منی برات سیف اللہ رودینی یل کنگ بہ بیت – سیف اللہ ءِ گھار

زورانسری آوار جنگ بوتگیں سوراب ءِ جھمنند سیف اللہ رودینی ءِ گھار فرزانہ رودینہ ءَ وتی برات ءِ وش ءُ سلامتی یل کنگ ءِ لوٹ کتگ ءُ گوشتگ کہ انسانیت ءِ نام ءَ منی برات یل کنگ بہ بیت –

آئی ءَ دیمتر ءَ گوشتگ کہ تھنا منی برات بیگواہ کنگ نہ بوتگ بلکنہ مئے وشی ھم بیگواہ کنگ بوتگ انت مئے واھشت لگتمال کنگ بوتگ انت – بیگواھیں برات ءِ ساڑی نہ بوگ ءَ مئے زند ازاب ءِ تہ ءَ گوزگ انت، برات ءِ زورانسری آوار جنی ھبر درشان کنگ نہ بنت ما ازاب ءِ تہ ءَ انت مناں منی برات سیف اللہ واتر دیگ بہ بیت –

آئی ءَ چہ انسانی ھکانی باسک ءُ سوشل میڈیا ایکٹوسٹاں گوں لوٹ کتگ گوشتگ کہ منی برات سیف اللہ ءِ زورانسری آوار جنی ءِ بگیری ءَ توار چست بہ کناں، برات ءِ زورانسری آوار جنی ءَ مئے سرجمیں زند بے مانا جوڈ بوتگ، وشی ءُ واھشت ارسانی تہ ءَ بدل بوتگ انت – انسانی ھکانی گلاں گون دزبندی کنیں کہ منی برات ءِ یل کنائینگے ھاتر ءَ مئے کمک ءَ بہ کن انت آئی ءِ وش ءُ سلامتی یل کنائینگ ءَ توار چست بہ کن انت –

زانگ بہ بیت سیف اللہ رودینی ء داد خدا سوارب ءِ جھمنند انت ءُ پولیس ءَ کار ءَ بوتگ کہ آ بیست ءُ دو نومبر سال دوھزار سینزدہ ءَ گِس ءَ دراتکگ ءُ ھزدار ءَ وتی کار ءِ سر ءَ رؤگ ءَ بوتگ کہ ھزدار ءُ سوراب ءِ میانی ھند راوہ ءَ سلاہ بنداں زورانسری آوار جتگ ءُ گوں وت برتگ –

دمگی پولیس ءُ لیوز ءَ آئی ءِ ارزی نبشتہ نہ کتگ پدا آئی ءِ کھول ءَ بیگواھیں مردمانی کمیشن ءَ گوں دزبندی کتگ کہ سیف اللہ ءِ آوارجنی ءِ ارزی نبشتہ کنگ بہ بیت –

کساس ھشت سالاں پد کمیشن ءِ گوشگ ءِ پد ءَ یازدہ مئی سال دوھزار ءُ بیست ءُ یک ءَ دمگی لیویز ءَ ارزی نبشتہ کتگ بلے تنی وھدی سیف اللہ ءِ ھچ وڈیں ھال بود نیست –

سیف اللہ رودینی ءِ کھول ءِ گوشگ انت کہ انسانی ھکانی ادارھاں ھوار درسیں میان استمانی ادارہ بلوچستان ءَ زورانسری آوارجنیانی جیڑو ءَ ھچ دلگوش دیگ ءَ نہ انت کہ چریشی ءَ بلوچستان ءِ تہ ءَ انسان نیستی ءِ ودی بوگ ءَ انت –