برلن ءَ باھوٹی عاطف بلوچ ءَ ملک ءَ در کنگ ءِ بگیری ءَ زھرشانی

جرمنی ءِ بنجاھی شھر برلن ءَ مروچی دو شمبے ءِ روچ ءَ باھوٹی عاطف بلوچ ءِ چہ ملک ءَ در کنگ ءِ بگیری ءَ بلوچ کمیونٹی ءِ نیمگ ءَ زھرشانی کنگ بوتگ –

اے زھرشانی سھبی بندات کنگ بوتگ اے میان ءَ بلوچ سیاسی باسکاں وزارت داخلہ ءِ دیم ءَ نندانک جتگ ءُ وتی زھرشانی نبشتہ کنائیں اِتگ کہ اودا جتا جتائیں پاٹیانی باسکاں وھد وھد ءِ سر ءَ زھرشانی ءَ بھر زرتگ –

ھمے درگت ءَ بی این ایم جرمنی ءِ سرکماش اصغر علی ءُ بلوچ کمیونٹء ءِ الہی بخش ءَ گوشتگ کہ عاطف بلوچ یک سیاسی باھوٹی ءِ کہ سال دوھزار پانزدہ ءَ جرمنی ءَ اتکگ ـ اے ھشت سالانی میان ءَ آئی ءَ بلوچستان ءِ تہ بووکیں ریاستی زوراکیانی بگیری ءَ توار چست کتگ ءُ زھرشانیانی بھر جوڈ بوتگ ـ ھشت سالاں پد آئی ءَ ملک ءَ در کنگ آئی ءِ زند ءَ ھترہ انت –

آیانی گوشگ ات کہ جرمنی ءِ سرکار ھمے زوتاں عاطف ملک ءَ در کنگ ءَ بہ داریت ءُ آئی ءِ جان ءَ بہ رکین ایت –

آئی گوشگ ات کہ بلوچ ادا مالی ناں بلکنہ سیاسی باھوٹی انت آ ایندگہ پاکستانیانی وڈا مالی باھوٹی چارگ مہ بنت پرچاکہ بلوچ سیاسی باسک پاکستانی زوراکیانی بگیری ءَ جھدے بھرے انت ـ ھمے درگت ءَ پمپلٹ ھم بھر کنگ بوتگ ءُ ھمے ادارھاں یک یاداشت ءِ ھم دیم داتگ –