TBP Balochi

بلوچستان ءِ دمگ کیچ ءَ ناشناسیں مردماں پوجی چوکی ءِ سر ءَ دز بمب گوں اُرش کُتگ۔

پوجی چوکی کیچ دمگ ءِ ناصر آباد ھنکین ءَ نشانگ کنگ بیتگ۔

اھوالانی رد ءَ اُرش ءِ تہ ءَ لشکریانی تاوان رس اتگ وھدیکہ اے درگت ءَ انگت دلجمیں اھوال سر نہ بیتگ۔

زانگ بہ بیت اے دمگانی تہ ءَ آجوئی لوٹوکیں بلوچ سلاہ بندیں گل مھکم اَنت، بلے مروچی بیتگیں اُرش ءِ زمہ واری داں انگت ھچ گل ءَ نہ من اِتگ۔

ناشناسیں سلاہ بندیں مردمانی تیرگواری ءَ ھاش ءَ چار کس بیران بیتگ اَنت-

سر بیتگیں ھالانی رد ءَ روکپتی بلوچستان ءِ دمگ ھاش ءَ ناشناسیں مردمانی تیرگواری ءَ چار کس بیران بیتگ اَنت-

کشگ بیتگیں مردمانی پجار بلال ریگی، شعیب شھنوازی ءُ سامین شھنوازی ء گلباران ءُ ھمے میان ءَ یک کس ئِے کُشگ بیتگ بلے آئی ءِ پجار نہ بیتگ –

ھالانی تہ ءَ گوشگ بیتگ اے مردمانی سر ءَ ھما وھد ءَ تیرگواری بیتگ کہ وتی گس ءَ ڈن اوشتوک بیتگ اَنت ناگتی سلاہ بندیں مردماں تیرگواری کرتگ ءُ کُشتگ اَنت –

اے ھرچاریں مردمانی کوشانی درگت ءَ دگہ گیشیں سرپدی نہ بیتگ اَنت نانکہ انتزامیہ ءِ نیمگ ءَ چوشیں گپ دیم ءَ اتکگ اَنت-

دوشی شپ یوئیفا چمپئین لیگ ءِ شانزدھمی راؤنڈ ءَ چار ٹیمانی میان ءَ گوازی کنگ بوتگ کہ آھانی تہ ءَ پی ایس جی ءَ رئیل میڈریڈ ءِ دیم ءَ یکے ءُ مانچسٹر سٹی ءَ اسپورٹنگ ءِ دیم ءَ پنچ گولاں گوازی کٹ اِتگ انت- دومی نیمگ یورپئین پریمئیر لیگ فٹبال گوازی ءَ مانچسٹر یونائیڈ ءَ برائیٹون ءِ دیم ءَ دوگولاں چہ گوازی کٹ اِتگ –

دوشی شپ بوتگیں یوئیفا چیمپئین لیگ شانزدھمی راؤنڈ ءِ اولی گوازی پیرس سینٹ جرمن (پی ایس جی) ءُ رئیل میڈریڈ ءِ میان ءَ بوتگ کہ پی ایس جی ءَ یک گولے ءَ گوازی کٹ اِتگ وھدیکہ رئیل میڈریڈ ءِ نیمگ ءَ چہ ھچ گول اسکور کنگ نہ بوتگ –
پی ایس جی ءُ رئیل میڈریڈ میان ءَ بوتگیں گوازی ءَ ھردو ٹیمانی لیبیاں جوانیں لیب پیش داشتگ ءُ گوازی ءِ اولی ھاپ ءَ ھردو ٹیم دیمیگ بوتگ انت بلے دومی ھاپ ءِ گڈسر ءَ نودمی ملٹ ءِ تہ ءَ پی ایس جی ءِ لیبی کیلئین ایمفافے یک گولے اسکور کُتگ ءُ چہ رئیل میڈریڈ ءَ باج بُرتگ ءُ گوازی وتی ٹیم ءِ نام ءَ کُتگ –

چمپئین لیگ ءِ دوشی شپ بوتگیں دومی گوازی مانچسٹر ءُ اسپورٹنگ کلب ءِ میان ءَ بوتگ کہ مانچسٹر سٹی ءَ پنچ گولاں گوازی کٹ اِتگ – اسپورٹنگ ءِ نیمگ ءَ چہ ھچ گول اسکور کنگ نبوتگ وھدیکہ مانچسٹر ءِ لیبی بی. سلوا ءَ دو، ریاد مہریز، فل پوڈین ءُ رحیم ءَ یک یک گولے اسکور کُتگ گوازی وتی ٹیم ءِ نام ءَ کُتگ –

