نود ھورک اَنت میتگ ءِ رنگ
نبشتہ کار: مَرز بوم بلوچ
دی بلوچستان پوسٹ
زمین ایوک ءَ مردماں ایر نہ بارت، زمین ایوک ءَ بنی آدم ءَ وتی دل بند ءَ جاگہ نہ دنت بلکیں آئی ءَ چہ پیسر زمین وتی ھاتر ءَ بنی آدم ودی کنت آئی ءَ را پراہ ءُ شاھگانیں پَٹ ءُ میدانے دنت آئی ءِ لنکوکاں چہ درکسانی ءَ گپت ءُ وتی اندر ءِ رستگیں شھدیں زبان ءَ ھیل دنت بلکیں آئی ءَ را ھمے زبان ءِ ھوری ءَ یک پجارے بکش اِیت داں آ پجار ءَ پد ءَ وتی توک ءَ جاگہ دات بہ کنت۔
دگنیا ءِ تہ ءَ بازیں ڈیھ ھست اِنت ھمے ڈیھاں چہ یکے بلوچستان اِنت، ھمے بلوچستان ءِ زمین ءَ ودی بیتگیں ھما ورنا کہ آ مدام گوں وتی کسانیں بالاد ءُ پُرمڑاھیں بچکندگاں شال ءِ دانشگاہ (یونیورسٹی آف بلوچستان) ءَ گندگ بوت، آئی ءِ کسانیں بالاد ءُ پُرمڑاھیں بچکندگانی تہ ءَ پہ زمین ءَ اَجبیں مھرے مان اَت آئی ءَ بلوچستان ءِ درچک ءُ دار، کوہ ءُ کوچگ، دلوت، لد، زیبائی، بے وسی، زوراکی ءُ بلوچ ءِ چُکچینی وتی بالاد ءُ بچکندگانی تہ ءَ جاگہ داتگ اِت اَنت مدام آئی ءَ ھمے بنگپانی سر ءَ نبشتہ کُت، گال پِر بست شَیر پِر بست ءُ درشان ئِے کُت آ ورنا ءَ کے پجاہ بیار اِیت آئی ءَ را سرجمیں بلوچستان پجاہ کار اِیت کہ آ وتی مھکیں مات (بلوچستان)، ھاک، بلوچی زبان ءُ آئی ءَ چہ بندوکیں ھمک چیزانی شیدائی اَت۔ آئی ءِ پجار آئی ءِ شَیر اَنت انچوش کہ جاگھے گُش اِیت
یک روچے نبیل نود ءَ مھرانی تہ ءَ ماراں
یک روچے نبیل نود ءَ آدینک ءِ تہ ءَ چاراں
نود مھروانیں ورنایے اَت، یک تچک ءُ تواناھیں مردے اَت آ بلوچے اَت، بلکیں آ چہ ازل ءَ بلوچے اَت، آئی ءَ بلوچی سِکین وتی ھما درکسانی ءَ کوانزگ ءِ توک ءَ سرجاہ چہ پُریں ھاک در بُرتگ اَت، آئی ءَ گلامی ءُ ایردستی مارشت چہ وتی بندوکی بندر ءَ ھیل کتگ اَت آوتی زمین ءِ ھاک ءُ آئی ءِ بوہ ءُ باس ءَ چہ شری آشنا اَت ھمے ھاتر ءَ نود ءَ مدام گُلامی، ایردستی ءُ اُستانی زوراکی ءَ را شَیری دروشم ءَ وتی راج ءِ دیم ءَ آؤرت ءُ درنگاز کُت چوناھی ءَ اگاں گُلامی،ایردستیں ءُ اُستان زوراکی ءِ تہ ءَ وتارا پہ راج ءِ ھاتر ءَ زندگ دارگ ءُ راج ءِ سکی گم ءُ آئی ءِ سر ءَ بیوکیں زوراکی ءَ یک آدینکے دروشم ءَ وتی تہ ءَ چارگ ءُ جاگہ دیگ باز ڈُکی کارے بلے نود چہ اے درستیں چیزاں شَر سرپد اَت ءُ باج ئِے بُرتگ اَت، آ سرپد اَت کہ اے راہ ءِ مساپر آں زورگیریں اُستان داں دیر ءَ جلگ ءَ نیل اِیت، ھمے ھاتر ءَ زورگیریں اُستان چہ نود ترس اِت اَنت آئی ءِ توانمندی ءَ بیمے آؤرت ءُ نود ءِ زور آوارجنی ءَ مھتل نہ بوت۔
