سیاسی توارانی ایرموش کنگ ءَ زھرشانی کنوکانی سر ءَ درکانودی دزگیریانی ھلاپ ءَ انسانی ھکانی گل توار چست بہ کن انت- سمی دین

ملیر شرافی گوٹھ بلوچ چُکچینی ءِ یاتگاری روچ مُچی ءِ واستا سرپدی مھم روانک ءَ پد ھشت مردم دزگیر کتگ اَنت-

بلوچ یکجھتی کمیٹی ءِ راھشون سمی دین ءَ گْوشتگ کہ گوستگیں روچ ءَ ملیر ءَ زھرشانی روانک ءَ سے کلاک ءَ پد چہ ملیر شرافی گوٹھ ءَ پولیس ءَ ھشت دمگی مردم ءُ زھرشانی ءَ ھوار بیتگ انت کہ دزگیر کتگ اَنت، آیانی تہ ءَ دو ورنا مجیت ء اسلم ءُ عمران ء مولا بخش ھوار اَنت، کہ آ تنی وھدے ھژدہ سال ءَ کم اُمر ئیگ اَنت-

سمی دین ءَ گْوشتگ کہ دزگیریں مردمانی کھولاں گوستگیں شپ ءَ زھرشانی نندانک داتگ، ءُ مروچی سُھب ءَ من آں ھوار آمنہ بلوچ، فوزیہ بلوچ ءُ دگہ شانزدہ مردمانی سر ءَ آیانی تہ ءَ دزگیریں مردم ھم ھوار اَنت، بے بنیاد ءُ ناجائزیں ایف آئی آر نکش کتگ انت-

آئی ءَ گْوشتگ کہ ھژدہ جنوری ءَ لیاری ءَ مئے زھرشانی ءِ میان ءَ دزگیر بیتگیں آ دگہ مردم آیانی تہ ءَ بلوچ یکجھتی کمیٹی ءِ آرگنائزر لالا وھاب بلوچ، کماشیں شھری ءُ ورنا ھوار اَنت، انگت پولیس ءِ دست ءَ اَنت-

آئی ءَ گْوشتگ کہ ما دراھیں انسانی ھکانی ادارہ ءُ گلاں چہ دزبندی کن ایں کہ سیاسی تواراں ایرموش ءُ زھرشانی کنوکانی درکانودی دزگیریانی ھلاپ ء شریں وڑے ءَ توار چست بہ کن اِت-