TBP Balochi

بلوچستان ءِ تیاب دپی شھر گوادر ءَ پاکستان کوسٹ گارڈ ءِ رویشگ ءُ شھریاں کنگ ءِ بگیری ءَ تاں شپ ءَ زھرشانی برجاہ ءَ اِنت-

سربوتگیں ھالانی رِد ءَ ھک دے تھریک ءِ باسکاں ھوار شھریانی مزنیں کچے ءَ اے وھد ءَ ڈی سی کارگس گوادر ءِ دیم زھرشانی ئیں نندانک برجاہ ءَ اِنت-

زھرشانی کنوکانی رِد ءَ کنٹانی ھور ءَ باپاری مردماں انتزامیہ ءُ کوسٹ گارڈ ءِ کارندہ بے سبب ءَ تنگ کتگ ءُ لٹ ءُ کٹانی نشانگ کتگ اَنت ءُ بے زت کتگ اَنت-

زھرشانی ئیں نندانک ءَ چہ ھدایت الرحمان بلوچ ءَ تران کنان ءَ گْوشتگ کہ کوسٹ گارڈ ءُ اے سی گُنڈہ گردی کبول نہ اِنت-

آئی ءَ گْوشتگ کہ ما گوستگیں چیزے ماہ ءَ گوں زھرشانی ئیں بلے پھازوکی لشکر ءِ کارندہ وتی رویشگ ءِ تہ بدلی وتی جاہ ءَ آ دمگی مردماں گیش تنگ کنگ ءَ اِنت-

زھرشانی کنوکانی لوٹ اِنت کہ سیمسری باپاری ءَ پاکستانی پوج توک ءَ مہ پُتر اِیت ءُ زرگری ءَ دارگ بہ بنت-

ضلع گوادر ءَ چہ ءَ سیادی داروکیں باپاری مردمانی گْوشگ اِنت کہ پاکستان کوسٹ گارڈ ءِ مزنیں افیسراں بگر تاں کسانی سپاھی ءِ زرگری ءَ ھوار اَنت-

زانگ بہ بیت بلوچستان ءِ تیاب دپی شھر گوادر ءُ دگہ تیاب دپی ھنداں دمگی مردماں یکشلہ پاکستانی پوج ءِ رویشگ ءِ بگیری ءَ زھرشانی اَنت-

بلے تنی وھدے ھکومت ءِ کول وتی جاہ ءَ آیانی لوٹانی سر ءَ گامگیج نہ زورگ ءِ سبب ءَ مردم پریشانی ءِ دیمپان اَنت-

زالبولانی میاں استمانی روچ ءِ درگت ءَ بلوچستان ءِ بنجاھی شھر شال ءَ ھوار دگہ دمگاں مراگش اڈ دیگ بوتگ انت، درسیں مراگش ءَ چہ بلوچستان شھدربرجاہ ءِ اڈ دیگ بوتگیں “وومن کانفرنس ” جوانتر بوتگ، کہ گوستگیں روچاں ء چہ اشی ءِ سر ءَ چاگردی ترامجاھاں باوست ھم بوتگ –

مروچی زالبولانی میان استمانی روچ ءِ درگت ءَ بلوچستان شھدربرجاہ ءِ واکدارانی ھمراھداری نہ کنگے سوب ءَ نودربراں شھدربرجاہ ءِ بلڈنگ ءَ ڈن کانفرنس برجم داشتگ کہ اودا ءَ زالبولاں مزنیں کچ ءَ بھر زرتگ وھدیکہ بھر زوراکانی مزنیں کچ ءِ بلوچستان شاھدربرجاہ ءَ چہ ڈن بوتگ انت کہ گیٹ پُترگ ءَ نہ اشتگ انت – وھدیکہ گوستگیں روچ ءَ پولیس ءِ مزنیں کچ ءِ شاھدربرجاہ ءَ اتکگ بوتگ انت –

بلوچ وومن کانفرنس نودربر گل بلوچ اسٹوڈنس ایکشن کمیٹی ءِ نیمگ ءَ چہ برجم دارگ بوتگ – اے درگت ءَ گل ءِ بنجاھی جارکش ءَ رسانکدراں وتی شنگ کرتگیں درشان ءِ تہ ءَ گوشتگ کہ واکدارانی نیمگ ءَ اڈاند پیدا کنگ ءَ ابید بلوچستان شھدربر جاہ ءَ زالبولانی میاں استمانی روچ ءِ درگت ءَ بلوچ وومن کانفرنس برجم داشتگ کہ ھر تک ءُ پھناتاں سیادی داروکیں زالبولاں بھر زرتگ –

آئی ءَ گوشتگ کہ گل ءِ نیمگ ءَ سَے ھپتگ ءَ ساری زالبولانی میاں استمانی روچ ءِ درگت ءَ وومن کانفرنس برجاہ دارگے جار جنگ بوتگ – بلوچستان شھدربرجاہ کہ سوبہ ءِ مستریں زانشجاہ انت کہ اودا بلوچستان ءِ کنڈ کنڈ ءِ نودربر وانگ ءَ انت ھمے ھاتر ءَ اے پیسلہ کنگ بوتگ کہ اے مراگش بلوچستان شھدربرجاہ ءَ برجاہ دارگ بیت انت ءُ واکدرانی گور ءَ یونیورسٹء آڈیٹوریم ءِ موکل لوٹ اِتگ – شاھدربرجاہ ءِ واکدارانی باور کنائینگ ءَ گل ءَ وتی درسیں مھمان ءُ بھر زوروک ھمے روچ ءَ شاھدربرجاہ ءَ لوٹارینتگ انت ءُ کانفرنس ءِ ھم سرجمیں کار کرتگ انت بلے زالبولانی میاں استمانی روچ ءَ چہ یک روچ ءِ ساری شھدربرجاہ ءِ واکدار ءُ دمگی واکداراں شھدبرجاہ ءِ تہ ءَ مراگش اڈ دیگ ءَ مکن کتگ ءُ بیھار ھم دیگ بوتگ –

