TBP Balochi

بلوچستان لبریشن فرنٹ ءِ جارکش میجر گْوھرام بلوچ ءَ پاکستانی پوج سر ءَ بوتگیں اُرش ءِ زمہ واری منّ اِتگ ءُ گْوشتگ کہ شمبے ءَ دوازدہ فروری ءَ پاکستانی پوج ءَ آواران ءِ دمگ تیرتیج ءِ نزیک ءَ زنڈوئی گواش ءِ ھند ءَ سرمچاراں انگر کنگ ءِ جُھد کتگ چریشی ءَ زورگریں پوج ءُ سرمچارانی میان ءَ یک دْراجیں میڑے بنداتگ بوتگ-

میڑ ءَ پاکستانی پوج ءِ چار کارندہ کُشتگ ءُ بازینے ٹپی کتگ اَنت وھدے کہ سرمچاراں دُژمن اُرش ءَ را پُشت کنز کتگ ءُ پہ سلامتی درایگ ءَ سوبمند بوتگ اَنت-

پاکستانی پوج ءَ جنگی بالگردانی کُمک ھم گون بوتگ-

میڑ ءَ پد ءَ دگہ یک جاگھے ءَ زورگریں پوج ءَ سرمچارانی انگر کنگ ءُ اُرش کنگ ءِ جُھد کتگ بلے دُژمن وتی مکسد ءَ سوبین نہ بوتگ-

بلوچستان ءِ دمگ کیچ ءِ تھسیل دشت ءَ پاکستانی پوج ءَ زوراکی کنان ءَ مردم لٹ ءُ شاپ کتگ اَنت ءُ مڈی گوں وت برتگ اَنت-

سربوتگیں ھالانی رِد ءَ کیچ ءِ تھسیل دشت ءِ دمگ کاشاپ ءَ گوستگیں شپ ءِ ساھت یک ءَ پاکستانی پوج ءِ بالگرداں کمانڈو ایر داتگ ءُ بیڑبرتگ ءُ زوراکی کنان ءَ مردم لٹ ءُ کُٹ کتگ اَنت –

ھالانی رِد ءَ پاکستانی پوج ءِ کارندھاں لوگانی سرجمیں مردم لوگاں چہ کش اِتگ اَنت سک لٹ ءُ کُٹ کتگ اَنت لھتے زمین ءِ سر ءَ دیم چیر کتگ واپینتگ اَنت پُٹانی سر ءَ لگت جتگ اَنت ءُ کماش گپتگ اَنت کم شرپ کتگ اَنت آیانی پادانی دیم ءَ تیر جتگ –

لوگانی مردمانی موباھل دگہ گران بھائیں مڈی برتگ اَنت اشانی تہ ءَ لھتے چری یے ھوار اِنت-

اھوالکارانی رِد ءَ بالگرد کاشاپ میتگ سر ءَ داں دیراں گشت جتگ اِت ءُ پد ءُ وتی کمانڈو ایر داتگ اَنت زوراکی بندات کتگ اِت-

ھمے دمگ ءَ مگرب ءِ وھد ءَ بمب ءُ تیراں ھم بے کساس توار کتگ بلے تیرگواری ءُ بمبانی درگت ءَ چُشیں ھال سر نہ بوتگ اَنت –

ھمے ماہ ءَ پاکستانی پوج ءِ دستاں بلوچستان ءَ برانزگپتگیِ زورانسری آوار جنیانی تہ ءَ بلوچستان ءُ چہ بلوچستان ءَ ڈن مردمانی آوارجنیانی درچ یکشل ءَ برجاہ اَنت-

پاکستانی پوج ءَ دگہ دو مردم دزگیر کرتگ ءُ بیگواہ کتگ اَنت، بیگواہ کنگ بیتگیں مردمانی تہ ءَ یکے ءِ سیادی چہ نوشکی ءَ اِنت کہ آئی ءِ نام کریم ء قادر بخش ءُ دومی مردمے پجار مھمد نور ءِ ناماں زانگ بیتگ-

