مشکت: نمیرانیں حمید بلوچ ءِ چکانی مات ماں عمان ءَ بیران بوتگ

بلوچستان ءِ نمیرانیں رھشون حمید بلوچ ءِ چکانی مات سنجی بلوچ مروچی پنچ شمبے ءِ روچ ءَ ماں سلطنت عمان ءِ شھر بریمی ءَ بیران بوتگ – آ ھمود ءَ بریمی ءَ کل ءُ کسارت کنگ بیت اِنت –

زانگ بہ بیت حمید بلوچ بلوچستان ءِ راجداری ءُ پگری زرمبشت ءَ گوں سیادی ءِ یک پھتویں رھشونے ءِ نام ءَ زانگ بیت –

آ ضیاءالحق ءِ پوجی سرکار ءِ وھد ءَ سال 1979 ءَ ماں تربت ءَ دزگیر کنگ بوتگ ءُ دو سالاں تاں بندیگ کنگ ءَ پد سال1981 ءَ پاھو دیگ بوتگ –

سرکار نیمگ ءَ ھمے گوشگ بیت کہ حمید بلوچ ھمے واست ءَ پاھو دیگ بوتگ کہ آئی ءَ یک انگریز پوجی کارمند ءِ کُشتگ بلے بلوچستان ءِ راجکاریں مردمانی گوشگ انت کہ آ ھمے ھاتر ءَ پاھو دیگ بوتگ کہ آئی ءَ راجدوستی ءِ وتی ھیال درشان اِتگ –

نمیرانیں حمید بلوچ راجکاری ءِ زند ءِ بندات چہ بلوچ نودربر گل ءَ بوتگ ءُ آ وتی نمیرانی ءَ تاں یک پھتویں رھشونے ءِ نام ءَ زانگ بیت –

حمید بلوچ ءِ نمیرانی ءَ پد آئی ءِ لوگبانک ءَ وتی شرمچیں زھگ بانڑی ءِ ھاتر ءَ وتی زند وقف کُتگ ءُ سلطنت عمان ءَ شُتگ ءُ نشتگ – نمیرانیں ھمید بلوچ ءَ زندانی ءِ میان ءَ وتی شیرمچیں زھگ بانڑی ءِ نام ءَ پیام ءِ دیم داتگ – آ پیام ءَ پد ءَ رند ءَ بلوچستان ءِ راجدوستیں راجکاری زرمبشت ءِ تہ ءَ یک نظریاتی لٹریچر ءِ جاہ گپتگ کہ آئی ءَروچ مروچی راجدوستیں راجداریں باسک وان انت ءُ وتی نزریاتی لٹریچر ءِ بھر بوگ ءَ پھر بند انت –