من ءَ یات اِنت شال ءِ سارتیں مولماں وھدے بلوچستان یونیورسٹی ءِ نودربر سھیل بلوچ ءُ پسی بلوچ ءِ زورانسری ءُ آوارجنی ءِ بگیری ءَ یونیورسٹی دیم ءَ زھرشانی ننداک ءَ جمبوریں آس ءِ کش ءَ نود مدام گوں سنگتان نشتگ اَت بچکندگ ءَ اَت مسکر کنگ ءَ اَت وتی شیر ءُ شائری گوں دیوان ئِے بز کتگ اَت برے برے دانشگاہ ءِ جنک نودربراں نود توار کُت کہ بیا مئے ھاتر ءَ شیرے بْوان نود مدام جاڑیگ اَت ڈولے ناں ڈولے ءَ بلوچی زبان ءِ سر ءَ کار کنگ ءَ اَت دیوان دیگ ءَ سر ءُ سوج کنگ ءَ اَت لبزانک بارو ءَ نوک باھندیں نودربراں سرپدی دیگ ءَ اَت آزمانک، شَیر، گدار رنگے ناں رنگے ءَ بلوچی زبان ءِ ھزمت ءَ گُلاھیش اَت۔ نود اے کسانیں وھد ءِ تہ ءَ بلاھیں نامے ءِ واھند اَت نود ءَ ھما رنگ ءَ شَیر پِربستگ کہ ھستیں وھد ءَ بلوچستان سرزمیں ءَ نوک باھندیں ورنا چُشیں شیر پِر بندگ باز کم گندگ کیت اگاں نود ءَ مارگ لوٹ اِت گراں آئی ءِ ھاتر ءَ نود ءِ شَیرانی تہ ءَ ایر روگی لوٹ اِیت انچوش کہ جاگھے ءَ نود گُش اِیت۔
تو منی مھرے سلاماں بر ھما ھاک ءَ بدے
کہ ھمود ءَ سمو ءِ ھونانی وشبو رتکگاں
نود ءِ شَیرانی تہ ءَ نازینک، آشوب، بگیری، مھری ءُ اے دگہ بنگپانی سر ءَ جتا جتائیں رنگ ءُ دروشم گندگ ءَ کیت نود منیر مومن ءِ بلاھیں منوگرے اَت بلکیں آ منیر ءِ ازم ءَ آشکے اَت، منیر ءِ گالانی تہ ءَ نود وتارا شوھاز ءَ اَت ءُ وتی پربندانی تہ ءَ بلوچ، بلوچستان ءُ بلوچی زبان ءَ پَرّیچان اَت نود ءِ زورانسری ءُ آوارجنی پہ بلوچی زبان ءُ بلوچستان ءِ ھاتر ءَ چہ یک مزنیں تاوانے ءَ کمتر نہ اِنت چے ءَ کہ داں ھما وھد ءَ دگنیا ءِ سر ءَ ھما ڈیھ پشت کپ اَنت دانکہ ھما ڈیھی مردماں وتی ماتی زبان رکینتگ نود ھمے جُھد ءَ پہ مھکمی کنگ ءَ اَت ھمے کاران گوں گیروشگ اَت نود ءِ ڈولیں ورنایانی زورانسری بیگواھی راج ءِ آواری ءَ زبان ءَ گیش تاوان دنت بلے من سرپداں کہ نود تھاریں کوٹی ءَ مھتل نہ بیت بلکیں ھما تھاریں کوٹی ءَ نود گوں نُگرھیں زبان ءَ رژنا کتگ، نود تو سرپدئے بے ترا میتگ ءِ رنگ ھورک اَنت واتر کن میتگ ءِ جلوانکی ءُ زیبائی تو گوں وت ءَ بُرتگ واتر کن کہ اے میتگ تی ھُنرانی وداریگ اِنت انچوشکہ جاگھے تو وت گُشتگ۔
چہ تو رند نود ھورک بنت رنگ میتگ ءِ
کے بکنت تئی وڑ ءَ چُش ھُنر میتگ ءَ
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت –