TBP Balochi

ٹی بی پی کارست

بھگت سنگھ

پولکار: حکیم بلوچ

برٹش انڈیا ءِ پنجاب پرگینگ ءِ دمگ لائل پور ءِ میتگ بنگھا ءَ 1907 ءِ 27 ستمبر ءَ کشن سنگھ سندھو ءِ لوگ ءَ ودی بیتگیں بھگت سنگھ ءِ سیادی پنجاب ءِ سکھ مذھب ءَ اَت۔ بھگت سنگھ ھپت برات ءُ گْوھارانی تہ ءَ دومی نمبر ءَ بیتگ اَت ۔ بھگت سنگھ ءِ پِت ءُ آئی ءِ ناکو چہ بن ازل ءَ پنجاب ءِ تہ ءَ برتانوی سامراج ءِ ھلاپ ءَ بیوکیں سیاسی جھد ءِ بھر بیتگ اَنت۔ آیاں کنال کالونائیزشن بل ءُ غدر پارٹی ءِ پئیمیں جُنزانی تہ ءَ بھر زُرتگ۔

بھگت سنگھ ءَ بُنکی وانگ چہ وتی بُنکی ھنکین بنگھا ءَ زُرتگ ءُ گیشتریں وانگ ءِ ھاتر ءَ لاھور ءَ دیاآنند اینگلو-ویدیک اسکول ءَ شُتگ ءُ پد ءَ لاھور ءِ نیشنل کالج ءَ چہ روکپتی آشوبی جنُزانی درگت ءَ وانگ برجاہ داشتگے۔ نیشنل کالج لاھور لالا لجپت رائے ءَ ھما وھد ءَ جوڑ کُتگ وھدیکہ مھاتما گاندھی وتی نان ک کوآپریشن موومنٹ ءِ وھد ءَ گش ایت کہ بائد اِنت ھندوستانی نودربر ھما اسکول ءُ کالجاں بھر مہ زیر اَنت کہ آ برتانیہ ءِ سرکار ءِ پلہ مرزی ءَ گوں جُنزگ ءَ اَنت۔

سردار بھگت سنگھ چہ کسانی ءَ یک آشوبی چاگردے ءِ تہ ءَ زند گوازینگ ءِ سوب ءَ در کسانی ءَ وتی مھلوک ءِ سر ءَ بیوکیں زوراکیاں سرپد بیتگ۔ بھگت سنگھ ءَ وھدیکہ آئی ءِ کھول آروس کنگ ءِ گپ ءَ کن اَنت بھگت سنگھ وتی لوگ ءَ یل کنت ءُ 1926 ءَ دیم پہ کانپور ءَ رؤت کہ اود ءَ آ نوجوان بھارت سبھا (یوتھ سوسائٹی آف انڈیا) ءَ اڈ دنت ءُ پد ءَ ھندوستان ریپبلکن ایسوسی ایشن ءِ بھر جوڑ بیت ھیچ آر سی کہ دیمترا ھندوستان سوشلسٹ ریپبلکن ایسوسی ایشن ءِ نام ءَ زانگ بیتگ اَت۔ ھمے نیام ءَ بھگت سنگھ مزنیں کچے ءَ برتانیہ ءِ سامراج ءِ ھلاپ ءَ جھدکنوکیں رھشون ءُ باسکاں ھم نیاد بیت۔

