TBP Balochi

نبشتانک: گُلامی وتی دیم ءَ سیاه کنگ ءَ اِنت

نبشتہ کار: جلال اهمد

دی بلوچستان پوسٹ

ما بچاریں کہ ما چیر تر اِتگیں چی ءَ کہ ما وتی وتواجہ نہ ایں ما گُلامیں مہ زُوراکیں دْژمن ءِ هکم ءِ منّوگِریں ءُ بے هساب تاوان بھر اِنت وتی دل ءِ پیسلہ ءَ وت کت کنگ ءَ نہ ایں ما دِگرانی گپ ءِ سر ءَ کار کنگ ءَ ایں انچو ما گُلامی ءِ هِیداں اُژناگیں کہ مارا اینچوک هم موکّل نیست کہ بے آئی ءِ هکم ءَ کارے بہ کن ایں ، اگاں وهدے کسانیں سپرے ءَ مردمے در کپ ایت گُڑا پیسرا واجہ ءِ گْور ءَ مُوکّل زُورگ لوٹ ایت کہ ” واجہ مرچی من پلان هند ءَ روگ ءَ آں ” وتی سرزمین ءِ سر ءَ ما وت ءَ انچوش لجوزیں لشکر ءِ هکم ءِ منّوگِر کتگ انجوش کہ کسانیں گْونڈلے وتی مات ءُ پت ءِ گپّانی منّوگِر بیت ـ

گُڑا همے وڑ ءَ ما هیال بہ کن ایں کہ ما کے اِنت؟ ءُ مئے راجدپتر ءَ کجام مردمانی نام هوار اَنت؟ ءُ هزار سالاں چہ گیش بیت کہ ما اے دُگنیا ءِ تہ ءَ ودی بُوتگ اِنت ءُ مارا یک جِتائیں نامے هست ءُ یک جتائیں بچّارے هست کہ ما بلوچ ءِ نام ءَ زانگ بہ بہ ایں ءُ دومی گپ مئے دُود ءُ ربیدگ ،نندگ ءُ پادآیگ ءُ پُچ ءُ پُوشاک ءُ زبان دْراه جتا اَنت بلکیں ما دِگہ راجانی چم دار نہ اِنت ءُ یک انچیں زمینی ءِ واهُند اِنت کہ چہ مال ءُ مڈّی ءَ جت ءَ ءُ ایر اِنت ما بچاریں داں مئے گْور ءَ هچ چیز ءَ کمی نیست ما وتی دْرست ءَ برابریں بلے مئے مستریں بد کسمتی همیش اِنت کہ ما وت ما وت تپاک نہ ایں ءُ مستریں تاکت تپاکی ءَ گوں همگرنچ اِنت ءُ یک جاھے بلوچی زبان ءِ نامداریں شائر ” واجہ مُبارک کازی ” گْوش ایت کہ ” تپاکی بُندر ءَ یک بندگی ئے ” باید ما انچو سرپدی ءَ ابید وت ما وت ناتپاک مہ بئیں ءُ ما دگہ یک چیزے بچاریں کہ یک هُشکیں دارے بہ بیت تو جْوانیں وڑے ءَ آ دار ءَ پُروشے بلے وهدے کہ همے دار تهنا مہ بیت ءُ ده دار یک جاه هور بہ بنت گُڑا پُروشگ نہ بنت نوں اے گپ ءَ چہ انسان ءَ اندر ءَ یک سوالے ودی بیت کہ چی ءَ اے دار نہ پُرشت اَنت چی ءَ کہ آ وهد ءَ اے دار یکے اَت پُرشت بلے وهدے کہ باز بیت اَنت گُڑا نہ پُرشت اَنت نوں اے گپ ءَ چہ مردم همے سرپد بیت کہ یک راجے اگاں تپاک مہ بیت گُڑا آ راج بهر ءُ بانگ بیت ءُ تاوان بهر بیت آ راج پُروش وارت ءُ جْوانیً وڑھ ءَ رد دیگ بیت اِنت ـ

