بلوچستان: پوج ءِ سر ءَ اُرش، کیپٹنے ءَ ھوار چار کارندہ کشگ بیتگ اَنت

بلوچستان ءِ دمگ شیرانی ءَ پولیس ءُ ایف سی ءِ چوکیانی سر ءَ بیوکیں اُرشاں پاکستانی پوج ءِ کیپٹنے ءَ ھوار چار کارندہ کُشگ بیتگ اَنت-

رپورٹ ءِ رد ءَ شیرانی ھند دانہ سر ءَ پولیس ءُ ایف سی ءِ جتا جتائیں چوکی نشانگ کنگ بیتگ اَنت-

اُرشکاراں بنداتی ءَ دزبمب چگل داتگ ءُ پد ءَ تیرگواری کتگ چریشی ءِ آسر ءَ سَے پولیس ءُ ایف سی ءِ یک کارندھے کُشگ بیتگ اَنت-

کُشگ بیتگینانی توک ءَ کپٹن سعید، نائب سوبیدار ءَ ھوار دگہ سَے کارندھانی لاش پوج ءِ ھیڈکوارٹر ءَ برگ بیتگ اَنت –

سکیورٹی بنشون ءِ رد ءَ سر بیتگیں اھوالانی تہ ءَ تیرگواری ءِ درچ کساس دو اداراِ داں برجاہ بیتگ-

ھمے وھد ءَ گمانی رنگ ءَ یک اُرشکارے ھم جنگ بیتگ ءُ سکیورٹی لشکر ءِ تیرگواری ءَ نشانگ بیتگیں اُرشکار ءِ ھمراھاں آ گوں وت برتگ –

سپرنٹنڈنٹ پولیس (ایس پی) عرفان علی ءِ رد ءَ شمبے ءُ یکشمبے ءِ میانی شپ ءَ دانہ سر ءَ چیک پوسٹانی سر ءَ اُرش کنگ بیتگ – چریشی ءَ پولیس ءِ یک آفیسرے ءَ ھوار سَے کارندہ کُشگ بیتگ اَنت-

شیرانی ءِ ڈپٹی کمشنر بلال شبیر ءَ گوشتگ ’ تیرگواری ءِ آسر ءَ یک اُرشکارے کشگ بیتگ ءُ دو زدگ بیتگ اَنت، زدگ بیتگیں اُرشکار وتی ھمراھاں گون وت برگ ءَ سوبمند بیتگ اَنت ءُ کشگ بیتگیں اُرشکار ءِ لاش انسداد دھشتگردی پولیس ءِ گور ءَ اِنت ‘-

آئی ءِ گوشگ ات کہ کانونداریں ادارھاں دانہ سر ءُ دگی ھند ءُ جاھانی راہ ءُ دربستگ اَنت-