دومی نیمگ ءَ یورپئین پریمئیر لیگ فٹبال گوازی ءَ مانچسٹر یونائیٹڈ ءُ برائیٹون ءِ میان ءَ گوازی کنگ بوتگ کہ مانچسٹر یونائیٹڈ دو گولاں گوازی کٹ اِتگ –

مانچسٹر یونائیٹڈ ءُ برائیٹون ءِ میان ءَ بوتگیں گوازی ءَ برائیٹون ءِ نیمگ ءَ چہ ھچ گول اسکور کنگ نہ بوتگ وھدیکہ مانچسٹر یونائیٹڈ لیبی کرسٹانو رونالڈو ءَ پنجاہ ءُ یکمی ملٹ ءَ مانچسٹر ءِ نیمگ ءَ چہ اولی گول اسکور کُتگ دومی گول بی.فرنندس ءَ نودمی ملٹ ءِ تہ اسکور کُتگ –

ھک دو تھریک ءِ سروک مولانا ھدایت الرحمان بلوچ ءَ سے شمبے ءِ روچ ءَ دگہ ھمراھانی ھمراھی ءَ بلوچستان ءِ دمگ کیچ ءِ بُنجاھی شھر تربت ءَ اَتکگ ءُ اے درگت ءَ پریس کلب ءَ یک پریس کانفرنسے ءَ چہ تران کنان ءَ جار جتگ آ زوت دہ لک مردمانی ھمراھی ءَ شال ءَ رو اَنت نندانک جن اَنت-

آئی ءَ گوشتگ کہ آئی ءِ زرمبشت کَسی سیاسی پارٹی یا کہ پردے ءِ بگیر ءَ نہ اِنت بلکیں بُنکی راجی جیڑاھانی سر ءَ اِنت ءُ گیبی تاکت وتی جاہ ءَ راج اے زرمبشت ءِ تاکت اِنت-

آئی ءِ گوشگ اِنت بیگواھیں مردمانی جیڑہ ءِ سر ءَ جُھد ءِ ھاتر ءَ راجدوست ھاسکار بی این پی مینگل ءُ نیشنل پارٹی ءِ کر ءَ شتگ ءُ یکجاھی جُھد ءِ ھاتر ءَ منارینگ ءِ جُھد کتگ پرچاکہ آ دومی نُکتے ءِ سر ءَ اناں کم چہ کم اے ھاسیں انسانی دردناکی ءِ سر ءَ اے گچینی پرمان ءِ ھاسیں جز اِنت-

آئی ءَ گوشتگ کہ سیمسر ءَ جاورانی چار ءُ ٹپاس کنگ ءَ رند صوبائی ھکومت ءِ گوم ءَ نبشتانکی مُھاد ءِ درگت ءَ چہ شور کن ایں چریشی ءَ پد زھرشانی ئیں نندانک کن ایں کیچ ءَ سنگتانی شور ءَ پد مزنیں نندانکے ءِ جار ءَ جن ایں-

آئی ءَ گوشتگ کہ ھک دو تھریک ءَ مزنیں کچے ءَ سوبمندی رس اتگ، ما ایف سی ءُ پھازوکی ادارھانی ودی کتگیں تُرس ھلاس کتگ اے وھد ءَ اگاں لھتے مردم تُرس آماچ اَنت اشاں نا اُمیتی ءُ تُرس ءِ درکنگ ءِ ھاتر ءَ شعوری زُرمبشتے بندات کن ایں چرشی ءَ راج ءَ ھوار کن ایں-

آئی ءَ گوشتگ کہ انو اے وھد ءَ بے ایمنی ءِ وئیلانی سر ءَ کسی پوج ءَ اے جُست ءَ نہ کنت کہ اشانی کر ءَ اینچوکیں مزنیں بجٹے ھست آ وتی ھم پھازوکی ءَ کُت نہ کنت، بے ایمنی ءِ زمہ وار ایف سی اِنت، تباھی ءُ بربادی ءِ بُن ، کُشت ءُ کوش ءُ بے کانودی کاراں ھواریں ایف سی ءَ بلوچستان ءَ چہ درایگ لوٹ اِیت اشی چہ ابید جاور شر بوت نہ کن اَنت-

