بلوچ نیشنل پارٹی ( بی این پی ) ءِ سینیٹرانی زورانسری آوار جنی ءِ ھلاپ ءَ بی این پی ءِ جار پد ءَ بلوچستان ءَ زھرشانی کنان ءَ شھدگ بند کتگ اَنت-
گیشیں ھالانی رِد ءَ سنیٹر نسیمہ احسان ءُ قاسم رونجھو ءِ آوار جنی ءِ ھلاپ ءَ بی این پی ءِ کارکناں نندانک سرجمیں بلوچستان ءَ برجاہ ءَ اَنت چریشی ءِ سبب ءَ چہ سرجمیں بلوچستان ءَ گاڑیانی روگ آیگ مھتل اِنت-
بلوچستان نیشنل پارٹی ءِ بُنجاھی جار رِد ءَ پارٹی ءِ سینیٹرانی آوار جنی ءِ ھلاپ ءَ بی این پی کیچ نیمگ ءَ چہ ڈی بلوچ دگ ھرچ وڑیں روگ آیگ ءَ بند کتگ-
ھمے درگت ءَ بی این پی کیچ ءِ راھشون مزنیں کچے ءَ ساڑی اَنت-
بی این پی سوراب ءِ نیمگ ءَ چہ شال کراچی شھدگ ھرچ وڑیں روگ آیگ ءِ واستا بند کتگ اَنت چریشی ءِ سبب ءَ چہ دگ ءِ دوئیں نیمگاں گاڑیانی دراجیں لین لگ اِتگ-
آئی ءِ گوشگ اِنت کہ بلوچستان نیشنل پارٹی ءِ راھبند ءِ ھلاپ اِنت چریشی ءِ سبب ءَ چہ آیانی سینیٹراں آوار جنگ ءَ اَنت بلے ما ھمے ھاتر ءَ زھرشانی ءِ راہ درچتگ دانکہ دیم ءَ آرگ نہ بنت مئے زھرشانی برجاہ بنت-
ھمے وڑ منگچر ءَ بی این پی ءِ بُنجاھی جار پد ءَ جوھان کراس بازار ھند سر ءَ شال کراچی بُنجاھی شھدگ بند کتگ-
خالق آباد منگچر ءِ دگ بند بیگ ءَ چہ دگ ءِ دوئیں نیمگاں گاڑیانی لین لگ اِتگ-
سینٹرانی آوار جنی ءِ ھلاپ ءَ بی این پی ءِ بُنجاھی جار پد ءَ وڈھ ءَ چہ شال کراچی شھدگ ھرچ وڑیں روگ آیگی واستا بند کتگ –