30 اکتوبر 1928 ءَ لاھور ءَ آیوکیں سائیمن کمیشن ءِ بائیکاٹ کنگ ءِ ھاتر ءَ لالا لجپت رائے ءُ ایندگہ مردم زھرشانی کنگ ءَ بنت وھدیکہ سپریٹینڈنٹ آف پولیس جیمز اسکاٹ ءِ گُشگ ءِ پد ءَ زھرشانی ءَ ھلاس کنگ ءِ ھاتر ءَ لٹ شاپی کن اَنت ءُ اے لٹ شاپی ءِ سوب ءَ لالا لجپت رائے بیران بیت۔ بھگت سنگھ ءُ آئی ءِ سنگت ھمے پیسلہ کن اَنت کہ مارا چہ انگریز سرکار ءَ بیر گرگی اِنت ءُ آیاں پسہ ءِ الم دیگی اِنت گُڑا بھگت سنگھ، سُکھ دیو ءُ راج گُرو ھمے پیسلہ کن اَنت کہ جیمز اسکاٹ کُشگی اِنت بلے ردی ءَ جیمز اسکاٹ ءِ جاہ ءَ اسسٹنٹ سپریٹینڈنٹ جون سینڈرز جنگ بیت۔ چہ دزگیری ءَ رکگ ءُ درکپگ ءِ ھاتر ءَ بھگت سنگھ وتی ریش ءَ گُڈ اِیت ءُ مِیدان کسان کنت ( زانگ بہ بیت سکھ مذھب ءِ تہ ءَ ریش ءُ میدانی کسان کنگ گناہ ءِ زانگ بیت) ءُ دیم پہ کلکتہ ءَ رؤت۔

ھندوستان ءِ تہ ءَ برتانیہ ترندی ءَ گوں جنزوکیں زوراکیانی سوب ءَ بھگت سنگھ ءُ آئی ءِ سنگت بٹوکیشور دت دھلی ءِ اسمبلی ءِ تہ ءَ بمب گواری کن اَنت ءُ پد ءَ آشوب زندگ بات ءِ اوگام جن اَنت۔ بھگت سنگھ ءُ بٹوکیشور دت وت ءَ وت دزگیر کنائین اَنت۔

بھگت سنگھ ءُ آئی ءِ سنگتاں 116 روچے شُد ھڑتال ءَ پد وتی ھکانی منارینگ ءَ پد وتی شُد ھڑتال ھلاس کُتگ۔ بھگت سنگھ ءُ آئی ءِ سنگتاں نہ تھنا سیاسی پِڑ ءَ بلکیں برتانیہ ءِ آمید گسانی دیم ءَ ھم وتی کیس کانودی ھساب ءَ ایر کُتگ۔

بھگت سنگھ ءُ آئی ھمراہ سُکھ دیو، راج گُرو، بٹوکیشور دت ءُ دگہ بندیگانی ھاتر ءَ مھلوک ءِ کمک ءُ یکجاھی ءِ تُرس ءِ سوب ءَ بھگت سنگھ، راج گُرو ءُ سکھ دیو ءَ بیست ءُ سَے مارچ 1931 ءَ پاھو دیگ بیت اِنت۔ بھگت سنگھ ءُ آئی ءِ سنگتاں آیانی پاھو دیگ ءِ راستیں روچ بزاں بیست چار ءَ پیسر بیست ءُ سَے ءِ بیگاہ ءَ پاھو دیگ بیت ءُ آیانی جون ھم چیروکائی جیل ءَ چہ کشگ ءُ گندھا سنگھ والا میتگ ءَ سوچگ بنت ءُ آیانی پُر ھم چیروکائی ستلج کئور ءَ دور دیگ بنت۔

بھگت سنگھ ءُ آئی ءِ ھمراھانی کوش ءَ پد ءَ پد ھندوستان ءَ مزنیں کساسے ءَ زھرشانی بنت۔ بازیں زانتکارانی رد ءَ بھگت سنگھ ءِ لوٹ داں انگت سرجم نہ اَنت بھگت سنگھ ءِ ھیالانی ھندوستان یک سرجمیں ءُ مھکمیں ھندوستان ءِ بیتگ نہ کہ پروشت ءُ پروش ءِ آماچیں۔ بھگت سنگھ ءِ لوٹ بیتگ کہ مئے مھلوک ابید چہ رنگ نسل ءُ مذھب درست یک ھساب ءَ بہ بنت۔

دلگوش: ٹی بی پی کارستانی درگت ءَ سرپدی ءُ اھوال چہ انٹرنیٹ ءُ دگہ جاھاں زیرگ بیتگ اَنت ءُ اِشانی تہ ءَ ردی اگاں گیشی ءُ کمی الم بیت کن اَنت-

