TBP Balochi

زاکر مجید ءِ درگت ءَ مار ءَ سرپدی دیگ بہ بیت – مات ءِ لوٹ

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ شال پریس کلب ءِ دیم ءَ زھرشانی بنجل برجاہ، زھرشانی بنجل ءَ مروچی چار ھزار ءُ شش سد ءُ پنچ روچ سرجم بوتگ –
بلوچستان نیشنل پاٹی ءِ بنجاھی رھشوناں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشانتگ گوشتگ کہ بلوچستان ءِ تہ ءَ تاکت ءِ زور ءَ جاورھال گیشتر ھراب کنگ بوھگ ءَ انت –

آھانی گوشگ ات کہ بلوچ نودربرانی سر ءَ لٹ شاپ ءُ آھاں ترسینگ ءُ بیھار دیگے امل پہ ریاست ءَ جوان نہ انت –

ھمے وھد ءَ گل ءِ کمک سرکماش ماما قدیر بلوچ ءِ گوشگ ات کہ بیگواھیں مردمانی یل کنگے ھاتر ءَ مئے پُرایمنیں جھد برجاہ انت – ریاست مردمانی یل کنگے بدل ءَ چدوگیشتر ورنا زورانسری آوار جنگ ءُ بیگواہ کنگ ءَ اِنت –

آئی ءَ گوشتگ کہ درسیں سیاسی پاٹی ءُ ھر تک ءُ پھناتاں سیادی داروکیں مردمانی زمہ واری انت کہ ریاست ءِ اے زلم زوراکیانی بگیری ءَ توار چست بہ کن انت –

یانزدہ سالاں زورانسری آوار جنگ ءُ بیگواہ بوتگیں بلوچ نودربر گل ءِ رھشون زاکر مجید ءِ مات ءَ مروچی زھرشانی ءَ بھر زرتگ ءُ گوشتگ کہ آ وتی چک ءِ زورانسری آوارجنی سوب ءَ ماژگی ازاب ءُ ازیتانی دیمپان انت آئی ءَ لوٹ کتگ گوشتگ کہ زاکر مجید ءِ درگت ءَ آئی ءَ سرپدی دیگ بہ بیت –

بلوچستان بنجاھی شھر شال ءَ باند ءَ ھشت مارچ ءَ زالبولانی میاں استمانی روچ ءِ درگت ءَ بلوچستان شاھدربر جاہ ءَ بلوچ زالبول کانفرنس نام ءَ یک مراگش ءِ اڈ دئیگ بوھگ انت – اے مراگش ءَ زالبول ءُ نودربرانی راجکاری، چاگردی ءُ وانگی جیڑھانی سر ءَ جتاجتائیں مراگش اڈ دیگ بوھگ ءَ انت ۔ بلے مروچی اے مراگش ءِ درگان درگان کنگے ھاتر ءَ ڈسٹرکٹ ایڈمنسٹریشن نیمگ ءَ پولیس دیم دئیگ بوتگ –

اے مراگش چہ بلوچ اسٹوڈنس ایکشن کمیٹی ءِ نیمگ ءَ برجم دارگ بوھگ انت اے درگت ءَ بساک ءَ وتی اوفیشیل تاک ءَ پولیس آھگے کسانیں تامر ءِ شنگ کرتگ گوشتگ بلوچ زالبول کانفرنس ءَ درگان درگان کنگے ھاتر ءَ ڈسٹرکٹ ایڈمنسٹریشن نیمگ ءَ سدانی کچ ءَ پولیس بلوچستان شاھدربرجاہ ءَ دیم داتگ –

آئی ءَ گوشتگ شاھدربرجاہ ءِ واکداراں اے مراگش ءِ ھاتر ءَ گچین کتگیں ھال ھم گل ءِ دیگ ءَ مکن کتگ نوں شاھدربرجاہ ءِ جنک ءُ بچکیں نودربراں مراگش کنگے ھاتر ءَ لت کٹ (تشدد) کنگے بیھار ھم دئیگ بوھگ انت کہ ایرجنگی انت –

