بلوچستان ءَ مستونگ ءِ دمگ ءَ سلاہ بنداں پاکستانی لشکر نشانگ کتگ۔ اُرش ءَ چہ رند ءَ دمگ ءَ بالی گرابانی روگ ءُ آیگ برجاہ۔
مستونگ ءِ دمگ ءَ اسپلنجی ءَ گْوستگیں روچ ءَ پاکستانی لشکر ءَ اے دمگ ءَ آپریشن کتگ گوں بازیں کچے دیم ءَ اتکگ ءُ بندات کتگ۔ گْوستگیں شپ ءَ پاکستانی لشکر ءِ کاروان ءَ اسپلنجی ءِ دمگ ءَ مَرو کنڈ ءَ سلاہ بندیں مردماں گوں بازیں کچے ءَ راہ بستگ ءُ اُرش ءِ نشانگ کتگ اَنت۔
مکینوں ءِ دمگ ءِ رد ءَ سکیں تیرگواری ءَ چہ رند بازیں تراک ءِ توار ھم اشکتگ وھدیکہ کدی کدی تیر ءِ توار سلسگ مرچی داں سھب ءَ برجاہ بیتگ وھدیکہ دمگ ءَ بالی گراب ءِ روگ ءُ آیگ برجاہ اِنت۔
اُرش ءِ آسر ءَ پاکستانی لشکر ءَ جانی تاوان ءِ دیم پہ دیم بیگ ءَ پڑ اِتگ دنیگا جارجنوک ءَ اے بابت ءَ سرجمیں سرپدی نہ دات ۔
مذکورہ ءِ دمگ ءَ گْوستگیں روچاں گذشتہ پاکستانی لشکر ءِ کاروان ءَ آئی ای ڈی ءِ اُرش ءَ نشانگ کتگ آئی ءِ زمہ واری بلوچ لبریشن آرمی ءَ من اِتگ وھدیکہ اے دمگ ءَ ایشی ءَ چہ پیسر بلوچ لبریشن آرمی ءِ سرمچارانی ءُ پاکستانی لشکر ءِ میان ءَ داں دیر ءَ جنگ برجاہ بیتگ آئی ءِ آسر ءَ دوئیں نیمگاں جانی تاوان رس اِتگ۔
انوگیں سال ءَ سرجمیں بلوچستان ءَ پاکستانی لشکر ءِ سر ءَ اُرش گیش کنگ بیتگ ۔ یکشمبے ءِ روچ ءَ بلوچ لبریشن آرمی ءَ زامران ءِ دو جتائیں جاھاں پاکستانی لشکر آئی ای ڈی ءِ اُرشاں نشانگ کتگ آئی ءِ آسر ءَ جار جنوک ءَ دو کارند ءِ مرگ ءِ ھال کتگ۔
مرچگیں اُرش ءِ زمہ واری دنیگا کس ءَ نہ من اِتگ۔