوتگ-

دمگی اھوالکارانی رِد ءَ آدینگ ءِ سُھب ءَ پوج ءِ کارندھاں لوگ لوگ ءَ پٹ ءُ پول کتگ- وھدے کہ آ دگہ بیگواہ بوتگیں چاریں مردمانی پجّار نہ بوتگ اَنت-

دومی نیمگ ءَ سرکاری بنشون ءِ نیمگ لشکر کشی ءِ درگت ءَ ھچ وڑیں پدری نہ کتگ-

زانگ بہ بیت اے ماہ ءَ بلوچستان ءِ جتائیں دمگاں 35 ءَ گیش مردم زورانسری آوار جنی ءِ رپورٹ دیم ءَ اَتکگ اَنت-

بلوچستان ءَ دگ ءِ وئیل انگت ھلاس نہ بوتگ انت جتا جتائیں دمگاں بوتگیں وئیلاں زالبول ءُ دو زھگاں ھوار ھپت مردم بیران بوتگ انت وھدیکہ بازینے زدگ بوتگ انت –

گیشیں ھالانی رِد ءَ مکران کوسٹل ہائی وے ءَ ھور کور ءِ نزیک ءَ کوچ ءُ سوزکی گاڑی ءِ ڈیک ورگ ءِ سبب ءَ زالبولے ءُ گوں دو زھگ ءَ بیران بوتگ انت ریسکیو ءَ جون نادراھجاہ ءَ سرکتگ انت –

دومی وئیل بلوچستان ءِ دمگ واشک باغ سوپک ءَ دیم ءَ اتکگ کہ سی پیک دگ ءِ سر ءَ تیز رؤکیں گاڑی ءَ یک مردمے لگت داتگ کہ ھما دمان ءَ بیران بوتگ –

واشک ءَ بیران بوتگیں مردم ءِ کھول ءَ وئیلے بگیری ءَ باغ سوپک ءَ گوادر تاں شال ءَ رؤکیں دگ بند کُرتگ چریشی ءَ دگ بند بوتگ ءُ بازیں گاڑی اوشتاتگ بلے پد ءَ ھم دمگی واکداراں گند ءُ نند ءَ پد زھرشانی ھلاس کنائینتگ –

ھمے وڑ مکران کوسٹل ہائی وے ءَ کوچ ءُ سوزکی ءِ ڈیک ورگ ءِ سوب ءَ دو مردم بیران بوتگ اَنت بازینے زدگ بوتگ انت – زدگ ءُ بیران بوتگیں مردم اُوتھل نادراھجاہ ءَ سر کنگ بوتگ انت –

دومی نیمگ ءَ ھزدار ءِ دمگ وڈھ ءَ جتا جتائیں ھند ءُ دمگاں سَے دگ ءِ وئیلاں یک مردمے بیران ءَ شش زدگ بوتگ انت –

وڈھ اولی وئیل دراکھالہ عبدالرؤف اسٹاف ءِ نزیک ءَ دیم ءَ اتک کہ گاڑی ءَ گوں پرپٹ ءَ ڈیک وارتگ چریشی ءَ پرپٹ سوار بیران بوتگ وھدیکہ کلی براہمزئی ءِ نزیک کوچ ءِ ڈیکر کنگ ءَ دو پرپٹ سوار زدگ بوتگ انت ھردو نادراھجاہ ءَ سرکنگ بوتگ انت –

سیمی وئیل ءَ فیلڈر گاڑی ءَ پرپٹ ءِ ڈیکر کُتگ چریشی پرپٹ سوار غلام قادر لہڑی یک زالبول ءُ زھگاں ھوار چار مردم زدگ بوتگ انت وھدیکہ زدگ بوتگیں مردم وڈھ نادراہ جاہ ءَ سر کنگ بوتگ انت –