روکپتی بلوچستان ءَ ایرانی چیریں ادارہ اطلاعات سپاہ ءَ دو شھری دزگیر کنگ ءَ پد بیگواہ کرتگ اَنت-

گیشیں ھالانی رد ءَ روکپتی بلوچستان ءِ دمگ راسک ءَ ایرانی چیریں ادارہ اطلاعات ءَ دو کس دزگیر کرتگ ءُ گوں وت برتگ اَنت-

آوار جنگ بیتگیں مردمانی پجار زاھد حیات زئی ء حمزہ ءُ عبدالغفار اربابی ء عبدالکریم جھمنند ھشنک کیشکور سرباز ءِ ناماں زانگ بیتگ اَنت-

آوار جنگ بیتگیں مردمانی بارو ءَ سیکورٹی ادارھاں دگہ گپ دیم ءَ نیاؤرتگ اَنت ءُ نانکہ سبب گوشتگ اَنت-

دمگی مردمانی رد ءَ اے مردمانی دزگیری ءَ پد اے مردم روکپتی بلوچستان ءِ بنجاھی شھر زاھدان ءَ برگ بیتگ اَنت-

دومی نیمگ ءَ بلوچ کمپین فعالین ءِ رد ءَ روکپتی بلوچستان ءَ یک سالے ءِ تہ ءَ کچ ءُ کساس یک سد ءُ سِی مردم آوار جنگ بیتگ اَنت کہ اشانی تہ ءَ ھپتاد ءُ نُھ کسانی رپورٹ پکائین ھال اَنت-

انسانی ھکانی واستا چاگردی رسانکجاھاں ھال شنگ کنوکیں تندجاہ بلوچ کمپین فعالین ءِ رد ءَ اے مردم گیشتر نشہ ءُ سیاسی بھتامانی پژدر ءَ گرگ بیتگ اَنت-

روکپتی بلوچستان ءِ بنجاھی شھر دزاپ “زاھدان ” ءَ ایرانی آمیدگس ءَ سَے بندیگیں بلوچاناں پاھو دیگ ءِ ھکم کتگ –

بلوچ کمپین فعالین ءِ رد ءَ ایرانی آشوبی دادگاہ زاھدان ءَ سَے سنی بلوچ پاھو دیگ ءِ پرمان کتگ اَنت-

اے بندیگیں بلوچانی نام مھمد کریم بارکزئی اکسون، مھمد براھوئی انجمنی ءُ ادریس بیلرانی ءِ ناماں زانگ بیتگ اَنت-

ھالانی تہ ءَ گوشگ بیتگ کہ اے سئیں شھری دو آمیدگسانی دادگاہ انکلاب زاھدان ءَ یکے ءَ پاھو ءُ پانزدہ سال ءِ بندیگی جرم جتگ اَنت، گوشگ بیتگ کہ اے مردم بگیر داریں ٹولی ءُ دگہ ناشریاں دزمانجن بیتگ اَنت-

گوشگ بیتگ کہ اے مردمانی سر ءَ ناشری ءِ بھتام بیتگ ءُ چریشی ءِ سر ءَ ھرسئیں مردمانی سر ءَ پانزدہ سال بندیگی ءُ پاھو ءِ پرمان بیتگ، مرکزِ زندان ءَ گوشگ بیتگ کہ اے ھرسئیں مردم داں پاھو ءِ وھد ءَ مھریں بندیگجاھاں بند کنگ ءُ پد ءَ داں پاھو دیگ بنت-

زانگ بہ بیت روکپتی بلوچستان ءَ اے وھد ءَ بازیں کچے ءَ مردم بازیں بھتامانی پژدر ءَ پاھو دیگ بیتگ اَنت کہ آیانی تہ ءَ نشہ باپاری ءُ ڈیھ ءِ بگیرداری ءَ ناشری ءُ دگہ بھتام ھوار اَنت-

روکپتی بلوچستان ءَ مردمانی پاھو دیگ ءَ انسانی ھکانی گلاں ھم پدردی درشان کتگ اَنت-