جارکش ءَ گوشتگ کہ شھدربرجاہ ءِ واکدارانی بیھار دیگ ءُ سدانی کچ ءَ پولیس ءِ آرگ ءُ آڈیٹوریم نہ رسگ ءَ ابید ھم ما ایڈمن بلاک ءِ دیم ءَ بلوچ ویمن کانفرنس برجم داشتگ – شاھدربرجاہ ءِ واکداراں مزنیں کچ ءَ زالبول گیٹ ءِ تہ ءَ پُترگ ءَ نہ اشتگ انت بلے پدا ھم مراگش برجم دارگ بوتگ مراگش ءَ نودربراں ھوار ھر تک ءُ پھناتاں سیادی داروکیں زالبولاں بھر زرتگ – مراگش ءَ انکلابی پڈ ءَ زالبولانی کرد، راجی جوڈیشت ءَ زالبولانی راجکاری جھدے گواستانک، بلوچ زالبول ءُ آھانی بنکی جیڑھاں ھوار دگہ بنگپانی سر ءَ باوست بوتگ ءُ ڈرامہ ھم کنگ بوتگ –

درشان ءِ گڈسر ءَ جارکش ءَ گوشتگ کہ نودربرانی گوم ءَ بلوچستان شھدربرجاہ ءِ واکدارانی نودربرانی گوم ءَ اے رویش ایرجنگی انت – وانگجاہ پہ نودربراں جوڈ کنگ بوتگ ننت بلے ھمے نودربراں مراگش کنگے موکل ھم دیگ نہ بیت اِنت – ما درسیں نودربر گلاں لوٹ کنیں کہ زانشجاھانی سر ءَ ڈُل کتگیں اے وڈیں واکدارانی بگیری ءَ یکجاہ بوھگ ءُ توار چست کنگی انت تانکہ نودربر ارزانی ءَ وتی ادارھانی تہ ءَ وتی سیاسی کاراں دیم ءَ برت بہ کناں –

دومی نیمگ ءَ مروچیگیں روچ ءِ درگت ءَ لمز شھدربرجاہ اُتل ءِ نودربراں پیس واک کتگ – کہ بازیِ نودربرانی دست ءَ بینر بوتگ انت – وھدیکہ بلوچستان نیشنل پاٹی، وومن ڈیویلپمنٹ ڈیپارٹمنٹ بلوچستان ءِ نیمگ ءَ جتا جتا مراگش کنگ بوتگ انت –

سربوتگیں ھالانی رِد ءَ بلوچستان ءِ دمگ کیچ ءَ پاکستانی پوج ءَ بلوچ آجوئی لوٹوکیں گل ءِ اوتاگ ءَ بیڑ برتگ ءُ ھردو نیمگاں جنگ ءُ چوپ ءَپاکستانی پوج ءُ بلوچ سلاہ بندیں آجوئی لوٹوکانی جَنَگ بیگ ءِ ھال اِنت –

پوجی بیڑ کیچ ءِ دمگ ھوشاپ تل ءَ بوتگ، پاکستانی پوج ءِ جارکش آئی ایس پی آر ءِ نیمگ ءَ شنگ بوتگیں درشان ءِ تہ ءَ گوشگ بوتگ کہ پھازگیلشکر ءَ بلوچستان ءِ دمگ کیچ ءَ سلاہ بندیں مردمانی جاگہ ءِ سرءَ چیریں اھوالانی سرءَ  بیڑ برتگ –

آئی ءِ رِد ءَ پھازگی لشکر ءَ دمگ ءَ کلیئرنس آپریشن بندات کتگ گُڑا سلاہ بندءُ پوج ءِ میان ءَ تیرگواری بندات بوتگ –

آئی ایس پی آر ءِ رِد ءَ ھردو نیمگاں تیرگواری ءَ چہ ھپت سلاہ بندیں مردم جنگ بوتگ،  جنگ بوتگیں مردمانی تہ ءَ کماندار حاصل ڈوڈ ءُ وشدل ھمھوار انت – اے مردم مکران تہ ءَ ھمے زوتاں پوج ءِ سر ءَ بوتگیں اُرشاں ھوار بوتگ انت – اشانی گور ءَ مزنیں کچ ءَ سلاہ ءُ تراکناکیں شورہ ھمدستکپتگ –

اھوالکار ءِ رِد لشکری بیڑ ءِ میان ءَ ھردو نیمگ ءَ بوتگیں جنگ چوپ ءَ ھپت سلاہ بندانی بیرانی ءَ ھوار پوج ءَ ھم جانی تاوان ءِ دیمپانی بوتگ –

آجوئی لوٹوکیں گلانی نیمگ ءَ اے درگت ءَ تنی وھدی ھچ وڑیں درشان دیگ نہ بوتگ ناکہ بیران بوتگیں مردمانی نام دیم ءَ آرگ بوتگ انت بلے اےدمگاں بلوچ آجوئیں لوٹوکیں سلاہ بندیں گل ھست اَنت –