بلوچ نیشنلسٹ آرمی ءِ جارکش مرید بلوچ ءَ رسانکدراں شنگ کُتگیں وتی درشان ءِ تہءَ گُشتگ کہ مئے سرمچار شمبے ءِ سھب ءَ گوادر ءِ دمگ پسنی ءَ یک پوجی گشتے ءَ بیتگ اَنت کہ آودہ آیانی پاکستانی زورگیریں لشکر ءُ آیانی زرداشتگیں ڈیتھ اسکواڈ ءَ گوں جنگ بیتگ اے دراجیں جنگ ءَ ورناہ ھدایت اللہ پنام بالاچ بلوچ وتی دگہ سنگتانی چہ دژمن ءِ انگیراں کشگ ءِ ھاترءَ گوں دژمن ءَ پہ دلیری ءُ تمردی ءَ دیمپان بیتگ، یک ادار ءِ میڑ ءَ دشمن ءِ بازیں کارمند کُشتگ ءُ ٹپی بیتگ اَنت ءُ دگہ سرمچاریں سنگت دژمن ءِ انگیراں چہ سوبمندی ءَ گوں در کپتگ اَنت ءُ ھدایت جان ءَ سرزمین رکینگ ءِ جھد ءَ نمیران بیتگ۔ گل آئی ءَ آئی مزنشانیں دیمھونی ءِ سرءَ ستاشانی پیش کنت ءُ سھریں دروت پیش کنت۔

جارکش ءَ گُشتگ کہ ھدایت اللہ پنام بالاچ جان ء نعمت اللہ جھمنند پیدارک 2014 ءَ بلوچ سلاہ بندیں جھداں گوں بندوک بیتگ آئی ءِ یک مسترے براتے شجاعت اللہ استانی ادارگانی دست ءَ نمیران کنگ بیتگ وھدیکہ دگہ یک براتے عنایت اللہ داں انگت ھم استانی زندانانی تہ ءَ لٹ ءُ کُٹانی آماچ کنگ بیگ ءَ اِنت۔ ھدایت جان یک وتن دوستیں لوگے ءَ چہ سیادی داریت آئی کھول ءَ سیادی داروکیں سَے پرزند کماش کہدا کمال، اسلام جان، اکرام ھم دژمن ءِ ارشاں نمیران کنگ بیتگ اِت اَنت۔ ھدایت اللہ بلوچ یک مھنتی ءُ دلیریں ورناھے بیتگ آئی ءَ ھوشاپ، تربت، بالگتر، پسنی ءُ ایندگہ کش ءُ کری دمگانی تہءَ وتگڑیں سی پیک ءِ ھلاپ ءَ بیوکیں اُرشانی تہءَ اژدری کرد پیلو کُتگ ءُ دژمن ءَ مزنیں دل جتگ آئی لائقیاں گندان ءَ دو سال پیسر گل ءَ وتی ھوشاپ فیلڈ کیمپ ءِ سیکنڈ آپریشنل کماندار ءِ اگدہ داتگ اَت۔

جارکش ءَ گُشتگ دیمھونیانی یکشلی داں سرڈگار ءِ آجوئی ءَ برجاہ مان اَنت۔

یونائٹیڈ بلوچ آرمی ءِ جارکش مزار بلوچ ءَ رسانکدراں شنگ کُتگیں وتی درشان ءِ تہ ءَ گُشتگ کہ گوستگیں شپ ءَ ادار نھ ءَ مئے سرمچاراں خضدار ءِ بنجاھی دگ ءِ سر ءَ جناح کینٹ ءِ ھنکین ءَ زورگریں پاکستانی لشکریانی جنزوکیں ٹولی ءِ گاڑی ریموٹ کنٹرول بمب ءَ گوں نشانگ کُتگ۔