دمگی مردمانی رد ءَ کریم بلوچ ء قادر بخش جھمنند مل نوشکی کہ قاضی آباد نوشکی ءَ یک باڑو داریں کوٹی ءَ گوستگیں شپ ءَ پوج ءُ لس پوشاکی کارندھاں آوار جتگ ءُ برتگ –

زانگ بہ بیت ھمے ماہ ءَ سرجمیں بلوچستان ءَ بازیں کچے ءَ پوج ءَ مردم آوار جتگ اَنت، ھمے وڑ یازدہ فروری دوھزار ءُ بیست ءُ دو ءَ آواران ءِ دمگ تیرتیج ءَ پاکستانی پوج ءَ دو برات مھمد علی ء دینار ءُ واھد دینار آوار جتگ اَنت ءُ پد ءَ وتی بنجل ءَ برتگ ءُ سک لٹ ءُ کُٹ کُتگ اَنت-

دمگی مردمانی رد ءَ مھمد علی ء دینار لٹ ءُ کٹانی وھد ءَ بیران بیتگ ءُ کستریِں برات واھد دینار ٹپی ءِ جاوراں یل کنگ بیتگ-

گوستگیں روچ ءَ لالیگا ءِ ھشت ءُ پریمئیر لیگ ءِ ھشت ٹیمانی میان ءَ گوازی کنگ بوتگ کہ لالیگا ءِ ٹیمانی تہ ءَ ایلوز، رئیل بیٹس ءُ رئیل سوسائیڈ ءَ گوازی کٹ اِتگ انت وھدیکہ بارسلونا ءُ اسپینیول دیمیگ بوتگ انت – پریمئیر فٹبال گوازی ءَ ولووز ءَ ٹوٹنہم ءِ دیم ءَ دو، نیوکاسٹل ءَ آسٹون ویلا ءِ دیم ءَ یک ءُ لیورپول ءَ برنلی دیم ءَ ھم یک گول ءَ گوازی کٹ اِتگ انت وھدیکہ پریمئیر لیگ ءِ چارمی گوازی ءَ لیسسٹر سٹی ءُ ویسٹ ہام دو دو گول ءَ دیمیگ بوتگ انت –

اسپینش فٹبال لیگ لالیگا ءَ اولی گوازی ایلووز ءُ ویلنسیا ءِ میان ءَ بوتگ کہ ایلووز ءَ دو پہ یک گول ءَ گوازی کٹ اِتگ – ویلنسیا ءِ نیمگ ءَ چہ لیبی گونکالو ءَ گول اسکور کتگ وھدیکہ ایلوز ءِ لیبی ایم لوما ءُ جوسیلو ءَ یک یک گولے داتگ ءُ گوازی وتی ٹیم ءِ نام ءَ کتگ –

لالیگا ءِ دومی گوازی ءَ لیوینٹ ءُ رئیل بیٹس میان ءَ بوتگ کہ رئیل بیٹس ءَ چار گولاں گوازی کٹ اِتگ لیونٹ نیمگ ءَ دو گول اسکور کنگ بوتگ کہ ھردو لیبی ڈی. گومز ءَ داتگ انت – رئیل بیٹس نیمگ ءَ دو گول این. فیکر ءُ ای.گونسلس، ڈبلیو. کارولہو ءَ یک یک گولے داتگ –

رئیل سوسائیڈ ءُ گراناڈہ ءِ میان ءَ بوتگیں گوازی ءَ رئیل سوسائیڈ ءَ دو گول ءَ چہ گوازی کٹ اِتگ – رئیل سوسائیڈ ءِ نیمگ ءَ چہ ایم.اویارزبل ءُ ریفنہا ءَ یک یک گول ءِ اسکور کتگ –