زانگ بہ بیت دو ماھانی میان ءَ بلوچ آجوئی لوٹوکیں سلاہ بندیں گلانی بگیری ءَ پاکستانی پوج ءِ بیڑانی تہءَ گیشی آرگ بوتگ – گوستگیں ماہ ءَپوج ءِ ھمے دابیں میڑ ءَ ھژدہ بلوچ آجوئی لوٹوک بیران بوتگ اَنت گوستگیں ماہ ءَ بیران بوتگیں گیشتریں آجوئی لوٹوکانی سیادی چہ بلوچنیشنلسٹ آرمی ءَ بوتگ کہ آھانی تہ ءَ گل ءِ سَے کمانداراں ھوار ھبدہ مردم بیران بوتگ انت وھدیکہ ھمے ماہ ءَ دہ مردم بیران بوتگ اَنت –

مروچیگیں میڑ ءَ زانگ نہ بوتگ کہ اے مردمانی سیادی چہ کجام گل ءِ اِنت –

شال ءَ بیگواھیں مردمانی ھاتر ءَ زھرشانی برجاہ، مروچی زھرشانی بنجل ءَ چار ھزار ءُ شش سد ءُ شش روچ سرجم بوتگ، بی این پی ءِ بنجاھیاگدہ دار عبدالولی کاکڑ، واجہ جہانزیب بلوچ ءُ ایم پی اے شکیلہ نوید دہوار،  ملک زبیر، احمد نواز ءُ دگہ مردماں بنجل ءَ اتکگ ءُ دلپدردیدرشانتگ –

ھمے وھد ءَ بیگواھیں مردمانی پانکجنیں گل وی بی ایم پی ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ بلوچستانءَ ریاستی پوج ءُ آئی ءِ جوڑ کرتگیں ڈیتھ اسکواڈ ءِ نیمگ ءَ انسانی ھکانی لگتمالی درچ یکشل ءَ برجاہ انت، کہ آئی ءِ سر ءَ میاں استمانی ھکانیادارھاں گامگیج زرتگ بلے پاکستانی آمیدگس ءُ ریاستی اداھانی تہ ءَ ھچ بدلی نہ اتکگ –

آئی ءَ گوشتگ کہ انسانی ھکانی لگتمالی زورانسری آوارجنی، ماورائے عدالت کوش ءُ لس مھلوک یکجاھی سزا دئیگ بوھگ ءَ اِنت – بازیں سال ءِبیت کہ ھزارانی کچ ءَ بلوچ ریاست ءِ بندیگ جاھاں بندیگ اَنت ءُ وتی نہ کرتگیں گناھانی سزا ءَ سگگ ءَ اَنت –

ماما قدیر بلوچ ءَ گوشتگ کہ مروچی کہ سرجمیں جھان ءَ زالبولانی میاں استمانی روچ دارگ بوھگ ءَ اِنت من اے گپ ءَ پدر کنگ لوٹاں کہ بلوچزالبول ھم ریاستی زوراکیانی آماچ اَنت ءُ ایردستی ءِ بگیری ءَ بوکیں جھد ءِ گھگیری ءِ نشان اَنت، مروچی سدانی کچ ءَ بلوچ زالبول وتیدوستیگیں مردمانی یل کنائینگے ھاتر ءَ مدامی جھد ءِ بھر اَنت ءُ اے زوراکی ءِ زمزیلانی پروشگے ھاتر ءَ جُھد ءَ اَنت –

صدر پاکستان ڈاکٹر عارف علوی ءِ سبی ءَ تر ءُ تاب ءِ وھد ءَ بمب تراکے بیتگ چریشی ءَ سیکورٹی پورسز ءِ بازیں کارمندے زدگ ءُ بیرانی بیتگ اَنت-

مروچی سبی ءِ میلے ءِ گڈسری مراگش ءَ صدر پاکستان ڈاکٹر عارف علوی گچینی ءِ مھمان بیتگ ءُ جیل روڈ ءَ لوکل ریسٹ ھاؤس ءِ نزیک ءَ صدر پاکستان عارف علوی ءِ کاروان ءِ گوزگ ءَ پد یک ترندیں تراکے بیتگ-

داں انگت ءَ اتکگیں ھالانی تہ ءَ اُرش ءَ بازیں سیکورٹی کارمند زدگ بیتگ اَنت ناسرجمیں ھالانی رد ءَ یک ایف سی کارمندے بیران ءُ دگہ زدگ بیتگ اَنت-

وئیل ءِ ھال ءِ سر بیگ ءَ سیکورٹی پورسز تراک جاہ ءَ سر بیتگ دمگ اش انگیر ءَ کرتگ ءُ تراک ءِ ٹپاس ءَ کنگ ءَ اَنت-

یوکرین ءِ پوج ءَ بھتام جتگ کہ روس شھری آبادیانی سر ءَ بمباری ءُ زالبول ءُ زھگاں الگار کنگ ءُ وتی کاروائیاں میان اُستمانی رھبند ءِ لڑ گوشگ اِنت-

امریکی وزیر ھارجہ اینٹی بلنکن ءَ روس ءَ را زور داتگ کہ آ یوکرین ءِ شھری آبادیانی سر ءَ وتی اُرشاں بند بہ کنت-

دو شمبے ءَ یورپی ملک لٹویا ءِ وزیر ھارجہ ءِ ھمراہ ءَ نیوز کانفرنس کنان ءَ گوشتگ کہ بلنکن ءَ گوشتگ “مردماں پُر ایمنی ءِ رنگ ءَ درایگ ءَ بِل ایت “اشاں وردن ءُ دوا سر کنگ ءَ بِل ایت ءُ یوکرین ءِ سر ءَ وتی مرزی ءِ جنگ ءَ ھلاس بہ کنت”-

