پاکستانی پوج ءِ کاروان ءِ سر ءَ اُرش، دشمن ءِ 9 کارندہ کشتگ انت- بی ایل اے

بلوچ لبریشن آرمی ءِ جارکش جیئند بلوچ ءَ کلات ءَ پاکستانی پوج ءِ سر ءَ بیتگین اُرش ءِ زمہ واری منان ءَ گوشتگ مروچی کلات ءَ پاکستانی پوج ءِ کاروان ءَ ھواریں گاڑی ءِ آئی ای ڈی ءِ نشانگ کنگ ءِ ھواری ءَ سربستگ ءُ ارش کتگ، اُرش ءَ دشمن ءِ نُھ کارندہ کشتگ ءُ پنچ زدگ کتگ اَنت-

جارکش ءَ گوشتگ کلات ءِ ھند دشت مھمود ءَ بی ایل اے ءِ سرمچاراں زورگرین پاکستانی پوج ءِ کاروان ءَ ھواریں پک اپ گاڑی ریموٹ کنٹرولڈ آئی ای ڈی ءِ اُرش ءِ نشانگ کتگ – چریشی ءِ آسر ءَ گاڑی ءِ دراھیں سواریں پنچ کارندہ جاہ پہ جاہ ءَ مرتگ انت ءُ سر بستگ ءُ سرمچاراں کاروان ءَ ھواریں دگہ گاڑی مزنیں سلاھانی گون ءَ نشانگ کتگ انت چریشی ءِ آسر ءَ دگہ چار کارندہ مرتگ ءُ کم چہ کم پنچ زدگ بیتگ اَنت-

جارکش ءَ گوشتگ بلوچ لبریشن آرمی ءِ سرمچاران دگہ کاروائی یے بیست ءُ ھشت ستمبر ءَ گوادر ءِ ھند پسنی ءَ اینٹی نارکوٹکس ءِ کارندھانی دزبمبے ھما وھد ءَ چگل داتگ کہ آ وتی بنجل ءِ نزیک ءَ مُچ بیتگ اَنت ءُ تراک ءَ کارندھانی جانی ءُ مالی تاوانانی دیمپانی کنگ کپتگ-

جیئند بلوچ ءَ گوشتگ اے اُرشانی زمہ واریاں بلوچ لبریشن آرمی من ایت ءُ دشمن ءِ سر ءَ اُرشانی درچانی برجاہ دارگ ءِ سِتک ءَ کنت اِنت-