TBP Balochi

کراچی ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی چار ھزار ءُ پنچ سد ءُ نود ءُ چار روچ سرجم بوتگ – چہ لیاری کراچی ءَ سیاسی ءُ چاگردی باسک پھلین بلوچ، عباس بلوچ ءُ بابل بلوچ ءَ بنجل ءَ اتکگ ءُ بیگواھیں مردمانی کھولانی گوم ءَ دلپدردی درشان اتگ –

ھمے وھد ءَ وی بی ایم پی ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ بلوچستان ءِ ایردست کنوکیں تاکتاں میان استمانی منّ اِتگیں جنگی کانود ءُ رھبند لگتمال کُتگ ءُ بلوچ چکچینی ءُ پوجی کاروائیانی تہ ءَ گیشی آرگ انت – پوجی لشکر کشیانی تہ ءَ لس مھلوک ءِ گسانی سر ءَ بمبگواری ءُ آھانی ماندارگ چُک ءُ زالبولاں کماشاں ھوار دست ءُ گوشیں بلوچاں بے رھمی لٹ ءُ کُٹ کنگ ءُ آھاں بیگواہ کنگ ھنچوش کہ ھمے زوتاں شال، نوشکی ءُ پنجگور ءَ بازیں بلوچے زورانسری آوار جنگ ءُ بیگواہ کنگ بوتگ ءُ ھنچیں جاھاں مردم لٹ ءُ کُٹ کُتگ کُشتگ انت پد ءَ آھانی جون کھول ھوالگ کنگ ءِ بدل ءَ وت کنڈ جتگ ءُ کل کُتگ انت –

آئی ءَ گوشتگ کہ بلوچ ورنائیں نودربر ءُ سیاسی باسکاں ھوار ھر تک ءُ پھناتاں سیادی داروکیں بلوچانی ٹارگٹ کنگ ءُ بلوچ چکچینی ھوار انت –

بلوچی بُنگیجی درونت

ٹی بی پی درونت

پنچمی درونت

پہ بلوچی زبان ءِ نوک باھندیں وانوکانی ھاترءَ دی بلوچستان پوسٹ ءَ یک درونتی لڑے بندات کرتگ کہ چریشی ءَ بلوچی زبان ءَ ھُب داروکیں مردم چرے درونتاں چہ بلوچی زبان ءِ راست نبیسگ ءَ ھیل کُت کن اَنت-

مئے پنچمی درونت پہ وانوکاں شنگ بیگ ءَ اِنت، پہ بلوچی زبان ءَ بیوکیں ھمک جھد کہ بیت چُش کہ بلوچی نبشتانک ءُ شائراں آیانی چاپ کنگ ءَ ھوار نِی مئے وانوکاں درونت ھم دزکپت کن اَنت چریشی ءَ نبشتہ کنوکیں مردم گیشتر وتی سیاھگ ءَ راست ءُ تچکی ءَ نبشتگ کت کن اَنت-

وَ: ھندی ءِ “تو” ءِ بزانت ءَ دنت۔

ھست سرجم: ھما کار کہ نی ئیں وھد ءَ پیلو بیتگ اَنت انچوشکہ(ا۔ک)

1- من راجی جنگ ءَ وَ ھوار بیتگ آں(میں قومی جنگ میں شامل ہوچکا ہوں)۔
2- نودربراں دْراھیں درونت ونتگ اَنت(طالب علم سارے سبق پڑھ چُکے ہیں)
3- تو زاناں پہ کئی ودار ءَ دمبُرتگ؟( آپ کِس کے انتظار میں تھک چُکے ہیں؟)۔
4- بانُک شانُتل ءَ وَ گُد شُشتگ اَنت (محترمہ شانُتل تو کپڑے دھو چُکی ہے)
5- سنگت ءَ ورگ وارتگ ءُ تو دیم شُشتگ۔

دلگوش: “کُتہ، وارتہ۔۔۔ ءُ شُتہ” نبیسّگ رَد انت چے ءَ کہ اے گال وت سرجم اَنت پمیشکا دُمب گُڈ نہ بنت۔