آئی ءَ گُشتگ کہ اُرش ءِ تہ ءَ زورگیریں لشکریانی دو کارمند مُرتگ اَنت ءُ آدگہ ٹپی کُتگ اَنت وھدیکہ آھانی گاڑی تراک ءَ سرجم ءَ تباہ بیتگ۔

جارکش ءَ گُڈ سر ءَ گُشتگ کہ مئے اُرش داں ایردستیں بلوچستان ءِ آجوئی ءَ زورگیریں لشکریانی ھلاپ ءَ برجاہ مان اَنت۔

بلوچستان ءِ دمگ سوراب ءَ دگہ شش مردم ھونی ئیں دگ ءَ وتی ارجان جتگ اَنت-

سر بیتگیں اھوالانی رد ءَ شال تاں کراچی ءَ روکیں شھدگ ءِ سر ءَ کار ءُ ٹریلر ءِ میان ءَ ٹکر وری بیتگ چریشی ءِ آسر ءَ زالبولاں ھوار شش مردم بیران بیتگ اَنت ءُ یک زالبولے زدگ بیتگ-

انتزامیہ وئیل جاہ ءَ سر بیتگ ءُ زدگ ءُ بیران بیتگیں مردم ڈی ایچ کیو سوراب ءَ برتگ اَنت اود ءَ زدگ بیتگیں زالبول گیشیں درمان کنگ ءِ ھاتر ءَ شال ءَ دیم دیگ بیتگ، بیران بیتگیں مردمانی سیادی شال ءُ کلات ءَ اِنت-

زانگ بہ بیت بلوچستان ءِ دگانی سر ءَ دگ ءِ وئیلاں ھمک سال بازیں کچے ءَ ساہ ارجان بنت – مھلوک اے دگاں ھونی ئیں دگ ءِ نام ءَ یات کنت-

شال ءُ کراچی ءِ شھدگاں آسراتی ءِ کمے کساس جاڑیگی اَنت گوستگیں سال ءَ اُستانی سرکار ءَ میڈیکل ایمرجنسی رسپانس سینٹرزے جوڑ کرتگ، واکدانی ٹاہ اِنت اشانی کمک ءَ وئیلانی تہ ءَ کمی اتکگ بلے بلوچستان ءَ دگ ءِ وئیل ھمک روچی جوڑ بیتگ اَنت-

گوستگیں سال ءَ موٹروے پولیس ءَ یک رپورٹے شنگ کرتگ اَت شالگشت ءَ شش یا ھشت ھزار مردم بلوچستان ءِ دگانی ارجان بنت وئیلانی کمی ءَ ابید گیش بیگ ءَ اَنت-

گوستگیں روچ ءَ شمبے ءَ اسپینش فٹبال لیگ لالیگا ءَ شش ٹیمانی میان ءَ گوازی کنگ بوتگ کہ آھانی ایٹلیٹیکو ءَ گیٹفے ءِ دیم سَے پہ چار، اوساسونا ءَ رائیو دیم ءَ سَے گول ءَ گوازی کٹ اِتگ ءُ رئیل میڈریڈ ءُ ویارئل دیمیگ بوتگ انت – وھدیکہ دومی نیمگ ءَ یورپئین پریمئیر لیگ فٹبال گوازی ءَ دہ ٹیمانی میان ءَ گوازی کنگ بوتگ کہ آھانی تہ ءَ برائیٹون ءَ وٹفورڈ ءِ دیم ءَ دو، ایورٹون ءَ لیڈز یونائیٹڈ دیم ءَ سَے، مانچسٹر سٹی ءَ نارویچ سٹی ءِ دیم ءَ چار گولاں گوازی کٹ اِتگ انت وھدیکہ پریمئیر لیگ گوازی ءَ مانچسٹر یونائیٹڈ ءُ ساؤتھ ایمپتون، برینٹفورڈ ءُ کریسٹال فلیس دیمیگ بوتگ انت –

