بلوچ یکجھتی کمیٹی ءِ سروک ڈاکٹر ماہ رنگ بلوچ ءَ 13 نومبر ءِ درگت ءَ راجی شھیداں سھریں دروت ندر کنان ءَ گوشتگ مرچی ھما راجی بامردانی روچ اِنت کہ آیاں وتی زات ءُ زاتی زند پہ بلوچ ءِ وشیں باندات ءَ کربان کُتگ انت، مرچی مئے چاگرد کہ دیمروئی ءِ نیمگ ءَ جنزان انت آئی ءِ پشت ءَ ھمے شھیدانی ھون اَنت۔
آئی ءَ گوشتگ اگاں ما لوٹ ایں کہ ما پہ وت ءَ وش ءُ وشھال ءُ زندگیں چاگردے جوڑ بہ کن ایں ءُ بلوچ دیمروئی کتگیں راجے بہ بیت، گڑا مارا وتی زات ءُ وتی سرکلانی باز چیز مٹ کنگ لوٹ انت، مارا گونڈیں سوچ، کُنت ءُ انا ھلاس کنگ لوٹ انت۔
آئی ءَ گوشتگ اگاں مارا اے نازاکیں ورنایانی کربانی ءُ ھون ءِ اھساس ھست گڑا ما وتی تاکت ءَ یکے دومیءِ ھلاپ ءَ ھرچ کنگ ءِ جاہ ءَ وتی سرجمیں تاکت ءَ “بلوچ ءِ دژمن” ءِ ھلاپ ءَ ھرچ بہ کنیں، راجی یکجاھی ءُ یکشمتی ءِ ھاتر ءَ وتی کسان کسانیں نام، کُنت ءُ انا ءَ کربان بہ کن ایں ءُ وتی سرجمیں زوراں بلوچ جنزءِ مھکم کنگ ءِ سر ءَ بہ دے ایں۔
ڈاکٹر ماہ رنگ بلوچ ءَ گوشتگ بلوچ راجی شہیداں پہ یک وشھالیں بانداتے ءَ وتی سرجمیں زند کربان کُتگ، یک وشھالیں بلوچ چاگردے منی گوں ھوار ھرچ بلوچ ءِ واھشت انت، بلے راج ءُ چاگرد پہ واھشت دیمروئی نہ کن انت ءُ نہ تھنا چہ لھتیں مردماں کربانی لوٹ انت، بگندئے چاگرد یک یک نپر ءَ چہ عمل.ءِ لوٹ کنت۔ مزاحمت، جھد، لبزانک، وانگ، سائنس، ٹیکنالوجی ھرچ یک پیلڈے کہ آئی ءِ راج ءُ چاگرد جوڑ کنگ ءِ تہ ءَ کرد اَست ھما جاہ ءَ وتی کرد ءَ پیلو بہ کن ایں۔
آئی ءَ گوشتگ اے وھد ءَ بلوچ چاگرد جنگ ءِ آماچ اِنت، بلوچ ورنا وتی شہیدانی رتگیں ھون ءُ کربانیاں وتی دیم ءَ ایر بکن انت ءُ بہ جیڑ انت کہ آیا مئے وھد، بودناکی ءُ انرجی پہ بلوچ ءِ جنز ءُ باندات ءَ ھرچ بوگ ءَ اَنت یا انچوش پہ بے سر ءُ پادیں کاراں زوال بوگ ءَ انت، اگاں بے سر ءُ پادیں جاہءَ ھرچ بوگ ءَ اَنت گڑا مارا ایشانی سر ءَ باز سوچ کنگ لوٹیت ءُ وتی زند مٹ کنگ لوٹ ایت پرچہ کہ جنز تھنا پہ ہمدردی ءِ بنیات ءَ سوبمند نہ بنت، بگندئے چاگردے ءِ ھرچ یک نپرے وتی کرد ءَ پیلو بہ کنت۔ مئے چاگرد ءِ ھرچ نپر ھاسکار ورنا ھمے گپ ءَ سک باز سوچ بکن اَنت کہ آ کجام جاہ ءُ کجام پڑ ءَ پہ بلوچ ءُ بلوچستان ءَ وتی کرد پیلو کت کن انت، ھما جاہ ءَ وتی کرد ءَ پیلو بکن اَنت، کسے شریں جھدکارے بوت کنت، کسے شریں ٹیچرے بوت کنت، کسے سائنسدانے بوت کنت، کسے شریں نبشتکارے بوت کنت، کسے شریں جرنلسٹے بوت کنت، کسے شریں آرٹسٹے بوت کنت، کسے شریں زبان زانتے بوت کنت، کسے نوکیں دورءِ ٹیکنالوجی ءِ تہ ءَ زانتکارے بوت کنت بلے اے درستیں بساد ھما وھد ءَ بلوچ چاگرد ءُ بلوچ راجی جنز ءِ کار ءَ اتک کن انت کہ مئے سوچ راجی بہ بنت، مُچانکی بہ بنت، پرچہ کہ اگاں ما اے کلیں چیزاں پہ وتی زاتی نپ ءُ پائیدگانی ھاتر ءَ بہ کنیں گڑا راج ءُ چاگرد ءَ ایشانی ھچ نپ نہ رس ایت۔
ڈاکٹر ماہ رنگ ءَ گوشتگ منی نزیک ءَ بلوچ راجی شھیداں دروت ندر کنگ ءِ شرتریں راہ ھمیش اِنت کہ آھانی گچین کُتگیں راہ ءِ سر ءَ امل بہ کنیں ءُ راجی جنز ءَ وڑے نہ وڑے ءَ الم وتی کرد ءَ پیلو بہ کن ایں۔