بادشاہ ءُ گریب

رجانک: ایس ڈی بلوچ

دی بلوچستان پوسٹ

یک مردے بادشاہ ءِ دربار ءَ پیش کنگ بوت کہ مرچی بہ لوٹ ھرچی لوٹ اِت کن ئے بہ لوٹ ترا رس ایت مرد گریبیں مردے اَت بلے ھوشیار ءُ چالاکیں مردے اَت مرد ءَ گُشت بادشاہ من چہ تئی دربار ءَ ہمے لوٹاں کہ تو منی بَڈا پنجاہ شیپاگ یا چیتِر بہ جَن بادشاہ ءُ بادشاہ ءِ درباری ھیران بوت اَنت کہ چونیں گنوکیں مردے کہ بادشاہ مرچی مردماں سھر ءُ زَر دیگ ءَ رازی اِنت بلے اے گنوک اَتکگ ءُ وتارا پہ زور لَٹ وارینگ لوٹ ایت گُڑا بادشاہ ءِ درباریاں چہ یکے ءَ گُشت کہ تو گنوکے ؟ بادشاہ ءِ دربار ءَ مرچی مردم سھر زَر ، تلاہ ورگ ءُ چرگ ءِ لوٹ کنگ ءَ اَنت تو لَٹ چتر شیپاگ ورگ ءَ اَتکگ ئے گُڑا بادشاہ ءَ درائینت کہ تو پرچا اے لٹ بِزاں چتِر ورگ ءِ لوٹ کُتگ گُڑا ہمے گریب ءُ بزگریں مرد ءَ گوشت کہ بادشاہ ساھب من ہمے واستا پنجاہ لَٹ بزاں چتر ورگ لوٹاں کہ تئی محل ءِ گیٹ ءِ دپ ءَ تئی گاٹ ءَ بزاں چوکیدار ءَ گُشتگ کہ من ترا بادشاہ ءِ دربار ءَ روگ ءَ کلاں کہ ترا چہ بادشاہ ءِ دیم ءَ ھرچی رس ایت تو نیمی کَن نیم ءَ من ءَ دے نیم ءَ تو وَت بزیر من گُشتگ شر پہ ہمے ھاترا تو اے پنجائیں چِتراں نیم ءَ من ءَ بہ جَن نیم ءَ وتی گاٹ ءَ بِزاں کہ چوکیدار ءَ گُڑا بادشاہ ءِ درباری ھیران بوت اَنت کہ اے چونیں ھوشیار ءُ چالاکیں مردے بادشاہ ءَ لوٹ کُرت کہ منی محل ءِ چوکیدار لوٹارینگ بہ بیت ایدگہ گاٹ ءُ پریٹاں چوکیدار لوٹارینت ءُ آؤرت بادشاہ ءَ گُشت کہ تو منی نام وش نام کُتگ
تو اے مرد ءِ کِرا گُوشتگ ترا بادشاہ ھرچی دَنت تو نیم بھر ءَ من ءَ بدے من ء بادشاہ ءَ اے پیسلہ کُتگ کہ ترا نیم بھر ءَ ناں اے مرد ءَ ھرچی لوٹ کُتگ درست ترا دیگ بنت مرد (گاٹ) وش ءُ گَل بوت ءُ سرجھل کُت گوشت ئِے بادشاہ تئی منت واراں گُڑا بادشاہ ءَ وتی گاٹ ءَ گُشت کہ تو نی جُست نہ کَن ئے کہ اے مرد ءَ منی درگاہ ءَ چے ءِ لوٹ کُتگ ؟گڑا بادشاہ ءِ محل ءِ دپ ءِ گاٹ ءَ گُشت بلے بادشاہ ! اے مرد ءَ چہ تئی گور ءَ چے ءِ لوٹ کُتگ؟ بادشاہ ءَ گُشت کہ اے مرد ءَ گُشتگ من ءَ را پنجاہ (50) چِتِر بہ جن بلے من بادشاہ ءَ اے پیسلہ کُتگ کہ ترا نیم اِناں بلکیں سرجمیں پنجائیں چتِر ترا جنگ بَنت بادشاہ ءَ گوانک جَت ءُ گُشت کہ سپاھیاں ایشی ءَ کشان کن ات ءُ بریت پنجاہ چتِر شر شر ءَ بہ جَن اِت ئِے اے مرد پہ گریوان کشان کنگ ءُ برگ بوت بادشاہ ءَ پیسلہ کُت اے گریب ءُ بزکاریں مرد من ءَ سک