بیگواھیں مردمانی کھولاں چاگردی رسانکدر ءَ کمپئین برجم دارگ جتگ

مشکے ءِ جھمنند ممتاز بلوچ ءِ برازتک بانڑی بلوچ ءَ گْوشتگ کہ منی نامو ممتاز بلوچ شش دسمبر 2022 ءَ چہ ھُزدار ءَ سیمی رند ءَ زورانسری آوار جنی ءِ نشانگ کتگ-

آئی ءَ گوشتگ کہ ما گوستگیں سالے نیم ءَ چہ کجام درد ءُ رنجاں گوزگ ءَ ایں- چہ ھُزدار ءَ زورانسری آوار جنی ءِ نشانگ کنگ بیتگیں کبیر بلوچ، عطااللہ ءُ مشتاق بلوچ ءِ کھول گوستگیں پانزدہ سالاں چہ اے درد ءُ رنجاں گوزگ ءَ اَنت-

آئی ءَ گْوشتگ کہ بیا اِت اے کھول ءِ توار جوڑ بہ اِت بلوچ وائس فار بلوچ جسٹس ءِ نیمگ ءَ چہ بیست ھپت مارچ دوھزار بیست چار ءَ کبیر بلوچ، عطاءاللہ ءُ مشتاق بلوچ ءِ یل کنائینگ ھاتر ءَ X بیگاہ ءِ ھپت ءَ بگر تاں دوزادہ کمپین برجم دارگ بیت- ما شمارا دُرستاں اے کمپین ءَ بھر زیرگ دزبندی ءَ کن ایں- بیگواھیں کبیر بلوچ ءُ آئی ءِ سنگتانی ءُ کھول توار جوڑ بہ بہ اِت-

ھاران ءِ جھمنند زورانسری بیگواھیں شاہ فھد بلوچ ءِ گھار نادیہ بلوچ ءَ گْوشتگ کہ منی برات شاہ فھد دوھزار بیست دو ءَ چہ ھاران زورانسری بیگواہ کتگ-

آئی ءَ گْوشتگ کہ زورانسری آوار جنی ءِ انسانیت بگیری ءَ یک بلاھیں جرمے، بیا اِت درست یکجاہ بہ ئے ایں اے جرم بگیری ءَ توار چست کن ایں- آئی ءَ گْوشتگ کہ من سرجمیں رسانکدری پُرکاراں چہ دزبندی کن آں کہ دوھزار نُھ ءَ چہ ھُزدار ءَ زورانسری بیگواہ کنگ بیتگیں کبیر بلوچ، عطااللہ بلوچ ءُ مشتاق بلوچ ءِ یل کنائینگ ءِ ھاتر ءَ بیست ھپت مارچ ءِ بیگاہ ءِ ھپت ءَ بگر تاں دوازدہ کمپین ءَ برجم دار ایں، شما درست اے کمپین ءَ بھر بزور اِیت زورانسری آوار جنی ءِ بگیری ءِ جنگ ءَ کھول ھمراھداری بہ کن اِت-