روکپتی بلوچستان:ایرانی لشکر ءِ تیرگواری ءَ دو کس بیران ءُ زدگ، یکے بیگواہ

روکپتی بلوچستان ءِ سیمسری ھند ءَ ایرانی لشکر ءِ تیرگواری ءَ ورنایے بیران ءُ یکے ٹپی بیتگ ءُ ھمے میان ءَ یک مردمے لشکر ءَ آوار جتگ ءُ گون وت برتگ –

گیشیں ھالانی رد ءَ بیران بیتگیں ورنا ءِ نام الاھی ء رحیم بخش ءُ ٹپی بوتگیں مردم ءِ پجار نواب نوھانی ءِ نام ءَ زانگ بیتگ-

اھوالانی رد ءَ بیران بیتگیں ورنا الاھی روکپتی بلوچستان ءِ ھند باھو ءِ میتگ ریمدان ءِ جھمنند اِنت، ٹپی بیتگیں ورنا نواب نوھانی رودراتکی بلوچستان ءِ سیمسری میتگ گوھرگ ءِ جھمنند اِنت-

ھمے وڑ ءَ ھمے میان ءَ لشکر ءَ یک ورنایے آوار جتگ ءُ گون وت ھم برتگ کہ آئی ءِ پجار عارف ءِ نام ءَ زانگ بیتگ ءُ عارف ھمے مردمانی ھمراھی ءَ ھوار بیتگ-

اھوالانی ءِ رد ءَ مرچی بانگواہ ءَ ایرانی لشکر سپاہ ءَ مورتان ءَ آیانی گاڑی ءِ سر ءَ تیرگواری کرتگ کہ چہ ایشی ءَ یک ورنا یے بیران ءُ یکے ٹپی بیتگ کہ آئی ءِ جاور ھم ناگیگ اَنت۔

داں گُڈی ھالانی رِد ءَ بیران بیتگیں ورنا ءِ جون ءُ زدگیں ورنا ھر دو ایرانی لشکر ءِ دست ءَ بیتگ اَنت ءُ انگت کھولاں دیگ نہ بیتگ اَنت-

زانگ بہ بیت کہ بلوچستان ءِ سیمسری دمگاں ھمک سال چہ ایرانی ءُ پاکستانی لشکر ءِ تیرگواریاں دھانی کساس ءَ بلوچ ورنا بیران بیگ ءَ اَنت-

رودراتکی ءُ روکپتی بلوچستان ءَ بھر کنوکیں لکیر ءِ دے دیم ءُ آ دیم ءَ نندوکیں گیشتریں زرکاری سیمسر ءَ تیل ءِ باپاری اِنت کہ چرے باپاری ءَ زور ءَ مھلوک وتی گزران ءَ کنگ ءَ اِنت-

ھمے وڑ ءَ گوستگیں روچاں رودراتکی بلوچستان ءِ سیمسری ھند زامران ءَ ھم پاکستانی پوج ءَ یک ورنایے ملام ءِ نہ دیگ ءِ سر ءَ لٹ ءُ کٹ کتگ ات کہ آ باز ٹپیگیں رنگے ءَ تامر بندے ءَ وتی گون ءَ بیوکیں زوراکیاں درشان کنگ ءَ اَت-