اسپینش لالیگا ءَ ایٹلیٹیکو ءُ گیٹفے ءِ میان ءَ بوتگیں گوازی ءَ ایٹلیٹیکو ءَ گوازی کٹ اِتگ – گیٹفے ءِ نیمگ ءَ چہ سَے گول اسکور کنگ بوتگ کہ یک گولے بی.میورال ءَ ءُ دو گول ای.یونل ءَ داتگ انت – ایٹلیٹیکو ءِ نیمگ ءَ چہ چار گول اسکور کنگ بوتگ کہ آھانی تہ ءَ دو گول ای.کوریا ءَ داتگ ءُ یکے ایم.سنہا ءُ یکے ایم ہیرموسو ءَ داتگ –

دومی گوازی رائیو والکینو ءُ اوساسونا ءِ میان ءَ بوتگ کہ اوساسونا ءَ سَے گولاں گوازی کٹ اِتگ وھدیکہ رائیو کلب ءِ نیمگ ءَ چہ ھچ گول اسکور کنگ نہ بوتگ – اوساسونا ءِ نیمگ ءَ جے. مونکیولا ، آر گارسیا ءُ کے کے ءَ یک یک گول ءِ اسکور کتگ گوازی وتی ٹیم ءِ نام ءَ کتگ –

ویارئل ءُ رئیل میڈریڈ ءِ میان ءَ بوتگیں گوازی ءَ ھردو ٹیم دیمیگ بوتگ انت- ھردو ٹیمانی نیمگ ءَ چہ گول اسکور کنگ نہ بوتگ –

سندھ ءِ مزن شھر کراچی ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی چار ھزار ءُ پنچ سد ءُ ھشتاد ءُ نُھ روچ سرجم بوتگ- ماما قدیر بلوچ ءِ ھمراھی ءَ بنجل ءَ چہ کراچی ءَ زورانسری آوار جنگ بوتگیں عبدالحمید ءِ کھول ھم ساڑی بوتگ ھمے وڑ چہ اوتھل ءَ سیاسی ءُ چاگردی باسک سلیم بلوچ، محمد یوسف بلوچ ءُ دگہ مردماں بُنجل ءَ اتکگ ءُ بیگواھیں مردمانی کھولانی گوم ءَ دلپدردی درشان اتگ –

بنجل ءَ اتکگیں مردمانی میان ءَ تران کنان ءَ ماما قدیر بلوچ ءِ گوشگ اَت کہ بلوچ چکچینی درچ یکشل ءَ برجاہ انت نوں اے درچ گڈی سیمسراں سر اِنت گوستگیں بیست سالاں ریاست ءَ وتی تاکت ءِ زور ءَ بلوچستان ءِ سر ءَ وتی زوراکی ءُ رستری ءِ بیمناکیں درور ایر کُتگ ءُ اشی ءِ درچ روچ مروچی یکشل ءَ برجاہ انت کہ ایردستیں راجانی سر ءَ بوتگیں زلم ءُ زوراکیانی یاتاں تاجگ کنت – اے زلم ءُ زوراکیاں جمھوریت لوٹوکیں ءُ دیمروئی لوٹوکیں نوک آبادیانی دیم ءَ زاھر کُتگ –

ماما قدیر بلوچ ءِ گوشگ ات کہ سرجمیں دنیاء انسانی ھکانی پاسداری کنگے جاک سلوات کنوکیں پاکستانی ھاکم بلوچستان ءِ تہ ءَ وت درساں گیشتر انسانی ھکانی لگتمالی ءَ کنگ ءَ ایں – چست کن ءُ بجن چگل دئے پالیسی ءِ سر ءَ کار انت – ھمے رستری پالیسی ءِ رِد ءَ گوستگیں لھتے سالانی تہ ءَ پنجاہ ءُ دوھزار ءَ گیش بلوچ سرکار ءِ پوج ءُ چیریں ادارھاں آوار جتگ ءُ بیگواہ کتگ انت کہ ورناھاں ابید آھانی تہ ءَ چُک ءُ زالبول ءُ کماش ھوار انت –