بلے مرچی ءُ باندات ما بچاریں کہ ما چینچو بهر ءُ بانگیں ءُ ما چِنکس تاوان بهریں مارا انچو بهر ءُ بانگ کنگ بُوتگ کہ یک برے دْژمن ءَ بدیں پندل ءُ ٹگّیاں مارا چو اے وڑ ءَ پُروش داتگ کہ ما چو نہ گْوشتگ کہ پلانی بلوچے ما بندات چو کتگ کہ آ بُگٹی یے، آ رندے، آ بنگلزئی یے، آ مری یے، آ لاشاری یے، آ کلمتی یے ءُ آ هسنی یے. بلے مئے بد کسمتی همے بیتگ کہ ما وت ءَ شرتر ءُ وتی دومی بلوچیں برات ءَ را نزور تر لیکئتگ ءُ وتی جند ءں برات ءَ چو اے پئیم ءَ ایرجتگ کہ تو وَ بُگٹی یے تو کجا منی مٹ بُوت کن ئے ءُ ما انچو وت ءَ مزن لیکتگ اَت کہ دومی مردم مئے چم ءَ نہ یتکگ ـ

چریشی ءَ رند پد ءَ دْژمن ءَ دگہ نوکیں پندلے سازتگ ءُ بلوچ راج ءَ پُروش داتگ ءُ چو اے وڑ ءَ بهر بانگ کتگ کہ آ گوادری یے، آ تربتی یے، آ پنجگوری یے، آ بلیدئی یے، آ کولوائی یے ءُ آ مستونگی یے همے وهد ءَ دْژمن ءَ بلوچ راج ءِ تہ ءَ انچیں هسد ءُ نپرت پیداگ کتگ کہ یک براتے ءِ گوادر ءِ ءُ دومی برات اگاں پنچگور ءَ اِنت گُڑا همے دوئیں براتانی میان ءَ الّم زِد ءُ هسدے هست الّم دوئیں براتانی میان ءَ کُٹکایے هست وهدے کہ گپے بیت گُڑا گپ همدا رس ایت کہ پلانی پنجگوری منی کجا مٹ بُوت کنت ، نوں بچار ما دْراه بلوچیں بلے هرکس وت ءَ دومی ءَ جہ شرتر لیکیت ءُ دومی ءَ جهل جنت ـ

انچیں نپرت راج ءِ تہ ءَ یل داتگ کہ دست بس برات ءَ رس ایت ءُ برات گوں برات ءَ جیگ پہ جیگ اِنت هما کہ میڈینوک اِنت آ همے میان ءَ هیش کنگ ءَ اِنت برات گوں برات ءَ ایرجیگ اِنت ءُ دْژمن گوں مال ءُ مڈّیاں سر ءُ چیر اِنت ـ

گُلامی ءَ نوں انچو وتی دیم سْیاه کتگ کہ ما وتی درد ءَ مارگ ءَ نہ ایں اگاں وانگجاهاں کہ کسانیں تِپل ءُ گْونڈو وانگایاں گُڑا ما وتی آزاتی نارھے ءِ جنگ ءَ بدل ءَ کشمیر ءَ آزاتی نارہ ءَ جن ایں ءُ نودربراناں انچیں چیز پرمایے کہ آ پہ مئے راج ءَ تاوان بهر اَنت، گُلامی ءَ مئے تہ ءَ انچو جاه کتگ کہ ما دست ءِ وت وتی بانداتاں ءَ گُلامی درس ءَ دیگ ءَ ایں کہ ما چو اے وڑ ءَ وتی زندگی گُلامی ءَ گْوازینگ ءُ شما هم وتی زندگی ءَ انچو هاموش بہ بَے هچ مہ گْوش اِت-

ٹوهیں ءُ مستریں سبب همیش اَنت کہ ما گُلامی ءَ نہ رک ایں، چی ءَ ما وت ءَ را وت انچوش کتگ ءُ ما گُلامی وتی سرجاه جُوڑ کتگ ءُ وت ءَ را بے کساس نیست ءُ نابُود کتگ باید راج پاد بئیت ءُ وتی گُلامی ءِ زمزیلاں بُہ پُروش ایت ءُ وتی بانداتاناں وتی آجوئی ءِ جُهد ءَ درس ءَ بہ دے ئِے ـ

