چیئرمین زاھد ءُ اسد بلوچ ءِ زورانسری آوار جنی ءَ دہ سال سرجم بوتگ- بی ایس او آزاد

بی ایس او آزاد ءِ بُنجاھی جارکش ءَ شنگ کتگیں درشان ءِ تہ ءَ گْوشتگ کہ گل ءِ بُنجاھی چیئرمین زاھد بلوچ ءُ جونئیر جوائنٹ سیکرٹری اسد بلوچ ءِ زورانسری آوار جنی ءَ دہ سال سرجم بوتگ بلے میان استمانی ادارھانی نیمگ ءَ سرجمی ءَ بے توار جوڑ بوتگ اَنت –

آئی ءَ گْوشتگ کہ ھما ادارھاں زاھد بلوچ ءِ یل کنائینگ ءِ دلجمی داتگ آ ھم سرجمی ءَ بے توار جوڑ بوتگ اَنت کہ پہ آیاں یک جُستے- زاھد ءُ اسد بلوچ شال ءَ گوستگیں چیئرپرسن بانک کریمہ ءُ دگہ دو سنگتانی چمّانی دیماں چست کتگ اَنت کہ آیانی گواھی ءَ شھید لمہ ءِ وتن بانک کریمہ ءَ باز رند ءَ داتگ- ریاست زاھد ءُ اسد بلوچ ءَ را ماں زنداناں بند کنگ ءَ بلوچ ورنایانی تہ ءَ آیانی سَسّا ءَ ھلاس کُت نہ کن اَنت، ورنایانی ءُ جُھدکارانی واستا آ مروچی ھم بامرد زانگ بنت- سیاسی راھشوناں اے وڑ زورانسری آوار جنی ءِ نشانگ کنگ آیانی ساڑی بیگ ءَ نہ منّگ بے سوبیں ریاست ءِ تچکی ءَ پروش نشانی اِنت-

جارکش ءَ گْوشتگ کہ زاھد بلوچ گوستگیں دہ سالاں تاں زندانانی تہ ءَ بند کنگ اے گپ ءِ منانک ھست کہ زورگریں پاکستان بلوچستان ءَ سیاسی زرمبشت ءَ چہ سرجمی ءَ ترس آماچ اِنت- سیاسی جُھدکاراں نشانگ کنگ ءُ آیاں در انسانی آزار جاھاں بند کنگ ریاستی پروش ورگ نشانی اِنت – چیئرمین زاھد ءُ اسد بلوچ ءَ ھوار بلوچستان ءَ گل ءِ ھزارانی سنگت زورانسری آوار جنی ءِ نشانگ کتگ اَنت، اے وھد ءَ تاں گل ءِ چیئرمین ءَ ھوار گوستگیں رسانکدری کارگشاد شبیر، کمک چیئرمین زاکر مجید بلوچ ءُ ھزارانی دگہ سنگت زورانسری آوار جنی ءِ نشانگ کتگ اَنت وھدے کہ گل ءِ باسکانی لاش دور دیگ بوتگ اَنت – بلوچ سیاسی جُھدکارانی واستا اے وڑیں جاور جوڑ کنگ بوتگ اَنت کہ آ چہ بندیگ کم نہ اِنت ءُ سرجمیں بلوچستان چہ پوج ءَ پُر کتگ ھالانکہ زانشتی ادارھانی تہ ءَ ھم پوج نادینتگ- زاھد ءُ اسد بلوچ ءَ ھوار دگہ سیاسی جُھدکارانی پہ سلامتی یل کنائینگ باور کنائینگ انسانی ھکانی ادارھانی زمہ واری اِنت- چیئرمین زاھد بلوچ ءَ را بلوچ بیگ ءُ وتی مردمانی ھاتر ءَ جُھد کنگ ءِ پُشدر ءَ زورگریں پوج ءَ بازیں سالاں چہ زورانسری بیگواہ کتگ- زاھد ءِ یل کنائینگ ھاتر ءَ گل نیمگ ءَ چہ کراچی پریس کلب دیم ءَ بیست شش روچاں تاں شُدکُشیں ھڑتال ھم کنگ بوتگ وھدے کہ میان استمانی ادارہ کیس ءَ نبشتہ کنگ ھمراھی ءَ بلوچستان ءُ سرجمیں جھان ءَ زاھد، اسد ءُ دگہ زورانسری آوار جنگ بیتگیں مردمانی ھاتر ءَ زھرشانی کنگ بوتگ بلے ریاستی ادارہ تاں انو ھم اے دْرچ ءِ برجاہ داشتگ-

گُڈی ءَ آئی ءَ سرجمیں انسانی ادارھاں چہ دزبندی کنان ءَ گْوشتگ کہ آ زاھد بلوچ ءُ اسد بلوچ ءِ یل کنائینگ ھاتر ءَ گل چہ کنگ بیتگیں وتی کول رِد ءَ ریاست زور بدے اَنت ءُ آیانی یل کنائینگ ءَ وتی کرد ءَ پیلو بکن اَنت-

وھدے کہ چاگردی رسانکدر ءَ SaveZahidAndAsadBaloch# ءِ ھیش ٹیگ ءِ یک کمپینے برجم دارگ بیت کہ سرجمیں مردماں گوں بھر زورگ ءِ دزبندی کن ایں