بلوچستان اسمبلی ءَ بلوچستان جیڑھانی سر ءَ جتا جتائیں لیکھانی درشانی

ھک دو تھریک بلوچستان ءِ سروک مولانا ھدایت الرحمان ءَ بلوچستان اسمبلی ءَ وتی ھیال درشان کنان ءَ گْوشتگ کہ بلوچستان سوچگ ءَ اِنت ءُ مئے چک مرگ ءَ اَنت-

آئی ءَ گْوشتگ کوہ ءَ رؤکیں گدار نہ اَنت، گدار ھما اَنت کہ چوکیانی سر ءَ اوشت اَنت زر گر اَنت منشیات گوازین اَنت-

آئی ءَ گْوشتگ کہ بلوچستان ءَ جتا کنگ واستا ” را ” الّم نہ اِنت، ایف سی بلوچستان ءَ پاکستان ءَ چہ جتا کنگ ھاتر ءَ بس اِنت – بلوچستان مئے لوگ اِنت ءُ لوگ ءَ ما پھازدار داشتگ درستاں چہ گیش ھرچ اشانی سر ءَ۔بیت، زانشت ءَ گیش فنڈز پھازداری ءَ ھرچ بیگ ءَ اَنت بلے پد ءَ ھم ایمن نہ اِنت، ھشتاد ءَ چہ نود ارب کلدار ھرچ بیگ ءَ اَبید ھم استان ءَ ایمن نہ اِنت-

مولانا ءَ گْوشتگ کہ ناشرکاری ءِ وئیلانی سر ءَ تھنا ءُ تھنا ایرجنی بیت جست کنگ نہ بیت، بلوچستان ءَ پوج ءِ ادارہ مھر اَنت ما مُھر نہ ایں، بلوچستان ءِ مردمانی ناں جان مُھر اِنت نانکہ مال-

آئی ءَ گْوشتگ کہ پنجاہ لاک مردمانی کار ءُ بار ءَ بند کن ئے گُڑا ورنا دُژمن ءِ دست ءَ کارمرش بنت، منشیات بلوچستان ءَ چو بودینی ءِ وڑ ءَ بھا بیگ ءَ اِنت، وھدے بے روزگاری بیت گُڑا ناشرکاری بیت، ایپکس کمیٹی والو سیمسر ءَ بند کنگ ءُ ناشرکار جوڑ کنگ ءَ اَنت یا زمین دوست؟ کھربانی کلدار ورگ بنت ڈیھ ءَ تاوان نہ بیت بلے چمن سیمسر ءَ کارکنوکیں مردماں چہ ترا تاوان بیگ ءَ اِنت، ھکومت کجیں مارا ھچ وڑیں ھکومت گندگ نئیت-

ھمے وڑ بلوچستان اسمبلی ءَ وتی ھیال ءِ درشان کنان ءَ نیشنل پارٹی ءِ سروک ڈاکٹر عبدالمالک بلوچ ءَ گْوشتگ کہ سے ھزار استاد ، نودربر ءُ اِھوالکاراں چارمی شیڈول ءَ مان کتگ اَنت اے وڑ پرچا کنگ بیتگ-

آئی ءَ گْوشتگ کہ چارمی شیڈول ریاست ءِ ھلاپ اِنت – چارمی شیڈول ءَ مان کنگ زور آجوئی لوٹوکانی نیمگ ءَ راھدیگ بیگ ءَ اِنت-

ڈاکٹر عبدالمالک بلوچ ءَ گْوشتگ کہ بی ایس او پجّار وتن ءُ ڈیھ دوست ءُ دگراں ڈیھ ءِ دُژمن سرپد بیگ شر نہ اِنت-