شالا راج یکمُشت بات ءُ بلوچستان آجو بات ـ

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

وائس فار بلوچ مسنگ پرسنز ءِ چیئرمین نصراللہ بلوچ ءَ وتی شنگ کُتگیں درشان ءِ تہءَ گُشتگ کہ بلوچستان مزن شھدربرجاہ ءِ بیگواھیں نودربر سھیل بلوچ ءِ کھول ءَ گوں آئی ءَ نیاد کُتگ ءُ ترُس ءِ درشان کُتگ۔

زورانسری بیگواھی ءِ آماچیں بلوچستان مزن شھدربرجاہ ءِ نودربر سھیل بلوچ ءِ کھول ءَ وی بی ایم پی ءِ رھشوناں گوں وتی نیاد ءِ تہءَ اے تُرس ءِ درشان کُتگ کہ سھیل بلوچ یل نہ بیگ ءِ سوب ءَ آئی کھول ذھنی جیڑھانی دیمپان اَنت۔

نودربر ءِ کھول ءِ گُشگ اَت کہ سھیل ءِ مات سک باز ذھنی کرب ءُ جنجالانی آماچ بیگ ءِ سوب ءَ آئی جاور ھال ھراب بیان اَنت پرچہ کہ آئی ءَ شکر ءِ نادراھی ھم است۔

نصر اللہ بلوچ ءَ گُشتگ کہ آئی ءَ سھیل بلوچ ءِ کھول ءَ باوری داتگ کہ وائس فار بلوچ مسنگ پرسنز سہیل بلوچ ءِ رکیتگیں دروشماں یل کنائینگ ءِ ھاترءَ ھمک جاہ ءَ توار چِست کنت۔

زانگ بہ بیت سھیل بلوچ ءُ فصیح بلوچ گوستگیں سال ءَ نومبر ءِ یک ءَ بلوچستان مزن شھدربرجاہ ءَ چہ زورانسری بیگواھی ءِ آماچ کنگ بیتگ اِت اَنت دوھیں نودربرانی یل کنائینگ ءِ ھاترءَ دگہ نودربراں داں پانزدہ روچ ءَ زھرشانی نندانک برجم داشتگ اَت۔

نصراللہ بلوچ ءَ گُشت کہ ما بلوچستان حکومت ءَ دزبندی کنیں کہ آ سھیل بلوچ ءُ فصیح بلوچ ءِ یل کنائینگ ءَ وتی کرد ءَ پیلو بہ کن اَنت یا گُڑا آھانی کھول ءَ آھانی درگتءَ معلوم داری بہ دئینت دانکہ آ ذھنی جنجالاں چہ بہ رک اَنت۔

دی بلوچستان پوسٹ پتر ھال ءَ سر بیتگیں ھالانی رد ءَ جیکب آباد ءِ دمگ ٹھل ءَ گیرت ءِ نام ءِ سر ءَ زالبولے کُشگ بیتگ –

پولیس ءِ رد ءَ جیکب آباد ءِ جھمنندیں شوکت مرھٹو ءَ وتی لوگی سیاہکاری ءِ بھتام ءَ تیر جتگ ءُ کُشتگ ءُ وت تتکگ، ھال ءِ شنگ بیگ ءَ پد پولیس سر بیتگ ءُ لاش اش چست کتگ پوسٹ مارٹم ءِ واستا ٹھل ءِ ھسپتال ءَ برگ بیتگ ءُ اود ءَ اژدری چار ءُ ٹپاساں پد لاش کھول ءِ گور ءَ رسینگ بیتگ-

پولیس ءِ رد ءَ جرمکار ءِ ھلاپ ءَ کانونی رنگ ءَ کاروائی کنگ بیت اِنت-

زانگ بہ بیت گوستگیں روچاں بلوچستان ءِ دمگ مستونگ ءَ ناشناسیں مردماں دوستی ءِ آروس ءِ سر ءَ مرد ءُ جن کُشگ بیتگ اَنت ءُ ھمے وڑ ءَ دو روچ ءَ پیسر ڈیرہ اللہ یار ءَ مرد ءَ تیرگواری کرتگ ءُ وتی زال گوں مردمانی ھمراھی ءَ کُشتگ اَنت-