چارمی گوازی ءَ اسپانیول ءُ بارسلونا دو دو گول ءَ دیمیگ بوتگ انت – ھردو ٹیمانی لیبیاں جوانیں لیب پیش داشت – گوازی ءِ بندات ءَ بارسا ءِ نیمگ ءَ چہ لیبی فیدری ءَ یک گولے اسکور کُتگ گڈا چلمی ملٹ ءِ تہ ءَ اسپینیول ءِ نیمگ ءَ.چہ ایس.داردیر ءَ گولے اسکور کُتگ ھمے وڈ شست چارمی ملٹ تہ ءَ ھم اسپینیول ءِ نیمگ ءَ دومی گول اسکور کنگ بوتگ بلے بارسا ءِ لیبی ایل.ڈی جونگ ءَ نودمی ملٹ ءِ تہ ءَ گول موکتگ ءُ داں گڈسر ءَ ھچ ٹیم ءِ نیمگ ءَ گول اسکور کنگ نہ بوتگ –

نیشنل پاٹی ءِ بنجاھی سروک، گوستگیں سر وزیر بلوچستان ڈاکٹر عبدالمالک بلوچ ءَ گوشتگ ریکوڈک بلوچستان ءِ مھلوک ءِ بنکی ملکیت ءُ مڈی اِنت، بلوچستان ءِ وتگڑیں سرکار ءَ بلوچستان ءِ مڈیانء بھا کنگ ءِ اجازت دیگ نہ بیت اِنت-

آئی ءَ گُشتگ وفاق ءَ سیندک ءِ دزھتی ءِ دیم ءَ برتگ ءُ ماورائے آئین ءِ گام ءِ لڑاں دارگ بیتگ، مڈی سوبائی سبجیکٹ اَنت اشی ءِ واک بس ایوک ءَ سوبہ ءَ اِنت-

مالک بلوچ ءَ گوشتگ کہ اسلام آباد ءُ بلوچ ءُ بلوچستان ءِ بارو ءَ وتی سنچ مٹ کنگ لوٹ ایت، اسلام آباد ءَ بلوچستان دوست اِنت پرچاکہ اشی ءِ اسٹیٹجیک جوان اَنت ءُ مڈی ءَ چکار اِنت بلے بلوچ اے شور ءَ ھوار نہ اَنت ءُ اے سنچ آیاں بدل کنگی اِنت-

آئی ءَ گُشتگ وھدیکہ بلوچ اسلام آباد ءَ نہ من اِیر گڑا آئی ءِ جیڑہ ءُ جنجالانی سر ءَ الکاپی نہ بیت اے جیڑہ برجم بیت اِنت-

نیشنل پاٹی ءِ بنجاھی سیکرٹری جنرل جان مھمد بلیدی ءَ گوشتگ بلوچستان ءُ بلوچ مھلوک ءِ ھلاپ ءَ شوربندی ءَ چن ءُ لانچیں پندل بند کنگ بہ بنت بلوچستان ءِ زربار ءُ گوریچان ھچ رنگ ءَ منّگ نہ بیت اِنت بلوچستان ءِ مڈیانی واک تھنا بلوچ مھلوک ءَ ھست اِنت ءُ مڈیانی پُلپھانچی بند کنگ بہ بیت اِنت-

آئی ءَ گُشتگ سیندک ءَ کاپر ءُ گولڈ پروجیکٹ ءِ مھاھدہ ءِ گیش دراج کش کنگ ھچ رنگ ءَ منّگ نہ بیت اِنت سیندک بلوچستان ءِ مھلوک ءِ ملکیت اِنت اشی ءِ آمدنی بلوچستان ءَ دیگ بہ بیت اِنت ءُ واک بلوچستان ءِ دست ءَ دیگ بہ بنت استان ءِ واک ءُ بنجاھی واکانی دپچڑی بند بہ بیت اِنت-

آئی ءَ دیمتر ءَ گوشتگ کہ بارڈر ٹریڈ ءِ جیڑہ گیشینگ بہ بنت ءُ زر ءَ گیرکانونی ٹرالرنگ ءُ گیر کانونی ماھیگیری سرجم ءَ بند کنگ بہ بیت ءُ زرواریں فشریز کشگ بہ بیت اِنت –

