بلوچستان ءِ جتاجتائیں لشکریانی سر ءَ اُرش، پسنی ءَ مزن شھدگ سَے جاہ ءَ بندگ، مڈی بروکیں ماندارگ بیتگ انت

چارشمبے ءِ روچ بلوچستان ءِ جتاجتائیں دمگاں تراک ءُ تیرگواری ھال دیم ءَ اَتکگ اَنت-

چہ پنجگور ءَ ھال اِنت کہ اسسٹنٹ کمشنر تھسیل گوارگو ءَ خسرو دلاروی ءَ خدابادان ءَ برجاھیں نندانکجاہ سر ءَ دستی بمب اُرش ءَ نشانگ کتگ – چریشی ءِ آسر ءَ بُنجاھی گیٹ ءَ کمو تاوان رس اِتگ- بلے جانی تاوان ھچ ھال نیست-

ھمے وڑ تربت ءِ دمگ آبسر ءَ پاکستانی پوج سر ءَ اُرش ھال اِنت – دمگی وسیلگ رِد ءَ نیم کلاک ءَ تاں تُرندیں تیرگواری ءُ توار اش کنگ بیتگ – وھدے کہ تیرگواری ءُ تراکاں پد پوج ءِ سُر پُرانی تہ ءَ گیشی گندگ اَتکگ-

ھمے وڑ آواران ءِ دمگ بزداد گندہ کور ءَ پاکستانی پوج اُرش ءِ نشانگ کنگ بیتگ – ھمے میان ءَ تُرندیں تیرگواری ءُ تراکانی توار ھم اش کنگ بیتگ-

دومی نیمگ ءَ بارکھان ءِ دمگ تومنی ءِ ھند بغاؤ ءَ صوبائی وزیر عبدالرحمان کھیتران ءِ بندیگجاہ ءَ سر ءَ سلاہ بندیں مردماں اُرش کتگ، اُرش ءَ چار گارڈز ٹپی بیتگ اَنت-

اے میان ءَ اُرشکاراں ھال اھوالی ٹاور ءِ تباہ کنگ ءَ ھوار بندیگجاہ ءِ تمبو ھم مانداشتگ اَنت-

زانگ بہ بیت اے جاہ ءَ چہ گوستگیں سال ءَ زالبول ءَ ھوار دگہ مردمانی لاش دزکپتگ اَنت کہ آیانی زمہ داری عبدالرحمان سر ءَ جنگ بیتگ اَت-

ھمے ھنی شپ ءَ تیاب دپی شھر گوادر ءَ ناشناسیں سلاہ بندیں مردماں پسنی ءُ اورماڑہ میانجی بُنجاھی شھدگ بستگ ءُ پول بندات کتگ ءُ ھمے میان ءَ مادن بروکیں ٹراکانی سر ءَ اُرش کتگ ءُ مانداشتگ اَنت-

انچش اورماڑہ کوسٹ گارڈ بُنجل سر ءَ سلاہ بندیں مردماں اُرش کتگ، دمگی وسیلگ رِد ءَ ٹی بی پی ءَ گوں تران کتگ گْوشتگ کہ نیم کلاک ءَ چہ گیش تُرندیں تیرگواری ءُ تراکانی توار اش کنگ بیتگ ءُ اُرش ءَ پوج ءَ جانی تاوان چست کنگ ھال اِنت-

ھمے وڑ اورماڑہ شھدگ سر ءَ خواری چائی ھند سر ءَ لیویز فورس پوسٹ سر ءَ سلاہ بندیں مردماں اُرش کتگ، کارمند سلاہ بندانی دستیگ اَنت وھدے کہ سلاہ ءُ دگہ سامان وتی دستیگ کتگ اَنت-

زانگ بہ بیت پسنی ءُ اورماڑہ ءِ میانجی شھدگ سر ءَ یکشل ءَ سلاہ بنداں بستگ ءُ پٹ پول کنگ ءَ اَنت-