گْوست سرجم ا۔ک

1- من وَ راجی جنگ ءَ ھوار بیتگ ات آں(میں قومی جنگ میں شامل ہوچکا تھا)۔
2- نودربراں دْراھیں درونت ونتگ اِت اَنت(طالب علم سارے سبق پڑھ چُکے تھے)
3- تو زاناں پہ کئی ودار ءَ دمبُرتگ اَت؟( آپ کِس کے انتظار میں تھک چُکے تھے؟)۔
4- بانُک شانُتل ءَ وَ گُد شُشتگ اَنت (محترمہ شانُتل تو کپڑے دھو چُکی تھی)
5- سنگت ءَ ورگ وارتگ اَت ءُ تو دیم شُشتگ اَت۔

گْوست سادگ: ھما کار گْوستگیں وھدے ءَ پیلو بوت اَنت ا۔ک
1- آپ ئِے وارت ءُ شُت (پانی پی کے چلاگیا)
2- دُزّ وَ تتک ( چور تو بھاگا)
3- من بلوچی وَ دربُرت (میں نے بلوچی تو سیکھا)

بِہ : بلوچی ءَ پرمانگالانی بُنگیج ءَ کیت ا۔ک: بِہ کن، بہ تچ ءُ بِہ گْوش
البت اِے گوں کارگال ءَ ھوار ھم نبیسّگ بیت ا۔ک : آرگ ءِ بیار، روگ ءِ برو ءُ جنّگ ءِ بجن

بے: نیستی ءَ درشان کنت ا۔ک: بے آپی، بے اُوست، بے ھیا، بے ادب ءُ بے اُمیت۔

پہ راجی زُبان ءِ دیمروئی ءَ ما شُمئے مھر ءُ ھمراھداری لوٹ ایں-

شال ءِ سول لائن پولیس تھانہ ءَ وائس فار بلوچ مسنگ پرسنز ءِ سرکماش نصراللہ بلوچ، کمک سرکماش ماما قدیر بلوچ ءُ بی این پی ءِ رھشون حاجی لشکری رئیسانی ءَ ھوار زھرشانی ءَ ھواریں بیگواھیں مردمانی کھول ، زالبول ءُ دگہ مردمانی بگیری ءَ ارزی نبشتہ کنگ بوتگ ءُ ناشرکار گوشگ بوتگ انت –

ارزی ءَ ھمے نبشتہ کنگ بوتگ کہ اے مردماں گوستگیں سال ءَ بیگواھیں مردمانی ھاتر ءَ زھرشانی ءِ میان ءَ کرونا ایس او پیز ءِ بگیری کُتگ ءُ ٹی این ٹی ءِ چار راھے سر ءَ زھرشانی کُتگ – وھدیکہ زھرشانی کنوکاں پولیس کارمند کہ وتی ڈوٹی سر ءَ بوتگ انت آئی ءِ تیلانک داتگ ءُ ریڈ زون ءَ پُترگ ءِ کوشست کُتگ –

ارزی سول لائن تھانہ ءَ پولیس ءِ ایس ایچ او محمد شہباز ہاشمی چیردستی ءَ وائس فار بلوچ مسنگ پرسنز ءِ رھشون، بی این پی ءِ رھشوناں ھوار بیگواھیں مردمانی کھول ءُ زالبولیں باسکانی بگیری ءَ نبشتہ کنگ بوتگ وھدیکہ ارزی ءَ بی ایس او ءُ پی ٹی ایم ءِ باسکانی نام ھم ھوار انت –

زانگ بہ بیت اے ارزی گوستگیں سال ءَ جون ءِ ماہ ءَ نبشتہ کنگ بوتگ وھدیکہ نون پولیس ارزی ءِ تہ ءَ ھواریں مردم باگی گوشتگ انت –