سی سی آئی ءِ واک استانانی دیریگیں جیڑہ ءِ گشینگ ءِ ای سی سی ءِ بنجاھی مڈیانی بھر ءُ بانگ استانانی ئیگ اِنت آیاں اے واک نیست اِنت بلوچستان ءِ مڈی دیگ بہ بنت-

پاکستان ءِ درالھکومت اسلام آباد ءَ یکشمبے ءِ روچ ءَ بلوچستان ءِ چہ سیادی داروکیں نودبراں وتی بیگواھیں سنگت حفیظ بلوچ ءِ زورانسری آوار جنی ءُ احتشام بلوچ ءِ بے کانودی کُشکاری ءِ بگیری ءَ روانک کشگ بوتگ ءُ زھرشانی کنگ بوتگ-

بلوچ اسٹوڈنٹس کونسل جار سر ءَ نودبرانی دستاں پلے کارڈز ، بینرز ءُ بیگواھیں نودربرانی اکس چست کتگ ءُ شھر ءِ دگاں روانک کش اِتگ ءُ نیشنل پریس کلب ءِ دیم ءَ زھرشانی کتگ ءُ زورانسری آوار جنیانی بگیری ءَ نارا جتگ-

قائداعظم شھدربرجاہ ءِ ایم فل ءِ نودربر حفیظ بلوچ ھمے ماہ ءَ چہ خضدار ءَ بیگواہ کنگ بیتگ وھدیکہ بین الاقوامی اسلامی شھدربرجاہ ءِ بی ایس مچی ءِ ساری ئیں سمسٹر ءِ نودربر احتشام بلوچ چوٹیانی گوازینگ ءَ وتی لوگ ءَ پنجگور ءَ شتگ کہ اود ءَ آ بیگواہ بوگ ءَ پد آئی ءِ تیرسُپتگیں لاش دستکپتگ- آئی ءِ ھمراہ ءُ بلوچ راج دوستاں آئی ءِ کوش ءِ بھتام پاکستانی چیریں ادراہ ءُ لشکر ءِ سر ءَ جتگ-

زھرشانی کنوکاں بلوچ نودربر ءِ زورانسری آوار جنی ءِ دْرچ بند کنگ ءُ گوشتگ کہ حفیظ بلوچ ءَ یل بہ کن اِت-

نودربراں گْوشتگ کہ ھرکسی ءِ مات پت وتی چکاں چُٹیاں لوگ ءَ لوٹائین اَنت- مئے مات پت منت کنگ ءَ اَنت ھدا ءَ بہ چار اِت لوگ ءَ میا اِت اگاں ناں تو ھم گار بیگواہ ءُ یا کُشگ بہ ئے-

آیاں گْوشتگ کہ چکاس برجاہ ءَ اِنت بلے وانگ وتی جاہ آ اے وھد ءَ اد ءَ زھرشانی کنگ ءَ اَنت-

نودربراں گْوشتگ کہ اے وھد ءَ ڈیھ ءِ جتا جتائیں شھراں وانوکیں نودربر تُرس ءِ آماچ اَنت، ءُ آیانی لوگانی مردم ھم پریشان اَنت-

نودربرانی گْوشگ اِنت کہ مارا وانگ ءَ بل اَنت تاکت ءُ تُپنگ ءِ زور ءِ سر ءَ نودربراں تُرسینگ ءِ دْرچ ءَ بند بہ کن اَنت ءُ بیگواھیں بلوچ نودربراں یل بہ کن اَنت آیاں وانینگ ءِ ھک دیگ بہ بیت –

زھرشانی ءَ قائد اعظم شھدربرجاہ ءِ گوستگیں استاد ءُ انسانی ھکانی باسک پرویز ھود ءُ پرازنہ باری ءَ ھم بھر زرتگ-