آئی ءَ گوشتگ دانکہ ڈیتھ اسکواڈ ، منشیات باپاری، تُپنگی ئیں مردماں ھوار وتگڑیں واجکارانی سروکی بیت جاور شر نہ بنت، لَس مھلوک زلیل ءُ بزگ اِنت منشیات پاباری ازتدار ءُ کُشکار ھاسیں مردم بنت گُڑا جاور بدل نہ بنت، ھک دو تھریک تُرس ءُ بے اُمیتی ھلاس کنت بُنکی راجی جیڑاہ ءَ چست کنت راج ءِ تہ ءَ شری کار لوٹ اِیت، وتی لیکہ ءِ سر ءَ ھک دو تھریک جُیزے مدتے ءِ تہ ءَ مزنیں سوبمندی یے رس اتگ ئِے-

آؤکیں وھد ءَ پشتون ءُ بلوچاں زُلم ءُ زوراکی ءِ بگیری ءَ یکجاہ کن ایں- بیگواھیں مردمانی یل کنائینگ ءُ سیمسر ءَ ٹریڈ سر ءَ راج اوشتارین ایں، صوبائی ھکومت ءَ مستری نیست ءُ آ وتی جیڑاھاں پُشتکنز اِنت ھر روچ یک وزیرے دلرنج بیت ءُ آئی ءِ منّارینگ ءَ شرکینی ءِ وارینگ ءَ سرجمیں روچ گْوز اِیت دومی روچ ءَ پد ءَ یک وزیرے دلرنج بیت، بلوچستان ءِ تہ ءَ شری راج ءِ تاکت ءَ چہ کَیت، نو ھچ وڑ مئے زلیل بوگ نہ بیت-

آئی ءَ گوشتگ کہ چیک پوسٹاں مئے پھازوکی ءِ ھاتر ءَ نہ اَنت زلیل کنگ ءُ وتی باپاری ءُ کلدارگرگ ءِ ھاتر ءَ جوڑ کتگ اَنت پنجگور ءُ نوشکی ءِ وئیل ءَ مئے ھیال پدر کتگ-

آئی ءَ گْوشتگ کہ کیچ شھر ءِ تہ ءَ ایف سی ءِ اینچوکیں مزنیں بُنجاھی جوڑ کنگ چی مانا دار اِیت ھالانکہ ایف سی سیمسری پوجے اشی ءَ سیمسر ءَ بوگی اِنت آ شھر ءَ جاگہ گپتگ ءُ نشتگ-

آئی ءِ گوشگ اَت کہ صوبائی ھکومت گوم ءَ سیمسر ءِ درگت ءَ ھما مُھاد ءَ کہ بوتگ اَنت آ سرجم کنگ نہ بوتگ اَنت، ایف سی تنی وھدے سیمسری باپاری ءَ ھوار اِنت، مارا گوں سیمسر ءَ سرجمیں جیڑاہ دمگی انتزامیہ ءِ دست ءَ دیگ ءِ مُھاد ءَ کنگ بوتگ کہ آیانی سر ءَ انگت چُشیں گامگیج زورگ نہ بوتگ، سیمسر ءَ پچ کن پجّار کارڈ سر ءَ مھلوک ءَ باپاری ءِ موکل دیگ بہ بیت-

آئی ءَ گوشتگ کہ بلدیاتی گیچنکاری اگاں آزات بہ بنت گُڑا یک وشیں گپے بیت ، گیچنکاری ءَ ھر وھد ءَ بلیک منی کارمرز بیت، آجوئی ءِ گچینکاری ءَ چہ راج ءِ جاورانی تہ ءَ شری کیت، اگاں گچینکاری جمھوری راھاں اوشتارینت گُڑا بے اُمیتی ءِ تہ گیشی کیت-

