روکپتی بلوچستان ءَ ایرانی آمیدگس ءِ پرمان ءَ یکشل ءَ بندیگیں مردم پاھو دیگ بوگ ءَ اَنت کہ گوستگیں سَے روچانی توک ءَ روکپتی بلوچستان ءَ بندوکیں سَے مردم پاھو دیگ بیتگ اَنت-
سر بیتگیں اھوالانی رد ءَ مروچی سھب ءَ ایرانی آمیدگس ءِ پرمان ءَ زاھدان ءِ مزنیں بندیگ جاہ ءَ یک مردمے پاھو دیگ بیتگ –
پاھو دیگ بیتگیں مردم ءِ پجار موسیٰ شاہ بخش ء اکبر جھمنند ھاجی آباد زاھدان ءِ نام ءَ زانگ بیتگ-
اھوالانی رد ءَ موسیٰ ایرانی سال سیزدہ سد ءُ نود ءُ ھشت ءَ ماں نشہ باپاری ءِ بھتام ءَ ایرانی انکلاب ءِ پھزداراں دزگیر کتگ ءُ مروچی آ آمیدگس ءِ ھکم ءَ پاھو دیگ بیتگ-
روکپتی بلوچستان ءَ بازیں وھداں چہ اود ءَ مردم ھمے داب ءَ پاھو دیگ بوگ ءَ اَنت کہ ایشانی سر ءَ اود ءَ بندوکیں مردم ایراد ھم گرگ ءَ اَنت-
لس سیاسی ءُ نیکراھی پاٹیانی گوشگ اِنت کہ مردماں ایرانی سرکار روزگار نہ دنت ءُ چریشی ءِ پژدر ءَ مردم لاچار اَنت ءُ ھمے مردم کُشیں کار ءَ وتی لاپ ءِ والینگ ءَ روزگار بہ کن اَنت-
ایران ءَ لس مردمانی پاھو دیگ ءِ پژدر ءَ جھانی انسانی ھکانی گل ھم وھد وھد ءِ سر ءَ ایراد گرگ ءُ بندیگیں مردماں لس آمیدگساں پیش کنگ ءُ گپانی موکل ءِ دیگ ءِ دزبندی ءَ کنگ ءُ پیداک اَنت-