نبشتانک: راشد حسین کٸے اِنت؟
نبشتہ کار: برزکوہی
رجانکار: مھروان مِھر
دی بلوچستان پوسٹ
بلوچستان ءِ راجدپتری ھند ءُ نامداریں قبیلھے ءَ چہ سیادی داروکیں راشد حسین یک سیاسی جھدکارے.راشد حسین ءِ سرجمیں کھول چہ 2010 ءَ پاکستان ءُ آٸی ءِ جوڑ کتگیں چیریں اداراھانی زوراکی ءِ آماچ انت درستاں ساری ھزدار ءَ چہ پاکستانی چیریں اداراھاں آئی ءِ چاردہ (14) سالی ناکوزھگ مجید زھری بیگواہ کنگ بیت ءُ آٸی ءِ تیر سپتگیں کُنٹ دور دیگ بیت ایشی ءَ پد ھزدار ءِ نامداریں ءُ انسانیت دوستیں 70 سالی ئیں کماش ھاجی مھمد رمضان زھری مجید ءِ زھری ءِ پت پاکستان ءِ چیریں ادارھاں جت ءُ شھید کت ءُ دیمترا کھول ءِ مردم دزگیر کت انت ءُ گس ءُ روزگار ءِ آسراتی مانداشت انت ءُ مردم بیھار دات انت تیوگیں کھول یک ازیتناکیں زندے گوازینگ ءَ ات ءُ گڈسر ءَ آ لاچار بیت انت ءُ وتی کروڑانی مڈی ءُ روزگار یلہ کُت انت دبٸی ءَ شت انت ءُ پاکستانی لشکر ءُ دلاراں آیانی گس،زمین،روزگار ءِ آسراتی ءُ موٹل وت زرت انت-
اے وٸیل ءَ سالے پد راشد حسین ءِ مستریں برات ضیاء جان ماں ھزدار زھری ءَ پاکستانی لشکر ءَ گوں میڑ ءَ بیران بیت اے وھد ءَ کھول ءِ بازیں مردم دزگیر کنگ بنت ءُ بازیں مردم ازیت دیگ بیت ءُ یلہ کنگ بنت کہ آیانی زھنی جاور شر نہ بنت البت اے دئیں سالاں پاکستانی لشکر ءُ چیریں ادارھانی کہ اے کٸول ءِ گون ءَ زوراکی ءُ ناروائیں سیادی بیتگ بلوچ دپتر اے داستان ءِ نبشتہ کنگ ءَ پچ لرز ایت بلٸے بژن کہ انسانی ھکانی پھریزگ ءِ ادارہ وتی جاہ ءَ بلوچ راج ءِ لس مھلوک ءَ ھم اے کھول ءِ باروا سرپدی نیست اگاں سرپدی است ھم گڑا اے کھول ءِ ازیتناکیں زند ءِ باروا راستیں سرپدی نیست-
راشد حسین ھم چہ پاکستان ءِ زوراکیانی آماچ بٸیگ ءَ پد دبٸی ءَ پہ لاپ ءِ شوھازگ ءَ روت.26 دسمبر 2018 ءَ وھدیکہ آ وتی کزنانی ھمراہ بیت ءُ پہ روزگار ءِ ھاترا درکپ ایت گڑا امارات ءِ چیریں ادارھانی مردم آیانی موٹل ءَ دار انت ءُ راشد حسین ءَ گوں وت بر انت ھمے روچ ءَ راشد حسین ءِ کھول،بلوچ سیاسی جھدکار ءُ انسانی ھکانی ادارھانی سروک جھد کن انت کہ آٸی ءِ باروا چیدگے دست بہ کپ ایت کہ آ کجا انت بلے درست بے سوب بنت کساس ھپتگے ءَ پد امارات ءِ چیریں ادارھانی باسک راشدحسین ءَ آٸی ءِ کزن ءِ گس ءَ کار انت گوں راشد حسین ءِ گندگ ءَ انچوش گمان بیت کہ آ لٹانی دیمپان بیتگ آ گس ءَ پٹ ءُ پول کن انت ءُ راشد حسین ءِ گوانکو ءِ درگت ءُ جست ءُ پرس ھم کن انت ءُ کٸول ءِ مردماں ھمے بیھار دینت کہ نی پہ شما ھیر نہ نیست.
