پوجی جارکش ءِ بھتام: بی وائی سی ءُ ڈاکٹر ماھرنگ ءَ بدنام کنگ لوٹ ایت، یا بلوچستان انسانی ھکانی لگتمالی ءَ چیردیگ؟- بی وائی سی

بلوچ یکجھتی کمیٹی ءِ بنجاھی جارکش ءَ وتی شنگ کرتگیں درشان ءِ تہ ءَ گوشتگ کہ مروچی پاکستان آرمی ءِ نیمگ ءَ پریس کانفرنس کنگ بوتگ بلوچ یکجھتی کمیٹی ءُ آئی ءِ رھشون ڈاکٹر ماھرنگ بلوچ ءِ سرا ھمے بھتام جنگ بوتگ کہ ڈاکٹر ماھرنگ ءُ بی وائی سی ناشرکار ءُ درملکی ایجنڈھانی سرا کار کنگ ءَ انت – اے بھتام سرا سر رد انت ءُ کم شرپی انت – چریشی ءَ ھمے پدر بیت ریاست یکرندے پدا بلوچستان ءَ برجاھیں انسانی ھکانی لگتمالی سرا نادلگوش کنگ ءِ ھاتر ءَ دروگ ءِ سھارا ءَ زورگ ءَ انت –

آئی ءَ گوشتگ کہ بی وائی سی سلاہ بند نہ انت ، ایمن ءُ سیاسی ءُ انسانی ھکانی گل یے، آئی ءِ بنھشت بلوچستان ءِ مھلوک ءِ کانودی، شھری ءُ انسانی ھکانی پھریزگ ءَ پہ ایرکنگ بوتگ – ڈاکٹر ماھرنگ بلوچ میان استمان ءِ ھما انسانی ھکانی باسکانی لڑ ءَ ھوار انت کہ آئی ءِ زھرشانی ءِ سپر بے پرشت ءُ پروش ءُ کانودی گھگیری ءِ رھبندانی رِد ءَ انت – آئی ءِ جھد گوں دلیری، مزن مردی ءُ رھبنداں سمبھ اِتگ کہ ریاستی ادارہ اشی ءَ درگان درگان کنگ لوٹ انت –

جارکش ءَ گوشتگ کہ اے نوکیں گپ ءِ نہ ایں ریاستی ادارھاں گوست ءَ ھم بلوچ ءِ ایمنیں توار ءِ ایرموش کنگ ءِ ھاتر ءَ کرد ایرجتگ، دروگیں ارزی ءُ رسانکانی سھارگ زرتگ – اے درسیں کارانی کنگ ءَ ابید ھم ریاست ءَ روچ ءِ مروچی ھچ چشیں گواہ ءِ امیدگس یا راج ءِ دیم ءَ نیاؤراتگ – مروچی بھتام ھم بے شاھد ءَ ھالی انت راستی ءَ اے ریاست ءِ کارشونیانی درچ ءِ کہ بگیری داروکاں کتکار کنگ ءِ جھد ءَ کنت –

آئی ءَ گوشتگ کہ پوج ءِ ھنوگیں کانفرنس بس یک درشان ءِ نہ انت بلکیں ھمے چیز ءَ پیش دارگ ءَ انت بی وائی سی ءِ ایمنیں جھد ایوک ءَ بلوچستان ءَ ناں بلکیں سرجمیں جھان ءَ شاھگان بوتگ – باید وا ھمیش ات کہ ریاست بلوچستان ءِ تہ ءَ انسانی ھکانی لگتمالی، زورانسری آوار جنی ءُ درکانودی کُشت ءُ کوشانی اھتساب ءَ بہ کنت بلے ھنگت نشتگ ءُ پرپیگنڈہ ءُ کرداں ایرجنگ ءَ انت –

