شال بلوچستان ءِ سرکار ءَ بلوچ یکجھتی کمیٹی ءِ رھشون شاھجی سبگت اللہ ءِ بندیگ کنگ ءِ پرمان دگہ سی روچ گیش کتگ ۔
گوستگیں ماہ ءَ 27 مئی 2025 ءَ چہ (محکمہ داخلہ) ءِ نیمگ ءَ شنگ بوتگیں پرمان ءِ رد ءَ مولوی ابدلھک ءِ زھگ شاھجی سبگت اللہ ءَ را سیمی رند ءَ بلوچستان مینٹیننس آپ پبلک آرڈر آرڈیننس ءِ رد ءَ تھری ایم پی او ءِ تک ءَ دزگیر کنگ بیتگ-
پرمان ءِ تہ ءَ گْوشگ بیتگ کہ شاھجی سبگت اللہ ءَ شال ءَ راجمانی ایمنی ءِ واست ءَ ھترہ اِنت ءُ آئی ءِ سر ءَ بھتام اِنت کہ آ لس مھلوک ءَ برانز دیگ ءُ امن ءُ ایمنی ءِ جاور ھالانی ناگیگ کنگ ءَ ھوار اِنت کہ ایشی ءِ سبب زوراکی ءُ سرکاری مال ءُ مڈیانی تاوان ءِ گمان بیتگ۔
اے پرمان ءِ پد ءَ دزگیریں بی وائی سی ءِ باسک ءِ بندیگ جاہ دگہ 30 روچ گیش کنگ بوتگ۔
زانگ بہ بیت کہ اے سال ءِ اپریل ءِ بندات ءَ پاکستانی لشکر ءَ شاھجی سبگت اللہ دزگیر کتگ ءُ ناشناسیں ھندے ءَ برتگ۔ پد ءَ 3MPO ءِ چیر دستی ءَ ھُدا جیل ءَ دیم ءَ آرگ بیتگ۔
ایشانی ھمراھی ءَ بلوچ یکجھتی کمیٹی ءِ سروک ڈاکٹر مھرنگ بلوچ، بیبگر زھری، بیبو بلوچ ءُ گلزادی بلوچ ھم انگت ءَ 3MPO ءِ چیر دستی ءَ پولیس ءِ بندیگی ءَ انت ءُ ایشانی یلہ کنگ ءِ ھاتر ءَ دائر کتگیں بازیں دزبندی آمیدگساں رد کنگ بوتگ اَنت۔
شاھجی سبگت ءِ کھول ءِ گشگ ءِ رد ءَ زندان ءَ دیوان ءِ وھد ءَ آیاں گْوشتگ کہ سرکار ءَ آھاں شرتی یلہ کنگ ءِ پیشکش کتگ کہ آ دیمتر ءَ سیاسی کاراں، دھرنا ءُ زھرشانی ءَ چہ دست کش بہ بنت کہ آیاں اے شرت رد کتگ۔
بی وائی سی ءَ بلوچستان ھائیکورٹ ءِ سر ءَ پارٹی راھشونانی دزگیری ءُ ناجائزیں بندیگ کنگ ءِ ھک ءَ پیسلہ دیگ ءِ سر ءَ ایراد گپتگ ءُ گُشتگ کہ بلوچستان ءِ آمیدگس سرکار ءِ دیم ءَ سرجم ءَ بے وس انت ۔ ھکومت 3MPO ءَ را سیاسی آسرال ءِ رنگ ءَ کارمرز کنگ ءَ اِنت ءُ آمیدگسی انساپ ءِ رسگ ءَ ناکام اِنت۔
گوستگیں ماہ ءَ بلوچستان ھائی کورٹ ءِ دو باسکی بینچ ءَ دزگیریں بی وائی سی ءِ سروکانی دزبندی ءِ سر ءَ اے کیس رد کتگ ات کہ ایشی ءِ سر ءَ بی وائی سی ءَ گشتگ ات کہ مئے گمان انت کہ اے آمیدگس ءِ زمہ واری انت کہ آ آئین ءُ کانون ءِ رد ءَ پیسلہ بہ کنت ءُ ھچ وڑیں زور ءُ لالچ ءِ رد ءَ بہ کنت۔ راج ءَ را دیم ءَ برگ ءَ بژن اِنت کہ اے بنچ ءِ دوئیں کازی آں آمیدگد ءِ رھبند ءُ میار بلوچستان ءِ رازداریں ادارہ، پوج ءُ وتگڑیں ھکومت ءِ دست ءَ میاریگ اَنت۔”