آئی ءَ گوشتگ کہ گوشتگ کہ بیگواھیں مردمانی ایجنڈے سر ءَ راج دوستانی کر ءَ رو آں ءُ اے نُکتے سر ءَ مئے ھمراھداری کن اَنت یا نہ کن اَنت، مئے گھار وتی بیگواھیں براتانی یل کنائینگ ءِ ھاتر ءَ زھرشانی کنگ ءَ اَنت اشانی گوم ءَ یک راجدوستے ھم نیست کہ آ بژنگے گپے، بیگواھیں مردمانی واست ءَ زوت شال نیمگ ءَ جُنز ایں-

پریس کانفرنس ءِ وھد ءَ ھک دے تھریک راھشون مولانا نصیر احمد بلیدی، غلام یاسین بلوچ، غلام اغظم دشتی ، یعقوب جوسکی ، شاہ جھان بلوچ ءَ ھوار ساڑی بوتگ-

نیشنل ڈیموکریٹک پاٹی ءِ بنجاھی جارکش ءَ وتی شنگ کرتگیں درشان ءِ تہ ءَ گوشتگ کہ بلوچستان ءِ مھلوک ھمے ھد ءَ تاں اتکگ ءُ سر بوتگ کہ وتی ھکانی گرگ ءِ ھاتر ءَ تانکہ ترند ءَ چہ ترندتریں گامگیج نہ زور ایت گڑا آئی ءِ گپ گوشدارگ نہ بیت انت، گوستگیں سرکار ءِ کریڈیٹ بازی سوب ءَ چہ رجسٹریشن املے سرجم نہ بوگ ءَ ابید کالجانی ایڈمیشن جار جنگ نودبرانی باندات ءِ گوم ءَ گوازی کنگ انت –

جارکش ءَ گوشتگ کہ میڈیکل کالجانی نودربراں میرٹ ٹیسٹ پاس کُتگ کالجانی تہ ءَ داخلہ زورگ ءَ سوبین بوتگ انت بلے کالجانی واکدار، جانسلامتی ءُ سرکار ءِ ردیانی بار نوں نودربرانی سر ءَ لڈگ بوگ ءَ انت کہ سراسر ناھکی یے – گوستگیں ھپتاد ءُ چار روچ انت کہ نودربر زھرشانی کنگ ءَ اَنت ءُ گوستگیں پنچ روچ انت کہ شدکشیں زھرشانی ءَ نشتگ انت ءُ لھتے نودربرانی جاور نگیگ بوتگ ءُ نادراھجاھاں برگ بوتگ انت بلے سرکار ءُ پی ایم سی نشتگ ءُ تماشا چارگ ءَ انت –

جارکش ءَ گوشتگ کہ پی ایم سی ایکٹ ءِ تہ ءَ چشیں ھچ وڑیں چکاسانی زکر نیست اے اسپیشل چکاس ءِ جار جنگ گیر کانودی یے ، نودربراں گیرکانودی چکاس گرگ آ تُری سد درسد پاس بہ بنت بلے اشی ءَ ابید ھم اے گیر کانودی یے، پی ایم سی، جانسلامتی ءُ سرکار ءَ لوٹ ایت وتی ردیانی بار ءَ نودربرانی سر ءَ لڈگ ءِ بدل ءَ میرٹ ءَ اتکگیں گوستگیں ٹیسٹاں چمشانکے نہ دے اَنت ءُ نودربراں رجسٹر بہ کن انت-

جارکش ءَ وتی درشان ءِ گڈسر ءَ گوشتگ کہ نودربر مئے راجی مڈیاں ھمے نودربراں باندا ڈاکٹر جوڑ بوگی انت ءُ انسانیت ءِ ھدمت کنگی انت آھانی گوم ءَ ھچ وڑیں ناھکی اوپار کنگ نہ بیت اِنت –

دی بلوچستان پوسٹ پتر ھال ءَ سربوتگیں ھالانی رِد ءَ سندھ ءِ دمگ حیدرآباد ءَ بلوچستان ءِ دمگ پنجگور ءِ ورنایے زورانسری آوار جنی ءَ پد بیگواہ کنگ بوتگ وھدیکہ پنجگور، ھزدار ءُ نوشکی ءَ پوج ءِ دست ءَ زورانسری آوار جنی ءَ پد بیگواہ بوتگیں سَے مردم یل کنگ بوتگ انت –