سند ءِ مزن شھر کراچی ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ ، زھرشانی ءَ مروچی چار ھزار ءَ پنچ سد ءُ نود روچ سرجم.بوتگ – پیپلز اسٹوڈنس فیڈریشن ءِ رھشونان بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشانتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ بنجل ءَ اتکگیں مردمانی میان ءَ تران کنان ءَ گوشتگ کہ جنرل ضیاء ءِ زوراکی ءِ دور ءَ زورگیریں ریاست ءَ بلوچ ءِ پُرایمنیں جھد ءِ ایرموش کنگ ءَ ریاستی ناشرکاری ءِ ھما رستری پالیسی گچین کنگ بوتگ ھمے وڈ زوراکیں جنرل پرویز مشرف ءِ دور ءَ اے زوراکی ءِ پالیسی برجاہ دارگ بوتگ بلکنہ اے زوراکیانی تہ ءَ گیشی آرگ بوتگ –

ماما قدیر بلوچ ءَ گوشتگ کہ بلوچستان ءَ پوجی لشکر کشی ءَ بلوچ ءِ بازیں مال ءُ مڈی ءِ تباہ کتگ اربانی کچ ءَ مھلوک مال ءُ دلوت پُلگ بوتگ انت ءُ لکانی کچ ءَ مھلوک در پہ دری زند گوازینگ ءَ لاچار کتگ کہ روچ مروچء وتی کھولانی ھمراھی ءَ در پہ در انت –

ماما قدیر بلوچ ءِ گوشگ ات کہ بلوچ پُرایمنیں جھد کنوکیں سیاسی باسک ءُ دگہ رژناہ پگریں واھگ داریں رھشونانی آوار جنی پیسر ءَ ھم بوتگ پیش ءَ ھم بلوچ آوار جنگ ءُ زندانانی تہ ءَ شھید کنگ بوتگ انت بلے جنرل مشرف ءِ دور ءَ پاکستانی پوج ءُ ایف سی ءُ چیریں ادارھانی کارمندان بلوچ پُرایمنیں جھد ءِ بگیری ءَ اے زوراکی مزنیں کچ ءَ بندات کتگ –

ماما قدیر بلوچ ءَ گوشتگ کہ بلوچ ءِ راج ءِ بگیری ءَ پاکستانی ریاست زوراکی نوکیں گپے نہ ایں ریاست ءِ چیریں جاھاں بلوچ پرزندانی لٹ کٹ کنگ ءُ شھید کنگ، آھانی زانگولیں جونانی چگل دیگ ءُ دز ڈنگانی پہ لب ملام بلوچ گداراں چیریں ادارھانی چیردستی ءَ کار گرگ اے دراہ اے نانھادیں جمہوری دور ءِ لانت انت – گوستگیں مزن وزیر ءَ بیگواھیں مردمانی یل کنگے جار جتگ ات بلے پوج ءَ اے جار ءِ جنگ ءِ ھواری ءَ زورانسری آوار جنی ءُ زانگولیں جونانی دور دئیگے تہ ءَ گیشی آؤرت ءُ مزن وزیر ءِ اوقات آئی ءَ را سمجارینت –

دی بلوچستان پوسٹ پتر ءَ سربوتگیں ھالانی رِد ءَ بلوچستان ءَ دگہ دو مردم پاکستانی پوج ءَ زورانسری آوار جتگ ءُ بیگواہ کتگ انت –

گیشیں ھالانی رِد ءَ گوستگیں شپ ءَ پاکستانی پوج ءَ چہ کراچی ءَ کیچ زامران ءِ جھمنندے زورانسری آوار جتگ ءُ گوں وت برتگ –

اھوالکار رِد ءَ پاکستانی پوج ءَ کراچی ءِ دمگ ملیر ءَ محمد نور نامیں ورنایے زورانسری آوار جتگ ءُ بیگواہ کتگ –

ھمے وڑ گوستگیں شپ ءَ پاکستانی پوج ءَ ھزدار ءِ کُچگی دمگ ءَ گِسے ءِ سر ءَ بیڑ برتگ ءُ نزیر احمد ء نور محمد آوار جتگ ءُ گوں وت برتگ –

