بلوچستان ءِ دمگ کلات ءِ ھند چہ شیخڑی، گندہ گین ءَ دو مردم ءِ لاش دزکپتگ اَنت، لیویز رِد ءَ دوئیں مردم تیرگواری کتگ ءُ کُشتگ اَنت-
لیویز ءَ کُشگ بیتگیں مردمانی پجّار سمیع اللہ ء محمد حنیف ءُ بسم اللہ ء غلام سرور ناماں چہ کتگ اَنت، کہ آ مستونگ ءِ دمگ پڑنگ آباد جھمنند گوشگ بیگ ءَ اَنت-
گوستگیں ماہ ءَ بیست نُھ مئی ءَ دی بلوچستان پوسٹ ءَ دمگی اِھوالکار ءَ گْوشتگ کہ دوئیں ورنا مستونگ ءَ چہ کلات ءِ دمگ منگچر ءَ نیمگ ءَ روگ ءَ بیتگ اَنت ھمے میان ءَ پاکستانی پوج ” ایف سی ” ءَ آوار جتگ ءُ وتی ھمراھی ءَ برتگ اَنت-
پاکستان پوج ءِ دست ءَ آوار جنگ ءَ پد دوئیں ورنا دیم ءَ آرگ نہ بیتگ اَنت، اود ءَ مروچی آ پوج نیمگ ءَ کُشگ ءَ پد لاش چگل داتگ اَنت-
مروچی پاکستان پوج ءِ ادارہ آئی ایس پی آر ءَ کلات ءَ دو بلوچ آجوئی لوٹوکانی جنگ ٹاہ داتگ اَت-
لیویز واکدار رِد ءَ اے دوئیں لاش آر ایچ سی منگچر ءَ برگ بیتگ اَنت اود ءَ گیشیں چار ءُ ٹپاس برجاہ ءَ اِنت-