وھدیکہ اے درگت ءَ ٹی بی پی ءِ اھوالکار ءَ گوں وائس فار بلوچ مسنگ پرسنز ءِ رھشون نصراللہ بلوچ ءَ گوں اھوال کتگ گڑا نصراللہ بلوچ ءَ ارزی ءِ ھبر راست کُتگ ءُ گوشتگ کہ ارزی گوستگیں سال ءَ بوتگیں زھرشانی ءِ رد امل ءَ نبشتہ کنگ بوتگ –

نصراللہ بلوچ ءِ رِد ءَ پولیس ءِ نیمگ ءَ آ باگی ءِ گوشگ بوگ ءَ انت وھدیکہ اے ارزی ءِ درگت ءَ من ءَ ھوار ھچ کس ءَ گوشگ ھم نہ بوتگ ھما مردمانی نام ارزی ءِ تہ ءَ ھوار انت انوں ھمے گوشگ بوگ ءَ اِنت کہ درست باگی انت آئی ءِ گوشگ ات کہ بیگواھیں مردمانی ھاتر ءَ زھرشانی کنوکانی بگیری ءَ ارزی نبشتہ کنگ پدردی گپے –

نصراللہ بلوچ ءِ گوشگ ات کہ مئے گل پُرایمنیں ءُ جمھوری وڑ ءُ ڈول ءَ زورانسری آوار جنی ءِ بگیری ءَ کار کنگ ءَ انت مئے سر ءَ ھمے الزام کہ ریڈ زون ءَ پُترگ ءِ کوشست کتگ وھدیکہ مئے پُرایمنیں زھرشانی پریس کلب ءِ دیم ءَ دلگوش دیگ نہ بیت گڑا بیگواھیں مردمانی کھول لاچار بنت کہ وتی پریات ءَ بہ زور انت ریڈ زون نیمگ ءَ بہ رو انت –

نصراللہ بلوچ ءِ گوشگ ات کہ سوبائی سرکار ءَ لوٹ ایت کہ اے ارزی ءَ واپس بہ زوریت ءَ مار ءَ پُرایمنیں جھد ءَ کنگ ءَ مہ دار ایت –

بلوچ لبریشن آرمی ءِ جارکش جیئند بلوچ ءَ گوشتگ مئے سرمچاراں بولان ءُ تربت ءَ دوجتائیں اُرشاں پاکستانی پوج نشانگ کتگ چریشی ءَ دُژمنیں پوج ءَ جانی ءُ مالی تاوانانی دیمپان کنگ کپتگ-

جارکش جیئند بلوچ ءَ گْوشتگ گوستگیں روچ ءَ بولان ءِ دمگ مچھ ءَ شور کنڈ ءِ ھند ءَ بی ایل اے ءِ پیسر ءَ سنگر گپتگیں سرمچاراں دُژمنیں پوج ءِ گاڑیانی کاروان ءَ ھواریں یک گاڑی یے بمبے نشانگ ءَ پد جتائیں سلاھاں گوں نشانگ کتگ اَنت، تراک ءِ آسر ءَ گاڑی ءَ سواریں دو کارندہ مرتگ اَنت ءُ گاڑی تباہ بوتگ وھدیکہ تیرگواری ءِ نشانگ ءَ اَتکگیں دگہ دو کارندہ مرتگ اَنت ءُ باز ٹپی بوتگ اَنت-

جارکش ءَ دیمتر ءَ گْوشتگ دگہ یک اُرشے ءَ بی ایل اے ءِ سرمچاراں گوستگیں شپ ءَ ناصر آباد بُنجل ءَ پھازوکی چوکی ءِ سر ءَ دست بمبے ءَ گوں نشانگ کتگ چریشی ءَ دُژمنیں پوج ءِ دو کارندہ ٹپی بوتگ ءُ چوکی ءَ تاوان داتگ-

اے اُرشانی زمہ واری ءَ مئے گل بلوچ لبریشن آرمی منّ اِیت، زورگریں پوج ءِ درایگ ءَ تاں مئے اُرش گوں تُرندی ءَ برجاہ بنت-