یک دگہ وئیلے ھمے سال ءِ بندات ءَ نسیر آباد ءَ پیش اتکگ اَت کہ یک مردمے ءَ گیرت ءِ نام ءِ سر ءَ وتی ناکوزتک گوھار ءَ ھوار یک مردمے کُشتگ اِت اَنت ھمے وڑ ءَ سَے روچ ءَ پیسر ھب ءَ سندھ ءِ جھمنندیں یک مردمے ءَ تیرگواری کرتگ ءُ سونداتگیں زال کُشتگ-

زانگ بہ بیت بلوچستان ءُ سندھ ءِ جتا جتائیں جاھاں گیرت ءِ نام ءِ سر ءَ کوشانی درچ یکشل ءَ برجاہ اَنت اے مردمانی تہ ءَ زالبولانی یک مزنیں کچے ھوار اِنت ءُ اشانی کوشکار باز کم گرگ ءُ سزا دیگ بیگ اَنت –

کچ ءَ کساسانی رد ءَ پاکستان ءَ گیرت ءِ نام ءَ سالگشتاں یک ھزار زالبول کُشگ بنت کہ اشانی تہ ءَ بلوچستان ءِ دمگ نسیر آباد ءُ سندھ ءِ لھتے دمگاں گیشتر اَنت-

بلوچستان ءِ تیاب دپی شھر گوادر ءَ بارڈر ٹریڈ یونین ءِ زھرشانی، بارڈر ٹریڈ یونین ءِ صدر امان اللہ کلانچی، نائب صدر زاہد کلانچی ءُ پریس سیکریٹری ملا جمیل ءِ سروکی ءَ مزنیں کچے ءَ مھلوک ءَ ڈی سی کارگس ءِ دیما زھرشانی کُتگ۔

اے وھدءَ بارڈر ٹریڈ یونین ءِ سروک امان اللہ کلانچی ءُ دگراں زھرشانی ءَ ھواریں مردماں گوں تران کنان ءَ گُشتگ کہ کنٹانی ھور ءُ جیونی ھنکین ءِ سیمسری حد ءُ بنداں تھناں کسانیں اولاک ءُ گوادر دمگ ءِ مھلوکءَ باپار ءِ ھق دیگ بہ بیت۔

آئی ءَ گُشتگ کہ جیونی ءُ کنٹانی ھور سیمسرءِ نیمگ ءَ مزنیں اولاک ءُ آئل ٹینکر انی سرءَ بندش جنگ بہ بیت۔

آھانی گُشگ اَت کہ گوستگیں بے آپی ءِ وھدءَ آپ ءِ ٹینکرانی زر داں انگت دیگ نہ بیتگ اَنت آ بائد اِنت زیت دیگ بہ بنت۔ ھمے نیام ءَ ایڈیشنل ڈپٹی کمشنر ذاکر علی زھرشانی کنوکانی نندانک ءَ سر بیتگ ءُ زھرشانی کنوکاں گوں سوبمندیں گپ ءُ تران پد دو روچ ءَ جیڑھانی ھلاس ءِ باوری داتگ کہ اِشی ءَ پد زھرشانی کنوکاں اے باوری ءِ پدا وتی زھرشانی ھلاس کُتگ۔

روکپتی بلوچستان ءَ چُکانی جرم ءِ سر ءَ مات گرگ بیتگ ءُ چار روچ ءَ زنداناں کنگ ءَ پد مروچی یل کنگ بیتگ –

گیشیں ھالانی رد ءَ روکپتی بلوچستان ءَ چُکانی جرم ءِ سر ءَ گرگ بیتگیں بلوچ زالبول کہ آئی ءِ نام جانی دکالی جھمنند بمپور ءِ نام ءَ زانگ بیتگ ءُ گوستگیں چار روچاں زانداناں بیگ ءَ پد مروچی یل کنگ بیتگ –

