ماہ ءِ سنگتی
نوشت: سادیہ بلوچ
رجانکار : ندیم بلوچ
دی بلوچستان پوسٹ
من ترا چینکس بر گوشتگ چہ من ءَ وتی روژنائی ءَ دور بہ کن من ھر کجا بہ رواں تو من ءَ پد ءَ نیل ئے منی دل ءِ تھ ءَ پر تو مھر نیست ساری ئیں سنگتی نیست ءُ نہ من ساری ءِ وڑ ءَ گون تو سیادی کنگ لوٹ ایں آ یک مدتے ات من ترا چارت ءُ منی دل ءِ دھک دھک تیز بیان بوت اَنت۔ آ دگہ وھدے ات من ترا بگل ءَ کرت ءُ مھر کرت-
تو منی مھروان ات ئے۔ منی زند ئے رژن ءُ منی گریوگ ءُ تھاریں شپانی سنگت ءُ ھمسپر ات ئے۔ من ترا پد ءَ نہ لوٹ اں۔ منی دل پروشتگ چَر تو ءُ چہ تئی روژنائی ءَ من ھر ماہ تئی وداریگ بوتگ آں منی چم جنوک ات انت کجام وھد ءَ تئی دیدار بیت ءُ کجام ساھت ءَ من ترا بگل ءَ کن ایں وتی دل ءِ درد ءُ رنج ترا بہ گوشیناں ھمک ھما گپ من تئی جِند ءَ گوشدارینت ءَ کُرتگ ءُ ترا گوشگ ءَ پد من ھرس ریچ آں بلے مروچی تو من ءَ ھچبر دوست نہ بہ ئے منی دل شتگ چہ تو مروچی تو ھم وتی دیم گردینتگ چہ من ءَ تو من ءَ گوشدارگ یل داتگ تو وتی سیادی چہ من ءَ پروشتگ۔
زیبل ءَ وتی سر جھل کناں ءُ ھرس ءِ گرم گرم ءَ چہ آئی ءِ کلکاں تچان ات انت ھمینکس گلگ دار ات مرچی ھما سنگت آئی ءِ مدام گونائی گپ ءَ کرتگ۔ وتی درداں بیان ءَ کرت بلے مروچی آئرا گوں بے رھی ءَ چارگ ءَ ات۔ یک مزنیں آڑسندھگے کشان ءَ زیبل وتی سر برز کرت ءُ ماہ ءِ روژنائی آئی ءِ دیم ءَ برش دیان ات ھرس ریچان ات انت۔ آئی ءَ ماہ ءَ چارت ءُ گشت کجام وھد ءَ منی دل جوان ات من گل ءَ بال ات انت گوں من ھچ گلگ نیست ات من ءَ گون تو مھر ات ترا بگل ءَ کرت گون تو سیادی ءَ کُرتگ تئو ھم مھر ءَ کُرت۔ نوں اے جھام اے مھلوک ءِ بے پرواھیں دل یک جنکے ءِ آئرا چُنڈان ءُ وران اِنت تو زان ئے ایشرا اے دردی ئیں جھان ءَ باز درد دات ایوک ءَ ھِشتے۔ یک راجی ئیں دود ءُ ربیدگاں آئی ءِ پادان ءُ زمزیر اش بست۔ نوں تو ھم من ءَ ایوک ءَ اِشت ئے تو ھم وت واھشت بوت ئے تو ھم گوں اے جھان ءِ دوداں آوار بوت ئے وتی روژنائی چہ من ءَ پُلِ ات ءُ من ترا ھچبر نہ بکشیں تو وتی روژنا دور کن چہ من ءَ من ھر کجا شت اوں منی زند ءَ گوں مہ بہ ئے تو ھم زالمے ئے تو ھم اے دردی ئیں جھان ءِ تھ ءَ ایوک ءَ اِشت ئے تو ھم یک جوانیں دلے لوٹ ئے۔ ھمے ساھت ءَ زیبل ءِ ماس آئرا گوانک جت ءُ گشتے اُو شوم بیا چی کن ئے چو گنوکانی وڑ ءَ نِشتگے گوں ماہ ءَ گپ کن ئے۔ بیا پِس تئی چاہ لوٹ ایت۔ زیبل ءَ ھرس وتی پھک کرت انت ءُ گُدا سرا کرت کوٹی ءِ نیمگ ءَ رھادگ بوت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