بلوچی زُبان ءِ وانگ
نبشتہ کار: امجد رھیم
دی بلوچستان پوسٹ
بلوچی وانگ اِے زمانگ ءَ باز آسان اِنت اَنچوش کہ یکے ءَ را زُبان ءِ بارو ءَ سرپدی بہ بیت اِنت ءُ شوک بہ بیت اِنت گڑا آ الّم وتی راجی زُبان ءَ دیم ءَ برگ ءِ جُھد ءَ کنت ءُ وتی زُبان ءَ وانین اِیت ءُ دگہ مردماں بلوچی وانگ ءَ سرپدی ءَ دنت۔ اگاں یک راجے وتی زُبان ءَ دیم ءَ برگ ءِ جُھد ءَ مہ کن، گُڑا آ زُبان کدی دیمروی نہ کنت، آ زُبان گار ءُ بیگواہ ءِ آماچ بیت پرچاکہ ھما زُبان ءِ جند ءِ راج ءِ تہ ءَ کَدر نیست دگہ جاگھاں کُجا کَدر بیت۔ اَنچُشکہ ما بلوچی ءَ بہ چاریں بازیں جاگھاں بلوچی زبان باز کم کارمَرز بوگ ءَ اِنت پرچا کہ اود ءَ ناں بلوچی وانگ بوگ ءَ اِنت ءُ نَیکہ بلوچی ءَ کَدر دیگ ءِ جُھد ءَ اَنت ھمے واستا بلوچی زُبان دیم ءَ روگ ءَ نہ اِنت۔
اگاں بلوچ وت وتی زُبان ءَ ارزشت مہ دے اَنت گڑا کَس بلوچی ءَ ارزشت نہ دنت، وتی زُبان ءَ بہ وان اِت ءُ وت ارزشت بہ دی اِت ، زُبان ءِ وانگ، ھبر ءُ نبشتہ ءَ کنگ ءَ مئے ماتی زبان دیمروی کنت جُھد ءِ برجمدارگ ءَ دیم ءَ روت اِنت ھمے مارا ءُ شُمارا جُھد کنگی اِنت۔ زُبان دوست ءُ راجدوست بوگ ءَ ترا وتی زُبان ءِ سر ءَ کار کنگی اِنت ءُ آئی ءِ کَدر ءُ کیمت کنگی اِنت، ترا ھمے زانگ لوٹ ایت بلوچی چی یے ءُ آئی ءِ بارو ءَ باز سرپدی بوگ لوٹ ایت۔ اَنچُشکہ ترا گوں زُبان ءَ مھر بہ بیت گُڑا تو وتی راجی زُبان ءَ دربرگ ءِ جُھد ءَ ساڑی کن بَہ ئے، بلوچی مئے زُبان اِنت مارا الّم دیم ءَ برگی اِنت راج ءِ کمُک کنگی اِنت ما بہ چاریں راج چنچو بزّگ اِنت مارا ھمے جیڑگی اِنت راج چی ءَ بزّگ اِنت؟
بازیں نودربر ھمے جیڑ اَنت کہ بلوچی زُبان ءِ وانگجاہ نیست ءُ بلوچی وانینگ بوگ ءَ نہ اِنت، ما بلوچی نہ وان ایں چیاکہ آیاناں سرپدی نیست ھمے واستا آ نہ وان اَنت۔ رھشون گُش اَنت وتی نودربراں ءُ وتی آیوکیں پدریچ ءَ بلوچی بہ وانیں اِت، ھمے سُوج ءَ بہ دی اِت کہ مئے مستریناں چے گُشتگ ءُ کُجام زُبان ءَ ھبر کُتگ اِش۔ ھمے الّم سُوج بہ دی اِت مئے زُبان کُجام اِنت، ھمے وڑ ءَ تیوگیں سرپد بہ بنت وتی زُبان ءِ بارو ءَ بہ زان اَنت۔
مئے رھشون شھید بانُک کریمہ ھمے گُشتگ اَت بلوچ ءَ را بلوچی زُبان پجّا کار اِیت، آئی ءَ ھمے گشتگ اَت بلوچی بہ وان اِت ءُ وتی شھدیں زُبان ءَ مھر بہ دی اِت۔ بانُک ءَ گُشتگ بلوچی وانگ پہ بلوچ ءَ گْران نہ اِنت انچوش بلوچی ءَ مھر ءُ دوستی بہ دی اِت، بلوچی ءِ کَدر ءَ شرّیں وڑے ءَ بزان اِت بلوچی مئے زُبان اِنت، چہ زُبان ءَ ابید مردم گنگدام بیت ھمے واستا زُبان ءِ کَدر ءَ بزان اِت۔ سنگتاں! وتی شھدیں زُبان ءَ بہ وان اِت ءُ برجم بہ دار اِت بلوچی مئے زُبان اِنت مارا وتی زُبان وانگ لوٹ ایت ءُ سرپد بوگ لوٹ ایت۔
سلامت بات اِت شالا ھمکوپگ ءُ ھمگرنچ بات اِت دراھیں بلوچ بات اِت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی اِنت–