بلوچ لبریشن آرمی ءِ جارکش جیئند بلوچ ءَ رسانکدراں شنگ کرتگیں درشان ءِ تہ ءَ گوشتگ سرمچاراں ھرنائی ءِ دمگ شاھرگ ءَ کھوسٹ ءِ ھند سر ءَ زورگریں پاکستانی پوج ءِ پرنٹیئر کور ءِ بُنجاھی بُنجل ءِ سر ءَ گوستگیں روچ ءَ نشانگ کتگ –

جارکش ءَ گوشتگ سرمچاراں راکٹ لانچر ءُ دگہ مزنیں سلاھاں گوں نشانگ کتگ ءُ پوج ءَ را مزنیں کچے ءَ جانی ءُ مالی تاوانانی دیمپان بیتگ-

جارکش جیئند بلوچ ءَ گوشتگ کہ پاکستانی پوج ءِ سر ءَ اُرش بلوچستان ءِ آجوئی ءَ داں برجاہ بنت-

وائس فار بلوچ مسنگ پرسنز ءِ جنرل سیکرٹری سمی دین بلوچ ءَ شال پریس کلب ءَ پنجگور ءُ بلوچستان ءِ دگہ دمگاں نودربراں ھوار دگہ مردمانی زورانسری آوار جنی ءُ بلوچستان ءِ جتا جتائیں ھند ءُ دمگاں فوج ءِ کریک ڈاؤن ءِ درگت ءَ اھوالکاراں گوں تران کتگ –

شال پریس کلب ءَ اھوالکاراں گوں تران کنان ءَ سمّی دین بلوچ ءِ گوشگ ات کہ ھنچو کہ شما سرپد اِت گوستگیں دو دھکاں بلوچستان ءِ تہ ءَ زورانسری آوارجنیانی درچ یکشل ءَ برجاہ انت البتہ ءَ اے زورانسری آوارجنیانی تہ ءَ کدی کمی ءُ کدی گیشی گندگ بیت انت بلے گوستگیں دو ھپتگاں اشی ءِ تہ ءَ ھد ءَ چہ گیش گیشی گندگ کیت کہ تنی وھدی انگت برجاہ انت –

وی بی ایم پی ءِ رھشون ءِ گوشگ ات کہ گوستگیں روچاں نوشکی ءُ پنجگور ءِ وئیل ءَ پد لس مھلوک نشانگ کنگ بوگ انت پدردی گپے کہ ھمینچو ایرجنگ بہ بیت کہ کم انت اے میان ءَ بازیں نودربرے پوج ءَ آوار جتگ ءُ بیگواہ کُتگ اَنت کہ آھانی باروا ناکہ کانودی کاروائی کنگ بوگ انت ءُ ناکہ آھانی کھول سرپد انت کہ آھانی دوستیگیں مردم آوار جنی ءَ پد کجا برگ بوتگ اَنت – سمی بلوچ ءِ گوشگ ات کہ ما ھمے دمگاں لھتے ھنچیں کیس یکجاہ کُتگ کہ شمئے اھوالکارانی دیم ءَ ایر کنین ئے –

آئی ءِ گوشگ انت کہ گوستگیں روچاں بلوچستان ءِ جتا جتائیں ھند ءُ دمگاں پاکستانی پوج ءَ بازیں بلوچ نودربرے زورانسری آوار جتگ ءُ بیگواہ کتگ انت چریشی ءَ تُرس ھم ودی بوتگ – اسلام آباد اسلامک یونیورسٹی نودربر احتشام بلوچ کہ وتی چٹیاں وتی گِس ءَ اتکگ بوتگ کہ سَے فروری ءَ پاکستانی پوج ءَ پنجگور بازار ءَ چہ آوار جتگ ءُ پد ءَ آئی ءِ تیر سپتگیں جون چگل داتگ وھدیکہ کہ پنجگور ءَ یک دگہ ماژگی نادراھے ھم پوج ءَ کُشتگ ءُ چگل داتگ –