امریکی وزیر ھارجہ ءَ لٹویا ءَ اسرائیلی ھم منصب یائر لیپڈ ءَ گند ءُ نند ءُ روس ءِ یوکرین ءِ اُرش ءَ پد جاورھالانی سر ءَ چار ءُ ٹپاس بیتگ-

امریکی وزیر ھارجہ ءَ یوکرین ءِ ناگیگیں جاورانی ھلاس کنگ ءَ اسرائیلی گپانی ستاہ شانی کتگ-

امریکہ ءُ اسرائیلی وزائے ھارجہ ءِ گند ءُ نند ھنچیں وھدے ءَ بیتگ کہ وھدیکہ یکشمبے ءَ اسرائیلی سروزیر نفتالی بینیٹ ءَ روس ءُ یوکرین ءِ سروکاں جنگ بندی ءِ دزبندی کتگ-

یوکرین ءِ سعقک ولودیمیر زیلنسکی ءِ نزیکیں گپ تران کنوک ءَ گوشتگ کہ روس ءِ گون ءَ سیمی روچ ءَ ھم گپ ءُ تران ءَ جوانیں چیز گندگ ءَ نیتکگ اَنت-

روس ءُ یوکرین ءِ میان ءَ دوشمبے ءِ روچ ءَ سیمی گپ ءُ تران بیلاروس ءَ بیتگ کہ آئی ءِ بنگپ ءِ وھد ءَ جنگ ءِ وھد ءَ مردماں جوانیں جاھاں سرکنگ ءُ جنگ بندی ءِ سر ءَ گپ کنگ-

چشکہ یوکرینی سروک ءِ جارکش ءَ گوشتگ کہ اے گپ ءُ تراناں ھچ رنگیں آسر گندگ ءَ نیتکگ اَنت-

روس ءَ دو شمبے ءِ روچ ءَ یوکرینی دمگاں سیز فائر کنگ ءِ جار جتگ دانکہ شھری آبادیاں مھلوک در اتکگ بہ کنت داں دوشمبے ءِ شپ ءَ چوشیں چم دیستوکیں مردم گندگ ءَ نیتکگ اَنت آیاں گوشتگ روس ءَ وتی بمباری داشتگ اَنت-

روسی واکداراں گشتگ یوکرینیانی گون ءَ چارومی بر ءِ گپ ءُ تران زوت بندات کنگ بیت اِنت-

زانگ بہ بیت روس ءُ یوکرین ءَ بیست ءُ چار فروری ءِ یوکرین ءِ سر ءَ روس ءِ اُرش ءَ پد داں انگت ءَ سَے براں گند ءُ نند بیتگ اَنت-

نبشتانک: ھسا بجارءِ کتاب کرپدانک ءِ سر ءَ دو دانک

نبشتہ کار: رحیم مہر

دی بلوچستان پوسٹ

ھسا بجار بلوچی کسہی لبزانک ءَ زانتگیں نامے،بلوچی ءَ گدار ءُ آزمانک نویسی ءَ آ وتی جتائیں اندازے ءِ درشاندابے ءِ واہند انت ۔ گوں کسہ ءَ ھمے عشق ءِ سوب انت کہ کسہی لبزانک ءِ رجانکاری ءَ اوں ھوار کپتگ، آئی ءِ رجانکاری ءِ سفر چہ دْرد ءَ بنا بوتگ ات، استیں کتاب ’’کرپدانک آئی ءِ ھمے مہر ءُ واہگ ءِ برورد انت۔

پنجاہ ءِ دہک ءَ وہدے بلوچی نبشتاری دروشم گپت ءُ تاک ءُ ماہتاکانی چاپ ءُ شنگی ءِ دْرچ بنا بیت تاں بنداتی زمانگ ءَ بلوچ نبشتہ کار آزمانک ءِ رجانکاری ءِ نیمگ ءَ اوں دلگوش دے اَنت، بازیں زبانانی آزمانک ماں بلوچی ءَ رجینگ بنت، اے سفر داں روچ ء مروچیگ ءَ یکشلی ءَ دیم ءَ روان انت ۔ بلوچی ءَ چہ درستاں گیش ھما تہر کہ رجینگ بوتگ آ آزمانک انت۔

ھسا ءِ کتاب کرپدانک اوں آزمانکانی رجانکی کتابےکہ اشی ءِ اندر ءَ جتائیں زبانانی نامی ئیں کلمکار ھوار انت، چوشکہ ولیم فاکنز،ارنسٹ ھمنگوے،،اوہنری، موپاساں، کرشن چندر،رضا بابا مقدم ءُ دگہ اے درائیں آزمانک چہ اردو ءِ کمک ءَ رجینگ بوتگ انت۔

ھسا ءِ رجانکانی وانگ ءَ من چہ سئے چیز ءَ اسرمند بوتگاں، بزاں یکے آئی ءِ زبان، دومی ریچ ءُ روانی ءُ سیمی معنا ءَ گوں شدت ءَ وتی زبان ءِ تہ ءَ آرگ ءُ بدل کنگ۔

