روکپتی بلوچستان ءِ بنجاھی شھر زاھدان ءَ آدینگ ءِ نماز ءَ پد ھمک آدینگانی رنگ ءَ زھرشانی کنگ بیتگ-
زھرشانی مکی مسیت ءَ روانک ءِ دروشم ءَ دراتکگ ءُ شھر ءِ جتا جتائیں دمکاں تران بوتگ ءُ زھرشانی کنوکاں بیگواھیانی ھلاپ ءَ اوگام جتگ ءُ بینر چست کتگ بیتگ اَنت-
زھرشانی روانک ءَ بازیں کچے ءَ مردماں بھر زرتگ ءُ بندیگیں مردمانی یل کنگ ءِ لوٹ ءُ زاھدان ءَ گوستگیں سال ءَ کُشگ بیتگیں مردمانی کھولانی انساپ دیگ ءِ لوٹ کتگ –
ھمے وڑ ءَ مکی مسیت ءِ پیش امام مولانا عبدالحمید اسمائیل زئی ءَ حطبہ ءِ وھد ءَ تران ءَ کنان ءَ گوشت ’ اے ڈیھ ءَ لائکیں کار زانت ءُ اگدہ دار پکار اِنت ‘-
آئی ءَ گوشت ’ اے وھد ءَ ما گندگ ءَ یں اے نالائکین دیندار مشکلاں گیش ءُ گیوار کت کنگ ءَ نہ اَنت چریشی ءَ ڈیھ ءِ مردم گپچل ءُ جنجالاں پرینگ بیتگ اَنت-
ھمے وڑ ءَ روکپتی بلوچستان ءِ دمگ ھاش ءَ ھم سر ءُ مانسرانی گر ءُ دار کنگ ءِ ھاتر ءَ دگانی سر ءَ بازیں ھسابے ءَ لشکر گندگ بوتگ اَنت-