ھزدار ءَ بلوچ یکجھتی کمیٹی ءِ نیمگ ءَ زھرشانی روانک، پوج ءِ انگر، راہ ءُ نیٹ بند کنگ بوتگ انت 

بی وائی سی ءِ نیمگ ءَ بلوچستان ءِ جتا جتائیں ھند ءُ دمگاں زھرشانی ءُ روانکانی درچ برجاہ انت – جھالاوان کمیٹی ءِ نیمگ ءَ درکانودی کُشت ءُ کوش، زورانسری آوارجنیانی تہ ءَ گیشی ءُ ڈاکٹر ماھرنگ بلوچ ءَ ھوار ایندگہ رھشونانی درکانودی بندیگی بگیری ءَ مروچی ھزدار ءَ روانک ءِ کشگ بوتگ –

ھزدار زھرشانی ءَ زالبولاں بھر زرتگ کہ اودا ایپ سی ءُ پولیس کارمنداں دگ بند کُتگ ءُ درنگاز کنوک دیم روگ ءَ نہ اشتگ انت بلے پدا ھم زالبولاں گھگیری کنان ءَ وت ءَ زھرشانی جاہ ءَ سر کُتگ گڈا ھمودا پوج ءَ انگر کُتگ انت –

بلوچ یکجھتی کمیٹی ءِ روانک ءِ دارگ ءِ ھاتر ءَ پاکستانی پوج، زالبولیں پولیس ءُ مزنیں کچے ءَ پولیس آرگ بوتگ –

ھزدار روانک ءَ درنگاز کنوکانی گوشگ ات کہ زھرشانی روانک ءِ دارگ ءِ ھاتر ءَ دوشیگینیں نیٹ بند کنگ بوتگ ءُ روانک ءِ راہ ءَ کارمند اوشتارینگ بوتگ انت ھچ کس رؤگ ءُ آیگ ءَ نہ اشتگ ءُ بازار ءِ دگ بندی برجاہ انت –

آیاں گوشتگ کہ ھنچوش سما بیت کہ مارا ترسینوک چہ مئے ایمنیں زھرشانیاں تُرسگ ءَ انت –

زانگ بہ بیت بلوچ یکجھتی کمیٹی ءِ نیمگ ءَ رھشونانی دزگیری ءُ آیاں یل نہ کنگ ءَ ھوار بلوچستان ءَ ریاست ءِ زوراکی ءُ زورانسری آوار جنی ءِ بگیری ءَ جتا جتائیں ھند ءُ دمگاں زھرشانیانی درچ برجاہ انت –

گل ءِ رد ءَ اے زھرشانی بی وائی سی ءِ ھما شاھگانیں زھرشانیانی بھر انت کہ آئی ءِ مول بلوچستان ءَ برجاھیں ریاستی زوراکی ءَ ھوار زورانسری آوار جنی ءُ درکانودی کارانی بگیری ءَ مھلوک ءِ سرپد کنگ انت – چدوپیسر تربت، مستونگ، ھاران، نوشکی، شال، پنجگور دالبندین ءُ ھب چوکی ءَ ھمے دابیں زھرشانی ءُ روانک کشگ بوتگ انت -.

بی وائی سی ءَ اے گپ پدر کتگ کہ آیانی پُرایمنیں زھرشانی ءِ زرمبش تاں ھما وھد ءَ برجاہ بیت تاکہ زورانسری آوار جنگ بوتگیں مردم یل کنگ نہ بوتگ انت – دزگیریں رھشون انساپ دیگ نہ بنت ءُ بلوچستان ءَ ریاستی ادارھانی زوراکی ھلاس کنگ نہ بنت –