رجانکاری ءَ پہ مستریں وسیلگ (Tools) زبان انت ، رجانکار چہ سورس ءُ ٹارگٹ ھردو زباناں سرپد ءُ آشنا بہ بیت تاں پہ ھنر وتی کار ءَ سرجم کت کنت، پرچیکہ ھمک زبان ءِ وتی جتائیں لبز ءُ محاورگے بیت،وتی جتائیں تب ءُ گوشگ وڑے بیت، وتی لبزیات بنت ، وہدے یک رجانکارے پہ دلگوش بدل لبز ءُ محاورگاں کارمرد کنت تاں اسل زبان ءَ دیم ءَ اتکگیں گپ ءُ معنا وتی سرجمیں رنگ ءَ دومی زبان ءَ بدل بنت۔ ھسا ءِ رجانکانی جوانی یے ھمیش انت کہ آ زبان ءَ پہ دلگوش ءُ وتی جند ءِ تب ءُ مزاج ءِ ردا کارمرد کنت ۔ اے رجانکی اکّر ءَ بگند ات کہ زبان ءِ پہ ھنر ءُ گالریچی رنگ ءَ کارمردی ءِ جوانیں درورے۔ ’’ آئی ءَ ہمے مار اِت کہ ہسپ ءِ سُہر سیاہ چکیں چم ءِ تہ ءَ دیپک ءِ چم رُدان انت۔ چارگ چارگ ءَ ہسپ درک بوت ۔ پد ءَ ترند درک چد ءُ گیش ترند تر تبلہ ءِ توار ہم یکشل ءَ برجاہ ات۔ “دہا “گے” نا” تی “دہند ہا” گے “نا “تی “تک “دہن یبرا بدن ءِ کُلیں رگ ءُ بنداں وتی دپ پلگوشت ءُ بدن چو کُٹنّگ ءَ پُترشُک شانت۔ ناپگ ءَ کمے جہل اسپیتیں نگرہ تچگ ءَ اتنت ڈن ءَ شپ نمب ءَ کلیں ندارگ میسینتگ ات انت ءُ نو واب چہ چمانی دریگ ءَ لرزان پیداک ات نو کہ آ سرجم ءَ تر بوتگ ات۔

(سلاہجاہ ءَ نشتگیں واب) چہ اے درور ءَ زانگ بیت کہ رجانکار زبان ءَ پہ ھنر کارمرد کنت، اسل ٹیکسٹ ءِ اندر ءَ دیم ءَ اتکگیں کیفیت ءُ جاوراں انچیں بدل لبزانی کمک ءَ ٹارگٹ لینگویج ءَ ایرگیج ایت کہ کسہ وت ھمے زبان ءِ بہرے سما دنت۔ سرجمیں کتاب ءِ وانگ ءَ ھمے گپ مارگ بیت کہ رجانکار ءَ زبان گوں دلگوشی ءَ کامرداتگ۔ ساچشتی رجانک ءَ یک جیڑہے ٹیکسٹ ءِ ریچ ءُ روانی ءِ برجاہ دارگ انت،رجانک ھمنچو کہ رچوک ءُ روان بیت تہ وانوک ءَ گوں ارزانی ءَ وتی رسانک ءَ کنت۔شریں رجانکار ھما انت کہ پہ وتی وانوک ءَ دگہ مانگیشی ودی مہ کن انت پرچیکہ دانکہ یک ٹیکسٹ ءِ اندر ءَ ریچ ءُ روانی مہ بیت تہ معنا ھم وانوک ءَ سرجمی ءَ سر نہ بیت۔ ھسا ءِ رجانکی یک شری یے ھمیش انت کہ آ رجانک ءِ وہد ءَ اسل ٹیکسٹ ءَ انچیں رچوک ءُ روانیں دابے ءَ وتی زبان ءَ بدل کنت کہ وانوک سرجم ءَ چہ نبشتگاں چَس ءُ لذت زورایت ءُ معنا ھم پہ جوانی آئرا سر بیت۔ سرجمیں کتاب ءِ وانگ ءَ انچو سما بیت کہ اے پہنات ءَ ھم رجانکار ءَ گوں دلگوشی ءَ کار کرتگ ۔ پہ درور اے ٹُکڑ ءَ بگند ات: ’’ مہمود وتی کسہ ءَ آران ات ءُ گشت ئِے ’’کاسی منی اولاک ات۔ من ورناہ ات آں من ئِے کہ جماز بوت آں تاں من ءَ اشی ءِ جماز بوگ سک وش بوتگ ات۔سرکماشے ءِ اسپ ات، پمیشکہ چہ دومی اسپاں گیش گور کنگ بوتگ ات۔ مدام زرنگ ات من ھمے کہ جماز ئِے بوت آں، پہ کہیبے گردن ءَ سُرینان گوں نالانی تواراں وش شتگ ات۔ڈلپادیں زمیناں آئی نالانی توارءَ درہیں آتراپ جکسینتگ ات۔ اے دمان ءَ من ہم وتی سُنٹ نوداں کتگ ات ءُ پہ ٹہلے اسپ ءِ سرا وت ءَ لُڈات۔(ہور ءُ ارس) سیمی جوانی کہ ھسا ءِ رجانکانی اندر ءَ من دیستگ ءُ مَرتگ آ سورس لینگویج ءِ تہ ءَ دیم ءَ اتکگیں جوزگ ءُ ھیال ءَ معنا ءُ بزانت ءَ گوں زور ءُ شدت ءَ ٹارگٹ لینگویج ءَ بدل کنگ انت ساچشتی رجانک چہ زانشی رجانک ءَ چوش ھم جتائیں چیزے کہ ساچشت ایوک زانت ءُ سرپدی یے نہ انت بلکیں اشی ءِ اندر ءَ دگہ ھم بازیں چیز ھوار کپ ایت ، چوشکہ وہدے یک زبانے ءِ اندر ءَ چیزے ساچگ بیت تاں ھما زبان ءِ گپ جنوک ءِ ملک ءُ آئی ءِ ربیت، رسم ءُ دود،ھواریں راجی سنچ ءُ سما ، زبان ءِ وتی محاورگ، نبشتہ کار ءِ درشانداب ءُ انداز ، چریشاں ابید ھمک کسہ ءِ جتائیں کارست آیانی زاہری ءُ نفسیاتی جیڑہ ءُ جنجال ، کجام ھم ساچشتی اکّرے ءِ رجینگ ءَ رجانکار اے توامیں جاوراں گوز ایت ۔پمشکہ ساچشتی رجانک چوشیں ارزانے کارے نہ انت لبز ءِ بدل ءَ لبز ایر کنگ ءِ نام نہ انت ، بلکیں اے توامیں چیز یک رجانکارے ءِ نگاہ ءَ بوہگ لوٹ انت یک ٹیکسٹے ءِ اندر ءَ دیم ءَ اتکگیں معنا ءَ گوں وتی توامیں پچ ءُ جُزئیاتاں وتی زبان ءِ تہ ءَ بدل کنگ ءَ ھردو زبانانی سر ءَ سرجمیں دسرسے لوٹ ایت ، پرچیکہ دانکہ یک رجانکارے ٹیکسٹ ءِ زاہری ءُ اندری بزانت ءَ سر مہ بیت تاں ھما داب ءُ دروشم ءَ وتی زبان ءَ ئے بدل کرت نہ کنت۔ ھسا ءِ رجانکانی وانگ ءَ سما بیت کہ آ اسل ٹیکسٹ ءَ دیم ءَ اتکگیں معنا ءُ بزانت ءَ وتی اندر ءَ ایر گیجیت پد ءَ اشی ءَ وتی زبان ءِ تب ءُ کالب ءِ رد ءَ دیم ءَ کاریت کہ چوشی اسل ٹیکسٹ گوں وتی توامیں معنا ءُ بزانت ءَ دیم ءَ کیت، سرجم ءَ وانوک ءِ سر ءَ وتی رسانک ءَ کنت۔ اردو ءِ اے ٹُکرءُ اشی بلوچی رجانک ءِ درورءَ بگند ات: ’’مگر آج وہاں کچھ نہ تھا۔ جذبوں کے شفق زار چھٹ گئےتھے۔ پیڑ کا تنا محض پیڑ کا تنا تھا اور پانی کا جھر نا ،پانی کے جھرنے کی طرح بہہ رہا تھا۔ ہر چیز انجانی اور اجنبی اور اس سے الگ الگ کھڑی تھی۔ وہ چیخ مار کر سارے جنگل کا جگا دینا چاہتا تھا۔ مگر اس کا حلق باربار گھٹ رہا تھا۔ اس کے سارے احساسات پر اک دھند سی چاہی ہوئی تھی، جنگل میں بے سمت گھومتے گھومتے کئی بار اسے خیال آیا کہ اگر وہ اس دھند کو اپنے ناخنوں سے چیر دے تو شاید اندر سے موگری کا زندہ اور اصلی چہرہ صحیح و سلامت نکل آئےگا۔ وہ موگری جسے وہ اپنے دل سے پہچانتا تھا۔ مگر دھند کسی طرح نہ چھٹی اور گہری ہوتی گئی۔جنگل میں اس کا دم گھٹنے لگا۔ پیڑوں کا گھیرا اس کے لئے تنگ ہونے لگا ۔اسے ایسا محسوس ہونے لگا جیسے چاروں طرف سے جنگل کے پیڑ جھک کر اس پر گرنے والے ہیں۔ پھر وہ گھبرا کر جنگل سے باہر بھاگ نکلا۔ (آدھے گھنٹے کا خدا)

