زاھدان: دو ٹکانی میان ءَ دلرنجی ھلاس ءُ دل ماں دل بیتگ انت

روکپتی بلوچستان ءِ بنجاھی شھر زاھدان ءَ دو ٹکانی میان ءَ دیریگیں جنگ ءُ چوپ ءَ وت ماں وت ءَ سِلاہ کنگ بیتگ ءُ ھردوک دل ماں دل بیتگ اَنت-

روکپتی بلوچستان ءِ سنی کمیونٹی ءِ سروک مولانا عبدالحمید اسماعیل زئی ءِ سروکی ءَ ماں مکی مسیت زاھدان ءَ دو ٹک شمبے زئی ءُ ریگی میان ءَ گوستگیں چار سالاں ودی بیتگیں جنگ ءُ چوپ ھلاس کنگ ءُ ھردوک دل ماں دل بیتگ اَنت-

زانگ بہ بیت اے ٹکانی میان ءَ جنگ ءُ چوپ ءَ اقبال شمبے زئی نامیں مردمے کُشگ بیتگ –

ھردوکیں ٹک مولوی عبدالحمید اسماعیلزئی ءَ ھوار دگہ نیکراھی سروک ءُ کماشاں یکجاہ کتگ ءُ وشان کتگ اَنت-

زانگ بہ بیت روکپتی بلوچستان ءَ وت ماں وتی جنگانی سبب ءَ بازیں مردم اَچ وتی زند ءَ زبھر بیتگ اَنت- چوشیں وئیل پیش اتکگ ءُ تنی وھدی انگت گندگ ءَ کاینت کہ اود ءَ مردم وت ماں وت ناوشانی دیمپان اَنت-