بلوچ کمپین فعالین کہ روکپتی بلوچستان ءَ انسانی ھکانی لگتمالی ءِ ھلاپ ءَ چاگردی رسانکجاھاں ھال شنگ کنگ انت آئی ءِ رد ءَ گوستگیں پشمبے ءَ ایرانی چیریں ادارھاں بمپور ءَ یک لوگے ءِ سر ءَ بیڑ برتگ-

بلوچ فعالین ءِ رد ءَ ایرانی چیریں ادارھاں اود ءَ بلوچ زالبول جانی دکالی ابید ء جرم ءَ گپتگ ءُ گوں وت برتگ-

بلوچ فعالین ءِ رد ءَ اے زالبول چار روچاں ایرانی چیریں ادارھانی زندان ءَ بندیگ بیتگ ءُ پد ءَ ابید ء آمیدگس ءِ پیشی ءُ دگہ چیزاں مروچی یلو کرتگ-

سبی ءَ دو جتائیں جاھاں زورگیریں پوج ءِ سر ءَ اُرش کُتگ ءُ جانی ءُ مالی تاوان داتگ انت- جیئند بلوچ

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مئے سرمچاراں سبی ءِ بازار ءَ ناڑی بینک ءِ سر ءَ برجاھیں پوجی پانگس ءِ سر ءَ دز بمب اُرش ءِ کُتگ چریشی ءَ دو پوجی کارمند زدگ بوتگ انت –

جارکش ءَ دیمتر ءَ وتی درشان ءِ تہ ءَ گوشتگ کہ مئے سرمچاراں دہ فروری ءَ سبی ءِ دمگ ناڑی گاج ءَ ترتاب کنوکیں زورگیریں پاکستانی پوج ءِ کارمندانی سر ءَ ھم اُرش ءِ کُتگ تیرگواری ءَ دژمن پوج ءَ جانی ءُ مالی تاوان ءِ دیمپانی بوتگ –

جارکش جئیند بلوچ ءَ درشان ءِ گڈسر ءَ گوشتگ کہ ھردو اُرشانی زمہ واری ءَ مئے گل بی ایل اے منّ ایت انت ءُ سرڈگارے آجوئی ءَ تان مئے جھد برجاہ مانیت –

بلوچستان ءِ دمگ آواران ءَ ھمے سال ءِ دوازدہ فروری ءِ شپ ءَ پاکستانی پوج ءِ دست ءَ بازیں لٹ کٹان بیران بوتگیں محمد علی ء دینار کوش ءِ بگیری ءَ آئی ءِ کھول ءَ زھرشانی کُتگ ءُ ھک ءِ لوٹ کُتگ –

زھرشانی ءَ تیرتیج ءِ بازیں مردماں بھرزرتگ – زھرشانی کنوکاں روانک کش اِتگ ءُ تاں کبرستان ءَ شُتگ انت کہ اودا گوستگیں شپ ءَ دزگیری ءَ پد کُشگ بوتگیں ھاتر ءَ پوج ءَ ٹیکٹرے سر ءَ کڈے جتگ ءُ محمد علی ءِ جون ھمودا کل کُتگ –

زھرشانی کنوکاں لوٹ کتگ کہ آھاں جون ءِ کشگ ءَ بِل انت ءُ مزھبی دودانی رِد ءَ کل ءُ کسارت کنگے اجازت دئیگ بہ بیت –

ھمے وھد ءَ زالبولاں کڈ کونڈیتگ ءُ محمد علی ءِ جون در کُتگ پدا مزھبی رسمانی رِد ءَ دمگی کبرستان ءَ کل ءُ کسارت کُتگ –

زانگ بہ بیت دوازدہ فروری شپ ءَ پوج ءَ گِس ءِ سر ءَ بیڑ برتگ ءُ دو مردم زورانسری آوار جتگ گوستگیں شپ ءَ یک مردمے ءِ جون آرگ بوتگ ءُ کبرستان ءِ نزیک ءَ کڈ ءِ جتگ ءُ ھمود ءَ کل کتگ –

زھرشانی کنوکانی گوشگ ات کہ اے وڈ کس دلوتانی گوم ءَ نہ کنت کہ پاکستانی پوج ءَ محمد علی ءِ جون ءِ گوم ءَ کُتگ آھانی اے ھک انت کہ آئی ءِ جون ءَ پہ شرپ کل بہ کن انت –

