سوراب ءُ مستونگ ءَ پاکستانی پوج ءِ سر ءَ بیتگیں اُرشانی زمہ واری بی ایل اے ءَ منّ اِتگ اَنت

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں سوراب ءُ مستونگ ءَ دو جتائیں اُرشاں زورگریں پوج ءِ چوکی نشانگ کتگ اَنت کہ یک کارندھے مرتگ ءُ سے ٹپی بیتگ اَنت-

جارکش ءَ گْوشتگ کہ گوستگیں شپ ءَ سوراب ءَ گدر ءِ دمگ تیغک ءَ زورگریں پاکستانی پوج ءِ یک چوکی ءِ دستی ءَ بمب گوں نشانگ کتگ، تراک ءِ آسر ءَ سے دُژمنیں کارندہ ٹپی بیتگ اَنت-

آئی ءَ دیمتر ءَ گْوشتگ کہ دگہ یک اُرشے بی ایل اے ءِ سرمچاراں 27 اپریل 2023 ءِ مستونگ ءِ دمگ تلخہ کاوی ءَ زورگریں پاکستانی پوج ءِ یک چوکی ءِ نشانگ کتگ، اسنائپر ُاُرش ءَ پوسٹ ساڑی ئیں کارندہ ءِ کُشگ ءَ پد سرمچاراں دگہ سلاھاں چہ دُژمنیں پوسٹ نشانگ کتگ-

جیئند بلوچ ءَ گْوشتگ کہ پانزدہ ملٹ ءَ تاں برجاھیں اُرش ءَ دُژمن ءَ گیش جانی ءُ مالی تاوان دیمپان کنگ کپتگ-

گُڈی ءَ جارکش ءَ گْوشتگ کہ بلوچ لبریشن آرمی اے دوئیں اُرشانی زمہ واری ءَ منّ اِیت- زورگریں پوج ءِ سرجمی ءَ دراھگ ءَ تاں مئے اُرش برجاہ بنت-