گیشیں ھالانی رِد ءَ سندھ ءِ دمگ حیدرآباد ءَ پاکستانی پوج ءَ گِسے ءِ سر ءَ بیڑ بُرتگ سھیل بلوچ نامیں ورنایے آوار جتگ ءُ گوں وت بُرتگ – سھیل بلوچ سندھ ءِ دمگ ھیدرآباد ءَ نندوک بوتگ وھدیکہ آ بنکی ءَ پنجگور ءِ جھمنند انت –

سھیل بلوچ ءِ کھول ءَ آئی ءِ آوار جنی ءِ ھبر راست کُتگ ءُ گوشتگ کہ ھمے ماہ ءِ یک فروری ءَ چیریں ادارھانی کارمنداں دمگی پولیس ءِ ھمراھی ءَ گِس ءِ سر ءَ بیڑ برتگ ءُ سھیل بلوچ گوں وت بُرتگ – کھول ءِ گوشگ انت کہ سھیل بلوچ لھتے روچ ساری پنجگور ءَ وتی سیاد ءُ وارسانی چارگ ءَ شُتگ بوتگ پد ءَ واتر حیدرآباد ءَ اتکگ وھدیکہ سھیل بلوچ ءِ کھول ءَ چِل ءُ پنچ سال اِنت کہ سندھ ءَ نندوک انت –

سھیل بلوچ ءِ کھول ءَ انسانی ھکانی ادارھاں ھوار سندھ ءِ سرکار ءَ چہ لوٹ کُتگ ءُ گوشتگ کہ سھیل بلوچ زاھر کنگ بہ بیت ءُ آئی ءِ گوم ءَ ھک کنگ بہ بیت –

دومی نیمگ ءَ بلوچستان ءَ پاکستانی پوج ءِ دست ءَ انوگیں کریک ڈاؤن ءَ زورانسری آوار جنگ بوتگیں پنجگور ءِ جھمنند مسرور عارف ءُ چہ نوشکی ءَ بیگواہ بوتگیں کریم بلوچ یل بوتگ انت وھدیکہ چار ماہ ساری چہ کراچی ءَ زورانسری آوار جنگ بوتگیں ھزدار ءِ جھمنند محمد افضل ء عبداللہ زھری ھم مروچی یل بوتگ ءُ وتی گِس ءَ سر بوتگ انت –

نوشکی پریس کلب ءَ چہ سیادی داروکیں اھوالکاراں مروچی سَے شمبے ءِ روچ ءَ بلوچستان ءِ تیاب دپی دمگ گوادر پریس کلب خیر سگالی ءِ تر ءُ تاب کُتگ –

ھمے وھد ءَ گوادر پریس کلب ءِ اھوالکاراں آ وش اتک کُتگ انت ءُ ھردو نیمگاں نزیکی ءُ اھوالکاری ءِ درگت ءَ وتی ھیال درشان اتگ انت –

جی پی سی اھوالکار ءِ رِد ءَ نوشکی پریس کلب ءِ اھوالکارانی گوستگیں سرکماش برکت زیب سمالانی، اھوالکار ظہور گل جمالدینی ءُ بلوچستان نیشنل پاٹی ءِ خورشید جمالدینی ءَ گوں دگہ ھمراھانی ھواری ءَ پریس کلب ءِ تر ءُ تاب کُتگ –

ھمے وھد ءَ ھردو نیمگاں وت ماں وت نزیکی ءُ اھوالکاری ءِ درگت ءَ وتی ھیال درشان اتگ انت- خورشید جمالدینی ءُ ایندگرانی اے درگت ءَ گوشگ ات کہ اھوالکاری ھر ریاست ءِ چارمی ھشت انت اھوالکاری یک ھما گیر جُھدے ءِ نام ایں، ھر چاگردے تہ ءِ آئی ءِ کرد ءِ نہ منّگ ممکن نہ ایں –

آھانی گوشگ ات کہ بلوچستان ءِ تہ ءَ اھوالکاراں بازیں اڑ ءُ جنجالانی دیمپانی کنگ کپگ انت ادے اھوالکاراں سد آپرین انت کہ بازیں جیڑہ ءُ جنجالاں ابید ھم مھلوک ءِ جیڑھاں دیم ء کار انت کہ ستا کرزانت –

نوشکی ءَ چہ اتکگیں ٹولی ءَ گوادر پریس کلب ءِ اھوالکارانی بازیں جیڑہ ءُ جنجالاں آبید وتی زمہ واریانی پیلو کنگ ءُ جوانیں کرد پیش دارگ ءَ دلبڈی داتگ انت ءُ گوادر ءِ اھوالکار نوشکی پریس کلب ءِ آیگ ءِ داوت ھم داتگ –