جارکش ءَ گوشتگ کہ ما پاکستانی سرکار، آمیدگس ءُ پوجی ادارھاں چہ ھمے لوٹ کن ایں کہ اے بدنیتی زوت دارگ بہ بیت ءُ بلوچستان ءَ انسانی ھکانی لگتمالی ءِ ھلاس کنگ ءِ ھاتر ءَ گوں سنگینی ءُ میان استمانی کانودانی رِد ءَ گامگیج زورگ بہ بیت – ما جھان ءِ بے جانبدار ءُ انسانی ھکانی گلاں لوٹ کن ایں کہ آ بی وائی سی ءُ ڈاکٹر ماھرنگ بلوچ ءِ سرا جنگ بوتگیں بھتامانی بے جانبدار ءُ میان استمانی تکاں منّ اِتگیں وڈ ءُ ڈول ءَ پٹ ءُ پول بہ کن انت – اگاں آ کتکار بوت گڈا ما میان استمانی کانودانی رِد ءَ احتساب ءَ تیار ایں بلے اگاں اے بھتام دروگ بوت انت گڈا مئے اے ھک بیت کہ ما پوج ءُ ریاستی ادارھاں ھمے میان استمانی کانودانی رِد ءَ کانود ءِ تھتگ ءَ بیار ایں –

آئی ءَ گوشتگ کہ اے وھدی ڈاکٹر ماھرنگ ءُ بی وائی سی ءِ ایندگہ رھشوناں دو ماہ ءَ گیش ایں کہ تھری ایم پی او ءِ وڈیں درکانودی ءِ رِد ءَ بندیگ انت – آمیدگسی کارانی بوگ ءَ ابید ھم ریاست ھچ وڈیں شاھد دات کرت کنگ ءَ نہ ایں بلے دومی نیمگ ءَ رسانکدراں بدنیتی ءُ ٹوپیں گپ جنگ بوگ ءَ انت –

جارکش ءَ گوشتگ کہ بی وائی سی ھچ وڈیں تشدد ءَ نہ من ایت ءُ آئی ءَ ایر جنت – ھزدار ءَ ھنو بوتگیں بمب تراک ءِ وئیل ءَ زھگانی مرگ ءِ ھال آیگ ءَ انت، اشی ءِ سرجمی ءَ پٹ ءُ پول المی ایں اگاں اے راست بوت کہ ھئو اے وئیل ءَ بے گناھیں زھگ مرتگ انت گڈا ما اے وئیل ءَ ترندی ءَ گوں ایر جن ایں – بے گناھیں مردمانی جان، ھاسکر زھگانی کُوش نا اخلاقی ءُ ناکہ کانود اشی ءِ موکل دنت –

مئے ایمنیں جھد ھکانی ھاتر ءَ انت ھچ وڈیں رنگ ءُ نسل یا راجے ءَ گوں بندوک نہ انت – ھما ریاست کہ وتی مردمانی ایمنیں توار ءِ ایرموش کنگ ءِ دمب ءَ انت راستی ءَ آ باندات ءِ زمیر ءَ گُٹ ءَ.گرگ ءِ جھد ءَ کنگ ءَ انت –

جارکش ءَ گوشتگ کی ما اقوام متھدہ، میان استمانی ھکانی گل، سپارتی مشنز ءَ گوں لوٹ کن ایں کہ آ پاکستان ءِ بگیری ءَ سنگینی ءَ گوں گامگیج بہ زور ایت – اے بھتام ایوک ءَ یک مردمے ءَ پہ ترسناک نہ انت بلکہ پاکستان ءِ تہ ءَ جمھوری آزاتی، آزاتی ءَ گوں وتی ھیالانی درشان، ایمنیں زھرشانیانی سرا اُرش یے –

بلوچ یکجھتی کمیٹی ءِ بنجاھی جارکش ءَ گڈسر ءَ وتی درشان ءِ تہ ءَ گوشتگ کہ بی وائی سی ءِ توار ایرموش کنگ نہ بیت مئے زندگ دلی، مئے جھد ءُ مردمانی گوم ءَ مئے ھمگرنچی مدامی برجاہ مان ایت –