آئی ءِ گوشگ ات کہ بیگواہ کنگ بوتگینانی تہ ءَ سرجمیں کھولے مردم ھم ھوار اِنت – زورانسری آوار جنی ءَ پد آھاں لٹ ءُ کٹ ھم کن انت وھدیکہ پاکستانی پوج یک یک ءَ بوچ نودربراں آوار جنگ ءُ بیگواہ کنگ ءَ اِنت –

بنجل ءَ ساڑی ئیں زورانسری آوار جنگ بوتگیں عبدالحمید زھری ءِ زھگ سعیدہ حمید ءِ گوشگ ات کہ آئی ءِ پت ءِ زورانسری آوار جنی ءَ دہ ماہ سرجم بوتگ بازیں کوشست ءَ پد ھم مارا گوشگ نہ بیت کہ منی پت کجام کتکاریانی سوب ءَ بیگواہ کنگ بوتگ –

سعیدہ حمید ءِ رِد ءَ آئی ءِ پت ءَ شکری نادراھی انت آئی ءَ گوشتگ کہ سرکار ءُ انسانی ھکانی ادارہ آئی ءِ پت یل کنائینگ ءَ وتی کرد ءَ پیلو بہ کن انت –

سربوتگیں ھالانی رِد ءَ بلوچستان ءِ تیاب دپی دمگ گوادر ءَ پاکستانی پوج ءُ سلاہ بندیں مردمانی میان ءَ میڑ ءِ بوتگ – میڑ ءَ ھردو نیمگاں جانی تاوان ءِ ھال اِنت –

اھوالکار ءِ رِد ءَ میڑ ءَ بیران بوتگیں یک مردمے ءِ پجار ہدایت اللہ پنام بالاچ ءِ نام ءَ بوتگ کہ ھمے گوشگ بوھگ ءَ اِنت کہ اے ورنائے سیادی گوں بلوچ آجوئی لوٹوکیں سلاہ بندیں گل ءَ بوتگ –

اھوالانی رِد ءَ اے اُرش ءَ پاکستانی پوج ءَ ھم جانی ءُ مالی تاوان ءِ دیمپانی بوتگ بلے تنی وھدی سلاہ بندیں گلانی نیمگ ءَ اے درگت ءَ ھچ وڑیں درشان شنگ کنگ نہ بوتگ ءُ ناکہ سرکاری بنشون ءَ اے درگت ءَ ھال شنگ کُرتگ –

بلوچستان ءِ دمگ مستونگ ءَ گوستگیں شپ ءَ ناشناسیں مردماں یک لوگے ءَ دور کتگ ءُ مرد ءُ زال کشتگ اَنت-

کُشگ بیتگینانی تہ ءَ ندیم ءُ آئی ءِ لوگی ھوار اَنت، دمگی مردمانی رد ءَ ھردوک گوستگیں لھتے سالاں پیسر ھردوکاں وتی رز ءِ سور کرتگ-

ایس ایچ او مستونگ مھمد یونس مھمد شھی ءَ گوشتگ کہ کوشکاریں ھونیاں لوگ ءِ دیوال ءَ دور کتگ تیزیں کارچاں گوں آیاں گٹ بر اِتگ اَنت ءُ آیانی دو جنکو ءُ یک بچکیں زھگے سلامت اَنت-

پولیس ءِ رد ءَ اے مردمانی لاش ھسپتال ءَ پہ پوسٹ مارٹم ءِ واستا دیم دیگ بیتگ اَنت ءُ جرمکارانی پَٹ ءُ پول برجاہ اِنت-

بلوچی بُنگیجی درونت

ٹی بی پی درونت

چارُمی درونت

پہ بلوچی زبان ءِ نوک باھندیں وانوکانی ھاترءَ دی بلوچستان پوسٹ یک درونتی لڑے بندات کرتگ کہ چریشی ءَ بلوچی زبان ءَ ھُب داروکیں مردم چرے درونت ءَ چہ بلوچی زبان ءِ راست نبیسگ ءَ ھیل کُت کن اَنت-

