زرباری ھراسان ءَ سیادی داروکیں پت ءُ چک ماں روکپتی بلوچستان ءَ ایرانی لشکر ءِ تیرگواری ءَ بیران

استان ھراسان ءِ زرباری ھنداں سیادی داروکیں تیل کشیں پت ءُ زھگ ماں روکپتی بلوچستان ءِ ھند نھبندیان ءَ ایرانی لشکر ءِ تیرگواری ءَ بیران بیتگ اَنت –

گیشیں اھوالانی رد ءَ روکپتی بلوچستان ءِ دمگ بھبندیان ءَ دیم پہ زاھدان ءَ روکیں تیل کشین گاڑی ءِ سر ءَ ایرانی لشکر ءَ تیرگواری کرتگ ءُ چریشی ءَ چہ پت ءُ زھگ بیران بیتگ اَنت-

بیران بیتگیں مردمانی پجار چِل ءُ یک سالیگیں حبیب اللہ یار مھمد ءُ مھمد امین ء حبیب اللہ ءِ ناماں زانگ بیتگ اَنت ھردوک پت ءُ زھگ اَنت استان ھراسان ءِ زرباری دمگ حسین آباد تاجکوہ زیرکوہ ءِ نندوک گوشگ بوگ ءَ اَنت-

اھوالانی رد ءَ حبیب گوستگیں بازیں وھداں بے روزگار بوگ ءَ پد آئی ءُ تیل کشی ءِ باپارے بندات کتگ ءُ چریشی ءَ چہ آ تیل کشی ءِ باپار ءَ بیتگ –

اھوالانی رد ءَ آئی ءِ گاڑی ءِ سر ءَ ایرانی پھزداری واکداراں تیرگواری کرتگ ءُ چریشی ءَ چہ گاڑی کلٹی بیتگ ءُ ھردوکیں پت ءُ زھگ بیران بیتگ اَنت-

زانگ بہ بیت روکپتی بلوچستان ءَ بندوکیں تیل کش ھمک وھد ءَ ایرانی لشکر ءِ تیرگواری ءِ آماچ بوان اَنت –