دومی نیمگ ءَ گوادر پریس کلب ءِ اھوالکاراں چہ نوشکی ءَ اتکگیں اھوالکار گوادر پریس کلب ءِ کانفرنس ھال، لائیبریری ءُ کارگس ءَ ھوار دگہ جاہ ھم پیش داشتگ انت –

کراچی پریس کلب ءِ دیم ءَ زورانسری بیگواھیں مردمانی زھرشانی بنجل ءَ چار ھزار ءُ پنچ سد ءُ نود ءُ دو روچ سرجم بیتگ، یکجھتی ءِ واستا جئے سند کومی مھاز ءِ کلانیں سروک اجاز چانڈیو ،جنید چانڈیو ءُ دگہ مردم ھوار بیتگ اَنت-

وی بی ایم پی ءِ وائس چیئرمین ماماقدیر بلوچ ءَ تران کنان ءَ گْوشتگ کہ مئے جُھد روانک، زھرشانی، مُچی ءُ چاگردی رسانکدر ءَ کمپئن کنگ ءُ مرچی کراچی پریس کلب ءِ دیم ءَ پہ ھمے اوست ءَ نشتگ ءُ پاکستانی چیریں تْرامگیجانی بیھارانی دیمپانی ءَ کنگ ءَ ایں کہ روچے نا روچے میان اُستمانی کانود مئے نیمگ ءَ دلگوش ءَ گْور کن اَنت، ما یکبرے پد ءَ چہ اقوامتھدہ ءَ ھوار میان استمان ءِ مردمی اگبالانی گلاں دزبندی کن ایں کہ آ وتی جوڑ کُرتگیں کانود ءُ راھبندانی پاسداری ءَ بہ کن اَنت کہ چہ ایشی ءَ ھزاراں کھول، مات ءُ گْوھار پہ شاتکامی وتی زندمان ءَ بہ گْوازین اَنت۔

آئی ءَ گْوشتگ کہ بلوچ زھگ چہ پریس کلبانی دیم ءِ واہ ءُ زارانی جاہ ءَ وانشتجاہ ءُ زانشتجاھاں چو مردمانی وڑ ءَ زندگی بہ گْوازین اَنت ءُ لکانی کچ ءَ بلوچاں وانگ ءُ زانگ ءِ دربرگ ءِ موہ بہ رس ایت، اگاں نہ زوراک ءُ زورگیرانی دیم ءَ گریوگ اھمکی ءَ ابید دگہ ھچے نہ اِنت، چونائی ءَ مردم واہ ءُ زار پمیشکا کن اَنت داں وتی توار ءَ داں جوانیں مردماں سر بہ کن اَنت، بِلے کہ پہ ایشی ءَ مارا رسانکدر ءُ ٹیکنالوجی لوٹ ایت کہ چہ ایشاں ما زبھر ایں ءُ پاکستانی رسانکدر زوراکیانی چیر دیگ ءِ سْوب ءَ اے میار باریاں شریدار اَنت، بلوچستان ءِ واہ ءُ زار چیر تَرینگ بیگ ءَ اَنت۔

آئی ءَ گْوشتگ کہ زاناں پہ بلوچاں بس مِرگ ءُ بیگواہ کنگ پشت کپتگ، دیمروئی، مالی ءُ سیاسی زندگی ءِ رکینگ ءَ پہ بلوچ ءَ بس واہ ءُ زار، جونانی چِست کنگ ءُ پدمنتگی راجے جوڑ بیگ ءُ دست کُٹ ءَ کنگی اَنت۔چو بلوچستان ءِ وڑ ءَ سندھ ءَ ھم سدانی کچ ءَ وئیل دیم ءَ اتکگ اَنت۔نوکیں ٹیکنالوجی ءُ کیمرھانی چمانی دیم ءَ ھمک چیز پدر بیتگ بلے ایشی ءَ ابید جھان مئے زمین ءِ چیر ءِ گرانھادیں مڈیاں گند اَنت بلے زوراکیاں گندگ ءَ نہ اَنت۔

