شال: بی ایم سی ءِ ھاسٹلانی بندش ءِ ھلاپ ءَ نودربرانی زھرشانی 6 روچ ءَ ھم برجاہ

بلوچستان ءِ بنجاھی شھر شال ءَ گوستگیں شش روچاں بلوچ نودربرانی نیمگ ءَ بولان میڈیکل کالج ءِ ھاسٹلانی بندش ءُ پولیس ءِ دستیگی ءِ ھلاپ ءَ زھرشانی برجاہ اِنت-

زھرشانی بلوچ ایکشن کمیٹی ءِ نیمگ ءَ برجاہ کنگ بیتگ کہ اود ءَ نودربرانی سر ءَ پولیس ءِ بیڑ برگ ءُ پد ءَ نودربرانی دزگیری ءُ ھاسٹلانی بندش ءِ ھلاپ ءَ کنگ بوگ ءَ اِنت-

شال ءَ بولان میڈیکل ءِ دیم ءَ مروچی نودربرانی زھرشانی ءَ شش روچ سرجم بیتگ بلے تنی وھدی انگت ءَ آیانی لوٹانی منگ ءَ ھچ کس گندگ ءَ آیگ ءَ نہ اِنت-

مروچی زھرشانی بنجل ءَ یک روانکے کشگ بیتگ ءُ اود ءَ نودربراں ھوار ھوار دگہ تک ءُ پھناتاں بندوکیں مردماں بھر زرتگ ءُ روانک ءَ نودربراں کالج ءِ ھاسٹلانی بندش ءِ ھلاپ ءَ نبشتگیں تاک ءُ اوگام جتگ اَنت-

نودربرانی گوشگ اِنت کہ مروچی پولیس ءَ بازیں کچے ءَ زھرشانی بنجل وتی انگیر ءَ ھم زرتگ-

نودربرانی گوشگ اِنت دانکہ مئے گوشتگیں لوٹ سرجم نہ بنت اِنت اے زھرشانی برجاہ مان ایت-