زانگ بہ بیت بلوچستان ءَ ھمے ماہ ءِ تہ ءَ زورانسری آوارجنیانی تہ ءَ گیشی اتکگ گوستگیں دہ روچانی میان ءَ بلوچستان ءِ جتا جتائیں دمگاں کساس پنجاہ مردم پوج ءَ آوار جنگ ءِ ھال رسانکدراں شنگ بوتگ اَنت –

دومی نیمگ ءَ ھب ءِ دمگ منگھو پیر ءَ یک مردمے ءِ جون دست کپتگ، وھدیکہ گوستگیں روچ ءَ ھم ھمے دمگ ءَ یک مردمے ءِ جون دست کپتگ دومی نیمگ ءَ شال ءَ ھم یک مردمے ءِ جون دستکپتگ –

ھب ءِ واکدرانی رِد ءَ ھب ءُ کراچی ءَ دستکپتگیں جون عباسی نادراھجاہ ءَ سر کتگ انت ھردو لاشانی دست زمزیل ءَ بندوک بوتگ ءُ وھدیکہ دوئیں مردم لٹ ءُ کٹ کنگ ءَ پد کُشگ بوتگ انت –

تنی وھدی ھردو جونانی پجار کنگ نہ بوتگ – ھب ءُ کراچی سیمسری دمگاں ھوار شال ءَ مدامی جون دست کپگ ءَ انت اشی ءَ پیش کراچی ءَ نادرن بائی پاس ءَ سَے مردمانی جون دستکپتگ انت کہ زانگولی سوب ءَ آھانی پجار نہ بوتگ اَنت –

نبشتانک: بلوچ نودربر ءُ آیانی جیڑہ

نبشتہ کار: رضوان ہوت

دی بلوچستان پوسٹ

مستریں جیڑہ وَ اے ھَد وت انت کہ اے ھد ءَ ما زندگ ایں، ایشا چہ ابید دگے مستریں جیڑہ چونیں بوت کنت ءُ ما کجام جیڑھانی سر ءَ گپ ءُ تران بہ کن ایں۔ اے ھد ءَ کہ ھرچ بلوچے زندگ انت آئی ءَ را سلام انت چو وَ پلانی پلانی وڑیں اوں ھست بلے ھرکس ماما قدیر ئِے وڑ بیت نہ کن انت۔

چیز ءِ روچ اِنت کہ شال ءِ مزن شھدر برجاہ بلوچستان یونیورسٹی ءَ چہ دو بلوچ نودربر بیگواہ کنگ بوتگ ءُ پد ءَ زوت ءَ دگے دو بےگواہ کنگ بوتگ ھر کجا بِہ چار ھرچ جاھے وانِندہ گار ءُ بیگواہ کنگ بوّگ ءَ انت۔

ایشانی بےگوائی ءَ ما چے کنگ ءَ انت ؟ ھچ بس بیا اسٹیٹس ءِ بدے ءُ بہ گوش کہ پلانی بےگواہ کنگ بوتگ باید ما بےگواھی ءَ چہ در بیا ایں بہ گوش ایں کہ پرچہ بےگواہ کنگ بوتگ، جیڑہ ھمیش اِنت کہ پرچہ مئے نودربرانی گار بیگواھی مدام گیش بوّان اَنت ھما رنگ ءَ کہ آ بلوٹ انت ھما وڑ بوّگ انت ءُ ھمے رنگ ءَ گوں مئے بلوچاں اے زلم ءُ زورانک ءِ کِسّہ دراج تِر بُوان اِنت مستریں گپ ایش اِنت کہ راج بے سر ءُ بے پادیں رہشوناں وتئ میار کُتگ مارا اگاں تچکءُ راستیں رھشون ءِ بِہ بوتیں مرچی گڈا گوں مارا کدی ھم اے وڑ نہ بوتگ اَت بلے ما چورہ انت ھما چورو ءِ دروشم ءَ کہ آھی ءِ مات مرتگ ءُ چورہ بوتگ مروچی من گُشاں ریاست اے ھبرءَ سرپد بوتگ کہ بلوچ پُسّگ وانگ ءُ زانگ ءِ پِڑا دیمروئی کنگ ءَ اِنت،راجے کہ زانت ءُ زانگ بداریت گڑا آ وتی سرجمیں حق ءُ حقوق، مال ءُ ماڈّیانی بہرُ سنگ ءَ سرپد بیت چمے تُرس ءَ ریاست ءُ آھی ءِ داشتگیں دُزّ بلوچ نودربراں وتی ارجاں جنان انت بلے گپ کنوک نیست۔ چونیں شوکیں شوکیں وانیدہ ایں نودربر بےگواہ کنگ بوتگ اَنت۔