دوست بیت اے مردکار مرچیگ ءَ پَد منی درباریاں گوں ھوار بیت ءُ منی دربار ءِ بیت اِنت منی محل ءِ تہ ءَ بیت اِنت گُڑا بادشاہ ءِ دگہ مستریں دربارے ءَ بزاں وزیرے ءَ درائینت کہ بادشاہ تو بلائیں نگیگیں کارے کنگ ءَ ئے اے شپانک ءُ نیزگار کُجا تئی درباری بوت کنت اے مارا ءُ شمارا بدنام کنت گُڑا بادشاہ ءَ درائینت اِناں اے شریں سوھو ءُ زانتکاریں مردے من ءَ را دوست بیت اِنت اگاں ترا ایتراز ھست گُڑا ایشی ءَ جُست بہ کَن گِران ءَ چہ گِران تریں جُستانی پسو ءَ دات کنت اگاں جستانی پسو ئِے دات کُت نہ کُت گُڑا سزا دیگ بیت ءُ اِدا چہ کشگ بیت اِنت گُڑا بادشاہ ءِ چمچہ ءَ موکا رس ات پرچہ کہ بادشاہ ءِ درباری بزاں کہ وزیر ءُ چمچہ نہ لوٹ اَنت کہ مئے بھر کم بہ بیت ءُ مئے جاہ ءَ دگہ یکے بئیت- پرچاکہ اے درباری شیتان دماگ ءُ ھِرس ءَ چہ پُریں دربارے اَت گُڑا درباری ءَ چہ ہمے گریب ءُ بزکار ءَ چے گِرانیں جُستے کُت کہ بلے پسیت ءُ بادشاہ وتی درباری نہ کَنت ئے گُڑا درباری بزاں وزیر ءَ جُست کُت کہ تو بہ گُش من انوں چے سوچگ ءُ پگر کنگ ءَ آں ؟ گُڑا بزکاریں نیزگار ءَ زانت کہ اے وزیر بلاھیں شیتان دماگ ءُ ھِرسی ئیں وزیرے ایشی ءَ ھمیشی ءِ وڑیں پسوے دیگ لوٹ ایت آئی ءَ پسو دات ءُ گُشت ئِے کہ انی اے سھت ءُ دمان ءَ تئی دل ءُ دماگ ءَ بس ہمے ھیال ءُ وسواس اِنت تو واجہ ھُدائے دربار ءَ پہ بادشاہ ءَ نیک ءُ شریں دوا لوٹگ ءَ ئے تو ہمے جیڑگ ءَ ئے کہ اے واجہ ھُدا مئے بادشاہ ءِ اُمر ءُ بھت ءَ گیش ءَ چہ گیش ءُ آئی ءَ سیر ءُ آباد بہ کَنت وزیر اے جُست ءِ پسو ئے اِش کنگ ءَ پد ھیران بیت کہ من گُشت اشی ءَ پسّاریناں بلے اشی ءَ من ءَ ھراب گِپت وزیر ھیران بوت کہ نی چی بہ گُشاں اگاں من بہ گُشاں کہ اِناں منی دماگ ءَ پہ بادشاہ ءَ اے رنگیں ھیال نیست گُڑا بادشاہ من ءَ چہ وزیری ءَ کش ایت اگاں من بہ گُشاں کہ ھو منی دماگ ءَ ہمے رنگیں ھیال ھست گُڑا بادشاہ چہ من وش وَ بیت بلے اے مرد کار ءَ ہم وزیر ءُ درباری کنت بلے وزیر ءَ تھنا وتی گم اَت- وزیر ءَ درائینت ھو منی دل ءَ واکی پہ بادشاہ ءَ ہمے ھیال بوتگ تو وَ سک زبرے مرد ءَ وَ زانت کہ اے رنگ ءَ وَ نہ اِنت بلے زانتکاری ءِ اے ہم بلاھیں پسو ئِے بادشاہ گَل بوت ءُ گُشت ئِے مرچیگ ءَ پد تو منی کِرا بو ترا سیر ءُ آباد کناں تو بلائیں نیک ءُ شریں انسان ئے مرچیگ ءَ پد تو منی درباریاں چہ یکے ئے-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

