راھشون ءُ مھرنگیں راھشون
نبشتہ کار: عُظمیٰ بلوچ
دی بلوچستان پوسٹ
ھر وڑیں جھد ءِ تہ ءَ آشوبی لیڈرشپ یک مزنیں کردے پیلو کنت۔ ھمے پیم ءَ ھر جُھد ءِ تہ ءَ لس مھلوک چہ لیڈرشپ، وژن ءُ دْراجیں شوربندی ءَ سانمند بیت۔ آ جُھد ءَ ھوار اَنت ءُ آشوب کار اَنت۔ لیڈرشپ ڈرائیور اِنت ،وژن راہ ءِ گیشینگ اِنت، ءُ مکسد منزل اِنت۔ ھرچ زُرمشت ءِ تہ ءَ لیڈرشپ ءِ یک مھکمیں ءُ برجمیں کردارے ھست بیت انت۔ چہ جُنز ءِ لاپ ءَ راست ءُ اسلیں لیڈر شپ ودی بیت کہ آ جُنز ءَ را یکجاہ کنان ءَ سوبمندی ءِ دیم ءَ جُنزان کن انت ۔لیڈرشپ ءِ راھشونی رندگیری پیداک کنت۔ ھمے پیم ءَ لیڈر ءُ رندگیر ءِ مکسد راجی مکسد جوڑ بیت ءُ گوں راجی جزبہ ءَ ھمگرنچ ءُ شناسا بِہ اَنت۔ راج ءِ جھگیری کنوک ھما لیڈر اِنت کہ راج ءِ اَسل مکسد ءُ لوٹاں پیلو بہ کنت۔
لیڈر دو ترز ءِ بنت۔
Transactional Leadership
اے لیڈرے نہ اِنت بلکیں کار ءُ باری ءُ بیپاری مردمے زانگ بیت۔ ایشی ءِ مکسد گوں دومی مردماں سیادی تھنا زَرّی سیتانی بنیاد ءَ بیت۔ اے ترز ءِ کار ءُ باری لیڈر اگاں چیزے دنت گڑا بدل ءَ چیزے لوٹ ایت۔
James Macgregor Bums
Such leadership occurs when one person of exchange of valued things contract others. The exchange may be economic political or psychological in nature.
بزانکہ سیادی ءُ سیاست تھنا کار ءُ بار ءُ دکانداری ءِ بنیاد ءَ بیت۔ اووٹ بہ دے ءُ زرّ بُزور۔ الیکشن مِھم بہ کن ءُ نوکری بُزور۔ زرّ بہ دے ءُ ٹیکہ بُزور ۔پارٹی ءُ کنڈیدیٹ ھر گپ ءَ جی جی بہ کن۔ کار ءُ باری ءِ سیاست ءِ تہ ءَ سیت ءِ سیاست بیت۔ اے ترز ءِ سیاست ءَ ٹرانزیکشنل ارینجمنٹ ءُ بارگین ءِ سیاست گوش اَنت۔ مھاھدہ یک الیکشنے ءَ بِگر تاں دومی الیکشن ءَ بیت۔ مرچی کسّے یک گلے ءِ بیرک ءِ چیر ءَ اِنت گڑا باندا دگہ گلے ءِ چیر ءَ مُچ ءُ ھوار بیت۔ سیاسی سیادی سیتانی بُنیاد ءَ جوڑ بنت۔ وھدے سیت ھلاس بیت گڑا سیاسی سیادی ھم ھلاس کنگ بہ بیت۔
Transforming Leadership
ٹرانسپورمینگ لیڈرشپ راستیں ءُ آشوبی لیڈر زانگ بنت۔ اے لیڈر شپ وتی سرجمیں جذبگاں، مارشتاں ءُ واھشتاں راج ءُ راجی سیتانی واست ءَ کُربان کنت۔
ٹرانسپورمینگ لیڈرشپ ءِ کوالٹی ایش انت کہ آ لس مھلوک ءَ موبلائز کنت۔ یکجاہ ءُ یکمُشت کنت ءُ راستی ءِ بابت ءَ سماھی دنت۔ اے پیمیں لیڈرانی بابت ءَ گوشگ بیت کہ
“History is made by masses of people, not by individuals. Leaders are agents for the majority.”Nelson Mandela