بلوچستان ءَ پوج ءِ نیمگ ءَ ھمے زوتاں بوتگیں لشکر کشیانی بگیری ءَ بلوچ یکجھتی کمیٹی ءَ وائس فار بلوچ مسنگ پرسنز ءُ زورانسری آوار جنگ بوتگیں مردمانی کھولانی ھمراھی ءَ سندھ ءِ مزن شھر کراچی ءَ زھرشانی کُتگ –

بلوچ یکجھتی کمیٹی ءِ نیمگ ءَ چہ لیاری ھشت چوک ءَ بگر تاں کراچی پریس کلب ءَ روانکے کشگ بوتگ وھدیکہ زھرشانی کنوک پشتون تحفظ مومنٹ ءِ ننداک ءِ سر ءَ ھم شُتگ انت –

کراچی روانک ءَ کراچی پریس کلب ءِ دیم ءَ اتکگ ءُ مچی دروشم ءَ دراہ یکجاہ بوتگ انت، زھرشانی ءَ چہ بلوچستان ءَ زورانسری آوار جنگ بوتگیں مردمانی کھول، پشتون تحفظ مومنٹ ءِ باسک ءُ رھشوناں ھوار نودربراں مزنیں کچے ءَ بھر زرتگ وھدیکہ وائس فار بلوچ مسنگ پرسنز ءِ کمک سرکماش ماما قدیر بلوچ ھم روانکے بھرے بوتگ –

کراچی زھرشانی ءِ جار بلوچ یکجھتی کمیٹی ءِ نیمگ ءَ بلوچستان ءَ ھمے زوتاں کریک ڈاؤن، بازیں دمگاں پوجی لشکر کشیاں ھوار بلوچستان ءِ جتا جتائیں دمگاں مردمانی زورانسری آوار جنی ءِ بگیری ءَ جنگ بوتگ –

زھرشانی کنوکانی گوشگ ات کہ چیزے روچ بیت اِنت کہ بلوچستان ءَ ریاستی ادارھانی نیمگ ءَ زورانسری آوار جنی ءَ ھوار دگہ انسانی ھکانی لگتمالی ءِ تہ ءَ گیشی اتکگ – بلوچستان ءِ جتا جتائیں ھند ءُ دمگاں نودربر، استاداں بازیں کچے ءَ مردم زورانسری آوار جنگ ءُ بیگواہ کنگ بوتگ انت وھدیکہ بازینے لٹ ءُ کُٹ کنگ ءَ پد کُشگ بوتگ انت ءُ آھانی زانگولیں جون چگل دیگ بوتگ انت –

آھانی گوشگ ات کہ بلوچستان ءَ ریاستی کریک ڈاؤن بازیں دھک ءَ برجاہ انت بلوچستان ءَ مدامی ریاستی زوراکیانی تہ ءَ گیشی آرگ بوتگ ءُ کانود ءُ آمیدگس اے زوراکیانی سر ءَ ھچ گوشگ ءَ نہ انت وھدیکہ پوج ءَ مھار بڈا دیگ بوتگ ءُ یل کنگ بوتگ کہ ھرچی آئی دل بلوٹیت چست بکنت بجنت بکوشیت ءُ جوناں چگل بہ دنت – رسانکدرانی بلیک آؤٹ ءِ سوب ءَ بلوچستان ءَ چہ ھچ وڑیں ھال ڈن ءَ در نئیت ءُ میان استمانی انسانی ھکانی ادارھاں وت ءَ ھنچوش کُتگ کہ ھچ ءَ سرپد نہ انت –

زھرشانی ءَ بیگواھیں آصف ءُ رشید ءِ گوھار سائرہ بلوچ، بیگواھیں عظیم دوست ءِ گوھار، متحدہ عرب امارات ءَ زورانسری آوار جنگ بوتگیں انسانی ھکانی باسک راشد حسین بلوچ ءُ عبدالحفیظ زھری ءِ کھول ، دہ ماہ ساری کراچی ءَ آوار جنگ بوتگیں عبدالحمید زھری ءِ زھگ سعیدہ حمید، بیگواھیں عالم لہڑی ءُ حب چوکی ءَ بیگواھیں عامر بلوچ ءِ کھول ھم ھوار بوتگ انت –