یورپئین پریمئیر لیگ فٹبال گوازی ءَ دوشی شپ چار ٹیمانی میان ءَ گوازی کنگ بوتگ کہ آھانی تہ ءَ ارسنل ءُ مانچسٹر سٹی ءَ گوازی کٹ اِتگ انت ءُ دومی نیمگ ءَ اسپینش فٹبال لیگ لالیگا ھشت ٹیمانی میان ءَ گوازی کنگ بوتگ –

لالیگا فٹبال گوازی ءَ ھشتیں ٹیمانی میان ءَ بوتگیں گوازی ءَ کیڈز ءَ رائو والکینیو ءِ دیم ءَ دو، بارسلونا ءَ ایلچی ءِ دیم ءَ دو پہ یکے ءَ، کیلٹا ویگو ءَ ملورکاءِ دیم ءَ چار پہ سَے ءُ ایٹلیٹیکو میدریڈ ءَ رئیل بیٹس ءِ دیم ءَ سَے پہ یک گولے ءَ گوازی کٹ اِتگ انت –

پریمئیر لیگ فٹبال گوازی ءَ دوشی شپ اولی گوازی مانچسٹر سٹی ءُ مانچسٹر یونائیٹڈ میان ءَ بوتگ کہ سٹی ءَ چار پہ یک گولے ءَ یونائیٹڈ برتگ – یونائیٹڈ نیمگ ءَ چہ جے. سینچو ءَ گول اسکور کتگ وھدیکہ سٹی ءِ نیمگ ءَ کے ڈی ءُ آر.مہریز ءَ دو دو گول اسکور کتگ گوازی وتی ٹیم ءِ نام ءَ کتگ –

وٹفورڈ ءُ ارسنل ءِ میان ءَ بوتگیں گوازی ءَ ارسنل ءَ سَے پہ دوگول ءَ وٹفورڈ ءَ چہ گوازی کٹ اِتگ – وٹفورڈ نیمگ ءَ جے.ہرنندس ءُ ایم.سیسوکو گول اسکور کتگ انت ءُ ارسنل ءِ نیمگ ءَ ایم.اوڈیگارڈ، بی. ساکا ءُ جی.مارٹینلی ءَ یک یک گول ءِ اسکور کتگ گوازی کٹ اِتگ –

سربوتگیں ھالانی رِد ءَ بلوچستان ءِ دمگ کیچ ءِ بنجاھی شھر تربت ءَ ناشناسیں مردماں پوجی پانگس ءِ سر ءَ دزبمب ءِ چگل داتگ –

اُرش تربت ءَ سنیما چار راہ ءَ برجاھیں پوجی پانگس ءِ سر ءَ کنگ بوتگ – اھوالکار ءِ رِد ءَ اُرشکاراں دزبمب ءِ پوجی پانگس ءِ تہ ءَ چگل داتگ ءُ تچگ ءُ رؤگ ءَ سوبمند بوتگ –

ھالانی رِد ءَ اُرش ءَ پوج ءَ تاوان ءِ دیمپان بوتگ بلے تنی وھدی سرکار ءِ نیمگ ءَ اے درگت ءَ ھچ گوشگ نہ بوتگ –

زانگ بہ بیت اے دمگاں پیسر ءَ پوج ءِ سر ءَ بوتگیں اُرشانی زمہ واری گیشتر بلوچ آجوئی لوٹوکیں سلاہ بندیں گلاں منّ اِتگ انت بلے تنی وھدی اے اُرش ءِ زمہ واری ھچ گل ءَ نہ منّ اِتگ –

گلزار دوست ءِ سرکماشی ءَ بیگواھیں مردمانی یل کنگ ، بلوچستان ءَ نشہ ءِ ھلاسی، وانگجاہ ءُ مھلوک ءِ گسانی سر ءَ ایف سی پانگسانی ھلاسی بلوچستان ءُ سند ءَ زمینانی سر ءَ کبزہ کنگے بگیری ءَ تربت تاں شال ءَ رؤکیں پیادگ روانک ءَ دوسد ءُ ھشتاد کلومیٹر گوازینتگ ءُ پنجگور ءِ دمگ گوارگو ھند کاٹاگری ءُ فتح علی ءَ سربوتگ –

پنجگور ءِ دمگ گوارگو ءِ سربوھگ ءَ اودے سیاسی پاٹی، ورنا ءُ چک ءُ زالبولاں گلزار دوست وش اتک کُتگ ءُ آئی ءِ سر ءَ پُل چنڈیتگ ءُ ھار گور ءَ داتگ – زالبولاں گلزار دوست ءِ دست چُک اِتگ ءُ سوبمندی ءِ نیک دوائی داتگ –

ورنا ءُ زھگاں فتح علی بازار ءَ گلزار دوست ءِ گوم ءَ گام جتگ ءُ آ کاٹاگری ءَ سر کتگ –

پنجگور ءِ دمگ گوارگو ءَ وش اتکی ءَ پد گلزار دوست ءَ تران کنان ءَ گوشتگ اے وڈیں ترس ءِ ماھول ءِ تہ ءَ چک ءُ زالبول ورناھانی منی وش اتک کنگ ءَ آھانی مھر منی ھوسلہ ءُ جزبگاں گیشتر مھکم کن انت راج ءِ ھمراہ داری ءُ مات گھارانی نیک دوائی ءُ مھر مناں دمبرگ ءَ نیل انت – ھما لوٹانی ھاتر ءَ من در اتکگاں تانکہ منی لوٹ منّگ نہ بنت من ھچ وڈا دستکش ءُ پد کنز نہ باں –

آئی ءَ گوشتگ بیگواھیں مردمانی پہ وش سلامتی یل کنگ، بلوچستان ءَ نشہ ءِ باپاری ھلاسی، بلوچستان ءَ وانگجاہ ، کوچگ ءُ بازاراں ءُ دگانی سر ءَ ایف سی پانگسانی ھلاسی ءُ بلوچستان ءُ سند ءَ زمینانی سر ءَ ہاؤس اسکیم ءُ شوربندیانی نام ءَ بلوچانی زمینانی سر ءَ کبزہ ءِ بگیری ءَ ھما زرمبشت کہ من بندات کتگ تاں وتی منزل ءَ سر نہ بیت منی جھد برجاہ مانیت –

آئی ءَ گوشتگ کہ ما ھما زرمبشت کہ بندات کتگ آئی ءِ گڈی منزل شال انت شال ءَ سرباں گورنر ہاؤس دیم ءَ نندانک جناں –

آئی ءَ پنجگور ءِ اھوالکاراں گوں تران کنان ءَ گوشتگ کہ بیگواھیں بلوچ، نشہ ءِ گر ءُ دار بلوچ ءِ آبرو ءِ رکینگ ءَ مناں ھروڈیں کربانی دئیگ کپیت من ساڈی آں بلے وتی موقف ءُ لوٹاں پد نہ کنزاں –

آئی ءَ گوشتگ من تربت ءَ چہ پیادگ دراتکگ ءُ تاں پنجگور ءَ سر بوتگاں سرکار ءِ نیمگ ءَ چہ مناں ھچ وڈیں ھال اھوال کنگ نہ بوتگ ناکہ دگہ اڈوجنجال ءِ دیم ءَ اتکگ بلکہ مات ءُ گھارانی جزبگ ءُ مھراں گنداں منی ھوسلہ گیشتر بنت –

آئی ءَ گوشتگ کہ منی گڈی منزل شال انت اگاں منی لوٹ منّگ نہ بوتاں گڈا گورنر ہاؤس ءِ دیم ءَ نندانک جنیں – آئی ءَ دگہ یک جست ءِ پسو ءَ درائینت کہ راج، مات ءُ گھار بلکل منی گوم ءَ پیادگ پند جنگ ءَ ساڈی انت بلے تنی وھدی من مکن کتگ انت ایوک ءَ در اتکگ انت ءُ اے زرمبشت ءِ سوبمندی ءَ پیسر آرامی ءَ نہ ننداں –