بلوچستان ءَ جتاجتائیں دمگاں اُرشانی دْرچ یکشل ءَ برجاہ ءَ اِنت

شال ءِ دمگ ڈبل روڈ “دگ” پولیس موباھل ءِ نزیک بمب تراکے ءِ آسر ءَ دو مردم بیران ءُ چار پولیس کارمنداں ھوار ھپدہ مردم ٹپی بیتگ اَنت-

ٹپی سول ھسپتال ءِ ٹراما سینٹر ءَ برگ بیتگ اَنت-

ریسکیو واکدار گوشگ اِنت بمب تراک ءَ چہ پولیس ءِ یک گاڑی ءَ تاوان رس اِتگ وھدے کہ یک پرپٹے ءَ آس کپتگ-

زانگ بہ بیت گوستگیں شپ ءَ چہ سرجمیں بلوچستان ءَ پاکستانی پوج ءُ پولیس ءُ لیویز سر ءَ اُرشاں ھوار بلوچستان ءِ جتاجتائیں دمگاں راھانی بندگ ءِ ھال دزکپتگ اَنت-

اے اُرش یک انچیں وھدے ءَ دیم ءَ اَتکگ اود ءَ بلوچ راج دوستانی گوشگ اِنت بیست ھپت مارچ ءَ پاکستانی پوج ءَ پہ تاکت بلوچستان دستیگ کتگ-

بلوچستان ءَ اے وڑیں روچاں گیشتر پوج سر ءَ بیتگیں اُرشاں گیشتر گندگ اَتکگ اَنت-

گوستگیں سال بیست شش اگست ءَ بی ایل اے ءِ نیمگ ءَ چہ آپریشن ھیروف بندات کتگ کہ اود ءَ سرجمیں بلوچستان ءَ پوج ءِ سر ءَ اُرش ءُ راہ بندگ بیتگ اَنت-

دومی نیمگ ءَ ھال اِنت کہ ناشناسیں مردماں نوشکی ءَ کشینگی ءِ ھند سر ءَ پاکستانی پوج ءِ چوکی اُرش ءِ نشانگ کتگ-

ھمے وڑ کلات ءَ ٹول پلازہ ءِ نزیک ءَ پاکستانی پوج ءِ گاڑی بمب اُرش ءِ نشانگ کنگ بیتگ ءُ جانی تاوان ءِ گمان-

ھاران ءَ ڈپٹی کمشنر ءِ کارگس ءِ سر ءَ دستی بمب اُرشے بیتگ-

ھمے وڑ تربت ءَ پاکستانی نیوی ءِ سر پھازوکی چوکیانی سر ءَ سلاہ بندیں مردماں اُرش ءِ نشانگ کتگ –

دشت کھڈان ءَ پاکستانی پوج ءِ کاروان سلاہ بندیں مردماں اُرش ءِ نشانگ کتگ زانگ بہ بیت گوستگیں شپ ءَ دشت کھڈان ءِ بُنجل ھم سلاہ بندیں مردماں اُرش ءِ نشانگ کتگ اَت-

تنی وھدے اے اُرشانی زمہ واری انگت ھچ گل ءَ نہ زرتگ اَنت-