نمدی یے پہ وتی مستریں برات مرید جان ءَ – برمش شاشانی

نمدی یے پہ وتی مستریں برات مرید جان ءَ

نبشتہ کار :برمش شاشانی

دی بلوچستان پوسٹ

دروت پُلیں برات، من اِے اُمیت کناں کہ تو وش ءُ سلامت ئے من اِے زاناں کہ تو کُجا ئے۔ من چوں نہ زاناں کہ تو چون ئے، باریں وشّیں وھد ءُ ساھتانی تَھ ءَ ئے یاکہ ناں۔ من پہ تو سک زھیر وار آں کہ تو کدی کائے پہ من ، ما تئی ودار ءَ اِیں مات ءُ پِت تئی ودار ءَ اَنت کہ کدی کَیت منی ورنا واتر لوگ ءَ تو من ءَ تھنا کُت من وت نہ زاناں کہ تو کجام نیمگ ءَ شُت ئے منی ارواہ ۔

اِے زندگی ءِ گم ءُ ساھت سک باز اَنت کہ کس زانت کُت نہ کنت کہ ما کجام نیمگ ءَ برو اِیں ، چون برو اِیں اگاں ما وتی گِساں نند اِیں ھچ بوت نہ کنت۔ منی لالا تئی داتگیں مھر تنیگتا منی کِر ءَ اِیر اَنت تئی ترانگیں آواز منی کِر ءَ اِیر اَنت تئی ٹالیں کندگ منی ھمراہ اَنت دانکہ من زندگ آں تئی اکس منی پجّار اِنت۔ تئی برات ھست پہ تو منی ساہ تئی ھما گپ ءُ تْران تنیگت ءَ من ءَ وش کندین اَنت۔

تو ھرروچ یات کائے من ءَ باریں نوں من ءُ تو کدی یکجاہ بَہ اِیں ءُ ھما وڑ کند اِیں۔ نوں باریں کے گوں من مسکرا کنت ءُ تئی وڑ ءَ منی ھمراہ بیت تو منی ھمراہ بَہ ئے آ وڑ نیکہ پیسر ءَ بوتگ ئے۔ باریں منی لالا تو کے ءَ وتی دل ءَ کار ئے ءُ کے کے تئی دل ءَ اِنت منی ساھت بس ھمیش اِنت کہ تو باریں چون ءُ چون بَہ ئے باریں چون چونیں مِنزل ءَ رو ئے بس من ءَ یات ءُ گم اِنت من تئی ھمراہ باں باریں کدی بہ باں اِے میتگ بے تو من ءَ ھچ وش نہ بنت ھمائیں کہ تو چِداں چَہ رپتگ ئے من ءَ بس تئی ھیال ءُ یات اَنت تو یک روچے بِیا پہ من ، کہ منی زھیراں تالان بِہ بنت پہ تئی دیدار ءَ
باریں چینچو روچ ما زندگ بوت کن اِیں ءُ تئی دیدار ءَ کن اِیں۔

اگاں منی زندگی گوں من ءَ ھمراہ بوت من اَلَم تئی باں اگاں تو زندگ بوت ئے منی ھمراہ بَہ ئے۔ منی زندگی ءُ ساھت بس پہ تو ھست اَنت دانکہ زندگ آں پہ تو ساہ کُربان کن آں من زاناں کہ من مِراں چینچو روچ وش ھال باں ۔ زندگی ھمیش بیت بس نیست ، نہ بیت گوں کس ءَ ھمراہ۔ دانکہ زندگ بہ باں تئی مِنزل ءَ گِراں ءُ تئی ھمراہ باں۔ بس من ءَ اِے ساھت نیست کہ من تئی ھمکوپگ بہ باں۔

منی برات ءُ منی ساہ ءُ جان تو مُدام سلامت بات ئے ءُ زندگ بات ئے ءُ وتن دوست بات ئے۔