مرچی مئے چاگردءَ بلوچ بوّگ ھم یک بلاھیں جنجالے وانیندھانی پِڑ ءَ اگاں ما گیش کنگ بہ لوٹ ایں بلے انگت چہ دومی نیمگ ءَ آ کم بوان انت پرچہ کہ بلوچ نودربر گار کنگ بیت ءُ گار اِنت۔ یک نودربرے ءَ یک واجہ ئِے کئیت ءُ شاھدربرجاہ ءَ چے گار کنت اے گار ءُ بیگواہ کنگی جیڑہ پرچہ ودی کنگ بوتگ انت باید اے جیڑہ ءِ جِند ھلاس کنگ بہ بیت۔

جیڑہ اے وھد سک باز گیش بوان انت ھرچ جاھے بچار ئے جیڑہ ءِ ودی بوان انت۔ یکے بُرتگ گارءُ بیگواہ ھمت یکّیں غم سرجم نہ اِنت کہ حال بیت دگے یک بلوچ نودربرے ءِ بیگواھیءِ حال بیت اے نوں مئے بلوچانی زند انت یکے وَ وانگ نیست انت ءُ دومی ھرچ کسے کہ وانگ لوٹ ایت آ یک نہ یک روچے لازم گار ءُ بےگواہ کنگ بیت۔

باید چوشیں جنجٹ ءُ جیڑہ ھلاس کنگ بہ بنت، اے جیڑہ چوش ھلاس نہ بنت مارا ھوار بوّگی انت وت مہ وت یک ءُ دومی ءِ ھم کوپگ بوّگی انت مارا یک انچیں رھشونے در کار اِنت کہ مارا شرّیں ءُ جوانیں راھے ءِ نیمگ ءَ رھشونی بِہ کنت ،چُش راہ وَ سک باز انت بلے کجام کشک ءَ ما پہ وت گچین بہ کن ایں کہ مرچی ئیں وھدءِ لوٹ بِہ بیت آ کِشک اے درگتءَ گڈا مارا یک رھشونے درکار اِنت کہ مئے تچکیں رھشونی بہ کنت ءُ مارا چہ اے پیمیں رنجءُ درداں چے بِہ رکّینیت مئے سرجمیں جیڑہ ءَ ھلاس بہ کنت تاکہ ما وتی دیمروئی ھاتر ءَ ھما جیڑہ کہ آیاں گوں قومانی دیمروئی ھوار اِنت آیانی بابت ءَ پگر ءُ سوچ بہ کن اَنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دستونک: ندر پہ شھید هدایت الله پنام بالاچ ءِ نام ءَ

شائر: سلیم ناز

دی بلوچستان پوسٹ

مدامی سنگراں دار اِیت بالاچ
بداں پہ تیر گوار اِیت بالاچ

داڈمب ءُ سیاجی ءِ برزیں هساراں
کہ روکیں دیدگاں شار اِیت بالاچ

نهنگ ءُ کلبر ءُ یا شادی کور ءَ
بدانی کسهاں کار اِیت بالاچ

بلوچ ءِ لوگ ءُ لوگ بالاچ ودی کنت
منی هر سّکیاں مارا اِیت بالاچ

تئی هوش را برتگ سرمچاراں
پہ وت راهے گچین چار اِیت بالاچ

زمین هاکانی وامداریں همک کس
دل ءِ هر واهگاں سار اِیت بالاچ