ھزدار ءُ پنجگور ءَ لشکر کشی، چہ چماں کوریں مردمے ءَ ھوار دو مردم بیگواہ

سربوتگیں ھالانی رِد ءَ ھزدار ءَ پاکستانی پوج ءَ بیڑ برتگ ءُ گس گساں پٹ پول کنگ انت، وھدیکہ دومی نیمگ ءَ پنجگور ءَ پاکستانی پوج ءَ لشکر کشی ءِ میان ءَ چماں چہ کوریں مردمے ءَ ھوار دو مردم زورانسری آوار جتگ ءُ بیگواہ کتگ انت –

گیشیں ھالانی رِد ءَ پاکستانی پوج ءَ ھزدار ءِ شھر وتی انگیر ءَ کتگ ءُ پٹ پول کنگ انت – ھالانی رِد ءَ پاکستانی پوج ءَ سرجمیں راہ ءُ در بستگ انت وھدیکہ پوجی کارمند گسانی تہ ءَ پُترگ ءُ پٹ پول کنگ ءَ انت –

پوج ءِ نیمگ ءَ دمگی مردمانی پجار ءُ گسانی پٹ ءُ پول برجاہ انت –

زانگ بہ بیت گوستگیں شپ ءَ ناشناسیں مردماں یک سرکاری بلڈنگ ءِ سر ءَ دزبمب اُرش ءِ کتگ بوتگ – اُرش ءَ محمد زاہد ءُ حمید نامیں دو کارمند زدگ بوتگ انت –

دومی نیمگ ءَ چہ بلوچستان دمگ پنجگور ءَ ھال آیگ ءَ انت کہ پاکستانی پوج ءَ گوستگیں شپ ءَ بیڑ برتگ ءُ دو مردم زورانسری آوار جتگ ءُ بیگواہ کتگ انت –

گیشیں ھالانی رِد ءَ دوشی شپ ءِ نھنگام ءَ پاکستانی پوج ءَ پنجگور ءِ دمگ بونستان ءَ بیڑ برتگ ءُ چماں چہ کوریں مردمے ءَ ھوار دو مردم زورانسری آوار جتگ ءُ بیگواہ کتگ انت –

آوار جنگ بوتگیں مردمانی تہ ءَ وسیم ء عبدین ءُ زاکر ء رحمت ھوار انت – زاکر ءِ درگت ءَ ھمے گوشگ بوگ ءَ انت کہ آ چماں چہ کور انت –

اھوالکار ءِ رد ءَ پاکستانی پوج ءَ لشکر کشی ءِ میان ءَ زھگ ءُ زالبول ھم لٹ شاپ کتگ انت –