بیگواھیں مردمانی کھولاں اھوالکاراں گوں تران کنان ءَ وتی دوستیگیں مردمانی یل کنائینگ ءُ آھاں زاھر کنگے ھاتر ءَ سرکاری ادارہ ءُ انسانی ھکانی گلاں چہ لوٹ کُتگ کہ وتی کرد ءَ پیلو بہ کن انت – وھدیکہ نودربراں ھزدار ءَ چہ زورانسری آوار جنگ بوتگیں حفیظ بلوچ ءِ اکس ھم گون بوتگ –

کراچی ءَ زھرشانی کنوکانی گوشگ ات کہ بلوچستان ءِ جتا جتائیں دمگان پاکستانی پوج ءِ زوراکی، گِسانی سر ءَ بیڑ برگ ءُ مردمانی زورانسری آوار جنی ءِ درچ یکشل ءَ برجاہ انت زھرشانی کنوکاں سرکاری ادارھاں چہ لوٹ کتگ کہ بلوچستان برجاھیں زوراکی دارگ بہ بیت ءُ بیگواھیں مردم وش سلامتی یل کنگ بہ بنت –

پاکستانی ریاست وانندھیں بلوچ ورناھاں نشانگ کنگ ءَ اِنت –

سند ءِ مزن شھر کراچی ءِ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ پنچ سد ءُ نود ءُ سَے روچ سرجم بوتگ –

زورانسری آوار جنگ بوتگیں سیاسی باسکانی کھولانی بنجل ءَ رؤگ آھگ برجاہ انت ھر تک ءُ پھناتاں سیادی داروکیں مردماں بنجل ءَ اتکگ ءُ ریاستی ادارھاں چہ بیگواھیں مردمانی یل کنگے لوٹ کتگ –

ھمے درگت ءَ وائس فار بلوچ مسنگ پرسنز ءِ رھشون ماما قدیر بلوچ ءَ گوشتگ کہ بلوچستان ءَ برجاھیں ریاستی زوراکیانی بگیری ءَ درسیں انسان دوستاں توار چست کنگ لوٹیت –

آئی ءَ گوشتگ کہ بلوچستان ءَ مھلوک زورانسری آوار جنگ ءُ بیگواہ کنگ بوھگ ءَ انت ءُ اے درچ تیزی ءِ گوم ءَ برجاہ انت اے امل ریاست ءُ ادارھانی واست ءَ شری نیاریت – اگاں ھمے وڈ ھچ گوشگ نہ بوت گڈا اے زورانسری آوار جنی سرجمیں پاکستان تالان بیت اتنت –

آئی ءِ گوشگ ات کہ ریاست بلوچستان ءِ وانندھیں نودربراں نشانگ کنگ ءَ اِنت تانکہ آ بلوچستان ءِ وانندھاں ترس ءِ آماچ بہ کن انت – بلے تاکت ءِ زور ءَ ھچ جیڑہ گیش گیوار نہ بنت –

سربوتگیں ھالانی رِد ءَ دوشی شپ پاکستانی پوج ءَ مند ءِ دمگ ھوزئی ءَ گِس ءِ سر ءَ بیڑ برتگ ءُ دو ورنا زورانسری آوار جتگ ءُ گوں وت بُرتگ انت-

اھوالکار ءِ رِد ءَ پاکستانی پوج ءَ دوشی شپ ءِ بے وھد ءَ ھوزئی ءَ بیڑ بُرتگ یاسر ء ناسر ءُ واجو ء مزار جھمنند ھوزئی زورانسری آوار جتگ ءُ گوں وت بُرتگ انت کہ تنی وھدی انگت بیگواہ انت –