آئی ءَ گوشتگ کہ ھمے روچ ءَ پاکستانی پوج ءَ تجابان ءَ یک ورنائیں نودربر الطاف جاڑا زورانسری آوار جتگ ءُ بیگواہ کتگ پد ءَ چار فروری ءَ دروگیں میڑ ءِ نام ءَ کُشتگ ءُ آئی ءِ جون ویرانگاں چگل داتگ وھدیکہ چیزے روچاں پد پنجگور ءَ چہ چاگردی باسک باپاری مردم ملک میران ءَ ھوار رجب دل، مراد باسط، حسن شبیر، حاجی کریم، مسرور عارف، یحییٰ ءُ رئیس پاکستانی پوج ءَ زورانسری آوار جتگ ءُ بیگواہ کتگ انت کہ انگت بیگواہ انت –

اھوالکاراں گوں تران کنان ءَ وی بی ایم پی ءِ رھشونانی گوشگ ات کہ اے میان ءَ پاکستانی پوج ءَ تربت ءُ نوشکی ءَ ھوار دگہ دمگاں ھم لشکر کشی کُتگ ھشت ءُ نُھ فروری ءَ تربت ءَ بازیں مردمے آوارجنی ءَ پد بیگواہ کتگ انت کہ آھانی تہ ءَ نزیر ء رحمت، نظام نوروز، رزاق بلوچ پجار بوتگ انت ھمے میان ءَ شش فروری ءَ نوشکی ءَ چہ وحید بلوچ، میع بلوچ، فرید عاصم ھم پوج ءِ دست ءَ زورانسری آوار جنی ءِ ھال سربوتگ انت –

چہ ھزدار ءَ ایم فل ءِ نودربر حفیظ بلوچ ءِ زورانسری آوار جنی ءِ درگت ءَ آھاں گوں اھوالکاراں تران کنان ءَ گوشتگ کہ حفیظ بلوچ وتی چٹیانی گوازینگ ءَ ھزدار ءَ اتکگ بوتگ کہ زورانسری آوار جنگ ءُ بیگواہ کنگ بوتگ وھدیکہ شال ءَ دگہ دو ورناھیں نودربر ہارون ءُ ندیم زورانسری آوار جنگ ءُ بیگواہ کنگ بوتگ انت –

وی بی ایم پی ءِ رھشونانی گوشگ ات کہ اے میان ءَ بازینے زورانسری آوارجنی ءِ آماچ بوتگ کہ آھانی تہ ءَ لھتے پجار مول جان ء دربیش، کریم داد ء محمد عمر، یاسین ء میاں سمد ، پھٹان ء کہدہ اللہ بخش، شبیرجان، امان اللہ، صمد ء سخی داد محمد خان، دھنی بخش بگٹی ناماں چہ بوتگ انت کہ بلوچستان ءِ جتا جتائیں ھند ءُ دمگاں ھمے ماہ ءَ آوار جنگ ءُ بیگواہ کنگ بوتگ انت –

اھوالکاراں گوں تران کنان ءَ وی بی ایم پی ءِ رھشون ءِ گوشگ ات کہ پاکستان ءِ مزن وزیر ءَ وائس فار بلوچ مسنگ پرسنز ءِ مردم باور کنائینتگ انت درسیں مردم زوتاں زوت یل کنگ بنت آھانی یل کنگ وتی جاہ ءَ بلوچستان ءِ جتا جتائیں جاھاں مردمانی زورانسری آوارجنی ءِ تہ ءَ گیشی آرگ بوتگ – آھاں ادارہ ءُ ملک ءِ مقتدرہ ءَ چہ لوٹ کتگ گوشتگ کہ درسیں مردم دیم ءَ آرگ بہ بنت اگاں آھاں جرمے کُتگ گڑا آمیدگس ءَ آرگ بہ بنت ءُ سزا دیگ بہ بنت اے وڑ مردماں بیگواہ مہ کن انت ءُ آھانی کھولاں ازیت مہ دے اَنت-

