بلوچستان ءِ تیاب دپی شھر گوادر ءَ مروچی بساک ءِ کتاب کاروان درگت ءَ کتاب میڑہ سر ءَ پولیس ءَ بیڑبرتگ نودربر کتاباں ھوار تھانہ ءَ بند کتگ اَنت پد ءَ پولیس ءَ وتی ھیال درشان کتگ کتابانی پٹ پول ءَ پد کنگ بنت-
گوادر ءَ دمگی اِھوالکار عین قادر رِد ءَ سے کلاکاں ساری وھدے پولیس ءَ میونسپل کمیٹی گوادر ءِ شورٹی سر ءَ کتاب میڑہ جنوکیں بچکاں گوں کتاباں ھوار لوگ روگ ءِ موکل داتگ گڑا ما کتاب چست کتگ گاڑیاں مان کنگ ءَ بیتگ ایں بلے پاکستانی چیریں ادارھانی کارمند اود ءَ پد ءَ سر بیتگ اَنت- آ ٹیم ءَ بگر تاں انو ناں پولیس یل کنگ ءَ اِنت ناں اے یل کنگ ءَ اَنت-
شپ ءِ اے وھد ءَ گوادر تھانہ ءِ دیم ءَ نودربر وکیل ءُ اِھوالکاراں ھوار سول سوسائٹی ءِ مردم مزنیں کچے ءَ ساڑی ءَ اَنت ءُ نودربرانی یل کنائینگ لوٹ کنگ ءَ اَنت- آیانی گْوشگ اِنت کہ اے کتاب یونیورسٹی ءَ وانینگ بنت، وھدے آرمی مردم اِد ءَ مراگش کن اَنت گُڑا ھمے کتاباں ایر کن اَنت بلے وھدے ھمے کتاب بلوچ دست ءَ بنت گُڑا آیاں شکی ئیں نگاھاں چار اَنت-