اشی ءِ بلوچی رجانک چوش انت : ’’بلے مروچی ہچ چوشیں چیزے نیست ات ،مارشتانی پلگاریں راز اندیم ات انت درچکءِ بُنڈ،یک بنڈے ات ءُ بس ،چمگ ءِ آپ ہم آپ ءِ داب ءَ تچگ ءَ ات۔ کُل شے چو درآمدءَ آئی ءَ چہ گستا اوشتوک ات انت۔ آ کوکار کنگ ءُ گریشگ ءَ چہ واب ءَ پاد کنگ لوٹگ ءَ ات۔ بلے آئی توار نِہ گُٹ بوگ ءَ ات۔آئی ءِ کُلیں مارشت یک مُجےءَ مان پوشتگ ات انت۔گریشگ ءِ تہ ءَ انچو پہ دیم گردگ ءَ باز براں ہمے ہیال ئِے کت کہ اگاں من ہمے مانپوشتگین مُج ءَ گوں ناکُناں بہ دِرّاں بلکن موگری ءِ اسلیں دروشم درا بہ بیت۔ ہما موگری کہ من آئی ءَ را گوں وتی دل ءِ چماں زانتگ ات۔بلے مج ات کہ گار بوہگ ءِ نام ئے نزانت ءُ گنتر تہا ر تر بوآن ات۔آ ماں گریشگ ءَ دمتوس بوہگ ءَ ات۔ درچکانی ہسار گیش بوان ات۔ انچو سما کنگ ءَ ات کہ اِند ءُ نا اِندءَ کلیں درچک منی سرا کپ انت۔پدا آ بہمنتگ بوت ءُ چہ گریشگ ءَ در شُت۔ (نیم ساہتے ہدا) سرجمیں رجانک آزمانک ھمے داب ءَ انت ۔ گیشتریں آزمانک آزات رجانک ءِ تکنیک ءَ رجینگ بوتگ انت، ھسا لبزانی پُشت ءَ نہ تچیت بلکیں اسل اکّرءَ دیما اتکگیں جوزگ ءُ ھیال ءَ انچیں دابےءَ بلوچی دروشم دنت کہ وت ھمے زبان ءِ ساچشتے سما دنت ۔