مئے چارُمی درونت پہ وانوکاں شنگ بیگ ءَ اِنت، پہ بلوچی زبان ءَ بیوکیں ھمک جھد کہ بیت چُش کہ بلوچی نبشتانک ءُ شائراں آیانی چاپ کنگ ءَ ھوار نِی مئے وانوکاں درونت ھم دزکپت کن اَنت چریشی ءَ نبشتہ کنوکیں مردم گیشتر وتی سیاھگ ءَ راست ءُ تچکی ءَ نبشتگ کت کن اَنت-

ہ، ھ، ءُ ستاگال

ہ ءُ ھ: بلوچی لبزانک ءَ “ہ” گالانی گُڈ سر ءَ ، ءُ “ھ” گالانی بُنگیج ءُ نیام ءَ کارمرز بیت انچوشکہ(ا۔کہ):- گُناہ، گناھگار، واجہ، ھبکہ، ھمراہ، ھمراھداری، بھارگاہ، کاہ، کاھدان ءُ مھر۔۔۔۔۔
البت پہ تْرُندیں توارینک ءَ “ھ” گال ءِ گُڈسر ءَ ھم کیت انت ا۔کہ:- بھ، ڈیھ ءُ جھ۔۔۔

ستاگال: ھما گال کہ یک چیزے ءِ جْوھانی ءُ ھرابی ءَ درشان بہ کنت، اے وڑیں گال رنگ گال ھم گْوش اَنت کہ انگریزی ءَ ایڈجیکٹوّ گْوش اَنت اش ءُ بلوچی ءَ ستاگالانی دو مستریں نشانی “یں ءُ ئیں” اَنت ا۔کہ:-

یں: دْروگیں ٹوک، وتواجھیں راج، پوھیں رھشُون، سوریں آپ، ھمراھیں سنگت، وشیں ھال، کْوھنیں گُد ءُ بدیں مردم

ھیں: ھما گال ءِ گُڈی آب “ہ” گُڑا ستاگالی دْروشم ءَ “ھیں” گالے بھرے بیت ا۔کہ:-
وتواہ: وتواھیں ھمساھِگ
وتواجہ: وتواجھیں راج
ورناہ: ورناھیں سرمچار

ئیں: اگاں گال ءِ گُڈی آب “ا، و، ی ءُ ے” بیت گُڑا پہ اے وڑیں گالاں “ئیں” نبیسّگ بیت ا۔کہ:-
جُتا: جُتائیں راہ ءُ مسکرائیں گپ
دو: دوئیں کتاب ءُ وشبوئیں پُل
گری: گری ئیں کُچک ءُ سکی مردم
سے: سے مُساپر ءُ بَےئیں کار

دلگوش: پہ نابیتگیں کاراں “یں” کارگالانی بھرے بیت ا۔کہ:

1- تو گُڑا دیر کہ کُتیں، دْریگتیں نادْراہ ءَ دوا وارتیں۔
2- تو من ءَ ھال بہ داتیں کہ من باندا نیاگ ءَ آں۔
3- گُڑا شُما تھاریں شپ ءَ بہ تتکیں۔
4- تو ابدلکیوم ءِ لوگ ءَ مہ شُتین ئے۔
5- ما کسی گِس ءَ مہ شُتین ایں۔

ستاگالانی گالرِد
1- ما ناتپاکیں راج پد ءَ یکمُشت بَہ ایں۔
2- زِندگیں راج وتی ڈیھ ءِ گُلامی ءِ نہ منّ اَنت۔
3- زُبان بھر ءُ بانگیں راجاں یکجاہ ءُ یکمُشت کنت۔
4- ما دِیر نشتگیں بلوچ ایں بلے پد ءَ ھم راج ءِ ٹوھیں گم ءَ مار ایں۔
5- تو وتواھیں مردمے ئے۔

پہ راجی زُبان ءِ دیمروئی ءَ ما شُمئے مھر ءُ ھمراھداری لوٹ ایں۔