زھرشانی کنوکاں لوٹ کتگ گوشتگ کہ مئے گوم ءَ انسانانی وڈ ءَ پیش بیا انت مئے سر ءَ دلوتانی ناں بلکنہ انسانی کانود نافز کنگ بہ بیت پرچاکہ ما ھم انسان ایں –

آواران تیر تیج ءِ زھرشانی ویڈیو ہیومن رائٹس کونسل بلوچستان ءِ انفارمیشن سیکرٹری عبداللہ عباس ءَ ٹویٹر ءَ شنگ کرتگ ءُ نبشتگ کہ نوشکی ءُ پنجگور ءِ اُرشاں پد پوج مزنین کچی ءَ زوراکی کنگ ءَ انت دامگ بند کنگ بوتگ انت کم چہ کم پنجاہ مردم زورانسری آوار جنگ ءُ بیگواہ کنگ بوتگ بازیں کُشگ بوتگ اَنت –

آئی ءَ گوشتگ کہ اے زوراکیانی سوب ءَ زھر گیش بیت انت –

سِندھ ءِ مزن شھر کراچی ءَ سندھ اسمبلی ءِ نزیک ءَ پشتون تحفظ مومنٹ ءِ زھرشانی مروچی دومی روچ ءَ برجاہ بوتگ –

پاکستان قومی اسمبلی ءِ باسک ءُ رھشون علی وزیر ءِ یل کنائینگ ءِ ھاتر ءَ زھرشانی ءَ پشتون تحفظ مومنٹ ءِ سرکماش منظور پشتین ھوار پشتون ورنایاں مزنیں کچے ءَ بھر زرتگ –

مروچی زھرشانی ءِ دومی روچ ءَ چہ بلوچستان ءَ زورانسری آوار جنگ بوتگیں مردمانی پانکجنیں جنیں گل وائس فار بلوچ مسنگ پرسنز ءِ کمک سرکماش ماما قدیر بلوچ بیگواھیں بلوچ رھشون ڈاکٹر دین محمد ءِ زھگ سمی بلوچ ءُ دگہ سیاسی باسکاں بھرزرتگ ءُ دلپدری درشان اتگ –

زانگ بہ بیت کہ علی وزیر شانزدہ دسمبر سال دوھزار ءُ بیست ءَ سندھ پولیس ءِ گوشگے پد ءَ پشاور ءَ چہ دزگیر کنگ ءُ کراچی ءَ آرگ بوتگ –

آ ھمے واستا دزگیر کنگ بوتگ کہ شش دسمبر سال دوھزار ءُ بیست ءَ کراچی ءَ پی ٹی ایم ءِ نیمگ ءَ روانک ءِ کشگ بوتگ آئی ءِ سر ءَ ھمے الزام جنگ بوتگ کہ ھما روانک ءَ علی وزیر ءَ پاکستان ءِ ادارھانی بگیری ءَ ترندیں لبز تران کُتگ –

زھرشانی ءَ بھر زورکیں ماما قدیر بلوچ ءُ دگہ بلوچ رھشونانی گوشگ ات کہ بلوچ ءُ پشتونانی درد ءُ مارشتانی سیادی یے مروچی ما دؤئیں راج ریاستی زوراکیانی آماچ ایں –

آھانی گوشگ ات کہ وتی راج ءُ زمین درگت ءَ گپ جنگے ھاتر ءَ کیز، لٹ کٹ ءُ زورانسری آوار جنی سزا دئیگ بیت اتنت –
آھاں گوشتگ کہ ایردستانی یکجاھی ءُ آھانی یکجاھیں مارشتاں زوراک اوپار کُرت نہ کنت، مروچی درسیں ایردستیں راجاں یکجاہ بوھگ ءُ زوراکانی دیم ءَ دیوال ءِ جوڑ بوھگی انت –

نبشتانک: بلوچ راج ءُ آئی ءِ راجی زبان

نبشتہ کار: شاھد اھمد

دی بلوچستان پوسٹ

ھو گِند ئے ما بلوچ ایں ءُ بلوچی زبان مئے ماتی زبان اِنت، میان اُستمانی روچ ءَ آ دگہ راجانی مھلوک وتی ماتی زبانانی روچ بیست ءُ یک اُستپان ءَ بَھر زورگ ءَ اَنت باید اِنت ما بلوچ ھم وتی ماتی زبان بلوچی ءَ وتی زُبان دوستی ءُ راجدوستی ءِ مارشتاں درشان بہ کن ایں چی ءَ کہ اے روچ پہ ما انچیں روچے کہ آ دگہ راج ھم وتی ماتی زبان ءِ تہ ءَ گوں پھر ءُ ناز ءَ وتی ھیال ءُ لیکھاں درشان کن اَنت۔

اے گپ راستے کہ بلوچی زبان آ دگہ راجانی پیم ءَ آجو نہ اِنت کہ وتی ماتی زبان ءَ وانگجاھانی تہ ءَ وانینگ بہ بیت چمیشکا مئے بلوچی ماتی زبان بندیگ کُتگ پرچاکہ ھر راج ھمے کوشست کن اَنت کہ مئے راجی زبان دگنیا ءِ تہ ءَ نبشتہ ءُ گپ بہ کن اَنت بلے ما بلوچ وت وتی راجی زبان ءِ تہ ءَ نبشتہ ءُ گپ کنگ ءَ دل نہ لوٹ ایت کہ ھبر ءُ نبشتہ بہ کن ایں چی ءَ کہ درآمدیگی زباناں مئے راجی زبان ءِ سر ءَ سک باز سان دَور داتگ کہ ما وت وتی زبان ءِ تہ ءَ مَنّگ ءَ جاڑی نہ ایں ءُ اگاں ما وتی زبان ءِ تہ ءَ نبشتہ ءُ ھبر بہ کن ایں گڑا ما دری زبان ءِ تہ ءَ وتی زبان ءَ ھور ءُ تور گپ ءُ نبشتہ کن ایں ءُ پمیشکا مئے بلوچی زبان ما وت شَگالی کُتگ۔

ایشی ءِ مستریں سبب ایش اِنت کہ ما وت وتی زبان ءَ نہ منّ ایں ءُ ما داں اَبد وتی زبان ءَ دست ئِے وت گار ءُ بیگْواہ کنگ ءَ ایں۔

بیدے زبان ءَ ما یک کوریں، کَرّیں ءُ گُنگیں بنی آدم ایں بزاں بس بُتّے جوڑ بَہ ایں ءُ دگہ راج مارا چوں سنسکرت زبان ءِ پیم ءَ یک روچے بزاں مراگش ءِ پُرسیگ لیک اَنت۔

اگاں شما اے چیز ءَ مَنّ اِت گڑا وتی زبان ءَ بے ھیال بہ کن اِت ءُ دری زبان ءَ وتی امبازاں بُزور اِت ءُ اگاں شما نہ لوٹ اِت کہ دگنیا مارا اے رنگ ءَ مہ چار ایت گڑا باید اِنت یکمُشت ءُ تپاک بہ بَہ اِت وتی ماتی زبان ءَ امبازاں بزور اِت چوں مہ بیت کہ شما چَٹّ ءَ گار بِہ بَہ اِت۔

شُما ھر ھما بلوچ پُسگ ءِ زمہ واری اِنت کہ وتی ماتی زبان ءَ بہ وان اِت ءُ وتی چُکاں ھم وانین اِت ءُ یکمُشت بہ بیت دری زبان ءِ راج ءَ اے باور کنائین اِت کہ ما ھم یک راجے ءِ بستار ءَ زانگ بَہ ایں ءُ اے ھم باور کنائینگ لوٹ ایت کہ مارا ملکے ھست مئے ملک ءِ نام بلوچستان اِنت ءُ ایشی ءِ چُک پہ وتی راجی زبان ءِ واست ءَ ھر وڑیں کربانی دیگ ءَ ھم جاڑی اَنت۔

شالا ءَ بلوچستان زندگ بات ءُ بلوچی زبان دیم ءَ دیمروئی بہ کنات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