بلوچ نیشنل موؤمنٹ (بی این ایم) ءِ سرکماش ھلیل بلوچ ءَ بلوچستان ءَ زورانسری مردمانی بیگواہ کنگ ءِ بابت ءَ وتی شنگ کُرتگیں درشانی ءَ گْوشتگ کہ زورانسری مردمانی بیگواہ کنگ ءُ چہ بلوچ راج ءِ کُشت ءُ کوش ءَ پاکستان ءِ ناشرکاریں چھرگ جھان ءِ دیم ءَ پدر کُرتگ۔

آئی ءَ گوشتگ پاکستان ءَ زوراکی ءُ رستری ءِ دُرسیں ھَدّ توام کُرتگ اَنت، اے بابت ءَ پاکستان چہ مردمی اگبالانی تْرامگیج ءُ ڈیھانی بےتواریاں یک جتائیں دْروشُمے ءِ وڑ ءَ کارمرد کنگ ءَ اِنت۔

بی این ایم ءِ سرکماش ھلیل بلوچ ءَ گْوشتگ کہ گْوستگیں دوھپتگ بیت کہ چہ ھزدار ءَ زانشتجاہ ءِ نودربر ھپیز ءَ ھوار سرجمیں بلوچستان ءَ پاکستانی لشکر ءَ پنجاہ مردم زورانسری بیگواہ کُرتگ اَنت ءُ ھپت مردم کُشتگ اَنت۔ چہ پنجگور ءَ زانشتجاہ ءِ نودربر اھتشام ءُ نیم گنوکیں ندیم ابدال روچ رھمانی تیر جتگ ءُ کُشتگ اَنت۔ آواران ءِ ءِ دمگ تیرتیج ءَ دو برات دزگیر کنگ ءَ پد بُنجل ءَ برگ بیتگ ءُ اود ءَ یک براتے مھمد علی چہ زوراکیاں کُشگ ءُ پد ءَ ٹکٹر ءِ سر ءَ کَلے جتگ ءُ بار داتگ، دومی برات ناگیگیں جاوراں چگل دیگ بیتگ۔ اسلام ءِ نام ءَ گروکیں پاکستان کُشگ ءَ پد مئے جونانی گون ءَ کمشرپی کنت ءُ آیاں کھولانی دست ءَ نہ دنت، بلے شاباش اِنت ترتیج ءِ مردم ءُ مئے مات ءُ گْوھاراں کہ پاکستان نہ منّگ ءَ ابید جون وت در کُرتگ ءُ گوں بلوچی دودانی بُنیاد ءَ کل ءُ کسارت کُرتگ ءُ نوکیں مسالے داتگ۔

آئی ءَ گْوشتگ کہ بلوچستان ءِ تہ ءَ مھترھند ءِ زوراکی یکشل ءَ برجاہ اَنت ءُ ھمک روچ زوراکی تیزتِر بیان اَنت ھما زوراکی کہ پاکستان ءَ بنگلہ دیش ءَ کُرتگ اَنت مرچی ھما زوراکی بلوچستان ءَ کنگ بیگ ءَ اَنت بلے پاکستان ءُ آئی ءِ تْرامگیج ایشی ءَ بزان اَنت کہ زور ءُ زوراکی ءِ سْوب ءَ ھما درونت کہ آئی ءَ بنگلہ دیش ءَ رس اِتگ بلوچستان ءَ ھم انچُش بیت۔ پہ زور ءُ زوراکی کنگ ءَ آجوئی ءِ زْرمبشت نزور بیگ ءِ جاہ ءَ گیش توانمند بنت۔

چئیرمین ھلیل بلوچ ءَ وتی درشان ءِ گُڈی ءَ گْوشتگ کہ میان استمانی مردمی اگبالانی تْرامگیج پاکستانی زوراکیاں دلگوش گْور بہ کن اَنت، بلوچستان ءِ مردم یک ناگیگیں دورے ءَ گْوزگ ءَ اَنت مردمانی ناگیگی پہ جھان ءِ ایمنی ءَ نیکیں پالے نہ اِنت میان استمان ءُ مردمی اگبالانی تْرامگیج بلوچستان ءِ جیڑہ ءَ دزمانجنی بہ کن اَنت ءُ مردمانی ناگیگی ءِ گِر ءُ دار کنگ ءَ وتی کِرد ءَ پیلو بہ کن اَنت۔