آھانی گوشگ انت کہ بیگواھی ءِ جیڑہ ءَ دیرگیں جیڑھے تنی وھدی ملکی ادارہ اے جیڑہ ءَ ھچ سرپد نہ انت گوستگیں روچاں نوشکی ءُ پنجگور ءِ وئیل ءَ پد سربوتگیں ءُ راستیں ھالانی رِد ءَ ایوک ءَ نوشکی ءَ کساس سد مردم آوار جنگ بوتگ کہ آھانی تہ ءَ گیشتریں کچ ورنایانی ئیگ اِنت وھدیکہ سرکار تنی وھدی یک بِلے ھم سنیٹ ءِ گور ءَ پاس نہ کنائینتگ اگاں کسے ھمے پھمیت کہ مردمانی زورانسری آوار جنی ءَ بلوچستان ءِ جیڑہ گیش ءُ گیواری انت گڑا ما آھاں یاتاں پرینیں بیگواھیں مردمانی جیڑہ اھمتریں جیڑہ انت اشی ءِ گیش ءُ گیواری ءَ ابید بلوچستان ءِ جیڑہ گیش ءُ گیواری ناممکن انت –

رھشوناں وتی پریس کانفرنس گڈسر ءَ گوشتگ کہ لس مھلوک ءِ بگیری ءَ تاکت ءِ کارمرز کنگ ءُ آھانی زورانسری آوار جنی بلوچستان ءِ جیڑہ ءَ گیشتر ھراب کنت اے پریس کانفرنس ءَ چہ ما ھستیں وھدے سرکار ءُ ملکے کانود جوڑ کنوکیں ادارھاں چہ لوٹ کنیں کہ گوستگیں روچاں ھمینچو مردم کہ زورانسری آوار جنگ بوتگ اَنت زوت یل کنگ بہ بنت ءُ پیسری آوار جنگ بوتگیں مردماں یل بہ کنائین انت –

لیاری کراچی ءَ چہ بیگواہ بیتگیں محبت بلوچ ءِ کھول ءَ رسانکدراں شنگ کُتگیں وتی درشان ءِ تہ ءَ گُشتگ کہ محبت بلوچ فشریز ءَ مزدوری کُتگ ءُ رکشہ تاتکگ وتی ءُ وتی زھگانی زند گوازینتگ۔ آ بے گناہ ءُ بے قصور اِنت ۔ اگں محبت ءَ کجام ھم گناہ کُتگ گُڑءَ قانود ءِ ردءَ گامگیج زورگ بہ بیت ءُ سزا دیگ بہ بیت بلے چُش بیگواہ کنگ ءُ کھول ءَ سزا دیگ کجے انساپ اِنت ؟

آیانی گُشگ اِنت وھدے محبت بلوچ بیگواہ کنگ بیتگ گُڑا مارا گُشگ بیتگ اَت کہ جُست پرسءَ پد آ یل کنگ بیت اِنت بلے سَے ماہ گوزگ ءَ پد ھم محبت داں انگت بیگواہ اِنت۔

آیاں چہ وزیر اعظم پاکستان عمران خان، سپریم کورٹ پاکستان، وزیر اعلی سندھ، سندھ ہائی کورٹ ءُ پھازگی گلاں چہ دزبندی کُتگ محبت بلوچ یل کنگ بہ بیت۔

محبت بلوچ ءِ کھول ءَ انسانی ھقانی گل، سوشل میڈیا باسک، نیکراھی ءُ سیاسی گلاں چہ دزبندی کُتگ کہ بیست فروری یک شمبے ءِ روچ ءَ محبت بلوچ ءِ یل کنائینگ ءِ ھاترءَ یک پر ایمنیں روانکے بیوکیں آرٹس کونسل کراچی ءَ بگرداں کراچی پریس کلب ءَ کُشگ بیت درستیں انسان دوستاں چہ بھر زیرگ ءُ کھول ءَ یکجاھی درشانگ ءُ محبت بلوچ یل کنائنگ ءَ کرد پیلو کنگ ءِ دزبندی کُتگ۔