عید ءِ روچ ءَ لکانی مھلوک دگانی سر ءَ دراتکگ زُلم ءُ زورکیانی نزام ءِ ھلاپ ءَ زھر ءِ درشان کتگ- بی وائی سی

مھلوک ءِ مُچی ءَ اے تچک کتگ کہ زوراکی ءِ درچ ءَ مھلوک ءِ زرمبشت دارگ نہ بیت اِنت-

بلوچ یکجھتی کمیٹی ءَ وتی شنگ کتگیں درشان ءَ گوشتگ گل ءِ جار ءِ پد ءَ گل بنجاھی سروکانی دزگیری ءُ ریاست ءِ پاکستان ءِ زوراکی ءُ بربرانکی ءِ ھلاپ ءَ عید ءِ روچ ءَ سرجمیں بلوچستان ءَ لَکانی مھلوک دگانی سر ءَ درکپتگ ریاستی زوراکی ءُ بربرانکی ءِ سر ءَ ھستیں نزام ءِ ھلاپ ءَ زھر ءِ درشان انت-

آئی ءَ گوشتگ عید ءِ بنداتی روچ ءُ دومی روچ ءَ نوشکی، ھاران، واشک، دالبندین ، چارسر، یک مچ، ماشکیل، زاھدان، نوکنڈی، چاگی، امین آباد ، تپتان، پنجگور،تربت،تمپ،مند، پانوان، بلیدہ، بلنگور، ھب، ملیر، آواران، جھاؤ، ھزدار، سوراب، کلات، مستونگ، ڈھاڈر ءُ کوھلو ءَ مچی ریکارڈ کتگ چریشی ءَ کچ ءُ کساسی ءَ لکانی مھلوک ءَ بھر زرتگ ءُ زوراکی ءِ ھلاپ ءَ یکجاھی ءِ درشان کتگ-