آئی ءِ رجانکانی مستریں صفتے ایش انت کہ وانگ ءِ میان ءَ ترا ھچ جاہ اسل ٹیکسٹ ءِ لوٹ نہ بیت ۔ھواریں دروشم ءَ ’’کرپدانک ’’بلوچی رجانکی لبزانک ءِ بندپتر ءَ یک ارزشتی ئیں گیشی یے کہ ھمیشی ءِ پارست ءَ بلوچی ءِ وانوک بازیں نامداریں کارست ءُ آیانی اہمیں آزمانکاں وتی جندءِ زبان ءَ ونت کن انت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

روکپتی بلوچستان ءَ شانزدہ سال ءَ پد گوستگیں روچ ءَ بم زندان ءَ چار بندیگیں بلوچ یل کنگ بیتگ اَنت-

یل بیتگیں مردمانی پجار گلداد شاہ بخش، خدارحن ریگی، عبدل شاہ بخش ءُ محمد عمر شاہ بخش ءُ اشانی ھواری ءَ دگہ یکے بندیگ بیتگ کہ آئی ءِ نام وحید حسن زئی ءِ نام ءَ بیتگ-

ھالانی تہ ءَ گوشگ بیتگ کہ اے چاریں مردمانی سر ءَ بھتام بیتگ کہ ھشت ایرانی لشکر ءِ کوش ءَ سال ایرانی ھشتاد ءُ پنچ ءَ چاہ احمد شھرستان خاش ءَ دزگیر بیتگ اَنت-

اے ھر چاریں مردم ھر وھد ءَ وتی سر ءَ جتگیں بھتام اش رد کنان کرتگ ءُ گوستگیں روچ ءَ یل کنگ بیتگ اَنت ءُ اشانی ھواری ءَ گرگ بیتگیں وحید حسن زئی ایرانی سال نود ءُ چار ءَ بم ءِ زندان ءَ ناگمانی کشگ بیتگ –

اے درگت ءَ اے گوشگ نہ بیتگ کہ اے مردمانی یل کنگ ءَ چنکس زر ءُ ملام پہ زمانتی دیگ بیتگ –

ھالانی تہ ءَ گوشگ بیتگ کپ ات مردم دو ٹولیانء میان ءَ ازبستگان ءَ ھشت ایرانی لشکر ءِ کوش ءَ گرگ بیتگ اَنت –

سول سوسائٹی تربت ءِ کنوینئر گلزار دوست پنجگور شھری ھنداں سر بوتگ، بونستان ءِ ھند ءَ سول سوسائٹی ، سیاسی ءُ چاگردی راھشون، ھک دے تھریک، زالبول ءُ چُکاں ءَ ھوار دگہ شھریاں گوں جوانیں وڑے ءَ وش آتک کتگ ءُ روانک ءِ دروشم ءَ گلزار دوست کاروان سی پیک دگ سر ءَ وھدے چتکان ھند ءَ سر بوتگ ءُ مچی ءِ دروشم ءَ جوڑ بوتگ-

اے وھد ءَ گلزار دوست ءِ وش آتکی ءَ ، یعقوب جوسکی ، میر غلام جان، آغا شاہ حسین ، ملا فرہاد، صمد رھچار ،ماہ جبین، مائل، یونس بلوچ ءُ دگراں تران کتگ-

مچی ءَ ساڑی ئیں مردماں گْوشتگ کہ یک نیمگے ورناہ بیگواہ کنگ بوگ ءَ اَنت دومی نیمگ ءَ منشیات ءَ چہ ورناھانی پدریچ ءَ تباہ کنگ ءَ اَنت-

گلزار دوست ءَ تران کنان ءَ گْوشتگ کہ پنجگور ءِ سول سوسائٹی ، راج، سیاسی ءُ چاگردی راھشون، ھک دے تھریک، زالبول ءُ دگہ ھیال لیکھی مردمانی منت ءَ گراں کہ آیاں پنجگور سر بوگ ءَ وش آتک کتگ ءُ ھوسلہ داتگ-

گلزار دوست ءَ وتی تران تہ ءَ گْوشتگ منی تربت ءَ چہ شال ءَ پیادگ روانک ءِ مول ءُ مراد سرجمیں بیگواھیں مردمانی پہ سلامتی دراھگ، منشیات ءِ ھلاس کنگ ، ایف سی ءَ بلوچستان ءَ میتگانی تہ ءَ درکنگ ھوار اِنت-

آئی ءَ گْوشتگ کہ اھساس انسان ءَ شریں وڑے ءَ واب نیل اِیت مارا وتی راج ھدمت ءُ ھرچ گام ءَ ھمراھداری کنگی اِنت درستاں چہ مستریں جیڑہ بیگواھیں مردمانی ئیگ اِنت، بیگواھیں مردمانی سلامتی دراھگ اِنت ، دومی جیڑہ منشیات اِنت کہ آ چو شومُک وڑ ءَ اِنت سر ءِ بازار بھا بوگ ءَ اِنت اِش بند کنگ بہ بیت یک جیڑھے ایف سی اِنت ھر میتگ ءُ بازار ، وانگجاھانی چتاں ساڑی اَنت ءُ مردمانی زمین دستیگ کنگ ءَ اَنت چریشی ءِ سبب ءَ زالبولاں نگیگی ءِ دیمپانی اِنت-

اے لوگ ءِ جاوراں بہ چار اِت آئی ءِ چُک ءُ برات بیگواہ ءَ اَنت، شال روگ ءَ نندانک ءَ ھمراھداری بہ کن اِت –

