شال: پبلک سروس کمیشن ءِ چن ءُ لانچاں دزگٹیں ورناہ بیگواہ

چہ شال ءَ پاکستانی پوج ءَ یک نودربرے زورانسری آوار جتگ ءُ بیگواہ کرتگ –

گوستگیں شپ ءِ ساھت دوازدہ ءَ بلوچستان ءِ بنجاھی شھر شال ءَ اے ون سٹی ءَ پاکستانی پورسز، سی ٹی ڈی ءُ پولیس ءِ کارمنداں بھزاد دلاوری نامیں ورنایے آوار جتگ ءُ بیگواہ کرتگ-

بھزاد دلاوری ء برکت دلاوری ءِ سیادی پنجگور ءِ دمگ ھدابادان ءَ اِنت-

بھزاد ایشی ءَ پیش 30 نومبر 2021 ءَ چہ پنجگور ءَ بیگواہ کنگ بیتگ ءُ پد ءَ یل دیگ بیتگ-

دمگی اھوالانی رد ءَ اے ورنا پبلک سروس کمیشن ءِ چکاسانی چن ءُ لانچ ءَ دزبند بیتگ- واکداراں تنی وھدی اے درگت ءَ دگہ اھوال نہ داتگ اَنت-

بلوچستان ءَ زورانسری بیگواھیانی وئیل ھمک روچ رپورٹ بوگ ءَ اَنت – بیگواھی ءِ آماچ کنگ بیتگیں مردمانی توک ءَ گیشتریں کساس نودربرانی ئیگ اِنت-