ھاش: سلاہ بندانی دست ءَ ایرانی اطلاعات ءِ دو آپیسرانی لوگی بندیگ

گوستگیں شپ ءَ سلاہ بندانی لوگ ءَ ایرانی چیریں ادارہ اطلاعات ءَ بیڑ برتگ ءُ اود ءَ جنگ ءُ چوپ ءَ دو کارندھ بیران کہ ایشانی توک ءَ یک آپیسرے ھوار اِنت-

روکپتی بلوچستان ءِ دمگ ھاش ءَ گوستگیں شپ ءَ ایرانی اطلاعات ءَ یک مردمے ءِ دزگیر کنگ ءَ یک لوگے ءَ بیڑ برتگ ءُ اود ءَ تیرگواری ءَ آپیسرے ءَ ھوار دو کارندہ بیران –

گیشیں اھوالانی رد ءَ گوستگیں روچ ءَ بھمن ناروئی نامین مردمے ءَ وتی گوھار ءُ برات ءِ بندیگی ءِ مٹ ءَ ایرانی چیریں ادارھانی دو آپیسرانی لوگی آوار جتگ ءُ برتگ اَنت –

بھمن ناروی ءَ گوشگ بیتگ کہ آ بئیت اِنت سرکار ءِ دیم ءَ وتی سر ءَ جھل بہ کنت ءُ وت ءَ سرکار ءِ دست ءَ بہ دنت ءُ چریشی ءِ پژدر ءَ آئی ءِ برات ءُ گوھار بندیگ کنگ بیتگ اَنت –

ھالانی رد ءَ گوشگ بیتگ بھمن ناروئی ءِ گوھار صابیہ ناروئی ءُ عبدالمالک ناروئی کہ یار مھمد ءِ زھگ اَنت ماں زاھدان ءَ آوار جنگ ءُ بندیگ کنگ بیتگ اَنت-

چریشی ءِ پژدر ءَ بھمن ناروئی کڈن کنگ بیتگ آ وتی سلاھان چگل بہ دنت ءُ سرکار ءِ دیم ءَ بئیت اِنت بلے بھمن ناروئی ءَ وتی برات ءُ گوھار ءِ مٹ ءَ اطلاعات ءِ دو آپیسرانی لوگی آوار جتگ ءُ بندیگ کتگ اَنت –

ھالانی رد ءَ گوشگ بیتگ کہ اطلاعات ءِ آپیسرانی لوگیانی آجو کنگ ءِ ھاتر ءَ گوستگیں شپ ءَ پولیس ءُ چیریں ادارھاں ماں ھاش ءَ بھمن ناروئی ءِ گِس ءَ بیڑ برتگ ءُ ھردوکیں نیمگاں تیرگواری بندات بیتگ کہ چریشی ءَ آپیسرے ءَ ھوار دو کارندھانی مرگ ءِ ھال دیم ءَ اتکگ بیتگ اَنت ءُ داں انگت ءَ بھمن ناروئی ءَ آیانی لوگی آجو نہ کتگ اَنت-

کُشگ بیتگیں آپیسر ءِ پجار ھاش ءُ سراوان ءِ پولیس ءِ مستر یاسر عبدلی ءِ نام ءَ زانگ بیتگ –