بیگواھیں مردمانی یل کنائینگ تاں جُھد برجاہ بیت، دیمونی دیگ ءِ وھد اَتکگ- عید واست ءَ دیمونی دیگی اِنت، ایف سی ءَ بلوچستان ءَ چہ درکنگی اِنت، منشیات ءِ ھلاس کنگ اِنت گُڑا جُھد الّمی اِنت-

بلوچستان ءِ دمگ ھزدار ءَ ایم فل ءِ نودربر حفیظ بلوچ ءِ زورانسری آوار جنی ءُ اسلام آباد ءَ بلوچ نودربرانی گوم ءَ اسلام آباد پولیس ءِ رویش ءِ بگیری ءَ مروچی بلوچستان ءِ جتا جتائیں دمگاں بلوچستان نیشنل پاٹی ءُ بلوچ نودربرانء نیمگ ءَ زھرشانی کنگ بوتگ –

زھرشانی بلوچستان ءِ دمگ ھزدار، کوہلو، دالبندین ءُ پسنی ءَ ھوار دگہ دمگاں کنگ بوتگ –

زھرشانی ءَ نودربراں بینرز دست ءَ بوتگ کہ آھانی سر ءَ حفیظ بلوچ ءِ یل کنگے لوٹ ءُ اسلام آباد پولیس ءِ بگیری ءَ نارہ نبشتہ بوتگ انت –

زھرشانی کنوکاں تران کنان ءَ گوشتگ کہ ریاست ءُ آئی ءِ ھاکم نہ لوٹ انت کہ بلوچ پشتون ءُ سندی راج بوانیت ءُ دیمروئی بہ کنت ھمے سوب ءَ آھانی سر ءَ زوراکی کنگ بیت ءُ آ زورانسری آوار جنگ ءُ بیگواہ کنگ بنت آھانی سر ءَ سنگینیں ارزی نبشتہ کنگ بیت انت –

آھانی گوشگ ات کہ ھر ملک ءُ چاگرد ءِ مھلوک ءَ اے ھک ھست انت کہ وتی ھکانی ھاتر ءَ زھرشانی بہ کنت بلے ھستیں وھدے سرکار ملک ءَ ڈنگانی وڈا چلائینگ لوٹیت –

ترانکاراں لوٹ کتگ نودربر حفیظ بلوچ، بارکھان ءَ آوار جنگ بوتگیں سئیں چاگردی باسک ءُ دگہ بیگواھیں مردم یل کنگ بہ بنت – وھدیکہ آھاں اے لوٹ ھم کتگ کہ اسلام آباد بلوچ نودربرانی سر ءَ لٹ شاپی کنوکیں پولیس اپسر ءُ کارمندانی بگیری ءَ کانودی کاروائی کنگ بہ بیت –

زھرشانی کنوکانی گوشگ ات کہ بلوچستان زورانسری آوار جنی لڑ ءَ دیر انت آئی ءِ بندات چہ سردار عطاءاللہ مینگل ءِ ورناھیں پرزند اسد مینگل ءَ چہ بوتگ کہ اے درچ تنی وھدی ھلاس نہ بوتگ، سعداللہ بلوچ، چنگیز بلوچ ءُ غفور بلوچ ءَ بگر تاں حفیظ بلوچ ءَ ھنگت برجاہ انت – گوستگیں ماہ ءَ مئے وانندھیں ورنا اسکول ءَ چہ آوار جتگ ءُ بیگواہ کتگ، وھدیکہ اسلام آباد ءَ بلوچ نودربراں زورانسری آوار جنی ءِ بگیری ءَ زھرشانی کتگ گڈا آھانی سر ءَ لٹ شاپی کنگ بوتگ آ نودربرانی سر ءَ ارزی ھم نبشتہ کنگ بوتگ – چوش کہ ریاست مات ءِ بستار ءَ داریت بلے اے چونیں مات ءِ وتی زھگانی گوم ءَ زیادتی کنگ ءَ انت ما تھنا بلوچستان ءِ زورانسری اوارجنیانی بگیری ءَ نان بلکہ سرجمیں پاکستان ءِ زورانسری آوارجنیانی بگیری ءَ زھرشانی کنگ ءَ انت ءُ مئے زالبول ھم اسلام آباد ءَ زھرشانی انت ھما زالبول کہ آھانی گشان کس ءَ نہ دیستگاں مروچی اسلام آباد ءِ دگانی سر ءَ در پہ در انت –

آھانی گوشگ ات کہ ما ھمے پھمیں کہ شوربندی ءِ رِد ءَ ونندھیں نودربر زورانسری آوار جنگ ءُ بیگواہ کنگ بوھگ ءَ انت – پیسر ءَ مار ءَ ھمے تژن جنگ بوتگ کہ بلوچ چہ وانگ ءُ زانگ ءَ دور انت وھدیکہ نوں مئے ورنا زانشت نیمگ ءَ آھگ انت گڈا آوار جنگ ءُ بیگواہ کنگ بوھگ ءَ انت –

آھاں گوشتگ کہ مئے لوٹ ھمیش انت کہ اگاں اے بیگواھیں بلوچانی سر ءَ الزام ءِ ھست گڈا آمیدگس ءَ آرگ بہ بنت ءُ سزا دئیگ بہ بنت ھر وڈیں سزائے دیگ بنت مار ءَ ھچ اعتراض نیست بلے اے وڈ زورانسری اوار جنگ ءُ بیگواہ کنگ ھچ وڈ ءَ کبول نہ انت –