راجدپترانی جوڈ کنوک لس مھلوک اِنت۔ ھما مھلوک کہ لیڈرشپ ءِ پدگیری ءَ کنت ءُ لیڈر شپ لس مھلوکانی جھگیری ءَ کنت۔ بلوچ راجمانی سیاست ءِ تہ ءَ ما گند ایں کہ لیڈرشپ گیپے بوتگ کہ آئی سبب ءَ بلوچ ءَ را باز تاوان وارتگ۔ ماں سیاسی پِڑ ءَ چہ لیڈرشپ گیپ ءَ زورآور ءَ باز پائدگ ھم چست کُتگ۔ انچش کہ وتی جوڑ کُتگیں لُچیں رھشون ءَ بلوچ راج ءِ لیڈرشپ گیپ ءَ را پُر کُتگ۔ بازیں براں رھشون رول کونفلیکٹ ءِ آماچ بوتگ اَنت، کہ آیاں بلوچ راج ءِ جھگیری کنگ ءَ سوبین نہ بوتگ اَنت۔ بلوچ راج ءَ را انچیں رھشونے ءِ لوٹ بوتگ کہ آ بلوچ راج ءِ اَسَل مانا ءَ بلوچ ءِ جھگیری ءَ کُت بِہ کن۔
ڈاکٹر ماہ رنگ ءِ لیڈرشپ: بانک ماہ رنگ ءِ لیڈرشپ ءِ مستریں سوبمندی ءِ سبب ایش انت کہ ماہ رنگ بلوچ لس مھلوک ءِ جھگیری ءَ کنگ ءَ اِنت۔ ریاست ءَ ھزاراں پندل ساز اِت کہ بلوچ راجی مُچی سوبین مہ بیت۔ استان ءَ بلوچ راجی مُچّی ءُ ڈاکٹر ماہ رنگ ءِ بگیری ءَ دو ترز کارمرز کُتگ ات۔ یک دستے ءَ زوراکی ، پورس ءُ زُلم ءِ کارمرز کُتگ ات اَنت کہ پہ بلوچ نوکیں چیزے نہ اِنت ءُ دومی دست ءَ سوفٹ پاور ءِ کارمرد کنگ انچش کہ پروکسی ءُ دری ایجنٹ ءِ پندل سازی ، نیٹورکانی بندگ ءُ پروپِگیٹیو – ناریشن ءِ جوڑ کنگ۔ آئی ایس پی آر ءِ ھمے پروپِگیٹیو -ناریٹیو کہ راجی مُچی ءِ رھشونی کنوک گوں بانک ماہ رنگ ءَ ھوار ڈنّی ءُ دری ایجنٹ اَنت ءُ آیانی مول انتشار شینگ کنگ اِنت۔ استان ءُ آئی ءِ ترامگیج ما دیست اَنت کہ بار بار پُرو پِیگیٹیو- ناریشن ءِ جوڈ کنگ ءِ جُھد ءَ ات اَنت۔ بلے آسر ایش بوت کہ استان ءَ تاکت ءُ سوفٹ پاور ءِ کارمرز کنگ ءَ ابید ھم بلوچ ءِ دست ءَ پروش وارت۔ آئشہ صدیقہ ءِ رِد ءَ ناریٹو ءِ جوڈ کنگ ءَ بی وائی سی ءَ ریاست باج بورتگ۔ جُنز رھشون جوڑ ءُ مھکم کن اَنت۔ ماہ رنگ ھما رھشون اِنت کہ آ چہ بلوچ راجی زرمبش ءِ لاپ ءَ ودی بوتگ۔ مرچی بلوچ راج کہ ماہ رنگ ءِ منّوک اِنت ءُ کسانین مُدتے ءِ تہ ءَ بی وائی سی ءَ بلوچ راج ءَ را یکجاہ ءُ یکمُشت کُتگ ءُ آئی ءِ سبب ایش انت کہ بلوچ ءُ بلوچیت، بلوچ ءِ پجار ءُ بلوچ ءِ ڈیھ ءِ گپ ءَ کنگ ءَ اِنت۔ درستاں چہ مستریں ھبر ایش اِنت کہ ریاست بلوچ چُکچینی ءِ ھلاپ ءَ اُشتاتگ۔
” The first act of genocide was the act of colonization. All other genocidal acts were secondary to that, including the acts of occupancy.”Ghilllar Michael Anderson-
بلوچ چُکچینی ءِ بگیری بی وائی سی ءِ سیاسی گھگیری ماں بلوچ راجی زُرمبش ءَ یک نوکیں ترزے ءِ سیاست اِنت۔بلوچ راج ءَ 75 سال اِنت کہ ریاستی زُلم ءُ زوراکی ءِ آماچ اِنت۔ اگاں ما ریاستی شوربندی ءَ بلوچ چُکچینی ءَ تپاس کن ایں ، گڑا ھمے گندگ ءَ کیت کہ بلوچ ءِ سیاسی چُکچینی بہ بیت کہ زرّی چُکچینی ءُ دودمانی چُکچینی بہ بنت یاکہ بلوچ ءِ بنیادی ءُ مردمی اُگبالانی ھلاپ ورزی بہ بیت۔ یاکہ اُگبالانی ھلاپ ورزی بہ بیت۔ اےسرجمینانی بنھشت کولونائیزیشن ءِ بنیاد اِنت۔ پرچا کہ چُکچینی ءِ اوّلی اَمَل کولونائیزیشن اِنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی انت