زانگ بہ بیت بلوچستان ءِ جتا جتائیں ھند ءُ دمگاں بازیں دھکاں چہ پاکستانی پوج ءِ زوراکی ءِ درچ یکشل ءَ برجاہ انت بلے اے دویں ماھانی ءِ تہ ءَ پاکستانی پوج ءِ لشکر کشی ءُ زورانسری آوار جنیانی تہ ءَ یکرندے پد ءَ گیشی آرگ بوتگ – آوار جنیانی تہ ءَ گیشتریں کچ بلوچ ورنا ءُ نودربرانی انت – ھمے وڈ زورانسری آوار جنی ءَ ھوار ھوار چست کن بجن ءُ چگل دئے پالیسی ءِ ھم یکرندے پد ءَ بندات کنگ بوتگ – کہ ھمے زوتاں پنجاہ مردم زورانسری بیگواہ کُرتگ اَنت ءُ آھانی تہ ءَ ھپت مردم کُشتگ ءُ چگل داتگ اَنت۔

بالی ءَ وتی ڈسکو ترزانی سوب ءَ مزن نامیں گولڈن مین بپی لھری 69 سال ءِ امبر ءَ بیران بیتگ۔

بپی لھری بازیں نادراھیانی آماچ بیتگ کہ آیانی علاج بیگ ءَ بیتگ، ھندوستانی رسانکدرانی درشانانی ردءَ آ یک ماہ ءِ کچ ءَ ھسپتال ءَ بیتگ ءُ دوشمبے ءِ روچ ءَ لوگ ءَ رھادگ کنگ بیتگ اَت۔

سے شمبے ءِ روچ ءَ پدءَ نادراہ بیگ ءِ سوب ءَ ھسپتال ءَ برگ بیتگ اَت کہ ھمودہ دوشی بیران بیتگ۔

بالی ووڈ سانمند تریں ترزجوڑکنوکانی تہءَ زانگ بیوکیں بھی لھری راستیں نام الوکیش بیتگ، آئی ءَ بازیں نامداریں تامرانی تہءَ ڈسکو ترزدیگ ءِ سوب ءَ زانگ ءُ پجارگ بیتگ ۔

پنچ دھکانی سرءَ بستگیں آئی کیریر ءِ نیام ءَ آئی نامداریں کمپوزیشنانی تہءَ 70 ءُ 80 ءِ دھکانی تامر آئی ایم آ ڈسکو ڈانسر، چلتے چلتے، شرابی، نمک لالا میت ءُ دگہ ھوار اَنت۔

بپی لھری ءَ بنگالی تامرانی ھاترءَ ھم سوت شر کُتگ اَنت ءُ وتی بازیں تَرز وت گُشتگ اَنت ھم، تلاہ گورءَ کنگے سک باز ھبناکی ءِ سوب ءَ آ بالی ووڈ ءِ گولڈن مین ھم گُشگ بیتگ۔ سک باز سھر ءِ چین، بریسلٹ، گھڑیال، مُندریک ءُ سیاھیں چشمک آئی پجار بیتگ اَنت۔

بالی ووڈ ءِ نامداریں استالاں، راجداراں ءُ آئی لوٹوکاں چاگردی رسانکدر ءَ رپتگیں گُشندہ ءَ ستاشانی پیش کنان ءَ اپنی دل دوستیں سوت شنگ کُتگ اَنت۔

سر بیتگیں ھالانی رد ءَ بلوچستان ءِ دمگ ڈیرہ بگٹی ءِ میتگ سوئی ءَ بلوچ بے روزگاریں وانِندھاں زورگیر ءِ سرکاری ٹیل ءُ گیس ءِ گل پی پی ایل ءِ ھلاپ ءَ تُرندیں زھرشانی کُت۔