ایشی ءَ پد راشد حسین ءِ باورا کس ءَ سرپدی نہ بیت 27 جنوری 2019 ءَ ماں پاکستانی رسانکدر ءَ ھمے ھال شنگ بیت کہ پاکستان ءِ پولیس ءِ پلوا چینی قونصلیٹ ءِ سر ءَ بیوکیں ارش ءِ کمکار راشد حسین ماں شارجہ ءَ دزگیر کنگ بیتگ آ گش انت کہ اُرش ءِ سھت ءَ راشد حسین ءَ چہ جتاٸیں اکاٶنٹاں 9 لکھ کلدار دیم داتگ ءُ دیمترا اے ھم گش انت کہ راشد حسین ارش ءِ ساھت ءَ کراچی ءَ بیتگ چوناھا پاکستان ءِ بُن ھشت چہ دروگ ءُ دگابازی ءَ ایر کنگ بیتگ ءُ چہ بندات ءَ پاکستان ءِ ھون ءِ تہ ءَ دورگ ءُ دگابازی ھوار انت ایشی ءِ سر ءَ تران کنگ وھد ءِ زوال کنگ اِنت-
ھبکہ بٸیگ ءِ ھبر ایش انت کہ ارب راج وتی راجدپتر ءُ دودانی وجہ ءَ درائیں دگنیا ءَ زانگ بیت ءُ دومی ھبر اربانی گوں بلوچ راج ءَ کوھنیں ءُ شوکیں سیادی یے ھست ءُ اے سیادی مروچی ناں بلکیں چہ کرناں ھست انت گڑا مروچی چون ارب راج ءَ بلوچ راج چہ وتی نگاھاں اندیم کت وتی شرپداریں ریاست ءِ شرپ لگت دات ءُ یک راہ دروہ ءُ دروگ بندیں پنجابی، آئی ایس آئی ءُ پاکستان ءِ چیریں ادارھانی گشگ ءَ راشد حسین بیگواہ کُت نی چو ھم شبین بیت کہ راشد حسین ءَ پاکستان ءِ ادارھانی دست ءَ دنت ءُ باندا پاکستان ءِ ادارہ راشد حسین ءِ تیرامبارتگیں کنٹ ءَ ماں گیابانے ءَ چگل دینت یاکہ چوں گوست ءَ آئی ءَ دروگیں میڑے ءَ شھید کن انت گڑا اے کار ارب راج ءُ ارب امارات ءِ دیم ءِ سر ءَ یک شھماتے نہ انت دگہ چی یے؟ آیا امارات اے منانک دات کنت کہ راشد حسین ءَ چہ وتی اکاٶنٹ ءَ زر دیم داتگ یاکہ امارات ءَ پاکستان ءِ دروگ ءَ ابید راستیں منانک دات کنت کہ چینی قونصلیٹ ءِ سر ءَ بیتگیں ارش ءِ کمکار راشد حسین بیتگ؟. اگاں کمکار بیتگ ھم گڑا امارات وتی جوڑکتگیں کانودانی بنیاد ءَ آٸی ءِ سر ءَ کیس بہ کنت اگاں راشد حسین ءَ پاکستان شھید بکنت گڑا آٸی ءِ کوش ءَ امارات ءِ دست مان نہ بیت؟پنجابی ءِ وڑیں دروگ بندیں ریاستے ءِ واستا امارات گوں بلوچ راج ءَ وتی کرنانی سیادی ءَ پروشیت ءُ دژمنی ءِ تہ ءَ مٹ کنت آیا اے شھزانتی یے؟ راشد حسین ءِ وٸیل یک ارزشتداریں وٸیلے اگاں پنجابی وتی دروگبندی ءُ مکاری ءَ سوبین بیت گڑا ارب ءُ بلوچ راج ءِ کرنانی سیادی ءِ دروشم دژمنی ءِ تہ ءَ مٹ بیت-
اے وٸیل ارب ءُ بلوچ راج ءَ گوں جھلانکی ءَ ٹپاسگی انت ءُ اے وٸیل یک انسانے ءِ یاکہ یک کھولے ءِ سوال نہ انت بلکیں دوئیں راجانی میان ءَ کرنانی سیادی ءِ سوال انت اگاں پنجابی وتی مکسد ءَ سوبمند بیت گڑا پہ آیوکیں وھداں امارات پہ بلوچاں آھانی دومی گس ناں بلکیں مساٸلستان جوڑ بیت ءُ پنجابی ءِ جھد ھمیش انت کہ اے راجانی میان ءِ سیادی پروشت ءُ پروش ءِ آماچ بہ بیت.راشد حسین ءِ ناھکیں دزگیری اے سیادی ءِ پروشگ ءِ بنداتی گام انت.برھال دوئیں راجاں گوں ھورت چاری ءَ مسلہ چارگی انت ءُ باندات ءِ باروا جیڑگی انت ءُ پنجابی راج ءِ مکسد زانگی انت-
ھمینچو کہ بیت کنت مارا اے وئیل راجی انسانی ءُ اکلاکی ھوالہ ءَ شنگ ءُ تالان کنگی انت.پہ ترسگ ءُ ھاموش بٸیگ نا ایوک ءَ راشد حسین ءِ وڑیں زانتکاریں نوجوانے ءِ جان ءِ ھترہ بیت بلکیں دوئیں راجانی میان ءِ سیادی گڑومنج ءِ آماچ بیت کہ چہ کرناں نہ بیتگ ءُ آیوکیں وھد ءَ ھم بائد انت مہ بیت چیاکہ دویں راجانی باندات گوں یکے دومی ءَ بندوک اِنت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