اے جرگہ ءَ دمگ ءِ مھلوک ءَ گوں دوچار کپتگیں جیڑھانی بابت ءَ زانتکار ءُ سیاسی مردم وتی ھیال ءُ لیکہ درشان کن انت وھدے کہ اے جیڑھانی گیش ءُ گیوار ءِ ھاتر ءَ منّگ نامہ ءِ شکل ءَ ھکومت ءِ دیم ءَ پیشکش پیش کنگ بنت۔
پاکستان ءِ صوبہ خیبر پختونخوا ءِ ضلع خیبر ءَ پشتون رکینگ ءِ تحریک ءِ چیردستی ءَ “راجی جرگہ” بندات بوتگ۔ اے جرگہ ءَ پختونخوا ءَ ھوار بلوچستان ءُ پنجاب ءِ بازیں دمگاں چہ مردماں بھر زرتگ ات کہ آھانی تہ ءَ گیشتر ورنا ھم ھوار ات انت۔ مرچی سئے روچی جرگہ ءِ اولی روچ ات کہ ایشی ءِ ھاتر ءَ جارچیناں بندوبست کنگ ءَ مشکلات ءِ دیمپان بوتگ ات۔
پشتون ءِ رکینگ ءِ تحریک ءِ جرگہ ءَ پیسر مرکزی ءُ صوبائی حکومتانی جرگہ برجم دارگ بوتگ کہ ایشی ءِ تہ ءَ سرجمیں صوبہ ءِ سیاسی گلانی سروکاں بھر زرتگ ءُ یک رندے پد ءَ خیبر پختونخوا ءِ سر وزیر ءَ را پشتون ءِ رکینگ ءِ تحریک ءِ سروکاں گوں گپ ءُ تران کنگ ءِ اجازت داتگ۔
اے جرگہ ءَ ورنا ءُ دگہ چہ ابید زالبولانی مزنیں کساسے ءَ ھم بھر زرتگ۔ جرگہ ءِ تہ ءَ بھر زوروکیں زالبول عصمت شاہ جھان ءَ جرمن نشریات ءِ ادارہ ءَ گوں تران کنان ءَ گشتگ کہ صوبائی حکومت ءَ وتی سیاست ءِ رکّینگ ءِ ھاتر ءَ اے کار المی انت۔ اگاں مرچی گپ مہ کن اَنت گڑا باندا مردم آیاں ووٹ نہ دنت۔” آئی ءَ گیش گوشت کہ شما ‘گواچن مصالحتی کمیشن’ جوڑ بہ کن ات اگاں ریاست ءَ اے کار نہ کت گڈا ما وت بندات کنیں اد ءَ درستیں اسٹیک ہولڈر ریاست ءُ الس ءِ نوک جوڑ کنگ ءِ بابت ءَ گپ ءُ تران کن انت۔
پشتون رکینگ ءِ تحریک ءِ جرگہ ءِ اولی دیوان ءَ ماھرین ءَ گوستگیں دو دھائی ءَ چہ دمگ ءَ جنگ ءِ اثرات، آوار جنگ ءِ بے بنیں سان ، واپاری مشکل، بیگواھیں مردمانی جیڑہ ءُ لٹ ءُ پُلی ءِ سر ءَ گشتانک داتگ . اے جرگہ ءِ جار دو ماہ پیسر شنگ بوتگ ات پولیس ءَ 3 اکتوبر ءَ جرگہ ءِ جاہ ءِ سرا سرکچ بندات کتگ ات کہ سئے روچ ءَ برجاہ بوتگ ات۔ لھتیں روچ پیسر جرگہ ءَ ھواریں مردمانی سر ءَ تیرگواری کنگ بوتگ کہ ایشی ءِ تہ ءَ پشتون پروٹیکشن موومنٹ ءِ چار مردم بیران ءُ دہ ٹپیگ بوتگ اَنت۔
ھمے میان ءَ پاکستان ءِ سرکار ءَ پی ٹی ایم ءِ سر ءَ بندش جت ءُ ناجائز لیک اِت کہ دراھیں سیاسی گلاں مذمت کُت ءُ پد ءَ گیشتریں گلاں وتی بھر زوری ءِ جار جت۔