زھرشانی کنوکیں بلوچ بے روزگاریں انجینئر ءُ ڈپلومہ ھولڈرزاں سوئی یوتھ کونسل ءِ سروگانی ءَ چہ بازار بُگٹی کالونی ءَ زھرشانی ئیں روانک کش اِت ءُ پی پی ایل ءِ کارجاہ ءَ سر کُتگ چہ ایشی ءَ پد ھمے زھرشانی ئیں روانک سوئی ءِ بالی پِٹ ءَ سر بوتگ پد ءَ زھرشانی کنوکاں پی پی ایل ءِ درآمدیگیں پوریاگِر ءُ کارسرانی دگ بند کُتگ اَنت ۔

زھرشانی کنوکاں پی پی ایل ءِ گل ءَ ھمے لوٹ کُتگ کہ مئے بلوچستان ءِ گیس تیوگیں پنجاب ءُ پاکستان ءِ کارجاہ ءُ گِسانی چُل بل اَنت بلے بلوچستان ءِ شھر ءُ میتگ بے گیس اَنت ءُ مئے مردم جنگلاں دار چن اَنت بلوچستان ءِ وانِندگ بے پوریاگِر اَنت بلے مئے دمگاں چہ کراچی ءُ پنجاب ءَ پوریاگِراں لوٹائین اِت۔ اد ءِ مھلوک بے روزگار اَنت ءُ بلوچستان ءِ ھالیگیں پوسٹاں شُما پنجاب ءُ کراچی ءِ مھلوک ءَ بھر ءُ بانگ کن اِت۔

آیاں گُشتگ کہ باید انت پی پی ایل وتی منّگ نامہ ءِ رِد ءَ ڈیرہ بگٹی ءِ وانِندگیں انجینئر ءُ ڈپلومہ ھولڈرزاں ھر دو سال ءَ بیست ءُ پنچ پوریاگِری بہ دنت۔

زانگ بہ بیت کہ بلوچستان ءِ سوئی میتگ ءِ گیس کہ سوئی گیس ءِ نام ءَ نامدار اِنت اود ءَ بلوچ راج ءِ ھلاپ ءَ پی پی ایل ءِ زالمیں شونداتانی آسر ءَ پاکستانی سرکار ءَ ڈیرہ بگٹی ءَ ملٹری آپریشنے بُنگیج کُت ءُ پد ءَ ھمے ملٹری آپریشن ءِ آسر ءَ سرجمیں بلوچستان ءَ آس روک کُتگ-

بلوچستان ءِ دمگ بولان ءُ کیچ ءَ پاکستانی لشکریانی نیمگ ءَ بیڑ برجاہ اَنت۔

بیڑ ءِ زد ءَ اتکگیں ھنکینانی تہءَ بولان ءُ ھرنائی ءِ بازار شاھرگ، سنجاول یخو ءُ دگہ ھوار اَنت۔

دومی نیمگ ءَ اھوالکارانی گُشگ اِنت کہ سبی ءِ ھنکین سانگان ءُ کَش ءُ گوراں ھم مزنیں کساس ءَ پوج دیما جُنزگ ءَ اِنت۔

اھوالانی گُشگ اِنت کہ اے بیڑءِ تہءَ گن شپ ھیلی کاپٹر ھم گندگ بیتگ اَنت۔ بیڑ ءِ نیام ءَ داں انگت ھچ پئیمیں جانی تاوان اگں دزگیری ءِ ھال دیما نہ اَتکگ اَنت ءُ نانکہ واکدارانی لیکہ اے درگت ءَ دیما اتکگ۔

وھدیکہ کیچ دمگ ءِ کوھی ھنکیناں چہ ھم اھوال پیداک اَنت کہ پنچ ھیلی کاپٹر بال کنگ ءَ گندگ بیتگ اَنت ءُ تمپ ءِ بازار رودبن شاہ آپ ءُ کلبر ءِ کوھی میتگانی سرءَ ھیلی کاپٹراں شیلنگ ھم کُتگ۔

بلے داں انگت سرجمیں اھوالانی سرپد بیگ ءَ جاورھالانی سوب ءَ جنجالانی دیمپانی اِنت۔