آپریشن ھیروپ ءِ ھیلکاری: دگہ ھپت اُرشانی زمہ واری منّ ایں – بی ایل اے

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ وتی شنگ کرتگیں درشان ءِ تہ ءَ گوشتگ کہ سرمچاراں اورناچ، پنجگور، کلات، نوشکی ءُ سبی ءَ اُرش کتگ، کہ آیانی تہ ءَ بنجاھی شھدگانی بندگ، زورگریں پوج ءِ سرا آئی ای ڈی ءُ دگہ سلاھاں گوں ارش، کمکارانی کوش ءُ پانگسانی دستیگی ھوار بوتگ انت –

جارکش ءَ سرجمیں ھال داتگ ءُ گوشتگ کہ اے کار بلوچ لبریشن آرمی ءِ آپریشن ھیروپ ءِ دومی بھر ءِ ھیلکاریانی بھر بوتگ انت کہ سرجمی ءَ پنجاہ ءُ ھشت جاھاں ھپتاد ءُ ھشت کار کتگ انت –

جیئند بلوچ ءِ رِد ءَ بلوچ لبریشن آرمی ءِ سرمچاراں شمبے ءِ شپ ءَ ھزدار ءِ دمگ اورناچ کراس ءَ شھدگ دو اداراں گیش بند کتگ ءُ وتی کنٹرول ءَ کتگ ھمے میان ءَ پٹ ءُ پول ھم کتگ وھدیکہ بلوچ راجی مڈیانی لٹ ءُ پُل ءَ ھواریں دو گاڑی نشانگ کتگ انت سرمچاراں لیویز ءِ یک پانگسے ءِ سرا کبزہ کنگ ءَ پد مانداشتگ –

جارکش ءَ گوشتگ کہ بی ایل اے ءِ سرمچاراں یکشمبے ءِ شپ ءَ پنجگور نوک آباد ءَ زورگریں پوج ءِ پانگسے ءِ سرا وتکاریں سلاھاں گوں اُرش کتگ وھدیکہ دژمن پوج ءِ سرا راکٹ لانچر ءُ گرنیڈ لانچر آس داتگ ـ بیست ءُ پنچ منٹ ءَ گیش برجاھیں اے اُرش ءَ زورگریں پوج ءِ کم چہ کم دو کارمند مُرتگ ءُ پانچ زدگ بوتگ انت –

آئی ءَ گوشتگ کہ یک دگہ کار ءِ سرمچاراں پنجگور ءِ دمگ پروم جائین ءَ زورگریں پاکستانی پوج ءِ نیمگ ءَ کل کُتگیں کیمرہ دستیگ کتگ انت –

جیئند بلوچ ءِ رِد ءَ سرمچاراں کلات ءِ دمگ گراپ ءَ زورگریں پاکستانی پوج ءِ بمب ڈسپوزل اسکواڈ ءِ کارمند ھما وھد ءَ آئی ای ڈی نشانگ کتگ انت وھدیکہ آ کلئرنس کار ءَ دلگوش بوتگ انت – تراک ءَ دو دژمن کارمند مرتگ انت –

آئی ءِ گوشگ ات کہ سرمچاراں نوشکی ءِ دمگ گلنگور ءَ زورگریں پاکستانی چیریں ادارھانء چار کارمند معین ء غلام مصطفی جھمنند پاکپتن، حذیفہ ء محمد لطیف جھمنند پاکپتن، عمران علی ء مقصود احمد ءُ عرفان علی ء مقصود احمد جھمنند رحیم یار خان کُشتگ انت –

جیئند بلوچ ءِ رِد ءَ اے کارمند نُھ مئی ءَ بی ایل اے ءِ سرمچاراں نوشکی ءِ دمگ احمد وال ءَ دگ بندی ءِ وھد ءَ دزگیر کتگ انت کہ جست ءُ پُرس ءِ وھد ءَ آیاں دپ ءِ وت منّ اِتگ کہ آیاں وتی دروشم مٹ کتگ ءُ پہ پاکستانی پوج ءُ چیریں ادارھانی واست ءَ کار ءَ بوتگ انت –

جارکش ءَ گوشتگ کہ بی ایل اے ءِ سرمچاراں سبی ءَ ریلوے ءِ سرا برجاھیں زورگریں پوج ءِ پانگس ءِ سرا دزبمب اُرش ءِ کتگ –

آئی ءَ گوشتگ کہ سرمچاراں کچھی ءِ دمگ مٹھڑی ءَ ھم زورگریں پاکستانی پوج ءِ پانگسے ءِ سرا اُرش کتگ چریشی ءَ دژمن ءِ کم چہ کم سَے کارمند زدگ بوتگ انت –

جارکش جیئند بلوچ ءَ وتی درشان ءِ گڈسر ءَ گوشتگ کہ اے اُرش زورگریں ریاست ءِ بگیری ءَ بلوچ لبریشن آرمی ءِ برجاھیں جنگی کارشون آپریشن ھیروپ ءِ درچ یے، بی ایل اے اے گپ ءَ تچک کنت کہ مئے اے دابیں ارش تاں ھما وھد ءَ برجاہ مان انت تانکہ ما راجی آجوئی ءَ نہ گر ایں –